Ngimbo
Gudi mutuameji wa miziki. Idi naye gushigiwa mu “Ubolesago.” Lungimbo lua Asafe.
75 Tudi guguhana mersi, Oo Nzambi, tudi guguhana mersi;
aye udi nu esue,
athu adi muzuelela midimo yaye ya gushimana.
2 Wazuela egi: “Ngahagele tangua ha gusophesa,
ngudi musophesa nu giamatshidia giagasue.
3 Tangua mavu nu athu agasue ana khala hene adigitshile,*
ame ngakolesele makunji enji.” (Sela)
4 Ngudi muwambela athu adi gudisunzula egi: “Mudisunzulago.”
Ngudi muwambela athu abola egi: “Mudisunzulago mukunda nu ngolo* jienu.
5 Mudisunzulago muavula mukunda nu ngolo* jienu,
muzuedigo nji nu lulendo.
6 Handaga lutumbu luana katuga ndo
gu khanda ya mazogelo a kumbi nga gu khanda ya mayilo a kumbi nga gu khanda ya sud.
7 Handaga Nzambi udi Nzuji.
Muene wana bulumuisa muthu mumoshi, uvi wana kanduisa muko.
8 Handaga Yehowa udi nu khopho ha mago;
matombe adi mufuafuelela, adi agufutula nu mitungu.
Muene mbawaabundula hashi,
athu agasue abola a ha mavu mbaanua matombe ene, mbagusadigo nga mboso.”
9 Uvi ame, mbangulongesa ndaga yene mayilago;
mbanguyimba ngimbo* ha gutumbuisa Nzambi wa Yakoba.
10 Handaga muene wazuedi egi: “Mbangumanesela ngolo* jia athu abola,
uvi mbanguvudisa ngolo jia athu abonga.”