Mihu Yana Guhula Athu Ana Gutanga Mikanda Yetu
“Matangi” atshi mbaamba Yehowa mu mitshima ya ifutshi gualeha ndo?
Mukanda wa Gumonesa 17:16, 17 udi muzuela mukunda nu gisendeselo gia lamba diakola egi: “Mbinga kumi wamonyi nu shitu ya mu foto mbajituna mukhetu ya thambi, mbajimutambula ima yenji yagasue nu mbajimubemba thowa; mbajidia misunyi ya muila wenji nu mbajimukonda diago tshuya. Handaga Nzambi wambi matangi mu mitshima yawo hagula atagenese gutshigina guenji, ayi, atagenese gutshigina guawo hakhawo, luholo ahanyi ufumu wawo gudi shitu ya mu foto.” Mu ivo yabalega, mikanda yetu yakhalele muzuela egi “matangi” mbaamba Yehowa mu mitshima ya ifutshi akhala matangi a gushiya ikombelelo ya mambo.
Uvi idi nu ndando egi tusombegese luholo luetu lua gukotelesa profesi yene. “Matangi” mbaamba Yehowa mu mitshima ya ifutshi mbaakhala a guatuma ha guhana “ufumu wawo gudi shitu ya mu foto.” Mvutu jia mihu yalandula mbajitukuatesa ha gukotelesa muabonga gutagenesewa gua profesi yene.
Akuatshi adi muzuelela mu profesi yene? Thomo, “mukhetu wa thambi” wana tamegewa nji egi “Babilona Yakoma”; wana monesa ikombelelo yagasue ya mambo. Ya mbadi, “shitu ya mu foto yabenga,” idi mumonesa Organisation des Nations Unies (ONU). Yazolewe mu 1919 mukunda nu gubata guhuima ha mavu agasue, mu tangua diene yakhalele mutamegewa egi Société des Nations. (Gumo. 17:3-5) Ya thathu, “mbinga kumi,” jiana monesa baguvernema agasue ana kuatesa shitu ya mu foto.
Gilangalo gitshi giakhala mukatshi dia mukhetu wa thambi nu shitu ya mu foto yabenga? Mukhetu wa thambi udi “wa gukhala holu” dia shitu ya mu foto, yakotelesa egi wana guyikuatesa nu wana tshigina guyituma ha gutshita ndaga yagasue yatshigina muene.
Itshi mbayibuila mukhetu wa thambi? Shitu ya mu foto nu mbinga kumi jiana guyihana mago “mbajituna mukhetu ya thambi.” Mbajimutambula ima yenji yagasue nu mbajimonesa haphelo makalegelo enji abola. Gungima mbaamushiya gifua luholo luazuelele Yehowa. (Gumo. 17:1; 18:8) Mbayikhala gisugishilo gia ikombelelo yagasue ya mambo. Uvi gutuama egi ndaga yene ibue, Yehowa mbawutuma ifutshi ha gutshita ndaga imoshi inyi khenji yakalegewe galego sendese athu ana guhinyina.
Yehowa mbawutuma ifutshi ha gutshita itshi? Yehowa mbawumba “matangi” enji mu mitshima ya mbinga kumi, yakotelesa egi mbawujituma ha guhana “ufumu wawo gudi shitu ya mu foto [yabenga],” yakotelesa egi Organisation des Nations Unies. (Gumo. 17:13) Ndaga yene idi mukotelesa itshi? Idi mukotelesa egi baguvernema agasue a ha mavu mbaadizudila gawo desizio dia guhana ufumu wawo gudi shitu ya mu foto ba? Ndo sha! Profesi yene idi mumonesa egi Nzambi hakhenji mbawatuma ha gutshita ngenyi. (Ish. 21:1; fuanesa nu Yeshaya 44:28.) Ifutshi yene mbayiya nu guhana ufumu wawo hazonda-hazonda ba? Ndo! Ndaga yene mbayikalegewa muphushi mbala imoshi. Gungima, shitu ya mu foto mbayishiya ikombelelo yagasue ya mambo mbala imoshi.
Itshi tushigo naye gudifelela ha gumona mu masugu adi muza? Tushigo naye gudifelela ha guvua mene jidi mumonesa egi baguvernema a ha mavu adi muya nu guhana mago gudi Organisation des Nations Unies. Uvi ndaga tudi naye gudifelela ha gumona yenyeyi: Yehowa mbawutuma ifutshi ha guhana sagumugu ufumu wawo gudi shitu ya mu foto. Mu tangua diene, mbatujiya egi lamba diakola didi mutshigina gusendesa. Uvi tangua tudi munengena ndaga jiene, “tukhale nu gikolekole nu matangi a ungambi” handaga gualeha ndo ndaga jiene mbajikalegewa!—1 Tes. 5:6.