Ngimbo
Gudi mutuameji wa miziki. Lungimbo.
66 Enue athu agasue a ha mavu, mbenu milolo ya gusuanguluga mukunda nu Nzambi.
2 Yimbenu ngimbo* ha gutumbuisa jina dienji diakoma.
Muhanenu lutumbu nu ginemua.
3 Wambelenu Nzambi egi: “Midimo yaye idi diago ya gushimana,
mukunda nu ngolo jiaye jiavula,
mbalagaji jiaye mbajiza nu gudigita gutuama diaye.
4 Athu a ha mavu agasue mbaafugama gutuama diaye;
mbaayimba ngimbo ha gugutumbuisa;
mbaayimba ngimbo ha gutumbuisa jina diaye. (Sela)
5 Zenu mumone midimo ya Nzambi.
Ndaga jidi mukalagala muene mukunda nu ana a athu, jidi diago jia gushimana.
6 Muene wamiginyishile kianga;
athu azawugile ha malu.
Tuasuangulugile ha fundo diene, mukunda nu ndaga jiagasue jiakalegele muene.
7 Muene udi muhinyina mayilago mu ngolo jienji.
Meso enji adi mulandula gutala ifutshi.
Athu adi mito yakola ashigo naye gudisunzula. (Sela)
8 Enue athu, tumbuisenu Nzambi wetu,
mutumbuisenu mu dijui diakola.
9 Muene wana gutubamba nu monyo;
gana bembago egi malu etu akhakhuge.*
10 Oo Nzambi, aye watutalele muabonga;
watuphelegetesele gifua luholo ana phelegetesa utadi wa siliva.
11 Watukuatele mu wanda wa mayanga;
wahagele ginemo giakola holu dietu.*
12 Wabembele egi mun’a muthu atudiate;*
tuabalegele mukatshi dia tshuya nu mukatshi dia meya;
gungima watubatele ha fundo diabonga.
13 Mbanguza mu inzo yaye nu milambu yami yagasue ya guwetshia;
mbangutagenesa ndaga ngadilogele gudi aye,
14 ndaga jinyi ngagulayele*
nu ndaga jiazogele mu kano diami tangua ngakhalele nu gikenene.
15 Mbanguguhana milambu ya guwotshia ya shitu jia maji-maji.
Mbangukanduisa mishi ya milambu ya imeme ya milume.
Mbanguhana ngombe jia milume nu khombo jia milume. (Sela)
16 Enue athu agasue muana vila Nzambi woma, zenu mutegelele,
mbangumiwambela ndaga jiagasue jiakalagala muene mukunda nu ame.
17 Ngatamegele Nzambi* ha gutoga ukuateshi.
Ngamutumbuishile.*
18 Gula nga ngabambele matangi abola mu mutshima wami,
nga Yehowa gangutegelelego.
19 Uvi muene wangutegelele;
wavile gisambu giami.
20 Nzambi atumbuishiwe, handaga muene gatunyilego gisambu giami;
gatunyilego nji gungumonesela guzumba guenji gua giamatshidia.