Ngimbo
Lungimbo lua Davidi. Tangua diakalegele muene ndaga gifua muenya malui gutuama dia Abimeleke; Abimeleke wamukayele, wayile genji.
א [Alefe]
34 Mbangutumbuisa Yehowa tangua diagasue;
kano diami mbadimutumbuisa tangua diagasue.
ב [Bete]
2 Mbangudisunzula mukunda nu Yehowa;
muthu wa gudibulumuisa mbawuvua nu mbawusuanguluga.
ג [Gimele]
3 Tumbuisenu Yehowa hamoshi nu ame;
tutumbuisenu jina dienji hamoshi.
ד [Dalete]
4 Ngakombelele Yehowa, wanguhanele mvutu.
Muene wanguhuluishile mu ndaga jiagasue ngakhalele muvuila woma.
ה [He]
5 Athu ana gudifelela gudi muene ana khala nu gusuanguluga;
ajiyilego guhanewa musonyi.
ז [Zayine]
6 Muthu wa guleba watamegele Yehowa, muene wamutegelele.
Wamuhuluishile gu malamba enji agasue.
ח [Heth]
7 Muanjelo wa Yehowa wana khala hehi nu athu agasue ana vila Nzambi woma,
wana guahuluisa.
ט [Teth]
8 Lola udimonele egi Yehowa udi wabonga;
gusuanguluga gudi nu muthu wana lengela gudi muene.
י [Yod]
9 Vilenu Yehowa woma, enue athu enji agasue a gijila,
handaga athu ana gumuvuila woma ana kamba ndo nga gima.
כ [Kaph]
10 Nu yene mitumba ya khoshi yana vua nzala,
uvi athu ana kamba Yehowa mbaashigo mukengela nga gima gimoshi giabonga.
ל [Lamede]
11 An’ami zenu, ngutegelelenu;
mbangumilongesa ha guvuila Yehowa woma.
מ [Mem]
12 Nanyi mukatshi dienu udi nu gusuanguluga mu monyo wenji,
nu udi mutshigina gujinga muavula ha gumona ndaga jiabonga?
נ [Nune]
13 Ngenyi, kanda ludimi luaye hagula uzuedigo ndaga jiabola,
nu kano diaye hagula umbigo mambo.
ס [Sameke]
14 Tuna ndaga jiabola, kalagala ndaga jiabonga;
kamba guhuima, landula gukhala mu guhuima.
ע [Ayine]
15 Meso a Yehowa ana tala athu abonga,
wana guategelela tangua ana gumudidila ha gutoga ukuateshi.
פ [Pe]
16 Yehowa wana tuna athu ana kalagala ndaga jiabola,
mbawaashiya hagula nga muthu mumoshi gaawungulugago luko.
צ [Tsade]
17 Athu abonga adidile, Yehowa waategelele;
waahuluishile mu malamba awo agasue.
ק [Qoph]
18 Yehowa udi hehi nu athu adi nu gikenene giavula;
wana huluisa athu adi ya guleba muila.
ר [Resh]
19 Muthu wabonga wana mona malamba avula,
uvi Yehowa wana gumuhuluisa gu malamba ene agasue.
ש [Shin]
20 Muene udi mubamba mifiya yenji yagasue;
gushigo nga umoshi wabooga.
ת [Taw]
21 Lamba mbadishiya muthu wabola;
athu anyi anago guzumba athu abonga mbaafishiwa milonga.
22 Yehowa udi musumba luko mionyo ya akombeledi enji;
gushigo nga muthu mumoshi wana lengela gudi muene mbawufishiwa milonga.