Ngimbo
Gudi mutuameji wa miziki. Idi naye gushigiwa mu “Lis.” Lungimbo lua Asafe, ludi mukuatesa ha guwunguluga.
80 Oo mubambi wa Isalele, tegelela,
aye wana tuameza Yozefe gifua imeme.
Aye udi ya gukhala ha nguasa ya ufumu holu* dia basheribe,
henya gifua muanya.
2 Monesa ngolo jiaye
gutuama dia Efrayime nu Benjame nu Manase;
iza, utuhuluise.
3 Oo Nzambi, tutshigine luko;
tuvile khenda, tuhuluise.
4 Yehowa Nzambi wa masuta, uu nu tangua ditshi mbawulandula guvila athu aye khabu
nu gutuna guvua isambu yawo?
5 Waadishile masoji gifua dipha,
waanuishile nji masoji avula diago.
6 Wabembele athu tuana jinga nawo hehi ha gunyonga mavu etu;
mbalagaji jietu jidi mulandula gutulela gifua luholo jiatshigina.
7 Oo Nzambi wa masuta, tutshigine luko;
tuvile khenda, tuhuluise.
8 Wavumbudile mutshi wa vinyo gu Ejipitu.
Wakayele athu mu mavu awo, gungima wakunyile mutshi wene.
9 Walondele fundo mukunda nu mutshi wene,
mutshi wene wahagele miji nu wazalele mu gifutshi.
10 Vule dienji diatshuigile milundu,
thango jienji jiatshuigile mitshi ya sedre ya Nzambi.
11 Thango jienji jiayile uu nu gu kianga,
thango jienji jiazonda jiayile uu nu gu muta.*
12 Mukunda natshi wabuishi gibayi gia maseso gia gilanga gia vinyo?
Henyaha athu agasue adi mubalega, adi muhela mabundu enji.
13 Yombo idi muzangela mutshi wene,
shitu jia mu foto jia udia.
14 Oo Nzambi wa masuta, tuabuba vutuga.
Tala hashi umone!
Bamba mutshi wuwu wa vinyo,
15 miji* ya mutshi wakunyile nu koko diaye dia madia,
tala mona* wahanele ngolo mukunda nu lutumbu luaye.
16 Mutshi wene wakondewa tshuiya, wabatudiwa.
Khabu jiaye jiamanesela athu.
17 Koko diaye dikuatese muthu udi gu koko diaye dia madia,
dikuatese mun’a muthu yago wahanele ngolo mukunda nu lutumbu luaye.
18 Ngenyi mbatushigo gugutuna.
Tubembe nu monyo, hagula tuajiya gutamega jina diaye.
19 Oo Yehowa Nzambi wa masuta, tutshigine luko;
tuvile khenda, tuhuluise.