Yobo
6 Gungima Yobo wamuhanele mvutu egi:
2 Gula nga ajiya guthesa gikenene giami giagasue,
nu gumba gikenene giene ha kilo hamoshi nu malamba ami!
3 Henyaha gikenene giami gidi gianema gubalega gishegele gia mu kianga.
Gishina giene mbimbi jiami jiabua gifua izuele-zuele.*
4 Handaga mifula ya Nzambi wa Ngolo Jiagasue yangutuile,
ngudi nji munua malengo-lengo a mifula yene;
woma wakola wa Nzambi wangukuata.
5 Phunda ya mu foto yajiya gudila gula idi nu muangu ba?
Nga ngombe yajiya gudila gula idi nu ima ya gudia ba?
6 Ima ilatebetebe yajiya gudiwa mungua ndo ba?
Nga meya alazele-zele* a mutshi ajiya gukhala abonga ha gunua ba?
7 Ngatunyile* gukuata ima ya luholo elu.
Handaga idi gifua ima yabola yambiwa mu ima yami ya gudia.
8 Oo gula nga Nzambi wahanele mvutu gu ndaga ngamutogele,
gula nga watagenesele nzala yami!
9 Gula Nzambi watshigina, angutshiongonone;
asunune nji koko dienji ha gungushiya!
10 Gula nga ndaga yene yakhalele naye gunguhana gikhesa,
nga ngakhalele nu gusuanguluga guavula ngatshima ngudi mulandula gumona malamba,
handaga ngatunyilego mbimbi jia muthu wa gijila.
11 Ngudi nu ngolo jia gulandula gunengenena ba?
Gudi nu felela mukunda nu ame hagula ngulandule gukhala nu monyo ba?*
12 Ngolo jiami jidi gifua jia seso ba?
Muila wami walondewe nu kuivre ba?
13 Gudi nu luholo ngajiya gudikuatesa hakhami ba?
Handaga angukatudile ima yagasue yajiya gungukuatesa.*
14 Muthu wagasue gashigo mumonesela muthu na muko guzumba gua giamatshidia
mbawubemba guvuila Nzambi wa Ngolo Jiagasue woma.
15 Aphangi’ami a mala ashigo athu a gushila mutshima, adi gifua gamuta ga mu sungi ya guhuma,
gifua meya a mu gamuta ga mu sungi ya guhuma adi mumigina.
16 Meya ene abuita mukunda nu may’a-nzanza,
neje idi ya gumuangana yadisuega mukatshi.
17 Uvi mu sungi ya muanya wakola tuana khalago luko nu meya;
tangua muanya wana bua wakola meya ana migina.
18 Njila jia tumita tuene jiana sombegesewa;
meya enji ana bulumuga mu mavu a luselenga, gungima ana tota.
19 Thundu ya athu a gu Tema anyi ana balega adi guakamba;
enya gu Seba ana tshita vuayaje* adi guanenga.
20 Adi muvua musonyi handaga asha mutshima ha fundo diabola;
adi muya guene, uvi muila udi gualeba.
21 Enue nji muabua ngenyi mukunda nu ame;
muamona malamba ami akola, woma wamikuata.
22 Ngamitogele ha gunguhana gima ba?
Nga ndo ngamitogele ha gunguhana kado mu umonyi wenu ba?
23 Ngatogele egi nguhuluishiwe ha mago a mbalagaji ba?
Nga nguhuluishiwe gudi athu adi gungusagesa ba?
24 Nguwambelenu ndaga ngatshitshi, mbanguhena tedie;
ngukuatesenu ha gukotelesa gujimbila guami.
25 Mbimbi jia giamatshidia jianago guhana gikenene!
Uvi gubonga gutshi ngajiya guheta mu luholo mudi gungubalela?*
26 Mudi muya giphungi ha gutuna mbimbi jiami,
mbimbi jia muthu gashigo nu felela, jinyi muhehe wana hehumuna.
27 Muajiya nji guta mubela mukunda nu mun’a shiye
nu gudiga diago futa dienu!
28 Henyaha balumugenu mungutale,
handaga ngajiyilego gumba mambo gutuama dienu.
29 Ngabuba, tadilenu luko mulonga wami, mungusophesago mu luholo luabola
ayi, tadilenu luko mulonga wami, handaga ame gami ya gujinginyina.
30 Ludimi luami ludi muzuela ndaga jiabola ba?
Ngajiyilego gukotelesa egi ndaga imoshi idi yabola?