Yobo
40 Yehowa walanduile guhana Yobo mvutu egi:
2 “Muthu wana kamba ndaga jiabola udi naye
gusha giphapha nu Nzambi wa Ngolo Jiagasue ba?
Muthu udi mutshigina gubalela* Nzambi ahane mvutu.”
3 Yobo wahanele Yehowa mvutu egi:
4 “Tala ngudi gami gama ga githuhu.
Mvutu itshi ngajiya guguhana?
Ngahaga koko diami ha givungu.
5 Ngazuedi mbala imoshi, uvi mbangushigo luko muhana mvutu;
ngazuedi mbala jiyadi, uvi mbangushigo luko muzuela nga gima.”
6 Gungima Yehowa wahanele Yobo mvutu mu funji yakola egi:
7 “Ngabuba, dilondege tshita ndaga gifua yala;
ngudi guguhula mihu, unguhane mvutu.
8 Aye wajiya guhaga giphapha mu* luholo luami lua gusophesa ba?
Wajiya gungufuisa milonga hagula aye ubinge ba?
9 Koko diaye didi nu ngolo gifua dia Nzambi wa giamatshidia ba?
Nga ndo dijui diaye diajiya gukaluguga gifua dienji ba?
10 Ngabuba, sudiga lutumbu nu gukoma;
sudiga nji ginemua nu gubonga.
11 Monesa khabu jiaye jiakola;
tala muthu wagasue udi nu lulendo umubulumuise.
12 Tala muthu wagasue udi nu lulendo umubulumune,
buisa athu abola ha fundo adi ya gumagana.
13 Asuege mukut’awo agasue mu fuphi;
ajitshige ha fundo dila bui,
14 ngenyi ame nji mbangutshigina* egi
koko diaye dia madia diajiya guguhuluisa.
15 Henyaha tala Behemote* ngalondele gifua luholo ngagulondele aye.
Yana dia muangu gifua ngombe ya mulume.
16 Tala ngolo jiana khala ha kete dienji
nu ngolo jidi mu mishiya ya mu vumo dienji!
17 Yana magesa mukila wenji gifua mutshi wa sedre;
mishiya ya mashina a malu enji yana khala ya gukuatagana hamoshi.
18 Ifuwa yenji idi gifua sele jia kuivre,
itshinyi yenji ya muila idi gifua itshinyi ya utadi.
19 Yana khala ha fundo dia thomo* mukatshi dia ima yafugile Nzambi;
phamba muthu wayifugile wajiya gusuena hehi nayo nu phogo yenji ya khusa.
20 Handaga milundu yana guyizolela ima ya gudia,
guene fundo shitu jiagasue jia mu foto jiana kena.
21 Yana banda ha mushin’a mitshi ya lotise,
yana gudisuega mukatshi dia matetete* mu mazanga a meya.
22 Mutshi wa lotise wana guyihagela givule-vule,
mutshi wa pepliye wa mu baba,* wana guyijieta.
23 Gula muta udi nu matshipa-tshipa akola, yene yanago guvua woma.
Yanago guvua woma ngatshima meya a muta wa Yordane adi muya muphushi fuafuafua akuma gu kano dienji.
24 Gudi nu muthu wajiya guyikuata tangua idi mutala,
nga guyitobola muzulu nu ndobo* ba?