Wonembewa na Yohani
3 Penze Mfalisi munango dzina yake Nikodemo, wolamulira wa Ayuda. 2 Iye adayenda kwa Yesu usiku nkumuuza kuti: “Mpfunzisi,* tinkudziwa kuti imwepo ndimwe mpfunzisi wochokera kwa Mulungu, ndawa palibe munthu angakwanise kuchita vizindikiro vomwe imwepo muchita peno Mulungu alilini naye.” 3 Yesu pakudawira adamuuza kuti: “Shuwa ninkukuuza, munthu angakwaniselini kuwona Ufumu wa Mulungu peno angabadwelini soti.” 4 Nikodemo adabvunza kuti: “Munthu angabadwe tani ali nkulu kale? Ko angakwanise kungena m’mimba mwa amayi wake nkubadwa pomwe?” 5 Yesu adadawira kuti: “Shuwa ninkukuuza, munthu angakwaniselini kungena mu Ufumu wa Mulungu peno angabadwelini mwa madzi na mzimu. 6 Chomwe chabadwa kuchokera mu thupi ni chanyama, ndipo chomwe chabadwa kuchokera mu mzimu ni chauzimu. 7 Ayi kudabwa ndawa nakuuza kuti: “Wanthu imwe mufunika kubadwa pomwe. 8 Mphepo imenya komwe inkufuna, ndipo munthu akubva kuunga kwake, koma adziwalini komwe inkuchokera na komwe inkuyenda. Nchibodzibodzimbo na aliyese yemwe wabadwa kuchokera mu mzimu.”
9 Nikodemo pakudawira adati: “Ko vimwevi vingakwanisike tani?” 10 Yesu adamubvunza kuti: “Ko iwepo ndiwelini mpfunzisi wa Izirayeli, manje vikukwanisika tani kuti vinthu vimwevi uleke kuvidziwa? 11 Shuwa ninkukuuza, vomwe ise tinkudziwa tiviyankhula, ndipo vomwe ise tawona tivichitira umboni. Koma imwepo mutsimikiziralini umboni womwe tipereka. 12 Peno nakuuzani vinthu va padziko yapasi koma imwepo osavikhulupirira, manje mungakhulupirire tani nichikuuzani vinthu va kudzulu? 13 Ndipo palibe munthu yemwe adakwera kudzulu koma Mwana wa munthu yekha, yemwe adabuluka kuchokera kudzulu muko. 14 Molingana na Mose yemwe adakwiza nyoka m’dzulu nchipululu, Mwana wa munthu ankufunikambo kukwiziwa m’dzulu, 15 kuti aliyese womukhulupirira akhale na moyo wosapera.
16 “Ndawa Mulungu adakonda maninge dziko mwakuti adapereka Mwana wake wobadwa yekha, kuti aliyese womukhulupirira ayi kuti adzongewe koma akhale na moyo wosapera. 17 Mulungu alibe kutumiza Mwana wake mu dziko kuti mwana muyo adzaweruze dziko, koma kuti dziko mwiyo ipulumusiwe mwakuphatisira basa iye. 18 Aliyese yemwe amukhulupirira afunikalini kuweruziwa. Aliyese yemwe amukhulupiriralini waweruziwa kale ndawa alibe kukhulupirira mu dzina ya Mwana wobadwa yekha wa Mulungu. 19 Kugwerewera kwafika mu dziko koma m’malo mokonda kugwerewera, wanthu ankukonda mdima pakuti basa zawo ni zoipa, ndawa ya vimwevi adzaweruziwe. 20 Womwe achita vinthu voipa aipidwa na kugwerewera ndipo afikalini pomwe pali kugwerewera, kuti basa zawo ayi kuti ziwonekere. 21 Koma aliyese yemwe achita vinthu vabwino abwera pomwe pali kugwerewera, kuti basa zake ziwonekere kuti adazichita mobverana na vomwe Mulungu ankufuna.”
22 Vimwevi pavidamala Yesu na wopfunzira wake adayenda mu dera yakumuyi ya ku Yudeya. Iye adakhala nawo kumuko kwakanthawe ndipo angabatiza wanthu. 23 Koma Yohani nayembo angabatiza wanthu ku Ainoni pafupi na Salimu, ndawa kumuko kwenze madzi yazinji ndipo wanthu angayenda kukabatiziwa. 24 Pa nthawe mwiyi nkuti Yohani akanati amufungira mudjeri.
25 Manje wopfunzira wa Yohani adayamba kugegedzana na munthu munango wa ku Yuda pankhani yokhala wochena pamaso pa Mulungu. 26 Patsogolo pake adayenda kwa Yohani nkumuuza kuti: “Mpfunzisi,* munthu yemwe mwenze naye kutsidya ya Yorodano ule, yemwe mumbamuchitira umboni ule nayembo ankubatiza ndipo wanthu wose ankuyenda kwa iye.” 27 Yohani pakudawira adati: “Munthu angatambirelini kanthu kalikose peno alibe kupasiwa kuchokera kudzulu. 28 Imwembo ndimwe mboni pa vomwe nidanena kuti: ‘Ine ndinelini Khrisitu, koma nidatumiziwa ninge wokonza njira yake.’ 29 Munthu yemwe anankazi yemwe ankulowodwa ni mkwati. Koma munzake wa mkwati akaimirira nkubvesera vomwe ankunena, akondwa maninge ndawa ya mawu mwayo ya mkwati. Ndipomwapa ine ninkukondwa maninge. 30 Iye ankufunika kumbaingizirika koma inepano ninkufunika kumbachepachepa.”
31 Wochokera kudzulu aposha anango wose. Wochokera padziko yapasi ni wapadziko yapasi ndipo ayankhula vinthu vochokera padziko yapasi. Koma wochokera kudzulu ni woposha anango wose. 32 Iye ankuchitira umboni pa vinthu vomwe waviwona na kuvibva, koma palibe munthu yemwe ankukhulupirira umboni wake. 33 Yemwe wakhulupirira umboni wake muyo watsimikizira kuti Mulungu anena chaivo. 34 Yemwe adatumiwa na Mulungu ayankhula mawu ya Mulungu, ndawa Iye akafuna kupereka mzimu aperekalini moumira. 35 Ababa akonda Mwana ndipo adapereka vinthu vose m’manja mwake. 36 Yemwe akhulupirira Mwana muyo adzatambire moyo wosapera. Wosabvera Mwana muyo adzatambirelini moyo muyo, koma ukali wa Mulungu udzapitirize kukhala pa iye.