1925​—Ivo 100 Yabalega Gale

AKOMBELEDI A NZAMBI AKHALELE NAYE GUNENGENA LUKO

Mu 1925, Alongugi a Biblia avula akhalele gudifelela egi mavu mbaabua Phaladiso mu givo giene. Mukunda natshi? Phangi Albert Schroeder, munu wakalegele mudimo gu Hunji dia Akulu Atuameji gungima, wazuelele egi: “Tuakhalele mutangiza egi alandudi a Klisto ambiwe maji mu nyuma anyi akhalele ha mavu mbaaya mu dilu ha gutshita mudimo mu Ufumu wa Nzambi; tuakhalele nji mutangiza egi athu akhalele nu gutshigina guakola gifua Abalahama, Davidi nu athu ako mbaafuzumuga ha gutuameza mavu.” Uvi luholo felela diene diatagenesewego mu givo giene, aphangi ako alebele muila.​—Ish. 13:12.

Ikhale ngenyi, Alongugi a Biblia avula alanduile gulongesa lukuma luabonga nu asendesele nji gukotelesa egi gukhala Matemue a Yehowa guene ndaga yabalega ndando. Tutadilenu luholo akalegele radio ha gulongesa athu avula lukuma luabonga.

ATUNGA STATION JIKO JIA RADIO

Mu 1924, athu avula ategelele muavula radio WBBR; uvi mu 1925, Alongugi a Biblia atungile station iko ya radio yakoma hehi nu dimbo dia Chicago gu Illinois. Jina dia radio yene ihe-ihe diakhalele WORD. Ralph Leffler wakuatesele ha gutunga station ya radio yene, wazuelele egi: “Mu matangua a ngueze mu sungi ya guhuma, athu avula akhalele mutegelela radio yene.” Ha gufezegesa, lusugu lumoshi, fami imoshi yakhalele mu dimbo dia Pilot Station gu Alaska ha mutango wa bakilometre 5000 nu radio yene, ategelele emisio imoshi mukatshi dia emisio jia thomo jia radio yene. Gungima dia gutegelela emisio yene, fami yene yasonegele aphangi akhalele mutshita mudimo gu radio yene mukanda ha guahana mersi mukunda nu programe yabonga yaakuatesele ha gujiya ndaga jiavula jiatadila Nzambi nu Biblia.

Inzo Yaleha ya Mutaledi ya 1 Decembre 1925 yakhalele muzuelela gubonga gua radio yene; yazuelele egi: “Radio WORD idi mukatshi dia radio jiakoma jia gu États-Unis. Athu adi mutegelela radio yene muabonga gu khanda ya est nu ya ouest ya États-Unis, gu Cuba nu gu khanda ya nord ya Alaska. Athu avula anyi adi khenji ajiyile giamatshidia adi musuanguluga nagio hadi ene mutegelela radio yene.”

Mu tangua diene, Alongugi a Biblia akhalele nji mutshigina gukalegela radio yene mu mudimo wa gulongesa gu Canada. Mu 1924, atungile station ya radio CHUC gu Saskatoon mu dimbo dia Saskatchewan. Radio yene yakhalele mukatshi dia radio jia thomo jiakhalele muzuelela ndaga jia ikombelelo gu Canada. Uvi mu 1925, akhalele naye gubata station yene ya radio ha fundo diko diakoma. Hene ulondegi wakatudile radio yene, ayihagele mu inzo yakhalele mutamegewa egi Regent Building; inzo yene yakhalele thomo fundo athu akhalele mutala théâtre. Asumbile fundo diene, adilondele hagula diajiya gubua station ya radio yene.

Radio yene yakuatesele athu avula a gu Saskatchewan ha gutegelela giamatshidia mu mbala ya thomo. Ha gufezegesa, mukhetu mumoshi wa mu dimbo dia gualeha, wasonegele mukanda ha gutoga mikanda yetu gungima dia gutegelela emisio imoshi. Phangi George Naish udi muzuela egi mukhetu muene watogele mikanda yene muphushi diago, ndaga yene yaatumile ha gumutumila volime jiagasue ya mukanda Études des écritures. Gungima dienji, mukhetu muene wasendesele gulongesa lukuma luabonga mu mafundo agasue a gualeha.

GIAMATSHIDIA GIA NDANDO

Inzo Yaleha ya Mutaledi ya 1 Mars 1925 yakhalele nu longo dimoshi dia ndando diakhalele nu muto wa lumene egi “Guvualewa gua Gifutshi.” Mukunda natshi longo diene diakhalele nu ndando? Handaga mu tangua diene, Alongugi a Biblia akhalele mutshigina egi Satana wakhala nu ulondegi wana khala nu itshinyi mbadi: Gitshinyi gia mu dilu giakhala nu bademo nu gitshinyi gia ha mavu giana khala nu mafumu a ikombelelo, enya mungenda nu mafumu a politike. Uvi mu longo diene, “muhiga wafubidila nu watema” wakuatesele aphangi ha gukotelesa egi Yehowa nji wakhala nu ulondegi wakhala mu dilu nu ha mavu; akombeledi enji anago gudinginyisa mu ndaga jia ha mavu a Satana nu ana kuatesa Yehowa ha guluisa Satana nu athu agasue ana khala gu khanda yenji. (Mat. 24:45) Muhiga wazuelele luko egi Ufumu wa Nzambi wasendesele guhinyina mu 1914; gungima dia ʼita yaluiwe mu diluʼ mu givo giene gimoshi, Satana nu bademo enji akayewe mu dilu nu abishidiwe ha mavu.​—Gumo. 12:7-9.

Yakhalele lamba gudi Alongugi a Biblia ako ha gutshigina ukoteleshi wene uhe-uhe. Gishina giene longo diene diazuelele egi: “Gula gudi nu athu ashigo mutshigina ndaga jiazuelewa mu Inzo Yaleha ya Mutaledi eyi, tudi guatoga ha gusha mutshima gudi Fumu nu guhuiminyina guagasue nu ha gubamba mitshima yawo yaphelegeta.”

Phangi Tom Eyre wakhalele muvundji wa njila (mu tangua diene avundji a njila akhalele mutamegewa egi ba colporteur) gu Grande-Bretagne, wamonesele luholo Alongugi a Biblia adivuile mukunda nu longo diene; wazuelele egi: “Aphangi asuangulugile nu ukoteleshi wa mukanda wa Gumonesa mukhapho 12. Tangua tuavuile egi Ufumu wa Nzambi wana hinyina gale mu dilu, tuasuangulugile ha guwambela athu ako lukuma luene luabonga. Ndaga yene yatutumile ha gudihana muavula mu mudimo wa gulongesa nu ha gukotelesa egi Yehowa wakhalele naye gukalagala ndaga jiavula jia gushimana mu masugu adi muza.”

GUKHALA MATEMUE A YEHOWA

Mangino Matemue a Yehowa ana kotelesa muabonga mbimbi jidi mu Yeshaya 43:10 egi: “Yehowa udi muzuela egi: ‘Mudi matemue ami,’ ‘Ayi, muenya mudimo wami ngatombele.’” Uvi gutuama dia givo 1925, mikanda yetu yakhalelego muzuelela verse yene muavula. Gungima ndaga jiayile nu gusombegesa. Mu 1925, malongo 11 a Inzo Yaleha ya Mutaledi azuelele ndaga jidi mu mukanda wa Yeshaya 43:10 nu 12!

Gu gisugishilo gia mbeji ya Aout 1925, Alongugi a Biblia ayile gu asamble yakalegewe mu dimbo dia Indianapolis gu Indiana. Ha programe jia asamble yene, guakhalele nu mbimbi jiasonegesele phangi Joseph F. Rutherford ha guyamba aphangi; jiakhalele muzuela egi: “Tuaza . . . haha hagula Fumu atuhane ngolo jiajiya gutukuatesa ha guvutuga mu mudimo wa gulongesa nu nzala yakola ya gukhala matemue enji.” Mu masugu agasue 8 a asamble yene, athu ayile guene ahetele gikhesa gia gulongesa lukuma luabonga lua Yehowa mu ba okazio agasue.

Mu lusugu lua Samano 29 Aout, phangi Rutherford wakalegele diskur diakhalele nu muto wa lumene egi: “Muatamegewe ha Gulongesa.” Mu diskur diene, wamonesele egi mudimo wa gulongesa udi nu ndando yavula, wazuelele egi: “Yehowa udi muwambela akombeledi enji egi . . . : ‘Mudi matemue ami . . . Ame ngudi Nzambi.’ Gungima wawambelele aphangi mbimbi eji jia ndando: ‘Hagenu gijiyishilo mukunda nu athu.’ Ha mavu agasue, athu ajiya gulongesa lukuma luabonga lua Yehowa adi athu anyi ana tuameza muene nu nyuma yenji handaga adi matemue enji.”​—Yesh. 43:12; 62:10.

Gungima dia gutshita diskur dienji, phangi Rutherford watangele mukanda umoshi wakhalele nu muto wa lumene egi: “Lumene Ludi Muhana Felela.” Athu agasue akhalele gu asamble yene atshiginyile ndaga jiakhalele mu mukanda wene handaga wakhalele muzuela egi phamba Ufumu wa Nzambi wajiya gubata “guhuima, umonyi, sante yawaha, monyo, diphanda nu gusuanguluga gua ivo nu ivo.” Gungima abalumuine mukanda wene mu mazuelelo avula nu awuzolele gifua batrakte ha guakalegela mu mudimo wa gulongesa. Ahanele athu batrakte hehi nu 40 milio.

Alongugi a Biblia asendeselego gutamegewa egi Matemue a Yehowa mu tangua diene. Uvi asendesele gukotelesa egi adi nu ginemo gia gukhala matemue a Yehowa nu gulongesa lukuma luabonga.

ALONGUGI A BIBLIA ASENDESA GUVUTUGILA ATHU

Luholo Alongugi a Biblia akhalele gudivudisa ha mavu agasue, a akuatesela ha guvutugila luko athu anyi atshiginyile lukuma luabonga. Gungima dia kampanye ga gukhapha trakte Lumene Ludi Muhana Felela, Bulletina yakhalele nu longo diakhalele muzuela egi: “Tshitenu yagasue ha guvutugila athu muabembela trakte Lumene Ludi Muhana Felela.”

Bulletin ya Janvier 1925 yakhalele nu rapore yakatugile gudi Mulongugi mumoshi wa Biblia wa mu dimbo dia Plano gu Texas, wazuelele egi: “Tudi gudihula muavula ha gumona egi tangua tudi muvutugila athu mu mafundo tualongesele gale, athu avula adi musuanguluga nu giamatshidia gubalega tangua tuana longesa mu mafundo ahe-ahe. Mu ivo 10 yabalega, alongeshi ayile mulongesa athu mbala thano mu gadimbo gamoshi gazonda ga mu terituare yetu. . . . Uvi mu masugu abalega, phangi wa mukhetu Hendrix nu mama wami ayile luko mulongesa mu gadimbo gene nu ahanyi athu mikanda yavula [gubalega].”

Phangi wa yala wa gu Panama wakhalele colporteur wasonegele egi: “Athu avula angukayele gumbo diawo mu mbala ya thomo, atshiginyile lukuma luabonga tangua ngavutugile luko mu mbala ya mbadi nga ya thathu. Givo giabalega, ngabalegesa matangua avula ha guvutugile luko athu ngalongesele thomo; ngasuangulugile muavula nu tangua tuabalegesele nawo hamoshi.”

NDAGA AKHALELE NAYE GUTSHITA MU MASUGU ADI MUZA

Gu gisugishilo gia givo 1925, phangi Rutherford watumidile avundji a njila agasue mukanda ha guawambela luholo mudimo wa gulongesa wakalegewe mu givo giene nu ndaga adi naye gutshita mu ivo idi muza. Wazuelele egi: “Mu givo giabalega, muakhadi nu ginemo gia gukuatesa athu akhadi nu gikenene. Mudimo wene wamisuanguluisa diago muavula . . . Uvi mu givo gidi muza, mudi nu luendu lua gulongesa lukuma luabonga luatadila Nzambi nu Ufumu wenji nu ha gumonesa gu meso a athu egi mudi diago akombeledi enji. . . . Tulandulenu gukalegela majui etu ha gutumbuisa Nzambi wetu nu Fumu wetu.”

Gu gisugishilo gia givo 1925, aphangi akhalele mutshigina gukomesa Betele ya gu Brooklyn. Mu 1926, ulondegi wakhalele naye gusendesa midimo yakoma ya gutunga inyi khenji yakalegewe galego.