Yobo
3 Gungima dia ndaga eji, Yobo wasendesele guzuela nu guta lusugu lua guvualewa guenji mukumbu.* 2 Wazuelele egi:
3 Lusugu ngavualewe lutewe mukumbu,
phipha inyi muthu mumoshi wazuelele egi: ‘Mona wa yala wamitshiwa!’ Itewe nji mukumbu.
4 Lusugu luene lubue phipha.
Nzambi gadisagesago mukunda nu lusugu luene;
muanya uzogigo mu lusugu luene.
5 Phipha yakola itoge lusugu luene.
Tuta dia mvula dikhale holu dienji.
Gima giagasue giana buitshisa lusugu giluhane woma.
6 Phipha yene ikhale yabuita diago;
isuangulugago mukatshi dia masugu a givo,
itangewago nji mukatshi dia mbeji.
7 Ayi phipha yene ibue gikunya;*
nga dijui dimoshi dia gusuanguluga divuiwago mu phipha yene.
8 Athu ana ta lusugu mukumbu alute mukumbu,
athu adi atagana ha guzugisa Leviatana.*
9 Themua jia mu ngueze ya phipha yene jibue bui;
inengene muanya uvi muanya wene guzoga ndo,
phipha yene imonyigo gutshia gua gisugu.
10 Handaga yakangelego mifulo ya vumo dia mama wami;
yasuegelego nji malamba gu meso ami.
11 Mukunda natshi ngafuilego tangua ngakhalele muvualewa?
Mukunda natshi ngafuilego tangua ngazogele mu vumo?
12 Mukunda natshi mama wangubatele ha mabongo enji?
Mukunda natshi wanguwamuesele?
13 Nga ngafile gami, ngakhalele naye gukhala ya gubanda muthu gungusagesa ndo;
ngakhalele naye gukhala ya gubanda nu guhuluguga
14 nu mafumu a ha mavu, nu ahanyi awo a malongo,
anyi atungile mafundo awo hakhawo,* mafundo ene adi makhulu mangino,
15 nga nu mafumu akhalele nu wolo,
anyi jinzo jiawo jiakhalele jia guzala nu utadi wa siliva.
16 Nga ndo mukunda natshi ngakhalelego gifua gabisu gafila mu vumo gadi gagusuega,
gifua mona munu khenji gamonelego muanya?
17 Fundo athu abola abembele gale gudisagesa;
fundo didi muhuluguga athu aguleba.
18 Fundo enya bologo adi hamoshi mu guhuima;
ashigo muvua luko dijui dia muthu udi guashinjiga ha gutshita mudimo.
19 Muthu wazonda nu muthu wakoma adi luholo lumoshi guene,
muhiga nji wazolewa mu uhiga gudi fumu wenji.
20 Mukunda natshi Nzambi udi muhana muanya gudi muthu udi mumona lamba?
Mukunda natshi muene udi muhana monyo gudi athu adi mu lamba diakola?*
21 Mukunda natshi adi munengena gufua, uvi gufua gushigo muza?
Adi mukamba gufua muavula gubalega umonyi udi wagusuega.
22 Athu adi nu gusuanguluga guavula,
adi nu gusuanguluga gula amona malumba.
23 Mukunda natshi Nzambi udi muhana muanya gudi muthu wajimbila njila yenji?
Muthu munu Nzambi wahagi mukatshi dia luphango.
24 Handaga ha fundo dia gudia, ngumumba gisugu,
gudila guami nji gudi mumuangana gifua meya.
25 Handaga ndaga yagasue ngakhalele muvuila woma ya ngubuila,
gima giagasue ngakhalele mulenga gia ngujila.
26 Ame ngushigo nu guhuima, ngushigo nji nu luholo lua guhuluguga,
uvi malamba adi mulandula gungubuila.”