Du kaust daut volbrinjen, waut du die em jeisteljen väanemst

1. Woo haft ons daut meist aula mol jegonen?

HAST du die mol em jeisteljen waut väajenomen un daut oba meist nich volbrinjen kunt?b Wan jo, dan best du nich de eensja. Philip biejlikj wull foakna bäden un wull uk, daut siene Jebäda mea enhilden, oba hee kjrieech meist nich de Tiet doatoo. Erika haud sikj väajenomen, bie de Toopkomes fa dän Prädichtdeenst enne Tiet to sennen, oba see wia dan noch meist emma too lot. Tomáš proowd miere Mol, de Schreft gaunz derchtoläsen. Hee sajcht: “Mie jinkj daut eefach nich scheen, de Bibel to läsen. Ekj proowd daut dree Mol, oba jiedat Mol kjeem ekj bloos bat 3. Mose un dan jeef ekj opp.”

2. Wuarom sell wie nich mootloos woaren, wan wie ons waut väajenomen haben un daut oba meist nich volbrinjen kjennen?

² Wan du die waut väajenomen hast un daut oba noch nich volbrocht hast, dan denkj nich, daut du to nuscht to brucken best. Mau rajcht wan daut waut eefachet es, mott eena sikj aunstrenjen un daut brukt uk Tiet. Daut die daut noch jankat, daut to volbrinjen, wiest, daut du daut väl räakjenst, Frint met Jehova to sennen un daut du dien bastet doonen west. Jehova räakjent daut väl, waut du deist. Wie weeten uk, daut hee kjeen Mol mea von ons velangt, aus wie doonen kjennen (Psa. 103:14; Micha 6:8). Soo, wan du die waut väanemst, dan saul daut waut sennen, waut du doonen kaust. Oba waut kaun die halpen, daut to volbrinjen? Well mie mol eenjet seenen.

EENA MOTT DAUT OPP IERNST WELLEN

3. Wuarom es daut wichtich, daut du daut opp iernst volbrinjen west, waut du die väanemst?

³ Wan wie ons em jeisteljen waut väanämen, es daut wichtich, daut ons daut opp iernst jankat, wäajen dan schauf wie jieren doaropp. Wie kjennen daut vejlikjen met dän Wint, waut een Schepp drift. Wan de Wint fein pust, dan woat de Scheppmaun doahan komen, wua hee han well. Un wan de Wint sea pust, dan kaun daut Schepp mau rajcht ea bat doa sennen. Een bät soo es daut met ons: Je dolla ons daut jankat, je leichta woa wie daut volbrinjen. David, een Brooda von El Salvador, sajcht: “Wan die daut opp iernst jankat, dan strenjst du die noch dolla aun.” Un dan säd hee noch: “Du sitst doano, daut die nuscht doavon aufhelt, daut to doonen, waut du die väajenomen hast.” Soo, waut kaun die halpen, daut die daut noch dolla jankat?

4. Om waut kjenn wie bäden? (Filippa 2:13). (See uk daut Bilt.)

⁴ Bäd doarom, daut die daut dolla jankat. Jehova kaun die derch sienen Jeist dän Wellen jäwen, daut to doonen, waut du die väajenomen hast (läs Filippa 2:13). Bieaun näm wie ons waut väa, bloos wiels wie weeten, daut wie daut doonen sellen, un doa es uk nuscht met orrajcht. Oba veleicht jankat ons daut dan nich soo rajcht. Soo jinkj eene Sesta von Uganda daut, waut Norina heet. See haud sikj daut väajenomen, een Bibelstudium auntofangen, wan ar daut uk nich soo rajcht jankad, wiels see docht, see wia nich een feina Liera. Waut holp ar? See sajcht: “Ekj funk aun, Jehova jieda Dach doano to froagen, daut hee mie dän Wensch jeef, een Bibelstudium to haben. Un ekj schauft uk doaropp, een bätra Liera to woaren. Een poa Moonat lota wort ekj en, daut mie daut aul dolla jankad. Daut Joa noch kunn ekj twee Bibelstudiums aunfangen.”

5. Äwa waut kjenn wie nodenkjen, daut ons daut dolla jankat, waut to doonen?

⁵ Denkj doaräwa no, waut Jehova fa die aules jedonen haft (Psa. 143:5). De Apostel Paulus docht doaräwa no, woo goot Jehova to am jewast wia, un daut brocht am bat doa, daut hee dän Wensch haud, sea fa Jehova to schaufen (1. Kor. 15:9-10; 1. Tim. 1:12-14). Krakjt soo es daut uk bie ons: Je dolla wie doaräwa nodenkjen, waut Jehova fa ons aules jedonen haft, je ea kjenn wie ons em Jia moaken toom daut doonen, waut wie ons väajenomen haben (Psa. 116:12). Waut holp eene Sesta von Honduras, met dän Pioniadeenst auntofangen? See sajcht: “Ekj docht doaräwa no, woo sea Jehova mie leeft. Hee holp mie, sien Volkj to finjen. Hee jeft väl om mie rom un beschizt mie. Wiels ekj doaräwa nodocht, wort miene Leew fa am jrata un dan jankad mie daut uk, doaropp to schaufen, Pionia to woaren.”

6. Waut kaun ons noch halpen, daut ons daut dolla jankat, waut to volbrinjen?

⁶ Denkj aun dän Nutzen, waut du hast. Erika, von dee wie ea aul jerät haben, haud sikj daut väajenomen, emma enne Tiet to sennen. See vetalt, waut ar holp: “Ekj kunn seenen, woo väl ekj mie derchgonen leet, wiels ekj emma lot fa dän Prädichtdeenst wia. Oba wan ekj wudd enne Tiet sennen, dan wudd ekj kjennen de Breeda un Sestren bejreessen un met dee vetalen. Ekj wudd uk kjennen no gooden Rot horchen, waut mie wudd halpen, daut mien Deenst mea enhilt un mie mea Freid jeef.” Erika docht doaräwa no, woo ar daut wudd togood komen, wan see daut deed, waut see sikj väajenomen haud. Daut kaust du uk doonen. Wan du die biejlikj soont väajenomen hast, waut met Bibelläsen ooda bäden to doonen haft, dan denkj doaräwa no, woo die daut Jehova noch noda brinjen kaun (Psa. 145:18-19). Wan du aun eene Ieejenschoft schaufen deist, denkj doaraun, daut du met aundre dan väl bäta woascht delenjd komen (Kol. 3:14). Schriew die de Jrind opp, wuarom du waut volbrinjen west, un läs die daut foaken derch. Tomáš, von dän wie ea aul jerät haben, sajcht: “Wan eena väl Jrind haft, waut to volbrinjen, dan strenjt eena sikj dolla aun, daut to doonen.”

7. Waut holp Julio un siene Fru, daut to doonen, waut dee sikj väajenomen hauden?

⁷ Sie met soone toop, dee die Moot toospräakjen woaren (Spr. 13:20). Julio un siene Fru hauden sikj väajenomen, mea em Deenst to doonen. Dit es, waut an holp: “Wie sochten ons soone Frind, dee ons Moot muaken, daut to doonen, waut wie ons väajenomen hauden. Wie räden met dee foaken doaräwa. Väle von dee hauden sikj selfst soont väajenomen un daut aul jedonen. Doawäajen kunnen dee ons gooden Rot jäwen. Onse Frind fruagen ons bieaun, woo daut met onse Plons wiedakjeem, un dee deeden ons uk Moot toospräakjen, wan ons daut fäld.”

WAN ONS DAUT BLOOS NICH JANKAT

8. Waut kunn passieren, wan wie mau dan aun waut schaufen, wan ons daut jankat? (See uk daut Bilt.)

⁸ Oba wie haben aula soone Doag, wua ons daut bloos nich jankat, waut to doonen. Meent daut dan nu, daut wie nich kjennen aun daut schaufen, waut wie ons väajenomen haben? Nä. Well wie daut mol vejlikjen: De Wint es eene stoakje Krauft, waut een Schepp bat doa brinjen kaun, wua daut han saul. Oba dee pust nich emma jlikjen stoakj, un eenje Doag es daut gaunz wintstell. Meent daut dan nu, daut de Scheppmaun nich wiedareisen kaun? Nich onbedinjt. Eenje Schäp biejlikj haben eenen Moota un eenje haben Roodlen met. De Scheppmaun kaun dise Dinja to Help nämen, om wieda to reisen. Bie ons kaun daut krakjt soo sennen. Eenje Doag jankat ons daut sea, waut to doonen, aundre Doag nich gaunz soo sea. Wan wie bloos dan aun daut schaufen wudden, waut wie ons väajenomen haben, wan ons daut jankat, dan woa wie daut veleicht kjeen Mol volbrinjen kjennen. De Scheppmaun nemt aundret to Help, om wiedatokomen, wan daut wintstell es. Krakjt soo mott wie uk proowen, ons opp eene aundre Wajch bat doa to brinjen, wiedatomoaken, wan ons daut bieaun uk nich jankat. Doatoo brukt daut Selfstbeharschunk, oba daut woat sikj goot loonen. Ea wie mea doavon räden, well wie ieescht eene Froag beauntwuaten, waut doa oppkomen kunn.

9. Es daut orrajcht, daut wie wieda aun waut schaufen, wan wie uk nich dän Wensch haben, daut to doonen? Laj daut ut.

⁹ Jehova well, daut wie am wellich deenen un daut ons daut scheen jeit (Psa. 100:2; 2. Kor. 9:7). Sell wie aulsoo wieda aun waut schaufen, waut wie ons em jeisteljen väajenomen haben, wan ons doa uk nich no es? Denkj aun dän Apostel Paulus sien Biespel. Hee säd: “Ekj bedwinj mienen Kjarpa, daut dee mie jehorcht” (1. Kor. 9:25-27, Erkjläarunk toom studieren von Varsch 27 en de Studiabibel nwtsty). Paulus deed sikj selfst bemotten, daut rajchte to doonen, wan am doa veleicht uk nich no wia. Wia Jehova met Paulus sienen Deenst tofräd? Secha! Un Jehova beloond am uk, wiels hee sikj aunstrenjen deed (2. Tim. 4:7-8).

10. Woo kjemt ons daut togood, wan wie wieda aun waut schaufen, wan ons daut uk nich jankat?

¹⁰ Krakjt soo jefelt Jehova daut, wan hee sitt, daut wie wieda aun waut schaufen, wan wie uk nich dän Wensch doatoo haben. Hee weet: Wan wie de Sach uk nich jleichen to doonen, doo wie daut oba doawäajen ut Leew fa am. Krakjt soo aus Jehova Paulus säajnen deed, woat hee ons uk fa onse Aunstrenjungen säajnen (Psa. 126:5). Un wan wie seenen, woo Jehova ons säajent, kaun daut mau rajcht sennen, daut ons daut aunfangt scheen to gonen. Eene Sesta von Poolen, dee Lucyna heet, sajcht: “Eenje Mol well ekj nich em Prädichtdeenst gonen, besonda wan ekj meed sie. Oba de Freid, dee ekj derchem Prädichtdeenst kjrie, es een besondret Jeschenkj.” Well wie mol seenen, waut wie doonen kjennen, wan ons daut bloos nich jankat, waut to doonen.

11. Woo kaun Jehova ons halpen, mea Selfstbeharschunk to haben?

¹¹ Bäd om Selfstbeharschunk. Selfstbeharschunk meent, daut eena siene Jefeelen unja Kontroll haft un uk daut, waut eena deit. Daut woat foaken jebrukt toom sajen, daut eena sikj trigjhoolen saul, waut orrajchtet to doonen. Oba Selfstbeharschunk es uk needich, om daut rajchte to doonen, besonda, wan daut nich waut eefachet es ooda soont, waut eenem nich jankat. Denkj doaraun, Selfstbeharschunk es Poat von de Frucht von dän Jeist. Doawäajen kaust du Jehova doano froagen, daut hee die met sienen Jeist halpt, aun dise wichtje Ieejenschoft to schaufen (Luk. 11:13; Gal. 5:22-23). David, von dän wie ea aul räden, sajcht, woo daut Jebäd am holp. Hee neem sikj väa, pinkjelja to studieren. Hee sajcht: “Ekj fruach Jehova no Selfstbeharschunk. Met siene Help kunn ekj mie daut soo enrechten, daut ekj pinkjelja studieren deed un doabie bleef.”

12. Woo kaun de Gruntsauz von Liera 11:4 ons halpen, daut to volbrinjen, waut wie ons em jeisteljen väajenomen haben?

¹² Wacht nich, bat du de jewenschte Omstend hast. En dise Welt woa wie kjeen Mol de jewenschte Omstend haben. Wan wie doano luaren, woa wie nienich waut volbrinjen (läs Liera 11:4). Een Brooda, waut Dayniel heet, sajcht: “De jewenschte Omstend jeft daut nich. Doawäajen sell wie nich wachten, oba bloos doamet aunfangen.” Een Brooda von Uganda, waut Paul heet, rät von noch eene Uasoak, wuarom wie nich sellen Sachen oppschuwen. Hee sajcht: “Eenen Aunfank to moaken, wan wie uk nich de baste Omstend haben, jeft Jehova waut, waut hee säajnen kaun” (Mal. 3:10).

13. Wuarom es daut goot, daut wie ons nich too väl väanämen?

¹³ Fang met waut leichtet aun. Veleicht jankat ons daut nich, waut to doonen, waut meist ommäajlich lat. Wan daut bie die soo es, wurscht du die daut kjennen en kjlandre Bieta endeelen? Wan du biejlikj aun eene Ieejenschoft schaufen deist, wurscht du dee opp verieescht kjennen met eefache Sachen bewiesen? Wan du de gaunze Bibel derchläsen west, dan kaust du veleicht ieescht mol jieda Dach bloos fa eene korte Tiet läsen. Tomáš, von dän wie aum Aunfank räden deeden, haud sikj daut väajenomen, en een Joa de Schreft gaunz derchtoläsen, oba hee kunn daut nich volbrinjen. Hee sajcht: “Ekj wort en, ekj haud mie too väl väajenomen. Doawäajen wort ekj mie eenich, daut noch een Mol to proowen. Oba dit Mol neem ekj mie väa, mau een poa Varzhen dän Dach to läsen un doaräwa notodenkjen. Dan funk mie daut aun, scheen to gonen, de Bibel to läsen.” Je scheena Tomáš’ daut jinkj, je mea läsd hee opp een Mol. Met de Tiet kunn hee de Schreft gaunz derchläsen.c

WOA NICH MOOTLOOS, WAN DOA WAUT MANKKJEMT

14. Waut kaun doa mankkomen?

¹⁴ Endoont woo sea ons daut jankat ooda woo sea wie ons aunstrenjen, doa kaun emma waut mankkomen. Biejlikj kaun onverhofs waut passieren, waut ons de Tiet wajchnemt toom waut volbrinjen (Liera 9:11). Ooda wie motten met eene Schwierichkjeit foadich woaren un feelen ons doawäajen mootloos un onen Krauft (Spr. 24:10, NW). Wäajen wie onvolkomen sent, kunn wie eenen Fäla moaken, waut ons daut bloos schwanda moaken kunn, daut to volbrinjen, waut wie ons väajenomen haben (Reem. 7:23). Ooda veleicht feel wie ons eefach meed (Mat. 26:43). Waut kaun ons halpen, wan ons doa waut mankkjemt ooda wan wie eenen schlajchten Dach haben?

15. Wuarom sell wie nich oppjäwen, wan doa waut mankkjemt? Laj daut ut (Psalm 145:14).

¹⁵ Wan die waut mankkjemt, meent daut nich, daut du daut kjeen Mol woascht doonen kjennen. De Bibel sajcht, daut wie met Trubbels un Schwierichkjeiten räakjnen motten. Oba dee sajcht uk, daut wie met Jehova siene Help emma wiedamoaken kjennen (läs Psalm 145:14). Een Brooda, waut Philip heet un von dän wie ea aul jerät haben, sajcht: “Ekj kjikj nich sea doano, woo foaken ekj daut nich hab kunt doonen, waut ekj mie väajenomen haud, oba woo foaken ekj daut wada jeprooft hab.” David, von dän wie ea aul räden, sajcht: “Ekj lot mie doa nich von opphoolen, wan doa waut mankkjemt ooda wan ekj eenen schlajchten Dach hab. Ekj see daut leewa aus eene Jeläajenheit, Jehova to wiesen, woo väl ekj am leew.” Wan wie wiedamoaken, endoont aus doa Sachen mankkomen, wies wie Jehova, daut wie am jefaulen wellen. Woo sea Jehova sikj nich freien mott, wan hee sitt, daut wie ons wieda aunstrenjen, daut to volbrinjen, waut wie ons väajenomen haben!

16. Waut kaun eena lieren, wan doa waut mankkjemt?

¹⁶ Lia doavon, wan doa waut mankkjemt. Denkj doaräwa no, wuarom daut passieed, un froag die: “Waut kaun ekj doonen, daut mie daut nich wada soo jeit?” (Spr. 27:12). Oba eenje Mol kaun eena waut bloos nich volbrinjen. Daut kunn wiesen, daut eena sikj too väl väajenomen haft. Wan die daut soo jeit, dan denkj doaräwa no, aus du daut, waut du die väajenomen hast, werkjlich noch doonen kaust.d Jehova woat nich denkjen, daut du to nuscht to brucken best, wan du nich waut volbrinjen kaust, waut aulmols too väl fa die es (2. Kor. 8:12).

17. Wuarom sell wie daut nich vejäten, waut wie aul volbrocht haben?

¹⁷ Denkj doaraun, waut du aul volbrocht hast. De Bibel sajcht: “Gott es nich ojjerajcht, daut hee june Woakjen . . . vejäten deit” (Heb. 6:10). Un du saust daut uk nich vejäten. Denkj doaräwa no, waut du aul aules volbrocht hast. Veleicht best du aul Jehova sien Frint ooda du rätst aul to aundre von am ooda du hast die aul deepen loten. Krakjt soo aus du ea aul veraunjekomen best un daut volbrocht hast, waut du die em jeisteljen väajenomen hautst, woascht du daut uk nu doonen kjennen (Filip. 3:16, NW).

18. Waut well wie nich vejäten, wan wie aun waut schaufen, waut wie ons väajenomen haben? (See uk daut Bilt.)

¹⁸ Met Jehova siene Help kaust du daut volbrinjen, waut du die väajenomen hast, krakjt soo aus een Scheppmaun bat doa kjemt, wua dee han well. Oba denkj doaraun, väl Scheppmana loten sikj daut uk aul hinjawäajes scheen gonen. Proow aulsoo to seenen, woo Jehova die halpen deit. Vejät uk nich, daut hee die emma halpen woat, Freid to haben, bat du daut volbrinjen kaust, waut du die väajenomen hast (2. Kor. 4:7). Wan du nich oppjäwen deist, woascht du lota noch väl mea Säajnungen haben (Gal. 6:9).