Yobo
41 “Aye wajiya gukuata Leviatana* nu ndobo
nga gujitshiga ludimi luenji nu ngoji ba?
2 Aye wajiya gunginyisa shinga mu mawina a mazulu enji
nga gutobola mbanga jienji nu ndobo ba?*
3 Yene mbayigububila ba?
Nga ndo mbayiguzuelesa nu gisemo giagasue ba?
4 Mbayikota nu aye gikotelo
hagula wajiya guyibuisa muhiga waye mayilago ba?
5 Aye mbawukena nayo gifua luholo wana kena nu ganjila ba?
Nga ndo mbawuyijitshiga shinga ha gukenesa an’aye azonda a akhetu ba?
6 Enya mungenda mbaayisombegesa nu ima iko ba?
Mbaayikhapha mukatshi dia athu ana sumbisa ima ba?
7 Mbawutobola gilema gienji nu tumifula ana kuatela jishui ba?
Nga mbawutobola muto wenji nu milumbu ana kuatela jishui ba?
8 Haga koko diaye holu dia Leviatana;
mbawuwunguluga itumba mbamulua, mbawushigo nji guyitshita luko.
9 Gushigo nga nu felela egi muthu wajiya guyibinga.
Gula wayimona phamba gu meso woma wakola mbawugukuata.*
10 Nga muthu mumoshi gajiyilego guyisagesa.
Na, nanyi wajiya gumagana gutuama diami?
11 Nanyi wadiangele gunguhana gima hagula ngumuvutudile nagio?
Ima yagasue idi ha mavu idi yami.
12 Mbangushigo muhena tedie mukunda nu itshinyi yenji ya muila,
nu ngolo jienji, nu luholo muila wenji walondewe muabonga.
13 Nanyi wakatudile mulele wa holu wa shitu yene?
Nanyi mbawungina mu mbanga jienji jiagukangula?
14 Nanyi wajiya guyishinjiga ha gukangula kano?*
Mazo enji agasue ana kuatesa woma.
15 Kunda dienji didi nu ndonga jia mahala*
agukuategenesa mangololo hamoshi.
16 Mahala agasue adi agukuatagana mangololo
ngenyi nga muhehe wajiyilego gungina mukatshi dia mahala ene.
17 Mahala adi a gukuatagana nu mahala ako;
adi a gujinginyina hamoshi, ajiyilego nji gukhaphumuiwa.
18 Gula yasaphula,* meya ana zoga mu mazulu enji ana henya gifua kiajiji,
meso enji adi gifua guhenya guana monega gutuama egi muanya uzoge mu gimenegena.
19 Guhenya guana zoga mu kano dienji;
madimi a tshuya ana zoga muene.
20 Mishi yana zoga mu mazulu enji
gifua jigo didi nu tshuya.
21 Guhuima guenji guana lemesa makala,
madimi a tshuya nji ana zoga mu kano dienji.
22 Shingo yenji yana khala nu ngolo jiavula,
gima giagasue giana tagana nu shitu yene giana vua woma wakola.
23 Itshinyi ya mukatshi ya gilema gienji yana khala ya gukuategena mangololo hamoshi;
yana khala ya gujinginyina gifua utadi unu wajiyilego gukatudiwa.
24 Mutshima wenji wana khala wakola gifua seso,
ayi, wana khala wakola gifua seso dia gukhukhila mbuto.
25 Gula yazuga mu molu, nga ene enya ngolo ana vua woma;
gunyigana guenji, guana buisa tunga-tunga.
26 Gushigo nga nu phogo imoshi ya khusa yajiya guyibinga;
ikhale mulumbu nga tumifula tuazonda-zonda nga mufula.
27 Gu meso enji utadi wana khala gifua gamulenge,
kuivre gifua mutshi wa gufua.
28 Mufula wanago guyilengesa;
gula ayisonona tumaseso, tuana bua gifua muangu wayibuila.
29 Yana mona mutshi wakola gifua muangu,
yana lela tola gula ayisonona mulumbu.
30 Vumo dienji didi gifua dia gusembega nu itshinyi ya malonga a uma;
yana gudisununa mu ithotho gifua gima gia gusuwila mbuto.
31 Yana fulugisa meya adi ha jinga gifua nzungu;
yana nyigisa kianga gifua nzungu ya maji.
32 Gula yabalega mu njila, njila yene yana henya.
Muthu wajiya gutangiza egi jinga dia meya didi nu sanga dilaphe.
33 Gushigo nga nu gima gimoshi giadifuana nu shitu yene ha mavu,
yafugiwe hagula ivuigo woma.
34 Yana tala nu khabu gima giagasue gidi nu lulendo.
Yana khala fumu ya shitu jiagasue jiakoma jia mu foto.”