Yobo

1 Guakhalele nu yala mumoshi mu gifutshi gia Uze, jina dienji Yobo.* Wakhalele muthu wabonga nu wagujinginyina;* wakhalele muvuila Nzambi woma, wakhalele nji mutuna ndaga jiabola. 2 Yobo wavualele ana a mala 7 nu ana a akhetu thathu. 3 Wakhalele nu imeme 7 000 nu shamo 3 000 nu ngombe 1000* nu phunda 500.* Wakhalele nji nu enya midimo avula diago, hene wabuile muthu wakoma gubalega athu agasue a gu khanda ya mazogelo a kumbi.

4 Mona wagasue mukatshi dia an’enji a mala wakhalele mutshita wano gumbo dienji mu giphungu gienji.* Akhalele mutamega aphangi’awo a akhetu mutatu ha gudia nu gunua nawo hamoshi. 5 Gula masugu ene a wano ahua, Yobo wakhalele guatumila mbimbi ha gudiphelegetesa. Gungima wakhalele muzuga nu gimenegena giagasue ha guhana milambu ya guwotshia mukunda nu muthu wagasue mukatshi diawo. Wakhalele muzuela egi: “Yajiya gukhala egi an’ami akalagala gubola nu atshi Nzambi mukumbu mu mitshima yawo.” Yobo wakhalele mulandula gutshita ngenyi.

6 Lusugu lumoshi tangua ana a Nzambi wa giamatshidia* anginyile ha gukhala mu mafundo awo gutuama dia Yehowa, Satana nji wanginyile mukatshi diawo.

7 Gungima Yehowa wahudile Satana egi: “Gui udi mukatuga?” Satana wahanele Yehowa mvutu egi: “Ngayi nu gudiwendesa ha mavu ha guatala.” 8 Yehowa wamuhudile luko egi: “Wamonyi muenya mudimo wami Yobo ba? Gushigo nu muthu muko gifua muene ha mavu. Muene udi muthu wabonga nu wagujinginyina,* wana vuila Nzambi woma nu wana tuna ndaga jiabola.” 9 Uvi Satana wavutudile Yehowa egi: “Na Yobo wana vila Nzambi woma wa gituhu ba? 10 Aye, wajieteselego ibayi ha gumubamba nu inzo yenji nu ima yenji yagasue ba? Washimbigile midimo ya mago enji, shitu jienji jiadivudishile nji ha mavu. 11 Uvi ha gusombegesa ndaga, sununa koko diaye ha gumutambula ima yenji yagasue, muene mbawuguta diago mukumbu.” 12 Gungima Yehowa wawambelele Satana egi: “Tala! Ima yenji yagasue idi ha mago aye.* Uvi muene hakhenji umutshitshigo gubola! Hene Satana wakatugile gutuama* dia Yehowa.

13 Lusugu lumoshi, tangua an’enji a mala nu a akhetu akhalele mudia nu gunua matombe mu inzo ya phangi’awo wa mbuta, 14 muenya mudimo mumoshi wajile muwambela Yobo egi: “Tuakhala mudima nu ngombe, phunda nji jiakhala mudia muangu hehi, 15 hene enya Seba aza gutuluisa, atambula shitu jiene, ashiya nji enya mudimo gu phogo ya khusa. Phamba ame ngahuluga ha guza guguwambela.”

16 Hakhalele muene muzuela, muko wajile, wazuelele egi: “Tshuya tua Nzambi* tuakatuga mu dilu tuakonda imeme nu enya mudimo! Phamba ame ngahuluga ha guza guguwambela.”

17 Hakhalele muene muzuela, muko nji wajile, wazuelele egi: “Enya Kaldea adikhaphumuna mu mahunji thathu aji ha gutuluisa, azudi shamo, ashiya nji enya mudimo nu phogo ya khusa. Phamba ame ngahuluga ha guza guguwambela.”

18 Hakhalele muene muzuela, muenya mudimo muko wajile, wazuelele egi: “An’aye a mala nu a akhetu akhala mudia nu gunua matombe mu inzo ya phangi’awo wa mbuta. 19 Mbala imoshi funji yakola yakatuga gu khanda ya mavu a luselenga, yabundji gu khomo* jiagasue nguana jia inzo, hene inzo yabuila mavuala akhadi muene, yaashiya. Phamba ame ngahuluga ha guza guguwambela.”

20 Hene Yobo wazugile nu watawile mulele wenji, wakuluile nji sanga; gungima wafugamele wabuile phala mu mavu, 21 wazuelele egi:

Yehowa wahanele, Yehowa watambula nji.

Jina dia Yehowa dilandule gutumbuishiwa.”

22 Mu ndaga eji jiagasue, Yobo gatshitshilego gubola, gazuelelego nji egi Nzambi watshitshi ndaga imoshi yabola.*