Ukuateshi Mukunda nu Akhetu Ana Gumonesewa Malamba
“HA MAVU agasue, akhetu avula nu an’a akhetu avula ana gumonesewa malamba. Aye nji udi mukatshi dia akhetu ene ba? Longo edi diza gugukuatesa ha gumona gishina Nzambi wana gudisagesa mukunda nu aye nu wana tshigina egi ukhale mu ubambi, diza nji mumonesa ndaga Nzambi mbawutshita athu ana gumonesa akhetu lamba.”
Mbimbi eji jidi mbimbi jia gisendeselo jia longo “La sécurité des femmes : Ce qu’en dit la Bible” diakhala mu jw.org. Gu suga ya longo diene, guakhala nu lien yana kuatesa ha gu télécharger longo diene mu format PDF, gungima muajiya gudizola ha papie nu gudifugula gifua trakte ya mayiji nguana. Phangi Stacy wa gu États-Unis udi muzuela egi: “Ame nu phangi muko wa mukhetu tuazolele bakopi a longo diene, gungima tuayile nawo gu inzo ana kuatesa akhetu amonesewe lamba yakhala mu terituare ya hungu dietu.”
Muthu mumoshi wana tshita mudimo gu inzo yene watogele gula ajiya gumuhana bakopi ako hagula wajiya guahana gudi athu ana khala mu inzo yene. Aphangi ene a akhetu amuhanele bakopi 40 a longo diene nu bakarte 30 a gunginyila mu site yetu jw.org. Tangua avutugile luko ha guatala, fumu wana tadila inzo yene watogele aphangi gula ajiya guwambela akhetu ana khala mu inzo yene luholo gulonguga Biblia guana kalegewa.
Phangi Stacy nu aphangi ako a akhetu mbadi ayile gu inzo iko yana kuatesa akhetu, ahanele athu bakopi thano a longo diene; athu ene a atogele nji bakopi ako. Muthu mumoshi wana tshita mudimo gu inzo yene wazuelele egi: “Longo edi diza mukuatesa akhetu avula haha.” Wazuelele luko egi: “Tudi nu funu ya longo diene.” Tangua aphangi ene avutugile luko, akhetu avula a mu inzo yene adibungishile ha gutala luholo gulonguga gua Biblia guana kalegewa, mbadi mukatshi diawo azuelele egi mbaaya mu gudibungisa gua mu hungu gu Inzo ya Ufumu mu phoso idi muza.
Phangi Stacy udi muzuela egi: “Tuana khala nu gusuanguluga ha gumona luholo athu ana gutshigina longo edi diabonga. Gula wazola bakopi a longo diene ha papie nu waafugula gifua trakte, ajiya gugukuatesa ha gulongesa lukuma luabonga gudi akhetu ana gumonesewa malamba. Tuakhalele nu gusuanguluga ha gumona luholo athu akhalele musuanguluga nu longo diene. Tudi munengena nu mitshima zagu-zagu ha gumona luholo Yehowa mbawutukuatesa ha gulandula gulongesa akhetu ene lukuma luabonga.”