Yobo
39 “Udi mujiya tangua khombo jia mu mulundu jiana vuala ba?
Wamonele gale luholo gabaji gana vuala ana ba?
2 Aye wana tanga mbeji shitu jiene jidi naye gutagenesa?
Udi mujiya tangua jiana vuala ba?
3 Jiana shiwuga ha guvuala ana,
ngenyi lamba diakola jiana khala nadio diana guhua.
4 Mitumba ya shitu jiene yana bua nu ngolo nu yana kula mu temu;
gungima yanaya nu yanago luko guvutuga gudi in’awo.
5 Nanyi wabembele phunda ya mu foto ha guya nu guwenda?
Nanyi wajituluile shinga jia phunda ya mu foto?
6 Ngatshitshile egi mavu a luselenga abue inzo yenji,
mavu a mungua akhale nji fundo dienji dia gukhala.
7 Yana segulula matululu a dimbo;
yanago nji guvua gubala gua mutuameji wa shitu.
8 Yanaya nu guwenda mu tumilundu ha gukamba ima ya gudia,
yanaya nu gukamba mutshi wagasue udi nu mayiji a gibisu.
9 Ngombe ya mulume ya mu foto yajiya gutshigina gugutshitshila mudimo ba?
Mu phipha yajiya gubanda mu dinda* diaye ba?
10 Aye wajiya gujitshiga ngombe ya mulume ya mu foto nu shinga ha gugumbila mihanga ba?
Nga ndo yene mbayigulandula ha gubundula mavu a mu baba?
11 Aye mbawusha mutshima mu ngolo jiayo jiavula
nu guyibemba ha gutshita mudimo waye wakola ba?
12 Aye mbawusha mutshima gudi shitu yene hagula igubatele mbuto jiaye ba?
Yene mbayibungisa mbuto jiene ha fundo diaye dia gukatudila mbuto ba?
13 Otrishe yana sonona mahambu nu gusuanguluga guagasue,
uvi mahambu ene nu mavuji* enji ajiya gufuanesewa nu a njila ya kolo ba?
14 Handaga yana bemba mayi ayo mu mavu,
yana guabemba nji mu fuphi hagula muzuza wa tshuya waakuate.
15 Yana buita mutshima egi kulu dimoshi diajiya guadiata
nga ndo shitu ya mu foto yajiya guatotola.
16 Yana kalegela an’enji ndaga nu khuta, gifua ashigo an’enji;
yanago guvua woma egi mudimo yakalegele wajiya gudiyila wa githuhu.
17 Handaga Nzambi gayihanelego gutema
nu gayihanelego khapho dia ndunge.
18 Uvi tangua yana zuga nu yana bunda mahambu enji,
yana lela gabalu nu muthu udi gugawendesa.
19 Aye wana hana gabalu ngolo ba?
Aye wasudigile shingo yenji nu uvuji waleha wana gudinyigisa ba?
20 Aye wajiya gutshita egi gabalu gasotoge gifua phasu?
Dijui diakola gana zola mu mazulu enji diana hana woma.
21 Gana hota maboto mu mavu mu baba nu gana suanguluga nu ngolo jiago;
nu gana guya phushi gu ita.*
22 Gana segulula woma nu ganago guvua woma nga wa gima gimoshi.
Ganago guvutuga gungima ha gulenga phogo ya khusa.
23 Gakuba ga gumbila mifula gana gusha matululu gula gadikuma nu gabalu,
milumbu yana henya.
24 Gana digita ha guya phushi gutuama,
gula gavua lumbinga mudila gajiyilego gumagana.*
25 Gula lumbinga luadila gene nji gana dila!
Gana guvua vumba dia ita gualeha,
gana guvua luholo bakomanda ana kaluga nu gumba milolo ya ita.
26 Aye wahanele njila ya imbi ndunge jia guzuga,
nu gusununa mahambu ayo ha guya gu khanda ya sud ba?
27 Nga ndo aye wana wambela njila ya khuyi ha guzuga
nu gulonda kianzu giayo gosa?
28 Mu phipha yana banda mu maseso,
yana khala mu mafundo a ubambi mu songi jia maseso.
29 Guene yana kambela ima ya gudia;
meso ayo ana mona gualeha diago.
30 An’enji ana nua mahatshi ndambo ndambo;
njila ya khuyi yana khala fundo diagasue didi imbi.”