Ngimbo
147 Tumbuisenu Yah!*
Idi yabonga ha gutumbuisa* Nzambi wetu nu ngimbo;
idi yabonga nu yatagana ha gumutumbuisa!
2 Yehowa udi mutunga Yelusalema;
wabungisa enya Isalele anyi amuanganele.
3 Wasaga athu adi nu gikenene gu mutshima;
wasaga phuta jiawo.
4 Wana tanga guvula gua themua;
wana gujitamega jiagasue mu majina ajio.
5 Fumu wetu udi wakoma udi nu ngolo jiavula;
tuajiyilego gukotelesa ndunge jienji.
6 Yehowa wana zugisa athu a gudibulumuisa,
uvi wana lutula athu abola mu mavu.
7 Yimbilenu Yehowa ngimbo ha gumuhana mersi;
yimbenu ngimbo nu gitare ha gutumbuisa Nzambi wetu,
8 muene wana tshuiga dilu nu matuta,
wana nogesa mvula ha mavu,
muene wana zola muangu mu milundu.
9 Wana hana ima ya gudia gudi shitu,
gudi mawunda a ikwanga tangua ana dila ha gukamba ima ya gudia.
10 Muene gana suanguluga ndo nu ngolo jia gabalu;
phushi jiabala jia muthu jiana gumuyitugisa ndo.
11 Yehowa wana suanguluga nu athu ana gumuvila woma,
athu anyi ana gudifelela mu guzumba guenji gua giamatshidia.
12 Oo Yelusalema, tumbuisa Yehowa.
Oo Siona, tumbuisa Nzambi waye.
13 Muene wana kolesa ima ya gukangela mifulo ya dimbo diaye;
wana shimbiga ana a mala adi mukatshi diaye.
14 Wana bata guhuima mu mavu aye;
wana guguhana mbuto jiabonga jia ble ha gudia.
15 Wana hana mukhuala wenji ha mavu;
mbimbi yenji yana zula phushi jiabala.
16 Muene wana nogesa neje, yana bua phuwa hashi gifua mbulaketa ilaphe;
wana muanga neje gifua fuphi.
17 Muene wana bishila may’a-nzanza* hashi gifua itshinyi ya mapha.
Nanyi wajiya gukolesela mu guhuma guana tuma muene?
18 Muene wana tuma mbimbi yenji, ene ana shiginyina.
Wana tuma muhehe, meya ana bulumuga.
19 Muene wana wambela Yakoba mbimbi yenji,
wana wambela Isalele mikhuala nu badesizio enji.
20 Muene gakalegelego ngenyi mukunda nu ifutshi iko;
ene ana jiya ndo nga ndaga imoshi yatadila usopheshi wenji.
Tumbuisenu Yah!*