7. ARTIKJEL FA DAUT STUDIUM
De Eltestasch äare Veauntwuatunk en de Vesaumlunk
“Christus [steit] äwa siene Jemeent . . ., fa dee hee sikj selfst hanjeef äa Heilant to sennen” (EFS. 5:23)
LEET 137 Onse Sestren – true Frues
WAUT WIE SEENEN WOARENa
1. Wuarom es Jehova sien Volkj veeent?
WIE sent schaftich, daut wie to Gott sien Volkj jehieren kjennen. Wuarom hab wie Fräd un sent veeent? Eent es, wiels wie aula ons bastet doonen deejanje to respakjten, waut Jehova äwa ons aunjestalt haft. Un je bäta wie vestonen, woo Jehova daut mank siene Deena enjerecht haft, je mea Eenichkjeit woa wie haben.
2. Waut fa Froagen woa wie en disen Artikjel beauntwuaten?
2 En disen Artikjel woa wie seenen, wäa äwa de Vesaumlunk aunjestalt es. Wie woaren biejlikj de Froagen beauntwuaten: Waut haben de Sestren doa fa Oppgowen? Es daut werkjlich soo, daut jieda Brooda daut Haupt äwa jieda Sesta es? Haben de Eltestasch deeselwje Veauntwuatunk fa de Breeda un Sestren aus daut Haupt von de Famielje fa siene Fru un Kjinja? Daut ieeschte well wie seenen, woo wie äwa de Sestren denkjen sellen.
WOO SELL WIE ÄWA DE SESTREN DENKJEN?
3. Waut woat ons halpen, daut wie daut noch mea räakjnen, waut onse Sestren doonen?
3 Wie räakjnen onse Sestren väl. Dee strenjen sikj sea aun, om fa äare Famielje to sorjen, de goode Norecht to prädjen un aundre von de Vesaumlunk to halpen. Wie woaren dee noch mea räakjnen, wan wie ons unjastonen, woo Jehova un Jesus äwa dee denkjen. Un wie kjennen uk väl doavon lieren, woo de Apostel Paulus met Frues omjinkj.
4. Woo wiest de Schreft, daut Jehova de Frues krakjt soo väl räakjent aus de Mana?
4 De Schreft wiest, daut Jehova de Frues krakjt soo väl räakjent aus de Mana. Dee sajcht biejlikj, daut Jehova en de Aposteltiet de Frues un uk de Mana dän heiljen Jeist jeef, un dee kunnen uk Wunda doonen, biejlikj opp veschiedne Sproaken räden (Apj. 2:1-4, 15-18). Un Frues un Mana sent met dän heiljen Jeist jesaulft worden, daut dee noch mol kjennen met Jesus toop em Himmel rejieren (Gal. 3:26-29). De Frues woaren krakjt soo goot kjennen fa emma oppe Ieed läwen aus de Mana (Opb. 7:9-10, 13-15). Un Frues un Mana haben de Oppgow jekjräajen, de goode Norecht bekaunttomoaken un aundre to lieren (Mat. 28:19-20). Daut es aun daut to seenen, waut wie en de Aposteljeschicht äwa Priszilla läsen kjennen. See holp äaren Maun Aquilla, dän huach utjelieeden Apollos de Schreft bäta uttolajen (Apj. 18:24-26).
5. Woo wiest Lukas 10:38-39, 42, daut Jesus de Frues respakjten deed?
5 Jesus deed Frues ieren un respakjten. Hee wia gaunz aundasch aus de Farisäa. Dee talden de Frues fa läaja un deeden kjeenmol ver aundre met dee räden, un besonda nich äwa de Schreft. Oba Jesus räd met Frues äwa wichtje Lieren ut de Schreft, krakjt soo aus met siene aundre Jinja (läs Lukas 10:38-39, 42).b Hee neem uk Frues met opp siene Prädichtreisen (Luk. 8:1-3). Un no sien oppstonen vom Doot jeef Jesus waut Frues de Iea, daut see siene Apostel daut sajen kunnen (Joh. 20:16-18).
6. Aun waut wia daut to seenen, daut de Apostel Paulus de Frues respakjten deed?
6 De Apostel Paulus säd to Timotäus, daut dee de Frues ieren sull. Dee sull de elre Frues soo behaundlen “aus Mitta” un de “jinjre Frues aus Sestren” (1. Tim. 5:1-2). Paulus haud Timotäus jeholpen een stoakja Christ to woaren. Oba hee säd uk, daut Timotäus siene Mame un siene Groosmame dän daut ieeschte von “de Heilje Schreft” jelieet hauden (2. Tim. 1:5; 3:14-15). Un Paulus bestald en sienen Breef aun de Reema miere Sestren to jreessen. Hee haud em Denkj jehoolen, waut dise Sestren jedonen hauden, un wia uk dankboa doafäa (Reem. 16:1-4, 6, 12; Filip. 4:3).
7. Waut woa wie nu derchnämen?
7 Soo aus wie bat nu jeseenen haben, sajcht de Schreft nich, daut de Sestren weinja wieet sent aus de Breeda. Onse leeftolje un friejäwaje Sestren sent väl wieet, un de Eltestasch freien sikj, wan dee methalpen, daut doa Fräd un Eenichkjeit en de Vesaumlunk es. Nu woa wie mol eenje Froagen derchnämen, biejlikj: Wuarom velangt Jehova daut, daut eene Sesta sikj eenjemol dän Kopp bedakjen saul? Es jieda Brooda daut Haupt äwa jieda Sesta von de Vesaumlunk, wiels je bloos de Breeda Eltestasch un Deenstaumthelpa sennen kjennen?
ES JIEDA BROODA DAUT HAUPT VON JIEDA SESTA?
8. Bediet Efeesa 5:23, daut jieda Brooda daut Haupt von jieda Sesta es? Laj daut ut.
8 Nä, een Brooda es nich daut Haupt von aule Sestren en de Vesaumlunk. Daut es Christus (läs Efeesa 5:23). De Ehemaun es daut Haupt äwa siene Fru, oba wan dee eenen jedeepten Jung haben, dan es dee nich daut Haupt von siene Mutta (Efs. 6:1-2). Un de Eltestasch en de Vesaumlunk sent bloos en jewesse Stekjen äwa de Breeda un Sestren aunjestalt (1. Tess. 5:12; Heb. 13:17). Eene onbefriede Sesta, waut nich mea tus wont, woat äare Elren un uk de Eltestasch respakjten. Oba krakjt soo aus bie de Breeda es bloos Jesus dee äa Haupt.
De Onbefriede, waut nich mea tus wonen, haben Jesus aus Haupt äwa sikj (See Varsch 8)
9. Wuarom sellen de Sestren sikj eenjemol dän Kopp bedakjen?
9 Jehova haft de Mana äwa de Vesaumlunk aunjestalt un nich de Frues (1. Tim. 2:12). Un hee haft Jesus aus Haupt äwa de Mana aunjestalt. Daut aules halpt met, daut doa Ordnunk mank siene Deena es. Wan eene Sesta mol waut doonen mott, waut jeweenlich een Brooda doonen wudd, dan well Jehova haben, daut see sikj dän Kopp bedakjen saul (1. Kor. 11:4-7).c Daut bediet nich, daut de Sestren weinja wieet sent. Dee kjennen doaderch bewiesen, daut see daut respakjten, woo Jehova daut en de Famielje un en de Vesaumlunk enjerecht haft. Nu woa wie von de Froag räden: Waut fa eene Veauntwuatunk haben daut Haupt von de Famielje un de Eltestasch?
DE OPPGOWEN VON DAUT FAMIELJENHAUPT UN VON DE ELTESTASCH
10. Wuarom well een Eltesta veleicht Räajlen moaken fa de Vesaumlunk?
10 De Eltestasch sent Jesus goot un uk de “Schop”, wua Jehova un Jesus an äwa aunjestalt haben (Joh. 21:15-17). Een Eltesta denkjt veleicht utem gooden Senn, daut hee soo aus een Voda fa de Vesaumlunk es. Veleicht well dee Räajlen moaken, om Gott siene Schop to beschitzen, krakjt soo aus een Famieljenhaupt Räajlen moaken kaun, om siene Famielje to beschitzen. Un eenje Breeda un Sestren froagen de Eltestasch veleicht mau rajcht doano, aus dee fa an entscheiden kjennen. Oba haben de Eltestasch von de Vesaumlunk deeselwje Veauntwuatunk aus daut Haupt von de Famielje?
De Eltestasch seenen doano, daut de Vesaumlunk em Gloowen stoakj blift un daut aule sikj doa woolfeelen. Jehova haft dee uk de Oppgow jejäft de Vesaumlunk reintohoolen (See Varsch 11-12)
11. En waut sent de Oppgowen von daut Famieljenhaupt un de Eltestasch äwareen?
11 De Apostel Paulus jeef auntovestonen, daut daut Haupt von de Famielje un de Eltestasch jewesset äwareen hauden (1. Tim. 3:4-5). Jehova well biejlikj, daut de Famielje daut Haupt jehuarsom es (Kol. 3:20). Un hee well, daut de Vesaumlunk de Eltestasch jehorcht. Jehova well uk, daut daut Haupt von de Famielje un de Eltestasch doano seenen, daut deejanje, wua see äwa aunjestalt sent, em Gloowen stoakj bliewen un sikj woolfeelen. Un krakjt soo aus daut Haupt von de Famielje sellen de Eltestasch uk doano seenen, daut deejanje, wua see äwa aunjestalt sent, en schwoare Tieden Help kjrieen (Jak. 2:15-17). Jehova well uk, daut de Eltestasch un daut Haupt von de Famielje fa siene Jebooten enstonen un daut dee nich “wieda gonen . . . aus jeschräwen steit” (1. Kor. 4:6).
Daut Famieljenhaupt es von Jehova enjesat un saul de Famielje veroppgonen. Een leeftoljet Famieljenhaupt woat met siene Fru doaräwa räden, ea hee waut entscheiden deit (See Varsch 13)
12-13. Waut es bie de Eltestasch un bie daut Haupt von de Famielje nich äwareen, soo aus Spricha 6:20 wiest?
12 Oba daut jeft uk väl, waut bie de Eltestasch un bie daut Haupt von de Famielje nich äwareen es. Jehova haft de Eltestasch biejlikj de Oppgow jejäft to rechten un dee kjennen soone ut de Vesaumlunk utschluten, waut sindjen un nich omkjieren (1. Kor. 5:11-13).
13 Oba Jehova haft daut Haupt von de Famielje jewesse Oppgowen jejäft, waut de Eltestasch nich haben. Daut Haupt von de Famielje haft biejlikj daut Rajcht, fa siene Famielje Räajlen opptostalen un doano to seenen, daut dee sikj uk doaraun hoolen (läs Spricha 6:20). Biejlikj kaun daut Haupt von de Famielje sajen, wanea de Kjinja zeowes sellen tus sennen. Un dee haft uk daut Rajcht, de Kjinja to bestrofen, wan dee nich jehuarsom sent (Efs. 6:1). Oba een leeftoljet Famieljenhaupt woat met siene Fru doaräwa räden, ea dee Räajlen moakt, wiels dee beid je “een Fleesch” sent (Mat. 19:6).d
CHRISTUS AUS HAUPT VON DE VESAUMLUNK RESPAKJTEN
Jesus es Jehova unjadon un es äwa de Christenvesaumlunk aunjestalt (See Varsch 14)
14. (a) Wuarom es daut no Markus 10:45 no paussent, daut Jehova Jesus aus Haupt äwa de Vesaumlunk aunjestalt haft? (b) Waut es dän Väastaunt siene Oppgow? (See dän Kausten “Waut de Väastaunt deit”.)
14 Derch daut Leesjelt haft Jehova doafäa betolt, daut jieda eena von de Vesaumlunk un uk aundre, waut aun Jesus jleewen, daut eewje Läwen kjrieen kjennen (läs Markus 10:45; Apj. 20:28; 1. Kor. 15:21-22). Wiels Jesus sien Läwen aus Leesjelt jeef, es daut paussent, daut hee daut Haupt von de Vesaumlunk es. Doawäajen haft Jesus daut Rajcht, fa jieda eenselnen Räajlen to moaken un uk fa de Famieljes un fa de gaunze Vesaumlunk. Un hee kaun uk doano seenen, daut aule sikj doaraun hoolen (Gal. 6:2). Oba daut es nich aules, waut Jesus fa ons deit. Hee leeft ons un es om jiedrem eenen von ons bekjemmat (Efs. 5:29).
15-16. Waut lia wie von daut, waut Marley un Benjamin sajen?
15 Woo kjennen Sestren wiesen, daut see Christus respakjten? Wan see no dee Mana horchen, waut Christus äwa an aunjestalt haft. Väl Sestren denkjen krakjt soo aus Marley, waut en de Stäts wont. See sajcht: “Ekj räakjen daut väl, waut ekj aus Ehefru un Sesta fa de Vesaumlunk doonen kaun. Oba ekj mott emma doaraun schaufen, rajcht doaräwa to denkjen, woo Jehova daut en de Famielje un en de Vesaumlunk enjerecht haft. Mien Maun un de Breeda von de Vesaumlunk halpen mie sea, wiels dee mie respakjten un mie wiesen, daut see fa daut dankboa sent, waut ekj doo.”
16 De Breeda, waut vestonen, woo Jehova daut en de Famielje un en de Vesaumlunk enjerecht haft, doonen de Sestren respakjten un ieren. Benjamin, een Brooda, waut en Enjlaunt wont, sajcht: “Ekj hab väl jelieet von de Sestren äare Auntwuaten en de Vesaumlunk un dee haben mie uk jesajcht, woo ekj studieren kaun un mie em Deenst vebätren. Ekj denkj, daut dee eene sea wieetvolle Oabeit doonen.”
17. Wuarom sell wie ons aun Jehova siene Ordnunk hoolen?
17 Wan jieda Maun, Fru, Famieljenhaupt un Eltesta von de Vesaumlunk sikj aun Jehova siene Ordnunk helt, dan woat doa Fräd sennen. Un daut wichtichste es, daut wie doaderch onsen leeftoljen himlischen Voda lowen kjennen (Psa. 150:6).
LEET 123 Ons tru aun Gott siene Ordnunk hoolen
a Waut haben de Sestren fa Oppgowen en de Vesaumlunk? Es jieda Brooda daut Haupt äwa jieda Sesta? Haft een Eltesta deeselwje Veauntwuatunk aus daut Haupt von de Famielje? En disen Artikjel woa wie seenen, waut Gott sien Wuat doatoo sajcht.
b See Varsch 6 von dän Artikjel “De Sestren von de Vesaumlunk unjastetten” em Woaktorm von Septamba 2020.
c See dän Kausten “Wanea saul eene Sesta sikj dän Kopp bedakjen?”
d En Varsch 17-19 von dän Artikjel “De aundre von de Vesaumlunk respakjten” em Woaktorm von August 2020 jeit mea doaräwa notoläsen, wäa daut entscheiden saul, to waut vonne Vesaumlunk eene Famielje jehieren saul.
e En daut Buak “Blieft en Gott siene Leew”, S. 209-212 jeit noch mea doaräwa notoläsen.
f En dän Wachtturm vom 15. Juli 2013, S. 20-25 woat noch mea von dän Väastaunt utjelajcht.