Yobo
5 “Ngabuba, tamega! Gudi nu muthu wajiya guguhana mvutu ba?
Wajiya gutoga ukuateshi gudi nanyi mukatshi dia athu agijila?
2 Handaga gubamba khabu mu mutshima mbagushiya muthu waheya,
giphi mbagibata muthu waheya gu gufua.
3 Ngamonele muthu waheya muzola miji,
uvi mu tangua diene inzo yenji yatewe mikumbu.
4 An’enji ashigo mu ubambi,
adi musagesewa ha mufulo wa dimbo, uvi gushigo nga nu muthu wa guahuluisa.
5 Muthu udi nu nzala wana dia ima yana katula muthu waheya,
wana zula ima yene mukatshi dia miya,
ima ya muthu waheya nu ya an’enji mbayitambudiwa.
6 Ndaga jiabola jiana zoga ndo mu fuphi,
malamba nji anazoga ndo mu mavu.
7 Muthu wavualewe mukunda nu malamba,
gifua luholo tumadimi tua tshuya tuana kanduga gosa.
8 Uvi gula nga ame ngakhadi ha fundo diaye, nga ngatamega Nzambi,
ngakhalele naye guwambela Nzambi mulonga wami,
9 muene wana tshita ndaga jiakoma nu jinyi tuajiyilego gukotelesa,
ndaga jia gushimana jinyi jiajiyilego gutangewa.
10 Muene wana nogesa mvula ha mavu,
wana tuma nji meya mu mahia.
11 Wana kanduisa athu ashigo nu ndando,
wana kanduisa nji athu adi aguleba nu wana guahuluisa.
12 Wana bolesa ndaga jiana londega enya ndunge jiabola,
hagula abingigo mu midimo yawo.
13 Muene wana kuata athu atema mu ndunge jiawo jiabola,
hagula ndaga jidi mulondega enya ndunge jiabola jikalegewago.
14 Mu muanya, phipha idi guabuila,
adi muya nu guphaphata ha katshi na katshi dia lusugu* gifua mu phipha.
15 Muene wana huluisa athu mu madimi awo adi gifua phogo jia khusa,
wana huluisa phutu ha mago a muenya ngolo,
16 hagula muthu gashigo nu ndando akhale nu felela,
uvi kano dia muthu wabola dikangewe.
17 Tala! Gusuanguluga gudi nu muthu munu Nzambi wana balela;
hene utunyigo ndola ya Nzambi wa Ngolo Jiagasue!
18 Handaga muene wana hana lamba, uvi wana kanga phuta;
wana namenesa, uvi wana saga nu mago enji.
19 Muene mbawuguhuluisa mu malamba 6,
nu diene dia 7 nji mbadishigo gugubuila.
20 Mu sungi ya nzala, muene mbawuguhuluisa hagula ufuigo;
mu sungi ya ita, mbawuguhuluisa nji hagula phogo ya khusa igushiyigo.
21 Nzambi mbawugubamba hagula mbimbi jiabola jigusagesago,
mbawushigo nji muvua woma tangua lamba diakola mbadiza.
22 Aye mbawushigo gudisagesa mukunda nu malamba nu nzala,
mbawushigo nji muvua woma wa shitu jia mu foto.
23 Maseso a mu mahia mbaashigo gugutshita gubola,*
shitu jia mu foto mbajikhala nji mu guhuima nu aye.
24 Mbawujiya egi tenta yaye idi mu ubambi,*
tangua mbawuya mutala fundo shitu jiaye jianaya mudia, mbawumona egi shitu jiaye jiagasue jidi guene.
25 Mbawukhala nu ana avula,
ajigulu aye nji mbaakhala avula gifua muangu* wa ha mavu.
26 Mbawulandula gukhala nu ngolo uu nu tangua mbawufua,
gifua itungu ya mbuto jia ble jiakatudiwa mu sungi yenji.
27 Tala! Tuakambi gujiya ndaga yene muabonga, idi ngenyi.
Tegelela, itshigine nji.