Tumbuisenu Yehowa

1. Mangino athu avula ana hana lutumbu gudi nanyi?

YAJIYA gukhala egi wamonele gale athu avula guditumbuisa. Ha gufezegesa, athu ako ana guditumbuisa mukunda nu ndaga ana kalagala nga mu njila ya Internet. Uvi mangino phamba athu azonda ana hana lutumbu gudi Yehowa Nzambi. Mu longo edi, tuza muzuelela gula guhana Yehowa lutumbu gudi mukotelesa itshi nu ndaga yana gututuma ha gumutumbuisa. Tuza nji muzuelela luholo tuajiya guhana Nzambi lutumbu ludi naye guheta muene nu luholo muene hakhenji mbawutumbuisa jina dienji mu masugu adi muza.

GUHANA YEHOWA LUTUMBU GUDI MUKOTELESA ITSHI?

2. Luholo lutshi Yehowa wamonesele lutumbu luenji gu Mulundu wa Sinayi? (Tala nji holu dia gizula.)

² Biblia yana monesa egi Yehowa udi Nzambi wabalega gukoma. Wamonesele lutumbu luenji tangua diazolele muene enya Isalele mu uhiga gu Ejipitu. Tangiza gale ndaga eyi: Enya Isalele avula adibungisa hehi nu Mulundu wa Sinayi ha gutegelela ndaga Nzambi wakhalele mutshigina guawambela. Mu tangua diene tuta dia tshuiga mulundu. Mu gisagumuisa mishi yazala mu mulundu wene, mavu asendesa gudigita mangololo, miandu, khuba nu matululu ako avula adi muzoga. (Guz. 19:16-18; 24:17; Ngi. 68:8) Tangiza luholo enya Isalele adihudile tangua Yehowa wamonesele ngolo jienji nu lutumbu luenji.

3. Guhana Yehowa lutumbu gudi mukotelesa itshi?

³ Mangino tuajiya gutumbuisa Yehowa ba? Ayi. Tuana hana Yehowa lutumbu tangua tuana wambela athu ako ima ya gushimana yakalegele muene nu makalegelo enji abonga. Tuana gumuhana nji lutumbu mukunda nu ndaga jiagasue tuana kalagala mu ukuateshi wenji. (Yesh. 26:12) Fumu Davidi watuhanele gifezegeselo giabonga gidi mumonesa luholo tuajiya guhana Yehowa lutumbu. Mu gisambu giakalegele muene gutuama dia hungu dia enya Isalele, wawambelele Nzambi egi: ‘Yehowa aye udi wakoma nu ngolo nu lutumbu nu ginemua nu ufumu, ima yagasue idi mu dilu nu ha mavu idi yaye.’ Tangua Davidi wamanesele gukombelela ‘thundu yagasue yatumbuishile Yehowa.’​—1 Gudi. 29:11, 20.

4. Luholo lutshi Yesu watumbuishile Yehowa?

⁴ Tangua Yesu wakhalele ha mavu, watumbuishile Shi’enji tangua diakhalele muene muwambela athu egi Yehowa wakhalele gumuhana ngolo jiagutshita ima ya gushimana. (Mako 5:18-20) Yesu watumbuishile nji Shi’enji tangua diakhalele muene muwambela athu ako ndaga jidi gumutadila nu luholo luakhalele muene mukalegela athu ako ndaga. Ha gufezegesa, lusugu lumoshi Yesu wakhalele mulongesa mu sinagoga. Mukatshi dia athu akhalele gumutegelela muakhalele nu mukhetu mumoshi wakhalele musagesewa gudi demo ivo 18. Demo diene diakhalele gumusagesa nu gumulebesa muila, hene gakhalelego luko nu ngolo. Ndaga yene idi muhana diago gikenene! Yesu wavidile mukhetu muene khenda, wasuenele hehi n’enji nu wamuwambelele nu gisemo giagasue egi: “Mukhetu, wasagewa gu misongo yaye.” Gungima wamuhagele mago, mukhetu muene wamaganele mbala imoshi, “wasendesele gutumbuisa Nzambi” handaga wavile muabonga! (Luka 13:10-13) Mukhetu muene wakhalele diago nu ndaga yamutumine ha guhana Nzambi lutumbu, esue nji tudi naye gutshita ngenyi.

MUKUNDA NATSHI TUANA TUMBUISA YEHOWA?

5. Ndaga jitshi jiana gututuma ha gunemesa Yehowa?

⁵ Tuana tumbuisa Yehowa handaga tuana gumunemesa muavula. Tuana khala nu ndaga jiavula jiana gututuma ha gunemesa Yehowa. Yehowa udi Nzambi wa ngolo jiagasue nu ngolo ji’enji jishigo nu gisugishilo. (Ngi. 96:4-7) Ndunge ji’enji jiana monega haphelo mu ima yafugile muene. Udi muhanyi wa monyo nu wana gutuhana ima yagasue tuana khala nayo funu ha gulandula gukhala nu monyo. (Gumo. 4:11) Wana khala nji yagujinginyina gudi athu enji. (Gumo. 15:4) Ndaga jiagasue jiana tshita muene jiana binga nu wana tagenesa ndaga jiana laya muene. (Yosh. 23:14) Gishina giene profete Yelemiya wazuelele egi: “Enya ndunge a ifutshi yagasue nu mawufumu awo agasue, gushigo nga mumoshi wadifuana nu aye”! (Yel. 10:6, 7) Yadiago tudi nu ndaga jiavula jiana gututuma ha gunemesa Tata wetu wa mu dilu. Uvi tushigo naye guhana Yehowa phamba ginemua, tudi naye nji gumuzumba muavula.

6. Mukunda natshi tuana zumba Yehowa?

⁶ Tuana tumbuisa Yehowa handaga tuana gumuzumba muavula. Tutadilenu makalegelo a Yehowa ana gututuma ha gumuzumba. Wana khala nu khenda jiavula. (Ngi. 103:13; Yesh. 49:15) Gula tudi muvua gikenene mukunda nu ndaga imoshi, muene nji wana vua gikenene. (Zak. 2:8) Wana gutukuatesa ha gumujiya muabonga nu gukuata n’enji ufuta. (Ngi. 25:14; Makal. 17:27) Yehowa wana khala nu khadilo dia gudibulumuisa; “wana mba meso enji ha gutala gosa nu hashi’a mavu, muene wana katula muenya gikenene mu fuluguta.” (Ngi. 113:6, 7) Ndaga eji jiagasue jidi gututuma ha gumutumbuisa.​—Ngi. 86:12.

7. Luendu lutshi lua ndando tudi nalo?

⁷ Tuana tumbuisa Yehowa handaga tuana tshigina egi athu ako amujiye. Athu avula anago gujiya giamatshidia giatadila Yehowa. Mukunda natshi? Handaga Satana wabuishile gale matangi awo ufofo mukunda nu mambo ana mba muene. (2 Kol. 4:4) Satana wana tshiginyisa athu egi Yehowa wana khala muenya khuta, gana gudisagesa ndo mukunda nu esue. Wana zuela nji egi Yehowa udi ha gishina gia malamba agasue tuana tagana nawo. Uvi tuana jiya giamatshidia giatadila Nzambi wetu! Tuana khala nu luendu luaguwambela athu ako egi Nzambi wetu udi Nzambi wabonga nu guakuatesa ha gumutumbuisa. (Yesh. 43:10) Mukanda wa Ngimbo 96 wana zuelela muavula gutumbuisa Yehowa. Henyaha tutadilenu luholo ndaga jiko jidi mu mukhapho wene jiajiya gutukuatesa ha guhana Yehowa lutumbu ludi naye guheta muene mukunda nu jina dienji.

LUHOLO TUAJIYA GUHANA YEHOWA LUTUMBU LUDI NAYE GUHETA MUENE

8. Luholo lutshi tuajiya gutumbuisa Yehowa? (Ngimbo 96:1-3)

⁸ Tanga Ngimbo 96:1-3. Tuajiya gutumbuisa Yehowa mu ndaga tudi muzuela mukunda nu muene. Verse eji jidi mumonesa egi akombeledi a Yehowa adi naye ‘guyimbila Yehowa, gutumbuisa jina di’enji, guwambela athu lukuma luabonga egi muene udi muhuluishi nu gutela ifutshi mene jia lutumbu luenji.’ Awa adi maluholo tuajiya gutumbuisa Tata wetu wa mu dilu. Enya Yuda anyi akhalele yagujinginyina gudi Yehowa mu siekle ya thomo, avilego woma waguwambela athu ako ndaga jiabonga jinyi Yehowa wakalegele mukunda nu ene nu guzuelela jina dienji. (Dan. 3:16-18; Makal. 4:29) Esue nji tuajiya gutshita gifua ene. Luholo lutshi?

9-10. Lumene lua phangi Angelena ludi gutulongesa itshi? (Tala nji gifuanesa.)

⁹ Tutadilenu gifezegeselo gia phangi wa mukhetu Angelena,a wana khala gu États-Unis. Watumbuishile jina dia Yehowa nu gikhesa giagasue fundo diakhalele muene mukalagala mudimo. Tangua diasendesele muene gutshita mudimo fundo diene, watamegewe mu gudibungisa gumoshi nu athu anyi akhalele mutshita n’enji mudimo nu a atogele ha guzuelela ndaga jia monyo wawo. Phangi Angelena waatalesele foto jiakhalele mumonesa egi udi nu gusuanguluga ha gukhala Temue wa Yehowa. Uvi gutuama egi Angelena asendese guzuela, futa dienji wa mudimo wazuelele egi muene nji wakudile mu fami ya Matemue a Yehowa, gungima wasendesele guzuela ndaga jiabola mukunda nu Matamue a Yehowa. Phangi Angelena wazuelele egi: “Ngavile gikenene giavula diago. Ngadihudile egi: Ngajiya guhana muthu njila ha gusendesa gumbila Yehowa mambo ba? Hene ngatshiginyilego egi athu ategelele mambo ene, gishina giene ngazudile desizio dia guawambela giamatshidia giatadila Yehowa.”

¹⁰ Tangua muthu muene wamanesele guzuela, phangi Angelena watshitshile gisambu mu phushi mu mutshima. Wawambelele muthu muene nu gisemo giagasue egi: “Lumene luaye ludi gifua luami. Ame nji ngakudile mu fami ya Matemue a Yehowa, ngudi nji Temue wa Yehowa.” Ngatshima phangi Angelena wadisagesele muavula mukunda nu ndaga yene, uvi gabuilego tunga-tunga. Walegezele muthu muene foto ji’enji nu jia mafuta enji anyi ana kombelela Yehowa nu gusuanguluga nu wazuelele ndaga jiatadila gutshigina guenji. (1 Phet. 3:15) Gubonga gutshi guahetele muene? Tangua phangi Angelena wamanesele guzuela, muthu muene wahenele tedie. Muthu muene watele nji mene jiabonga jiakhalele mujiya muene sendese ulenge wenji tangua diakhalele muene muya mu gudibungisa nu Matemue a Yehowa. Phangi Angelena wazuelele egi: “Yehowa watshita egi jina dienji ditumbuishiwe. Idi luendu ha guwambela athu ako giamatshidia giamutadila.” Esue nji tudi nu luendu lua gutumbuisa Yehowa ikhale athu ako ashigo gumutubuisa.

11. Luholo lutshi akombeledi a Yehowa akalegele longo didi mu Ngimbo 96:8?

¹¹ Tanga Ngimbo 96:8. Tuajiya gutumbuisa Yehowa nu ima yetu ya ndando. Akombeledi a Yehowa ana gumutumbuisa mu luholo elu. (Ish. 3:9) Ha gufezegesa, enya Isalele akhalele muhana makuta nu ima yawo ya ndando ha gutunga tempelo nu guyilondega. (2 Maf. 12:4, 5; 1 Gudi. 29:3-9) Alandudi ako a Yesu ‘akhalele mukalegela ima yawo ha gukuatesa’ Yesu nu apostolo enji. (Luka 8:1-3) Aklisto a mu siekle ya thomo nji akuatesele aphangi’awo Aklisto a mu membo ako akhalele nu nzala. (Makal. 11:27-29) Esue nji mangino tuajiya gutumbuisa Yehowa nu misomo yetu.

12. Luholo lutshi misomo tuana hana yana tumbuisa Yehowa? (Tala nji gifuanesa.)

¹² Tutadilenu gifezegeselo gimoshi gidi mumonesa luholo tuana tumbuisa Yehowa tangua tuana hana misomo. Mu 2020 gikalala giakola giakalegele masugu avula diago gu Zimbabwe. Athu avula akhalele mu gingonza handaga akhalelego nu ima ya gudia, phangi Prisca wakhalele nji mukatshi dia athu ene. Ikhale yakhalele lamba, uvi phangi Prisca walanduile gulongesa lukuma luabonga mu lusugu lua Thathu nu lua Thano. Athu akhalele n’enji hehi akhalele gumusegulula luholo luakhalele muene muya mu mudimo wa gulongesa ha fundo dia guya mukamba ima ya gudia. Akhalele muzuela egi: “Mbawufua nu nzala.” Phangi Prisca wakhalele guahana mvutu nu gutshigina guagasue egi: “Yehowa mbagabembigo akombeledi enji nga hazonda.” Gungima dia tangua diazonda, phangi Prisca wahetele ima yakatugile mu ulondegi wetu. Ima ya gudia nu ima iko phangi Prisca wahetele yakatugile mu misomo tuana hana. Athu akhalele mujinga hehi nu phangi Prisca adihudile diago. Azuelele egi: “Nzambi gagubembelego nga hazonda, henyaha tudi mutshigina gujiya ndaga jiavula jia mutadila.” Athu 7 mukatshi diawo asendesele guya mu gudibungisa gua mu hungu.

13. Luholo lutshi makalegelo etu ajiya gutumbuisa Yehowa? (Ngimbo 96:9)

¹³ Tanga Ngimbo 96:9. Tuajiya gutumbuisa Yehowa mu makalegelo etu. Nganga-nzambi jiakhalele mukalegela Yehowa mudimo mu tempelo jiakhalele naye gukhala aphelegeta mu muila. (Guz. 40:30-32) Yadiago gukhala aphelegeta mu muila gudi ndaga yabonga uvi ndaga yabalega ndando idi gukhala nu makalegelo abonga. (Ngi. 24:3, 4; 1 Phet. 1:15, 16) Tudi naye gutshita ngolo ha gukatula “umuthu ukulu” yakotelesa egi makalegelo abola nu gusudiga “umuthu uhe-uhe” yakotelesa gutangiza nu gutshita ndaga mu luholo luana suanguluisa Yehowa. (Kol. 3:9, 10) Ikhale muthu udi mutshita ndaga jiabola diago, Yehowa wajiya gumukuatesa ha gusombegesa nu gusudiga umuthu uhe-uhe.

14. Gifesegeselo gia Jack gidi gutulongesa itshi? (Tala nji gifuanesa.)

¹⁴ Tutadilenu gifezegeselo gia Jack. Wakhalele muenya khuta nu wadihanele jina egi Demo. Luholo luakhalele muene mutshita ndaga jia khuta azudile desizio dia gumushiya. Uvi tangua diakhalele muene munengena ha gushiyiwa, phangi mumoshi wa yala wayile gumulongesa Biblia, Jack watshiginyile nu wasendesele gulonguga Biblia. Ikhale wakhalele nu makalegelo abola, uvi wakatudile umuthu ukulu gungima wabatijiwe. Jack wasombegeselo diago makalegelo enji, hene mu lusugu akhalele naye gumushiya masuta ako akhalele mutadila bologo adidile muavula. Yala mumoshi wakhalele mukalagala mudimo gu bologo diene wazuelele egi: “Jack wakhalele muthu wabola diago mu bologo edi, uvi henyaha udi mukatshi dia athu abonga.” Phoso imoshi gungima dia gufua gua Jack, aphangi a mala ayile gu bologo ha gutuameza gudibungisa gua mu hungu mu katshi dia phoso, amonele muenya khuta mumoshi muza mu gudibungisa mu mbala ya thomo. Itshi yatumine yala muene ha guza mu gudibungisa? Wadihudile muavula luholo Jack wasombegeselo makalegelo enji, hene muene nji wakhalele mutshigina gujiya ndaga yakhalele naye gutshita muene ha gukombelela Yehowa. Yadiago makalegelo etu ajiya gutuma athu ako ha gutumbuisa Tata wetu wa mu dilu!​—1 Phet. 2:12.

LUHOLO LUTSHI YEHOWA MBAWUTUMBUISA JINA DIENJI MU MASUGU ADI MUZA?

15. Luholo lutshi Yehowa mbawutumbuisa jina dienji mu masugu adi muza? (Ngimbo 96:10-13)

¹⁵ Tanga Ngimbo 96:10-13. Verse jia gisugishilo jia mukanda wa Ngimbo 96 jiana monesa egi Yehowa udi Nzuji nu Fumu wabonga. Luholo lutshi Yehowa mbawutumbuisa jina dieji mu masugu adi muza? Mbawuyitshita mu njila ya usopheshi wenji. Gualeha ndo mbawushiya Babilona Yakoma handaga enya ikombelelo ya mambo ana tshita ndaga jiabola nu ana longesa ndaga jia mambo mukunda nu muene. (Gumo. 17:5, 16; 19:1, 2) Tangua Babilona Yakoma mbayishiyiwa, athu ako mbaazula desizio dia gukombelela Yehowa. Gu gisugishilo, mu ita ya Alemagedona, Yehowa mbawushiya Satana nu mavu enji hamoshi nu athu ana gumulumbugila nu ana segulula jina dienji, uvi mbawuhuluisa athu ana gumutumagela nu ana gumutumbuisa. (Mako 8:38; 2 Tes. 1:6-10) Tangua athu mbaalolewa mbala yasuga gungima dia uhinyini wa Klisto wa ivo 1000, Yehowa mbawutumbuisa jina dienji mayilago. (Gumo. 20:7-10) Mu tangua diene, ‘mavu mbaazala pha nu ujiyi wa lutumbu lua Yehowa gifua luholo meya ana zalesa kianga.’​—Hab. 2:14.

16. Desizio ditshi wazula? (Tala nji gifuanesa.)

¹⁶ Mbayikhala diago ndaga ya gusuanguluga tangua athu agasue mbaahana Yehowa lutumbu ludi naye guheta muene mukunda nu jina dienji! Uvi gutuama egi lusugu luene luze, tuajiya gutshita yagasue ha gulongesa jina dienji nu gutshita ndaga jidi gumutumbuisa. Hunji dia Akulu Atuameji diatombi mukhapho wa givo 2025 mu mukanda wa Ngimbo 96:8 udi muzuela egi: ‘Hanenu Yehowa lutumbu ludi naye guheta muene mukunda nu jina dienji.’ Mukhapho wene mbawutukuatesa ha gusha matangi mu ginemo egi gia ndando tudi nagio.