Ngimbo
Gudi mutuameji wa miziki. Lungimbo lua Davidi.
21 Oo Yehowa, fumu udi nu gusuanguluga mukunda nu ngolo jiaye;
muene udi nu gusuanguluga guavula diago luholo wana huluisa athu!
2 Watagenesa nzala jia mutshima wenji,
watagenesa ndaga jiatogi muene. (Sela)
3 Wamushimbigile muavula diago;
wamusudigishile gifulu gia ufumu gia wolo wabonga gu muto.
4 Wagutogele monyo, wamuhanele nawo,
wamuhanele monyo waleha, ayi, monyo wa ivo nu ivo.
5 Athu adi gumunemesa muavula diago handaga wamuhuluisa.
Wamubuishi muthu wakoma, wamuhanyi lutumbu.
6 Wamushimbiga mayilago;
wamusuanguluisa gutuama diaye.
7 Fumu wana sha mutshima gudi Yehowa;
muene mbagashigo munyigishiwa nga hazonda
mukunda nu guzumba gua giamatshidia gua Nzambi wa Gudinyinyiga.
8 Koko diaye mbadikuata mbalagaji jiaye jiagasue;
koko diaye dia madia mbadikuata athu anago guguzumba.
9 Mbawutala ndaga jiawo mu tangua diatombewe, mbawaashiya gifua muana kondewa ima ha tshuya.
Yehowa mbawaavila khabu, mbawaaminya; tshuya mbatuashididisa.
10 Mbawushiya ajigulu* awo ha mavu;
mbawushiya ajigulu awo mukatshi dia ana a athu.
11 Handaga adi mutshigina gugutshitshila gubola;
iphungi yawo mbayishigo mubinga.
12 Mbawalengesa gutuama diaye
tangua mbawunana uta waye wa manana ha guasonona.*
13 Oo Yehowa zuga, monesa ngolo jiaye.
Mbatugutumbuisa nu ngimbo* mukunda nu ngolo jiaye jiavula.