Yobo
2 Mu lusugu luko tangua ana a Nzambi wa giamatshidia* anginyile ha gukhala mu mafundo awo gutuama dia Yehowa, Satana nji wanginyile mukatshi diawo ha gukhala ha fundo dienji gutuama dia Yehowa.
2 Gungima Yehowa wahudile Satana egi: “Gui udi mukatuga?” Satana wahanele Yehowa mvutu egi: “Ngayi nu gudiwendesa ha mavu ha guatala.” 3 Yehowa wahudile Satana egi: “Wamonyi muenya mudimo wami Yobo ba? Gushigo nga nu muthu muko gifua muene ha mavu. Udi muthu wabonga nu wa gujinginyina,* wana vuila Nzambi woma nu wana tuna ndaga jiabola. Yobo udi mulandula gusala ya gujinginyina uvi aye udi gungutuma ha gumushiya* ikhale muene gatshitshilego nga ndaga imoshi yabola.” 4 Uvi Satana wavutudile Yehowa egi: “Gilema mukunda nu gilema. Muthu mbawuhana ima yenji yagasue ha guhuluisa monyo wenji. 5 Uvi ha gusombegesa ndaga, sununa koko diaye umutshite gubola, muene mbawuguta diago mukumbu.”
6 Gungima Yehowa wawambelele Satana egi: “Tala! Yobo udi ha mago aye! Uvi umushiyigo!” 7 Hene Satana wakatugile gutuama* dia Yehowa, gungima walowele Yobo ijimbo yabala mu muila sendese gu malu uu nu gu muto. 8 Yobo wazanguile gitshinyi gia wuma ha gudiwazela, wakhalele ya guditumbiga mu fuphi.
9 Gu gisugishilo mukaji’enji wamuhudile egi: “Aye gaye mulandula gusala ya gujinginyina gudi Nzambi ba? Mute mukumbu ufue gaye!” 10 Uvi Yobo wamuvutudile egi: “Udi muzuela gifua mukhetu waheya. Tudi naye gutshigina phamba ndaga jiabonga gudi Nzambi uvi jiabola ndo ba?” Mu ndaga eji jiagasue Yobo gakalegelego gubola nu kano dienji.*
11 Mafuta* a Yobo thathu avuile malamba agasue amubuidile, muthu nu muthu wakatugile ha fundo diakhalele muene, wajile. Akhalele, Elifaze muenya gu Temana nu Biledade muenya gu Shuha nu Sofale muenya gu Naama. Adivuile ha gudibungisa ha guya muwalagana Yobo nu gumuhana gikhesa. 12 Tangua amumonele gualeha, amujiyilego. Asendesele gudila mangololo, atawile milele yawo; abishidile fuphi gosa adimbile nayo nji mu mito. 13 Gungima akhalele n’enji mu mavu masugu 7 phipha nu muanya. Nga muthu gamuwambelelego nga mbimbi imoshi, handaga amonele egi lamba dienji diakhalele diago diakola.