LONGO DIA 40
LUNGIMBO 111 Ndaga jiana Tusuanguluisa
Yehowa udi Diago ‘Gusuanguluga Guetu’
‘ Mbanguya . . . gudi Nzambi, muene udi diago gusuanguluga guami.’—NGI. 43:4.
MU GUHIHIA
Tuza mumona ndaga jiajiya gutshita egi tukhadigo nu gusuanguluga nu ndaga tuajiya gutshita ha gukhala nu gusuanguluga.
1-2. a) Ndaga jitshi athu avula ana tagana najio mangino? b) Itshi tuza mumona mu longo edi?
MANGINO athu avula ana tshita yagasue ha gukhala nu gusuanguluga. Uvi ikhale ngenyi, anago gukhala nu gusuanguluga gua giamatshidia. Athu avula ana tagana nu ndaga jiana guahana gikenene, ndaga yene yana guatuma ha gutangiza egi ndaga mbajishigo muyila muabonga mukunda nu ene. Akombeledi a Yehowa nji ana tagana nu malamba. Luholo tudi mujinga “mu masugu a gisugishilo,” tuana tagana nu ndaga jiana gutusagesa nga gutuhana gikenene.—2 Tim. 3:1.
2 Mu longo edi, tuza mumona ndaga jiajiya gutshita egi tukhadigo luko nu gusuanguluga nu ndaga tuajiya gutshita ha gukhala nu gusuanguluga. Uvi thomo, tukambe gujiya muthu wajiya gutukuatesa ha gukhala nu gusuanguluga gua giamatshidia.
NANYI WAJIYA GUTUKUATESA HA GUKHALA NU GUSUANGULUGA?
3. Ima yafugile Yehowa idi gutulongesa itshi mukunda nu muene? (Tala ni ifuanesa.)
3 Yehowa wana khala Nzambi wa gusuanguluga nu wana tshigina egi esue nji tukhale nu gusuanguluga. Gishina giene wafugile ima yavula hagula tuajiya gukhala nu gusuanguluga. Ha gufezegesa, tuana suanguluga tangua tuana mona ima yavula idi ha mavu nu mikubu yagudisha. Tuana suanguluga nji tangua tuana mona shitu mukena nu tangua tuana gudia ima yabonga. Nzambi wana gutuzumba muavula nu wana tshigina egi tukhale nu gusuanguluga!
Mun’a ngiamba: Image © Romi Gamit/Shutterstock; an’a shitu yana temegewa egi pingouin: Vladimir Seliverstov/500px via Getty Images; tuana tua khomo: Rita Kochmarjova/stock.adobe.com; jishui mbadi: georgeclerk/E+ via Getty Images
Gula tuamona shitu mukena, yana gutukuatesa ha gujiya egi Yehowa udi Nzambi wa gusuanguluga (Tala paragrafe 3)
4. a) Itshi yana kuatesa Yehowa ha gukhala nu gusuanguluga ikhale wana mona malamba tuana tagana nawo? b) Kado gatshi gatuhanele Yehowa? (Ngimbo 16:11)
4 Yehowa wana mona malamba tuana tagana nawo nu wana gudisagesa nji muavula mukunda nu malamba ene. Uvi Biblia yana gumutamega egi “Nzambi wa gusuanguluga.” (1 Tim. 1:11) Na mukunda natshi Yehowa wana khala nu gusuanguluga? Idi handaga watombele gale lusugu mbalumanesela muene malamba agasue mayilago. Yehowa wana jiya ndaga tuana tagana najio nu wana gutukuatesa. Luholo lutshi? Idi luholo luatuhanele muene kado ga ndando. kado gene gadi gusuanguluga. (Tanga Ngimbo 16:11.) Tutadilenu luholo Yehowa wahanele mun’enji Yesu kado gene.
5-6. Mukunda natshi Yesu wana khala nu gusuanguluga?
5 Yesu udi muthu wa thomo wana khala nu gusuanguluga mukatshi dia ima yagasue yafugile Yehowa. Mukunda natshi tuazuela ngenyi? Tutadilenu ndaga eji mbadi jialandula. 1) ‘Udi gifuanesa gia Nzambi yonu ganago gumonega’ nu wana monesa makalegelo a sh’enji mu ndaga jiagasue. (Kol. 1:15) 2) Yesu wana khala nu gusuanguluga handaga wabalegesele matangua avula nu Yehowa Nzambi wa gusuanguluga.
6 Yesu wana khala nu gusuanguluga handaga wana kalagala ndaga jiagasue jiana gumutoga Yehowa ha gutshita. (Ish. 8:30, 31; Yone 8:29) Gishina giene Yehowa wana suanguluga nenji muavula.—Mat. 3:17.
7. Itshi tuajiya gutshita ha gukhala nu gusuanguluga?
7 Esue nji tuajiya gukhala nu gusuanguluga gula tudi musuena hehi nu Yehowa Nzambi wa gusuanguluga. Gula tudi muzula tangua dia gulonguga ndaga jiatadila Yehowa nu tudi mulandula gifezegeselo gienji, mbatukhala nu gusuanguluga. Mbatukhala nji nu gusuanguluga gula tudi mukalagala gutshigina gua Nzambi nu tudi mujiya egi tuana gumusuanguluisa.a (Ngi. 33:12) Uvi itshi tuajiya gutshita gula matangua ako tushigo nu gusuanguluga? Ndaga yene idi mumonesa egi Nzambi gashigo musuanguluga nu esue ba? Ndo sha! Yehowa wana jiya muabonga egi, matangua ako tuajiya gutagana nu malamba nga ndaga jiko jiajiya gutusagesa handaga tushigo athu atagana. (Ngi. 103:14) Tutadilenu ndaga jiajiya gutukatula gusuanguluga nu ndaga tuajiya gutshita ha gukhala luko nu gusuanguluga.
WAJIYA GUKHALA NU GUSUANGULUGA
8. Itshi yajiya gutubuila gula tuatagana nu malamba?
8 Ndaga ya thomo yajiya gutukatula gusuanguluga: Malamba. Udi musagesewa handaga udi Temue wa Yehowa ba? Gudi nu ndaga imoshi ya lamba yagubuila mu gisagumuisa ba? Nga ndo, udi gudisagesa handaga udi phutu, udi mukata nga wabua muthu wa gukola ba? Ndaga eji jiajiya gutuhana gikenene, muavula-muavula gula tushigo nu ndaga ya gutshita ha gumanesela milonga yene. Biblia yana monesa egi ‘gikenene giana lebesa muthu muila.’ (Ish. 15:13) Phangi Babis udi mukulu, wafishile phangi’enji wa yala nu mvuaji jienji mukatshi dia ivo nguana. Udi muzuela egi: “Ngadivile hakhami nu ngakhalelego nu muthu wa gungukuatesa. Matangua ako, ngakhalele nji muvua gikenene giavula handaga ngakhalele mutshigina gubalegesa nawo tangua hamoshi gutuama egi afue, uvi henyaha ngajiyilego luko gubalegesa nawo tangua.” Luholo lumoshi nji, ndaga tudi mutagana najio mu monyo wetu jiajiya gutshita egi tukhadigo luko nu gusuanguluga.
9. Itshi yajiya gutukuatesa ha gukhala luko nu gusuanguluga? (Yelemiya 29:4-7, 10)
9 Ndaga yajiya gutukuatesa ha gukhala luko nu gusuanguluga. Tuajiya gukhala nu gusuanguluga gula tushigo enya ndaga jiakola nu tudi nu khadilo dia guhana mersi. Enya ha mavu awa ana monesa egi tuajiyilego gukhala nu gusuanguluga gula tuatagana nu malamba. Uvi ishigo ngenyi. Ha gufezegesa, Yehowa wawambelele enya Yuda ayile mu uhiga gu Babilona ha gukhala nu gusuanguluga ikhale akhalele mutagana nu malamba. (Tanga Yelemiya 29:4-7, 10.) Ndaga yene idi gutulongesa itshi? Idi gutulongesa egi, tudi naye gutshita ngolo ha gutala ndaga jiabonga jia mu monyo wetu nu gusuanguluga nu ndaga jiene. Tubuitshigo nji mutshima egi Yehowa mbawutukuatesa. (Ngi. 63:7; 146:5) Tutadilenu gifezegeselo gia phangi Effie wanamenesewe mangololo gu aksida, gakhalelego luko nu luholo lua guwenda. Udi muzuela egi: “Yehowa nu enya fami yami nu aphangi a mu hungu angukuatesele nu anguhanele gikhesa. Ngana guahana mersi mukunda nu ndaga atshitshile mukunda nu ame nu jinyi ana gungukalegela. Hene ngana tshita yagasue ha gukhala nu gusuanguluga.”
10. Mukunda natshi tuajiya gukhala nu gusuanguluga ikhale tudi mutagana nu malamba?
10 Tuajiya gukhala nu gusuanguluga ikhale tudi mutagana nu malamba a luholo lutshi.b (Ngi. 126:5) Mukunda natshi tuazuela ngenyi? Handaga ndaga tudi mutagana najio jishigo jiene jiana tshita egi tukhale nu gusuanguluga. Phangi Maria udi muvundji wa njila udi muzuela egi: “Gukhala nu gusuanguluga tangua udi mutagana nu malamba ishigo mukotelesa egi ndaga yene ishigo gugusagesa. Uvi idi mukotelesa egi udi musha mutshima mu ndaga jiatulayele Yehowa. Muene mbawutukuatesa ha gukhala nu gusuanguluga.” Tujimbilago egi malamba tudi mutagana nawo mangino adi mukunda nu tangua diazonda. Gualeha ndo malamba ene agasue mbaahua, mbatuabuita diago mutshima.
11. Luholo lutshi gifezegeselo gia mupostolo Phaula giajiya gutukuatesa?
11 Matangua ako tuajiya gutangiza egi tudi mutagana nu malamba handaga Yehowa gashigo luko musuanguluga nu esue. Uvi ifezegeselo ya akombeledi a Yehowa a mu tangua dikulu atagenele nu malamba yajiya gutukuatesa. Tutadilenu gifezegeselo gia mupostolo Phaula. Yesu wamutombele ha gulongesa giamatshidia gudi “athu a ifutshi iko nu gudi mafumu nu gudi enya Isalele.” (Makal. 9:15) Yakhalele diago luendu luakoma mukunda nu muene! Uvi ikhale ngenyi, watagenele nji nu malamba avula. (2 Kol. 11:23-27) Luholo Phaula watagenele nu malamba idi mukotelesa egi Yehowa gakhalelego luko musuanguluga n’enji ba? Ndo sha! Luholo luakhalele muene mukolesela idi mumonesa egi Yehowa wakhalele gumukuatesa. (Roma 5:3-5) Esue nji tudi mutagana nu malamba, uvi tudi mulandula gukombelela Yehowa nu gujinginyina guagasue. Ndaga yene idi mumonesa diago egi Yehowa wana suanguluga nu esue.
12. Itshi yajiya gubua gula mafelela etu ashigo mutagenesewa?
12 Ndaga ya mbadi yajiya gutukatula gusuanguluga: Gula tushigo mutagenesa mafelela tuadishila. (Ish. 13:12) Tuana gudishila mafelela a mu nyuma handaga tuana zumba Yehowa nu tuana tshigina gumuhana mersi mukunda nu ndaga jiana gutukalegela muene. Uvi tuajiya guleba muila gula mafelela ene ashigo gudivua nu ndaga jia monyo wetu. (Ish. 17:22) Phangi Holly udi muvundji wa njila udi muzuela egi: “Ngakhalele mutshigina gungina Khalasa dia Alongeshi a Ufumu ha guya fundo diakhalele nu funu ya alongeshi nga guhana mago mu mudimo wa gutunga gu Ramapo. Uvi ndaga jiasombegesele, ngakhalelego luko nu luholo lua gutagenesa mafelela ene. Ndaga yene yangulebesele diago muila. Yana khala diago lamba gula ndaga udi mutshigina gutshita ishigo mutagenesewa.” Athu avula ana gudivua nji ngenyi.
13. Mafelela atshi tuajiya gudishila gula tushigo nu luholo lua gutshita ndaga jiavula mu mudimo wa Yehowa?
13 Ndaga yajiya gutukuatesa ha gukhala luko nu gusuanguluga. Tujimbilago egi Yehowa ganago gukhala muenya ndaga jiakola. Muene ganago gututoga ha gutshita ndaga jinyi tuajiyilego gutshita, uvi wana suanguluga nu ndaga jinyi tuajiya gutagenesa mu mudimo wenji. Yehowa wana tshigina egi tujiye mididilo yetu nu tukhale ya gujinginyina gudi muene. (Mika 6:8; 1 Kol. 4:2) Wana zula nu ndando umuthu wetu wa mukatshi gubalega ndaga tuana tshita. Hene ishigo ndaga yabonga gula tudi mukamba gutshita ndaga jiavula gubalega jinyi jiana gututoga Yehowa ha gutshita.c Gula ndaga jia mu monyo waye jishigo guguhana njila ha gutshita ndaga jiavula mu mudimo wa Yehowa, tshita ndaga jinyi wajiya gutagenesa. Ha gufezegesa, wajiya gukuatesa mavuala nu guhana aphangi a gukola gikhesa. Wajiya nji gudishila felela dia guya mutala aphangi gumbo diawo, guatamega gu telefone nga guatumina mesaje ha guahana gikhesa. Yehowa wana suanguluga gula tudi mutshita ndaga jinyi tuajiya gutshita nu mbawutukuatesa ha gukhala nu gusuanguluga! Tujimbilago egi gualeha ndo, mu mavu ahe-ahe, mbatukhala nu luendu lua gukalegela Yehowa mu maluholo avula! Phangi Holly tuazuelela gu thunda udi muzuela egi: “Gula ngaleba muila, ngana tangiza egi gudi nu lusugu mbanguheta monyo wa ivo nu ivo. Ngana jiya nji egi mu masugu adi muza, Yehowa mbawungukuatesa ha gutagenesa mafelela ami ako.”
14. Ndaga itshi iko yajiya gutukatula gusuanguluga?
14 Ndaga ya thathu yajiya gutukatula gusuanguluga: Gukamba gudisuanguluisa. Athu ako ana kalegela internet ha gumonesa egi ana khala nu gusuanguluga handaga adi nu ima yavula yabonga. Hene tuajiya gusendesa gutangiza egi gutshita ndaga gifua: gusumba ima, gutshita saga nu guya mu mafundo a gudisha guajiya gutubatela gusuanguluga. Ishigo ndaga yabola ha gusuanguluga nu ima eyi. Yehowa wana tshigina egi tusuanguluge nu ima yafugile muene. Uvi athu avula akambele gudisuanguluisa akotelesele gale egi ndaga akhalele mutangiza egi jiajiya guabatela gusuanguluga jiabatelego gusuanguluga guene. Phangi Eva udi muvundji wa njila udi muzuela egi: “Gula udi mutshigina gudisuanguluisa mbawusuangulugago nu ima udi nayo.” Tuajiya guleba muila nga guvua gikenene gula tudi mukamba gudisuanguluisa tangua diagasue.
15. Longo ditshi tuajiya guzula mu lumene lua Fumu Salomo?
15 Enya ha mavu awa ana monesa egi ajiya gukhala nu gusuanguluga gula adi nu makuta nu adi mutshita ndaga jiagasue atshigina. Uvi ndaga yene ishigo ya giamatshidia, handaga gutshita ngenyi guanago gubata gusuanguluga. Lumene lua Fumu Salomo ludi mumonesa ndaga yene haphelo. Wavile gikenene gungima dia gudisuanguluisa. Watshitshile ndaga jiavula hagula wajiya gukhala nu gusuanguluga. Ha gufezegesa, wakhalele mudia ima yabonga, gutegelela miziki yawaha nu gusumba ima ya ndando. Uvi ima yene yamubatelelego gusuanguluga. Wazuelele egi: ‘Meso anago gukuta ha gutala, matshui nji anago gukuta ha guvua.’—Mulo. 1:8; 2:1-11.
16. Luholo lutshi gudihana ha gukuatesa athu ako guajiya gutubatela gusuanguluga? (Tala nji ifuanesa.)
16 Ndaga yajiya gutukuatesa ha gukhala luko nu gusuanguluga? Yesu wazuelele egi: “Muthu udi muhana wana khala nu gusuanguluga guavula gubalega muthu udi muzula.” (Makal. 20:35) Phangi Alekos udi mukulu udi muzuela egi: “Ngana kalagala ngolo ha gukuatesa athu ako ikhale mu ndaga jiazonda-zonda. Ngana khala nu gusuanguluga handaga tangua ngana guakuatesa, nganago gutangiza ndaga ngana tshigina.” Itshi wajiya gutshita mukunda nu athu ako? Gula wamona muthu mu lamba, mukuatese. Yajiya gukhala egi ushigo nu luholo lua gumanesela mulonga wenji, uvi wajiya gumukuatesa gula wamutegelela muabonga, wakamba gukotelesa luholo ludi gudivua muene nu wamukuatesa ha gubembela Yehowa ginemo gienji. (Ngi. 55:22; 68:19) Wajiya gumukuatesa ha gujiya egi Yehowa gamubembelego. (Ngi. 37:28; Yesh. 59:1) Wajiya nji gumukuatesa nu ima iko ajiya gukhala nayo funu gifua, gumuhana ima ya gudia nga gubalegesa nenji tangua. Wajiya guya nenji mu mudimo wa gulongesa, gutshita ngenyi guajiya gumukuatesa ha gudivua muabonga. Hene bemba egi Yehowa agukalegele ha guhana athu ako gikhesa. Yadiago, gula tudi gudihana ha gukuatesa athu ako, mbayitukuatesa ha gukhala nu gusuanguluga!—Ish. 11:25.
Khala gudihana ha gukuatesa athu ako ha fundo dia gutshita phamba ndaga udi mutshigina (Tala paragrafe 16)d
17. Itshi tudi naye gutshita gula tudi mutshigina gukhala nu gusuanguluga? (Ngimbo 43:4)
17 Tuajiya gukhala nu gusuanguluga gula tudi mukolesa ufuta wetu nu Tata wetu wa mu dilu. Biblia idi gututshiginyisa egi Yehowa udi ‘gusuanguluga guetu.’ (Tanga Ngimbo 43:4.) Hene ikhale ndaga jitshi tudi mutagana najio, tushigo naye guvua gikenene nga woma. Handaga luholo Yehowa udi futa dietu diabonga, mbawutukuatesa ha gukhala nu gusuanguluga!—Ngi. 144:15.
LUNGIMBO 155 Suangulugenu Tangua Diagasue
a Tala galuanda “Luholo Yehowa Wana Gutuhana Gusuanguluga.”
b Ha gufezegesa, tala lumene lua phangi Dennis nu Irina Christensen mu video ya 2023 ya Mbimbi jia Hunji dia Akulu Atuameji Gitshinyi gia #5 ya français idi mu jw.org.
c Ha gujiya ndaga jiavula tala longo “Des attentes raisonnables . . . pour être joyeux !” mu Inzo Yaleha ya Mutaledi ya 15 Juillet 2008 ya français.
d UKOTELESHI WA GIFUANESA: Phangi mumoshi wa mukhetu wasumba ima yenji yavula, uvi udi nu gusuanguluga guavula tangua dia sumbila muene phangi wa mukhetu wa gukola iyaji ha gumuhana gikhesa.