Wakhala nu Ndando Yavula gu Meso a Yehowa!

1-2. Itshi yajiya gutukuatesa ha gutshigina egi tuakhala nu ndando gu meso Yehowa?

AKOMBELEDI a Yehowa akhala nu ndando yavula gu meso enji. Uvi gudi nu ako mukatshi diawo ana tangiza egi ashigo diago nu ndando. Yajiya gukhala egi ndaga yana guatuma ha gutangiza ngenyi idi handaga athu ako a akalegele ndaga jiabola jiatumile ha gutangiza egi ashigo nu ndando. Aye nji wana tangiza ngenyi ba? Gula idi ngenyi, itshi yajiya gugukuatesa ha gutshigina egi wakhala nu ndando gu meso a Yehowa?

² Ndaga yajiya gugukuatesa idi gutanga mene jia Biblia jiana monesa luholo Yehowa wana tadila athu nu wana guakalegela ndaga. Mun’enji Yesu wakhalele nji mukalegela athu ndaga nu ginemua. Ngenyi wamonesele egi muene nu sh’enji ana guzula nu ndando yavula athu ana tangiza egi ashigo diago nu ndando. (Yone 5:19; Heb. 1:3) Mu longo edi tuza mumona: 1) luholo Yesu wakuatesele athu ha gukotelesa egi adi nu ndando nu 2) ndaga yajiya gutukuatesa ha gutshigina egi tuakhala diago nu ndando gu meso Nzambi.​—Hag. 2:7.

YESU WAKUATESELE ATHU HA GUKOTELESA EGI ADI NU NDANDO

3. Luholo lutshi Yesu wakuatesele enya gu Galilea?

³ Tangua Yesu wakhalele mulongesa gu Galilea, athu avula ajile gudi muene hagula a alongese nu a asage. Wazuelele egi athu ene “akhalele mumona lamba nu guwungagana gifua imeme ishigo nu mubambi.”(Mat. 9:36; tala nji note d’étude mu Biblia ya français.) Mafumu awo a ikombelelo akhalelego guazula nu ndando, akhalele guatamega egi “athu atewe mukumbu.” (Yone 7:47-49; tala nji note d’étude mu Biblia ya français.) Uvi Yesu wakhalele guakalegela ndaga nu gisemo nu ginemua luholo luazudile muene tangua dia gualongesa nu guasaga misongo yawo. (Mat. 9:35) Luholo luakhalele muene mutshigina gukuatesa athu avula, wahanele apostolo enji formasio ha gulongesa athu nu waawambelele ha gusaga athu akhalele nu misongo.​—Mat. 10:5-8.

4. Malongo atshi tuazula mu luholo Yesu wakhalele mukalegela athu akhalele gumutegelela ndaga?

⁴ Luholo Yesu wakalegele athu ndaga nu gisemo nu ginemua, wamonesele egi muene nu sh’enji ana zula nu ndando yavula athu anyi athu ako ana tangiza egi ashigo nu ndando. Gula wana gukombelela Yehowa uvi wana tangiza egi ushigo nu ndando, tangiza ndaga yakalegele Yesu gudi athu a gudibulumuisa akhalele muza ha gulongesewa gudi muene. Gutshita ngenyi guajiya gugukuatesa ha gujiya egi wakhala nu ndando gu meso a Yehowa.

5. Itshi tudi mujiya mukunda nu mukhetu watagenele nu Yesu gu Galilea?

⁵ Yesu wakhalele mulongesa athu avula uvi matangua ako wakhalele mulongesa nu gukuatesa muthu hakhenji. Ha gufezegesa, hakhalele muene mulongesa gu Galilea, watagenele nu mukhetu mumoshi wakhalele muzoga mahatshi ivo 12. (Mako 5:25) Ha gutadila mukhuala, mukhetu muene wakhalele usala nu muthu wagasue wakhalele gumukuata wakhalele nji mubua usala. Hene, yajiya gukhala egi wakhalele mubalegesa tangua diavula hakhenji. Gakhalelego nji nu luholo lua gudibungisa nu athu ako ha gukombelela Yehowa nga mu mawano. (Levi 15:19, 25) Yadiago, mukhetu muene wakhalele mukata nu yajiya gukhala egi wakhalele mutangiza egi gashigo nu ndando.​—Mako 5:26.

6. Ndaga itshi yakalegele mukhetu muene ha gusagewa?

⁶ Mukhetu owu wakhalele mukata diago, wakhalele mutshigina egi Yesu amusage. Uvi wavuile woma ha guya gudi muene mbala imoshi. Mukunda natshi? Handaga yajiya gukhala egi wakhalele muvua sonyi mukunda nu misongo yenji. Nga ndo wakhalele muvua woma egi Yesu mbawumudingila handaga wakhalele usala nu gakhalelego naye gukhala mukatshi dia athu. Hene, wakuatele songi ya mulele wenji handaga wakhalele nu gutshigna egi gutshita ngenyi mbagumusaga. (Mako 5:27, 28) Nzambi washimbigile gutshigina guenji, misongo yenji yahuile. Gungima tangua Yesu wahudile gula nanyi wamukuata, mukhetu muene wamuwambelele ndaga jiagasue jiakalegele muene. Ndaga itshi yakalegele Yesu?

7. Luholo lutshi Yesu wakuatesele mukhetu mumoshi wakhalele mukata mangololo? (Mako 5:34)

⁷ Yesu wakalegele mukhetu muene ndaga nu gisemo nu ginemua giagasue. Wamonele egi mukhetu muene wakhalele ‘muvua woma nu wakhalele mudigita.’ (Mako 5:33) Hene, watele n’enji maga nu gisemo giagasue, wamuhanele nji gikhesa. Wamutamegele nji egi “mun’ami,” mbimbi yene yakhalele mumonesa gisemo nu guzumba guakhalele nago Yesu mukunda nu mukhetu muene. (Tanga Mako 5:34.) Biblia yana monesa egi phamba mu lusugu luene Yesu wakalegele mbimbi “mun’ami” ha gutamega mukhetu mumoshi. Yajiya gukhala egi wakalegele mbimbi yene ya gisemo handaga mukhetu muene wakhalele muvua woma. Tangiza gale luholo mukhetu muene wadivile! Nga Yesu gamuwambelelego mbimbi jiene, nga mukhetu muene wakhalele naye gulandula gudibela ikhale misongo yenji yasagewe. Uvi Yesu wamukuatesele ha gudivua muabonga nu ha gujiya egi Yehowa wana gumuzumba nu wana gumuzula nu ndando.

8. Malamba atshi atagenele nawo phangi mumoshi wa mukhetu wa gu Brésil?

⁸ Mangino nji, akombeledi a Nzambi ako ana khala nji nu misongo yana gualebesa muila nga guatuma ha gutangiza egi ashigo nu ndando. Phangi Mariaa udi muvundji wa njila wa tangua diagasue gu Brésil, wavuadiwe nu koko dimoshi nu kulu dimoshi. Udi muzuela egi: “Akhalele gungusagesa muavula gu khalasa ha mulonga nu ndaga yene. Akhalele nji gungutamega mu majina abola. Nu ene enya fami yami akhalele gungusagesa; ndaga yene yangutumile ha gutangiza egi ngushigo gami nu ndando.”

9. Itshi yakuatesele phangi Maria ha gujiya egi wakhala nu ndando gu meso a Yehowa?

⁹ Itshi yakuatesele phangi Maria? Habuile muene Temue wa Yehowa, aphangi a mu hungu diawo amuhanele gikhesa, amukuatesele nji ha guditadila gifua luholo Yehowa wana gumutadila. Udi muzuela egi: “Aphangi avula diago angukuatesele! Ngana hana Yehowa mersi nu mutshima wami wagasue mukunda nu fami yabonga ya mu nyuma yanguhanele muene.” Aphangi a mala nu a akhetu akuatesele phangi Maria ha gujiya egi wakhala nu ndando gu meso a Nzambi.

10. Itshi yakhalele musagesa Madiya wa gu Magadala? (Tala nji ifuanesa.)

¹⁰ Tutadilenu luholo Yesu wakuatesele Madiya wa gu Magadala. Wakhalele nu bademo 7! (Luka 8:2) Yajiya gukhala egi bademo ene akhalele gumutuma ha gukalagala ndaga jiko jinyi jiatumile athu ako ha gumulenga. Mu tangua diene dia lamba, yajiya gukhala egi wavile woma wavula nu watangijile egi gushigo nu muthu wana gumuzumba nga wajiya gumukuatesa. Uvi Yesu wamuzolele bademo ene akhalele gumumonesa lamba, Madiya wabuile nji mulandudi wenji. Mu luholo lutshi luko Yesu wakuatesele Madiya wa gu Magadala ha gukotelesa egi wakhala nu ndando gu meso a Nzambi?

11. Luholo lutshi Yesu wakuatesele Madiya wa gu Magadala ha gukotelesa egi wakhala nu ndando gu meso a Nzambi? (Tala nji ifuanesa.)

¹¹ Yesu watamegele Madiya wa gu Magadala ha guya n’enji mu mafundo akhalele muene mulongesa.b Ndaga yene yamukuatesele ha gulandula guvua malongo Yesu wakhalele mulongesa athu ako. Yesu wamonegene nji gudi muene mu lusugu luafuzumugile muene. Madiya wakhalele nji mukatshi dia alandudi a thomo anyi azuelele nu Yesu mu lusugu luene. Yesu wamuhanele nji luendu lua guya muwambela apostolo enji egi wafuzumuga gale. Ndaga jiene jiagasue jiakalegele Yesu mukunda nu muene, jiamukuatesele ha gukotelesa egi wakhala nu ndando gu meso Yehowa!​—Yone 20:11-18.

12. Itshi yatumile phangi Lidia ha gutangiza egi athu ako ajiyilego gumuzumba?

¹² Gifua Madiya wa gu Magadala, athu avula nji mangino ana tangiza egi gushigo nu muthu wajiya guazumba. Phangi Lidia wa gu Espagne udi muzuela egi tangua mama wawo wakhalele nu vumo dienji, wakhalele mutshigina gudizola. Udi muwunguluga egi hakhalele muene mona wazonda, mama wawo gakhalelego gudisagesa mukunda nu muene, wakhalele nji gumuwambela mbimbi jiabola. Udi muzuela egi: “Monyo wami wagasue, ngakhalele gudifelela egi athu ako angutshigine nu anguzumbe. Ngakhalele muvua woma egi ikhale ngatshita gami itshi, athu mbaashigo gunguzumba handaga mama wakhalele gunguwambela egi ngakhala muthu wabola.”

13. Itshi yakuatesele phangi Lidia ha gukotelesa egi wakhala nu ndando gu meso a Yehowa?

¹³ Tangua phangi Lidia wasendesele gulonguga giamatshidia, ndaga jiasombegesele. Isambu nu gulonguga guenji gua Biblia nu mbimbi jia gisemo jia aphangi a mu hungu yamukuatesele ha gukotelesa egi wakhala nu ndando gu meso a Yehowa. Udi muzuela egi: “Mulumi’ami wana gunguwambela tangua diagasue egi wana gunguzumba. Wana gunguwambela nji makalegelo ami abonga. Mafuta ami ako ana tshita nji ngenyi.” Gudi nu muthu udi mutangiza egi wajiya gumukuatesa ha gukotelesa egi wakhala nu ndando gu meso a Yehowa ba?

TUKHALE GUDITADILA GIFUA LUHOLO YEHOWA WANA GUTUTADILA

14. Luholo lutshi 1 Samuele 16:7 yana gutukuatesa ha guditadila gifua luholo Yehowa wana gututadila? (Tala nji galuanda “Mukunda Natshi Yehowa Wana Zula Akombeledi Enji nu Ndando?”)

¹⁴ Ujimbilago egi Yehowa ganago gugutadila gifua luholo athu a ha mavu awa ana gugutadila. (Tanga 1 Samuele 16:7.) Athu a ha mavu awa ana zula muthu nu ndando ha gutadila luholo luenji lua gusudiga, guvula gua makuta akhala nawo muene nga makhalasa alongugile muene; uvi Yehowa ganago gutadila ndaga mu luholo lunu. (Yesh. 55:8, 9) Hene, ha fundo dia guditadila gifua luholo athu ana gugutadila, tshita yagasue ha guditadila gifua luholo Yehowa wana gugutadila. Biblia yakhala nu mene jia athu akhalele mutangiza egi ashigo nu ndando gifua Eliya, Naomi nu Ana. Zula tangua dia gutanga mene jiene ha gumona luholo Yehowa wakhalele guazumba. Wajiya gusonega ndaga watagenele najio mu monyo waye jidi mumonesa egi Yehowa wana guguzumba nu wana guguzula nu ndando. Wajiya nji gutala malongo adi mu mikanda yetu nu mu video jietu ana zuelela ndando tuakhala nayo gu meso a Yehowa.c

15. Mukunda natshi Danyele wakhalele nu ndando yavula gu meso a Yehowa? (Danyele 9:23)

¹⁵ Khala mujiya egi gujinginyina guaye guana gugubuisa nu ndando yavula gu meso a Yehowa. Mu tangua dimoshi ngenyi, profete Danyele ‘wahuidile diago muavula,’ walebele nji muila; yajiya gukhala egi wakhalele nu ivo gubalega 90 mu tangua diene. (Dan. 9:20, 21) Luholo lutshi Yehowa wamukuatesele? Watumile muanjelo Gabriyele ha gumuwambela egi wakhala ‘nu ndando yavula’ nu Yehowa wategelele nji isambu yenji. (Tanga Danyele 9:23.) Mukunda natshi Danyele wakhalele nu ndando yavula gu meso a Nzambi? Handaga wakhalele muthu wabonga nu wakhalele nji wagujinginyina gudi Yehowa. (Ezek. 14:14) Yehowa wasonegesele lumene luene mu Biblia ha gutukuatesa. (Roma 15:4) Yehowa wana tegelela nji isambu yaye nu wana guguzula nu ndando mukunda nu luholo wana zumba ndaga jiabonga nu luholo wakhala wagujinginyina gudi muene.​—Mika 6:8; Heb. 6:10.

16. Itshi yajiya gugukuatesa ha guzula Yehowa gifua sh’aye wana guguzumba?

¹⁶ Khala muzula Yehowa gifua sh’aye wana guguzumba. Yehowa wana tshigina gugukuatesa, ganago gulanduishila tundaga tuagasue tuabola wana kalagala. (Ngi. 130:3; Mat. 7:11; Luka 12:6, 7) Gutangigiza ndaga yene guakuatesele gale athu avula akhalele mutangiza egi ashigo nu ndando. Ha gufezegesa, phangi Michelle wa gu Espagne wakhalele mutangiza egi gushigo nu muthu wana gumuzumba nu gashigo nu ndando handaga mulumi’enji wakhalele gumuwambela mbimbi jiabola ivo yavula. Udi muzuela egi: “Tangua diagasue ngana gudivua egi ngushigo nu ndando, ngana tshita yagasue ha gutangiza egi Yehowa wana gungubata ha mago enji, wana gunguzumba nu wana gungubamba.” (Ngi. 28:9) Tangua diagasue phangi Lauren wa gu Afrique du Sud wana gudivua egi gashigo nu ndando, wana gudiwunguluisa egi: “Gula Yehowa wangunanele gudi muene nu guzumba guagasue nu wangukuatesele ha gusala wagujinginyina gudi muene mu ivo eyi yagasue yabalega nu wana gungukalegela ha gulongesa athu ako, idi yadiago egi wana gunguzumba nu ngudi nu ndando gu meso enji.”​—Hosh. 11:4.

17. Itshi yajiya gugukuatesa ha gusha mutshima egi Yehowa wana gugutshigina? (Ngimbo 5:12) (Tala nji gifuanesa.)

¹⁷ Khala musha mutshima egi Yehowa wana gugutshigina. (Tanga Ngimbo 5:12.) Davidi wafuanesele guzumba gua Yehowa nu ‘tshibu yakoma’ yana gubamba athu abonga. Gujiya egi Yehowa wana gugutshigina nu wana gugukuatesa guajiya gugukuatesa ha gutuna gutangiza egi ushigo nu ndando. Itshi yajiya gugukuatesa ha gujiya egi Yehowa wana gugutshigina? Gifua luholo tuayimonyi, Yehowa wana guguwalagana mu njila ya Biblia. Wana kalegele nji akulu nu mafuta abonga nu athu ako ha gugukuatesa ha guwunguluga egi wakhala nu ndando gu meso enji. Itshi wajiya gukalagala gula athu ako adi guguwambela ndaga jiabonga?

18. Mukunda natshi udi naye gutshigina ndaga jiabonga jiana guguwambela athu ako?

¹⁸ Gula athu ana gugujiya muabonga nu ana guguzumba aguwambela ndaga jiabonga, utangizago egi adi guguhuiga. Khala mujiya egi Yehowa wajiya guakalegela ha gugukuatesa ha gujiya egi wana gugutshigina. Phangi Michelle tuazuelela gu thunda udi muzuela egi: “Henyaha ngabuile gale gutshigina hazonda-hazonda mbimbi jiabonga jiana gunguwambela athu ako. Yakhala lamba uvi ngudi mujiya egi yene ndaga Yehowa wana tshigina egi ngutshite.” Akulu akuatesele nji phangi Michelle nu gisemo giagasue ha gujiya egi Yehowa wana gumutshigina. Mangino udi muvundji wa njila wa tangua diagasue, wakhala nji volontere gu Betele.

19. Mukunda natshi tudi naye gusha mutshima egi tuakhala nu ndando gu meso a Nzambi?

¹⁹ Yesu wana gutuwambela nu gisemo giagasue egi tuakhala nu ndando yavula gu meso a sh’etu wa mu dilu. (Luka 12:24) Hene, tuajiya diago gusha mutshima egi Yehowa wana gutuzula nu ndando yavula. Tushigo naye gubuita ndaga yene mutshima! Tulandulenu nji gukuatesa athu ako ha gujiya egi akhala nu ndando yavula gu meso a Nzambi!