Yobo
17 “Ngushigo luko nu ngolo, ngudi mutshigina gufua;
malumba adi gungunenga.
2 Athu ana lela athu ako angujieta,
meso ami adi naye gutala luholo adi mulumbuga.
3 Ngabuba tshigina gijiyishilo giami, gibambe gudi aye.
Gudi nu muthu muko wajiya gubunda mago enji nu ami ha gunguzuelela ba?
4 Wakangele mitshima yawo hagula ikhadigo nu ukoteleshi wa ndaga;
gishina giene ushigo guaatumbuisa.
5 Ene ajiya guhana ima yawo gudi mafuta awo,
uvi meso a an’awo adi muleba.
6 Nzambi wangubuisa gifua gima gia gulelesa* mukatshi dia athu,
gishina giene athu adi gungufita mate gu phala.
7 Meso ami adi muya nu gubuita mukunda nu gikenene,
itshinyi yagasue ya muila wami idi gifua vule.
8 Athu a gujinginyina adi gudihula mukunda nu ndaga eyi,
muthu gatshitshilego gubola udi muvua khabu mukunda nu muthu ganago gunemesa Nzambi.*
9 Muthu wabonga udi mulandula gukhala ya gujinginyina mu njila yenji,
muthu udi nu mago aphelegeta nji udi mubua nu ngolo.
10 Uvi mukut’enu agasue muajiya gulandula guhana matangi’enu,
handaga ngamonelego nga muthu mumoshi watema mukatshi dienu.
11 Masugu ami ahua;
ndaga ngakhadi mulondega ha gutshita, nzala ya mutshima wami, yabolesewa.
12 Adi mulandula gubalumuna phipha ha gubua muanya,
adi muzuela egi: ‘Muanya udi naye gukhala hehi handaga guma gudi guabuita.’
13 Gula nganengenena, malumba* mbaabua inzo yami;
mbanguhaga gitanda giami ha fundo dilabui.
14 Mbanguwambela wina* mu dijui diakola egi: ‘Udi tata wami!’
Mbanguwambela mavinyo egi: ‘Udi mama wami, nu phangi’ami wa mukhetu!’
15 Felela diami didi gui?
Nanyi wajiya gumona felela diami?