Yobo
19 Yobo wamuvutudile egi:
2 “Uu nu tangua ditshi mbamulandula gusagesa monyo wami,*
nu gungutshiongonona nu mbimbi jienu?
3 Muangubalela* gale mbala 10;
mushigo muvua musonyi luholo mudi gungukalegela ndaga nu khuta ba?
4 Gula nji ngajimbila,
gubola gudi guami, ishigo gumitadila.
5 Gula mudi mulandula gudikanduisa gutuama diami,
nu mudi muzuela egi ngudi naye gumona malamba awa,
6 gula idi ngenyi, jiyenu egi Nzambi wanguhuigi,
nu wangukuatshi mu wanda wenji wa guzombela.
7 Tala! Ngudi mulandula gukaluluga egi: ‘Angukalegela ndaga jia khuta!’ uvi ngushigo muheta nga mvutu;
ngundi mulandula gukaluluga ha gutoga ukuateshi, uvi ashigo gungukalegela ndaga mu luholo luabonga.
8 Muene wakanga njila yami nu gibayi gia maseso, ngushigo nu luholo lua gubalega;
wazalesa njila jiami nu phipha.
9 Muene watambula lutumbu luami;
wangukatula gifulu gia lutumbu gu muto.
10 Wangubogola gu khanda jiagasue uu nu tangua mbangufua;
wavumbula felela diami gifua luholo ana vumbula mutshi.
11 Muene wanguvuila khabu jiakola,
udi gungutala gifua mbalagaji wenji.
12 Thundu jienji jia masuta jiaza hamoshi, jiangujieta,
phundo yawo yajieta tenta yami.
13 Muene wahaga aphangi’ami a mala gualeha nu ame,
athu ana gungujiya anguta dikunda.
14 Mafuta ami* a diago aya gawo,
athu ngana jiya muabonga angubuita mutshima.
15 Athu aji monzo yami nu enya mudimo ami a akhetu adi gungumona gifua ngenji;
ngudi gifua ngenji gu meso awo.
16 Ngudi mutamega muenya mudimo wami, uvi gashigo muhana mvutu;
ngudi gumububila ha gunguvuila khenda.
17 Mukaji’ami gashigo luko mutshigina vumba dia mu kano diami,
ngudi muzoga vumba diabola gudi aphangi’ami a mala.*
18 Nu ene ana azonda adi gungusegulula;
gula ngazuga mu molu, adi gungushinga.
19 Mafuta ami agasue a guzumba angutuna,
athu ngakhalele muzumba angubalumugila.
20 Ifuwa yami yakuatagana nu gilema giami nu misunyi yami,
ngahuluga nu gilema gia mazo ami.
21 Nguvuilenu khenda, mafuta ami, nguvuilenu khenda,
handaga koko dia Nzambi dia ngukuata.
22 Mukunda natshi mudi mulandula gungusagesa gifua mudi gungusagesa Nzambi?
Mukunda natshi mudi mulandula gunguluisa?*
23 Gula nga mbimbi jiami jiasonegewe,
gula nga mbimbi jiene jiasonegewe mu mukanda!
24 Oo gula nga mbimbi jiene jiasonegewe mayilago gu seso,
nu gima gia gusonegela gia utadi nu utadi wa plomb!
25 Handaga ngudi mujiya muabonga egi muthu udi naye gungusumba luko* udi nu monyo;
muene mbawuza gungima diami, mbawuzuga holu dia mavu.*
26 Gungima dia gubolesa gilema giami,
tangua mbangukhala ame gami nu muila wami, mbangumona Nzambi.
27 Mbangumumona ame hakhami,
meso ami hakhami mbaamumona, a muthu muko ndo.
Uvi ngudi muvua lamba mu mutshima wami!*
28 Enue mudi muzuela egi: ‘Mu ndaga itshi tuamusagesa?’
Handaga ame hakhami ngadikambela malamba ami.
29 Enue hakhenu vuenu woma wa phogo ya khusa,
handaga phogo ya khusa yana bata ndola mukunda nu gubola;
mudi naye gujiya egi nzuji udi guene.”