Ngimbo
MUKANDA WA MBADI
(Ngimbo 42-72)
Gudi mutuameji wa miziki. Maskile* a ana a Kora.
42 Oo Nzambi, ngudi gugukamba,
gifua luholo gabaji gana kamba meya a gunua.
2 Ngumuvua luhungu* lua Nzambi, Nzambi wa monyo, gifua muana vua muthu luhungu lua meya.
Tangua ditshi mbanguya mumagana gutuama dia Nzambi?
3 Ngudi mudila phipha nu muanya, ngushigo mudia;
lusugu lua mudidi athu adi gunguhula nu gusegulula guagasue egi: “Nzambi waye udi gui?”
4 Ngawunguluga ndaga eji, ngudi gugukangudila mutshima wami,
ngakhalele muwenda mukatshi dia athu avula;
ngakhalele muwenda mage-mage gutuama diawo ha guya gu inzo ya Nzambi,
mukut’etu agasue tuakhalele mumba miyelele nu guhana Nzambi mersi,
tuakhalele mutshita wano nu athu avula.
5 Mukunda natshi ngushigo luko nu felela?
Mukunda natshi ngabua tunga-tunga?
Mbangunengenena Nzambi,
mbangumutumbuisa handaga udi Muhuluishi wami Wakoma.
6 Nzambi wami, ngushigo luko nu felela.
7 Ngavua matululu a meya adi mubulumuga muphushi,
idi matululu a meya aye adi muhuhua.
Matshipha-tshipha aye akola angutshuiga.
8 Mu muanya, Yehowa mbawungumonesela guzumba guenji gua giamatshidia,
mu phipha, mbanguyimba mukunda nu muene, mbangukombelela Nzambi wana gunguhana monyo.
9 Mbanguwambela Nzambi, seso diami egi:
“Mukunda natshi wangujimbila?
Mukunda natshi ngudi naye guwenda nu gikenene mukunda nu lamba didi gungumonesa mbalagaji jiami?”
10 Mbalagaji jiami jidi gunguweya nu khuta* yagasue;
lusugu lua mudidi adi gunguhula nu gusegulula guagasue egi: “Nzambi waye udi gui?”
11 Mukunda natshi ngushigo luko nu felela?
Mukunda natshi ngabua tunga-tunga?
Mbangunengenena Nzambi,
mbangumutumbuisa handaga udi Muhuluishi wami Wakoma, udi Nzambi wami.