Ngimbo
Gudi mutuameji wa miziki. Idi naye gushigiwa mu Gitite.* Lungimbo lua Asafe.
81 Yimbenu ngimbo nu gusuanguluga mukunda nu Nzambi, muene udi ngolo jietu.
Mbenu milolo ya gusuanguluga mukunda nu Nzambi wa Yakoba.
2 Shigenu miziki; zulenu gangoma,
nu gitare giana zola dijui diabonga nu gima gia gushigila miziki giana khala nu shinga.
3 Shigenu lumbinga mu mbeji ihe-ihe,
tangua mbeji yana bua ya mudidi, mu lusugu lua wano wetu.
4 Handaga idi mukhuala mukunda nu Isalele,
mukhuala wahagele Nzambi wa Yakoba.
5 Wahagele mukhuala wene ha guwunguluisa Yozefe
tangua dialuishile muene* gifutshi gia Ejipitu.
Ngavile dijui* dimoshi uvi ngakoteleselego, diakhalele muzuela egi:
6 Ngakatuile ginemo giakhalele ha phanga yaye;
ngakatuile kinda gianema ha mago aye.
7 Tangua wakhalele mu lamba wangutamegele, ngaguhuluishile;
ngaguhanele mvutu mu tuta diabuita.
Ngagulolele gu meya a Meriba. (Sela)
8 Enue athu ami, tegelelenu, mbangumitemesa.
Gula nga wangutegelele, Oo Isalele.
9 Mukatshi dienu mbagukhadigo nu nzambi wa enya ifutshi iko.
Mbamufugamelago nji nzambi wa ngenji.
10 Ame Yehowa, Nzambi wenu,
muthu wamizolele mu gifutshi gia Ejipitu.
Kangulenu makano enu muabonga, mbanguazalesa.
11 Uvi athu ami atunyile gutegelela dijui diami;
Isalele watunyile gungutumagela.
12 Hene, ngaabembele ha gulandula mitshima yawo yakola;
akalegele ndaga akhalele mumona egi jidi jiabonga gu meso awo.
13 Gula nga athu ami angutegelele,
gula nga Isalele wawendele mu njila jiami!
14 Nga ngahanele mbalagaji jiawo ha mago awo;
nga ngaluishile mbalagaji jiawo.
15 Athu anago guzumba Yehowa mbaadigita nu woma gutuama dienji,
gisugishilo* giawo mbagikhala mayilago.
16 Muene mbawugudisa* mbuto jiabonga jia ble
mbawugudisa wigi wa mu seso, mbawukuta.