Yobo
35 Elihu walanduile guzuela egi:
2 “Aye udi diago nu gutshigina egi ndaga wazuedi idi ngenyi,
hene udi muzuela egi: ‘Ngudi muthu wabonga gubalega Nzambi’?
3 Handaga udi muzuela egi: ‘Ndaga yene idi nu funu itshi gudi aye?*
Itshi ngahetshi luholo ngatshitshilego gubola?’
4 Mbangumihana mvutu,
aye nu mafuta aye.
5 Tala mu dilu umone,
tala muabonga matuta adi gosa gualeha nu aye.
6 Gula watshita gubola, mbayisagesa Nzambi gu itshi?
Gula gubola guaye guadivudisa, ndaga itshi mbawumutshita?
7 Gula udi muthu wabonga, itshi mbawumuhana;
itshi muene mbawuheta gudi aye?
8 Gubola guaye mbagusagesa phamba muthu gifua aye,
gubonga guaye nji mbagusuanguluisa phamba mun’a muthu.
9 Athu adi mudila tangua adi mumona lamba diakola;
adi mukaluguga hagula ahuluishiwe mu uhinyinyi* wa enya ngolo.
10 Uvi nga muthu mumoshi gashigo muzuela egi:
‘Nzambi, Mufugi wami Wakoma udi gui?
Muthu wana tshita egi ngimbo jiyimbiwe mu phipha.’
11 Muene wana gutulongesa muavula gubalega shitu jia ha mavu,
wana gutubuisa atema gubalega tunjila tua gosa.
12 Athu adi mudila, uvi muene gashigo muhana mvutu,
mukunda nu lulendo lua athu abola.
13 Yadiago, Nzambi ganago guvua gudila gua mambo;
Nzambi wa Ngolo Jiagasue ganago gutegelela diago gudila guene.
14 Muene mbagashigo gugutegelela nga hazonda gula udi muboguta egi ushigo gumumona!
Mulonga waye udi gutuama dienji, hene udi naye gumunengenena nu mutshima zagu-zagu.
15 Muene gaguvuidilego khabu, gaguhanelego nji ndola;
gashigo nji mulandula ndaga udi mutshita gutangiza ndo muabonga.
16 Yobo umulaba gukangula kano dienji;
udi muvudisa mbimbi uvi gashigo nu ujiyi.”