Ezela
7 Gungima dia ndaga eji, Ezela* wavutugile hakhalele Fumu Aletakelesese muhinyina gu Phelese. Ezela wakhalele mun’a Selaya, mun’a Azariya, mun’a Hilikiya, 2 mun’a Shaluma, mun’a Zadoke, mun’a Ahituba, 3 mun’a Amaliya, mun’a Azariya, mun’a Melayota, 4 mun’a Zelaya, mun’a Uzi, mun’a Buki, 5 mun’a Abishua, mun’a Fineyase, mun’a Eleazale, mun’a Alona fumu wa nganga-nzambi. 6 Ezela wakatugile gu Babilona. Wakhalele musonega mikhuala, wakhalele nji mujiya muabonga* mikhuala yahanele Yehowa Nzambi wa Isalele gudi Moize. Fumu wamuhanele ima yagasue yatogele muene handaga Yehowa Nzambi wenji wakhalele n’enji.
7 Mu givo gia 7 gia uhinyinyi wa Fumu Aletakelesese, enya Isalele ako nu nganga-nzambi nu enya Levi nu ayimbi a ngimbo nu abambi a mifulo nu athu akhalele mutshita mudimo gu tempelo,* ayile gu Yelusalema. 8 Gungima Ezela wahetele gu Yelusalema mu mbeji ya thano, mu givo gia 7 gia uhinyinyi wa Fumu Aletakelesese. 9 Wakatugile gu Babilona mu lusugu lua thomo lua mbeji ya thomo, wahetele gu Yelusalema mu lusugu lua thomo lua mbeji ya thano handaga Nzambi wenji wakhalele n’enji. 10 Ezela walondele mutshima* wenji ha gulonguga mikhuala ya Yehowa nu guyitumagela nu ha gulongesa mikhuala yene nu badesizio a Nzambi gu Isalele.
11 Mukanda wahanele Fumu Aletakelesese gudi nganga-nzambi Ezela yago wakhalele musonega nu wakhalele mujiya muabonga* mikhuala yahanele Yehowa gudi enya Isalele wene owu:
12 * “Aletakelesese fumu wa mafumu, gudi nganga-nzambi Ezela muthu wana sonega Mukhuala wa Nzambi wa mu dilu: Moyo waye! 13 Ngambile mukhuala egi enya Isalele agasue adi mu ufumu wami nu nganga-nzambi jiawo nu enya Levi adi mutshigina guya nu aye, ajiya guya. 14 Handaga fumu wagutumi nu ahanyi enji a malongo 7 ha gukamba gujiya gula enya gu Yuda nu enya gu Yelusalema adi mutumagela mikhuala ya Nzambi waye, udi ha mago aye. 15 Udi naye guzula nji utadi wa siliva nu wolo wahanyi fumu nu ahanyi enji a malongo mu gutshigina guawo gudi Nzambi wa Isalele, yago inzo yenji idi gu Yelusalema, 16 nu utadi wa siliva wagasue nu wolo aguhanyi mu provense jiagasue jia gu Babilona, hamoshi nu bakado adi muhana athu ako nu nganga-nzambi mu gutshigina guawo mukunda nu inzo ya Nzambi wawo idi gu Yelusalema. 17 Udi naye nji guzula mbongo jiene ha gusumba ngombe jia milume nu imeme ya milume nu mitumba ya imeme nu mbuto nu matombe ana hanewa hamoshi nu shitu jiene. Udi naye guyihana ha giwotshielo gia inzo ya Nzambi waye idi gu Yelusalema.
18 “Ndaga yagasue mbawumona egi idi yabonga mukunda nu aye nu aphangi’aye a mala, wajiya guyitshita nu utadi wa siliva nu wolo mbawusala, gifua mudi gutshigina gua Nzambi wenu. 19 Ikadigilo yagasue aguhanyi mukunda nu mudimo wa inzo ya Nzambi waye, mbawuyihaga gutuama dia Nzambi gu Yelusalema. 20 Ima iko yasala idi nu funu mu inzo ya Nzambi waye inyi mbaagutoga, mbawuyizula ha fundo ana bamba umonyi wa fumu.
21 “Ame Fumu Aletakelesese, ngambile mukhuala egi, athu agasue ana bamba umonyi adi mu mavu a ha Sambua dia Muta,* adi naye guhana muphushi ima yagasue yaatogewa gudi nganga-nzambi Ezela wana sonega mikhuala ya Nzambi wa mu dilu, 22 adi naye gumuhana batalanta* uu nu gu 100 a utadi wa siliva nu bakore* 100 a mbuto jia ble nu babate* 100 a matombe nu babate 100 a maji. Uvi mukunda nu mungua, adi naye guhana guvula guagasue atshigina. 23 Ndaga jiagasue jiazuelele Nzambi wa mu dilu jidi naye gukalegewa nu gikhesa giagasue mukunda nu inzo ya Nzambi wa mu dilu, hagula Nzambi gavuilago ufumu wami nu ana a fumu a mala khabu. 24 Ngamiwambela nji egi, mushigo naye gushinjiga nganga-nzambi, enya Levi, ayimbi a ngimbo, abambi a mifulo, athu ana tshita mudimo gu tempelo* nu athu ana tshita mudimo gu inzo ya Nzambi ha gufuta gitadi nga guhana musomo.
25 “Aye Ezela, kalegela ndunge jiaguhanele Nzambi waye,* tomba manzuji adi naye gusophesa athu agasue a mu mavu a ha Sambua dia Muta, athu agasue adi mujiya mikhuala ya Nzambi waye. Udi naye gulongesa nji muthu wagasue gashigo mujiya mikhuala yene. 26 Muthu wagasue watuna gunemesa mikhuala ya Nzambi waye nga ya fumu, udi naye guhanewa ndola muphushi. Wajiya gushiyiwa, gukayewa mu gifutshi, gufutshishiwa gibawu nga gumbiwa mu bologo.”
27 Yehowa Nzambi wa akhakh’etu atumbuishiwe handaga muene wakuatshi mutshima wa fumu ha gubuisa inzo ya Yehowa idi gu Yelusalema yabonga. 28 Wangumonesele guzumba gua giamatshidia handaga watshitshile egi fumu nu ahanyi enji a malongo nu atuameji agasue a ngolo a mu ufumu wenji anguvuile khenda. Ngahetele gikhesa* handaga Yehowa Nzambi wami wakhalele nu ame, ngabungishile mala a enya Isalele akhalele atuameji* hagula nguye nawo.