Yobo
34 Elihu walanduile gumuhana mvutu egi:
2 “Tegelela mbimbi jiami, aye muthu watema;
ngutegelele, aye muthu udi mujiya ndaga jiavula.
3 Matshui ana lola mbimbi
gifua luholo ludimi luana lola ima ya gudia.
4 Tutadilenu ndaga idi yabonga mukunda nu esue;
tuzulenu desizio mukatshi dietu ha gujiya ndaga idi yabonga.
5 Handaga Yobo wazuedi egi: ‘Ngudi gami muthu wabonga,
uvi Nzambi gashigo mutshigina egi ngudi muthu wabonga.
6 Ngudi naye gumba mambo mu ndaga yatadila usopheshi wami ba?
Phuta yami mbayishigo muhua, ikhale ngashiyilego nga mukhuala.’
7 Gudi nu muthu muko gifua Yobo,
udi munua luweyi* gifua meya ba?
8 Muene udi mukuata ufuta nu athu adi mutshita ndaga jiabola,
udi nji muwenda nu athu abola.
9 Handaga muene wazuedi egi: ‘Muthu gajiyilego guheta gubonga
gula udi mutshita ngolo ha gusuanguluisa Nzambi.’
10 Enue athu mudi nu ukoteleshi wa ndaga ngutegelelenu:
Nzambi wa giamatshidia gajiyilego gukalagala ndaga jiabola nga hazonda,
Nzambi wa Ngolo Jiagasue gajiyilego gutshita gubola nga hazonda!
11 Muene mbawufuta muthu ha gutadila ndaga jiatshitshi muene,
mbawutshita nji egi ndaga jimubuile gifua mudi makalegelo enji.
12 Yadiago, Nzambi ganago gutshita ndaga jiabola;
Nzambi wa Ngolo Jiagasue ganago gusophesa milonga mu luholo luabola.
13 Nanyi wamuhanele ginemo gia gutuameza mavu?
Nanyi wamutombele ha guhinyina mavu agasue?
14 Gula muene wahaga matangi’enji* gudi ene,
gula wabungisa mionyo yawo nu muhehe gudi muene hakhenji,
15 athu agasue mbaafua,
enya ha mavu mbaavutuga mu fuluguta dia mavu.
16 Hene gula udi nu ndunge, haga matangi mu ndaga eyi;
tegelela muabonga ndaga ngudi muzuela.
17 Muthu udi mutuna ndaga jiabonga wajiya gutuameza ba?
Nga ndo mbawufuisa muenya ngolo yago udi muthu wabonga milonga ba?
18 Wajiya guwambela fumu egi: ‘Udi muthu wa gituhu,’
nga guwambela manene egi: ‘Mudi athu abola’?
19 Nzambi ganago gumonesa khadilo dia gutomba-tomba gudi mafumu,
wana kalegela enya umonyi nu phutu* ndaga luholo lumoshi,
handaga mukut’awo agasue adi mudimo wa mago enji.
20 Ene ajiya gufua mu gisagumuisa hakatshi na katshi dia phipha;
adi mudigita mangololo, adi nji mutota;
nu ene enya ngolo adi mukatudiwa, uvi ishigo nu mago a athu.
21 Handaga meso a Nzambi adi mumona makalegelo a muthu,
wana mona nji guwenda guenji guagasue.
22 Athu ana tshita ndaga jiabola ashigo nga nu phipha,
nga nu givule-vule giakola fundo ajiya gudisuega.
23 Nzambi gahagelego tangua
dinyi muthu wajiya gumagana gutuama dienji ha gusophesewa.
24 Muene wana bogola enya ngolo ikhale gahudilego mulonga,
wana haga athu ako ha fundo diawo.
25 Handaga muene wana jiya ndaga ana kalagala;
wana guakatula mu phipha nu wana guatshiongonona.
26 Muene udi guabeta ha fundo dinyi athu agasue ajiya guamona,
mukunda nu makalegelo awo abola.
27 Handaga amutunyile, abembele nji gumulandula;
ashigo nji nu ginemua mukunda nu ndaga jiagasue jiatshitshile muene.
28 Ene adi mutshita egi phutu jidile gudi muene ha gutoga ukuateshi,
hagula muene avue gudila gua athu ashigo nu mukuateshi.
29 Gula Nzambi wahena tedie, nanyi wajiya gumufuisa milonga?
Gula muene wasuega phala yenji, nanyi wajiya gumumona?
Ikhale wasuegela gifutshi nga muthu phala yenji, ndaga jidi luholo lumoshi.
30 Hagula muthu ganago gunemesa Nzambi* gahinyinago
nga gatelago athu miheto.
31 Gudi nu muthu mbawuwambela Nzambi egi:
‘Ngahanewe ndola, uvi ngatshitshilego nga gubola gumoshi;
32 nguwambele ndaga ngamonelego;
gula ngakalagala gubola, mbangushigo muvutugila luko ba?’
33 Muene udi naye gugufuta gifua luholo udi mutshigina ha udi mutuna usopheshi wenji ba?
Aye udi naye guzula desizio, uvi ame ndo.
Nguwambele ndaga udi mujiya muabonga.
34 Mala agasue adi nu ukoteleshi wa ndaga
nu mala agasue atema mbaanguwambela egi:
35 ‘Yobo udi muzuela uvi gashigo nu ujiyi,
mbimbi jienji jidi jia guheya.’
36 Yobo alolewe* uu nu gu gisugishilo
handaga mvutu jienji jidi gifua jia athu abola!
37 Muene udi mulezela gulumbuga mu gubola guenji;
udi mubunda mago gutuama dietu nu luweyi* luagasue,
udi muzuela mbimbi jiavula jiabola mukunda nu Nzambi wa giamatshidia!”