Ngimbo
Maskile* a Asafe.
74 Oo Nzambi, mukunda natshi watutuna mayilago?
Mukunda natshi udi muvuila imeme yaye wana bamba khabu?
2 Wunguluga athu* watombele sendese mualeha,
giphuta wakudile ha gubua khapho diaye.
Wunguluga mulundu wa Siona, fundo wakhalele mukhala.
3 Nda ha fundo diabuishiwe makhulu mayilago.
Mbalagaji jiabolesele ima yagasue ha fundo dia gijila.
4 Mbalagaji jiaye jiashile matululu ha fundo diaye dia gudibungishila.
Ahagele ijiyishilo yawo ya gubinga ha fundo diene.
5 Ene akhalele gifua athu adi mukoka mitshi nu iphangu mu gishitu gidi nu mitshi yavula.*
6 Ene akokele ifuanesa yagasue yakhalele ha fundo dia gijila nu iphangu nu ikadigilo ya utadi.
7 Akondele fundo diaye dia gijila tshuya.
Ene abuishile tabernakle yana bata jina diaye ya usala, ayibuishile hashi.
8 Ene nu ajigulu awo azuelele mu mitshima yawo egi:
“Mafundo agasue athu ana gudibungisa mu gifutshi ha gukombelela Nzambi adi naye gukondewa tshuya.”
9 Tushigo mumona nga gijiyishilo gimoshi;
gushigo nji nga profete mumoshi,
gushigo nga muthu mumoshi mukatshi dietu udi mujiya tangua ndaga eji mbajihua.
10 Oo Nzambi, uu nu tangua ditshi mbalagaji mbajilandula gugushinga?
Mbalagaji mbajilandula gusegulula jina diaye mayilago ba?
11 Mukunda natshi udi muvutula koko diaye dia madia gungima?
Zola koko diaye moshi’a mulele, ushiye mbalagaji.
12 Uvi Nzambi udi Fumu wami sendese mualeha,
muene udi muhuluishi wakoma ha mavu.
13 Aye wathuphuile kianga nu ngolo jiaye;
wamuangele mito ya shitu jiakoma jia mu mita.
14 Wabudile mito ya Leviatana;*
wayihanele athu ha gudia,
wayihanele athu ana khala mu mavu a luselenga.
15 Wakangudile mavu ha guzola ito ya mita nu tumita tuazonda;
wamiginyishile mita yakoma.
16 Muanya nu phipha idi yaye.
Aye wafugile kiajiji nu kumbi.
17 Wahagele mididilo yagasue ya mavu;
wafugile sungi ya muanya nu sungi ya guhuma.
18 Oo Yehowa, wunguluga mashingo agushingile mbalagaji,
wunguluga luholo athu aheya aseguluile jina diaye.
19 Uhanyigo yembe* diaye ha mago a shitu jia mu foto.
Ujimbilago nga hazonda athu aye adi mumona malamba.
20 Wunguluga gikotelo,
handaga mafundo abuita a ha mavu azala pha nu mbundudi.
21 Muthu udi mu lamba gavutugago muila wa guleba;
muthu gashigo nu ndando nu muthu udi phutu atumbuise jina diaye.
22 Oo Nzambi, zuga ubatule mulonga waye.
Wunguluga luholo athu aheya adi gugushinga lusugu lua mudidi.
23 Ujimbilago ndaga jidi muzuela mbalagaji jiaye.
Matululu a athu adi guguluisa adi mulandula gudivudisa.