“Kalagalenu Ngolo ha Gukhala Hamoshi mu Nyuma”
MUPOSTOLO Phaula wawambelele Aklisto a gu Efeso egi: ‘Khalenu nu gudivua guabonga nu akuenu nu guzumba guagasue. Kalagalenu ngolo ha gukhala hamoshi mu nyuma; guhuima gukhale gifua ngonji jidi gumijitshiga hamoshi.’—Ef. 4:2, 3.
“Nyuma,” yakotelesa egi ngolo jia Nzambi, yana gutukuatesa ha “gukhala hamoshi” nga mu gudivua. Uvi gifua luholo Phaula wayimonesele, yana toga gutshita ngolo ha gubamba gudivua guene. Na nanyi udi naye guyitshita? Muklisto wagasue udi naye gutshita “ngolo ha gukhala hamoshi mu nyuma.”
Ha gufezegesa, tangiza gale egi muthu waguhana gamiyo gahe-gahe. Nanyi udi nu ginemo gia gubamba gamiyo gene? Aye mujiya mvutu ya muhu owu. Gula gamiyo gene gabola handaga wagabambelego muabonga, wajiyilego guzuela egi idi gubola gua muthu waguhanele nago.
Luholo lumoshi nji, gudivua tuakhala nago mukatshi dietu gudi kado gatuhanele Nzambi, uvi muthu wagasue mukatshi dietu udi naye gutshita ngolo ha gubamba gudivua guene. Gula tushigo gudivua nu phangi mumoshi wa yala nga wa mukhetu, tuajiya gudihula egi: ‘Ngudi diago mutshita ngolo ha gubamba gudivua gua mu hungu dietu ba?’
‘KALAGALA NGOLO’ HA GUKHALA MU GUDIVUA NU ATHU AKO
Gifua luholo Phaula wayimonesele, matangua ako yana toga gutshita ngolo ha gukhala hamoshi mu nyuma gila phangi wa yala nga wa mukhetu watukalegela ndaga yabola. Na idi mukotelesa egi ha gubamba gudivua, ndaga yabonga ya gutshita idi phamba guya mumona phangi muene ha guzuelela mulonga wene ba? Ndo sha. Dihule egi: ‘Gula ngaya mumona phangi muene, mbangulondega mulonga wene nga ndo mbanguwubolesa luko muavula gubalega?’ Matangua ako, ndaga yabonga ya gutshita yakhala gutotesela muthu muene nu gubuita mutshima.—Ish. 19:11; Mako 11:25.
Dihule egi: ‘Gula ngaya mumona phangi muene, mbangulondega mulonga wene nga ndo mbanguwubolesa luko muavula gubalega?’
Gifua luholo Phaula wayisonegele, tulandulenu gukhala mu ‘gudivua guabonga nu akuetu nu guzumba guagasue.’ (Ef. 4:2) Mukanda umoshi wana zuela egi mbimbi jiene jiajiya gubalumuiwa egi “guayamba gifua luholo adi.” Yakotelesa egi tudi naye gutshigina egi aphangi etu Aklisto ashigo athu atagana nu matangua ako ana kalagala gubola gifua esue. Idi yadiago egi tudi naye gulandula gusudiga “umuthu uhe-uhe.” (Ef. 4:23, 24) Uvi gushigo nga nu muthu makatshi dietu wajiya gukalagala ndaga mu luholo luatagana. (Roma 3:23) Hene, gula tuabamba ndaga yene mu matangi, mbayitukuatesa ha gukhala mu gudivua nu akuetu, ha guatotesela nu ha gutshita “ngolo ha gukhala hamoshi mu nyuma.”
Gula tudi mutotesela athu ako nu tudi mubuita mutshima gu ndaga jiabola atukalegela, mbatumonesa egi tudi mutshita yagasue ‘ha gukhala hamoshi mu nyuma’ nu tudi mubemba egi ‘guhuima gukhale gifua ngonji jidi gutujitshiga hamoshi.’ Mbimbi ya Greke yabalumuiwe mu Efeso 4:3 egi ‘ngonji jidi gumijitshiga hamoshi’ yajiya nji gumonesa ima yana gukuatenesa ifuwa hamoshi mangololo. Luholo lumoshi nji, guhuima nu guzumba tuakhala nago mukunda nu aphangi’etu guana gutukuatesa ha gubamba gudivua tuakhala nago mukatshi dietu, ikhale matangua ako aphangi ene ana tshita ndaga jishigo gutusuanguluisa.
Hene, gula phangi mumoshi wagukalegela ndaga yabola nga ndo waguhana khabu, tshita yagasue ha gumuvuila khenda ha fundo dia gutadila phamba gubola guakalagala muene. (Kol. 3:12) Mukut’etu agasue tushigo athu atagana, nu muene aye matangua ako wakalegele gale muthu ndaga yabola. Gula wabamba ndaga yene mu matangi, mbayigukuatesa ha gutshita “ngolo ha gukhala hamoshi mu nyuma” nu aphangi ako.