Junho

Yahova adadalisa Akhrisitu wa mu nthawe za Atumi pomwe angazolowera kuchinja. Munthawe ya atumi, Akhrisitu ambadzudziwa nthawe zizinji ndipo vimbachitika mosadikhirika. Onani vomwe vidachitikira Baranaba na mtumi Paulo pomwe iwo ambalalikira ku Lusitara. Pakuyamba wanthu ambawatambira bwino maninge ndipo ambabvesera vomwe ambalalikira. Koma patsogolo pake, otsutsa ‘adanyengerera gulu ya wanthu’ omwe ambabvesera kuti amumenye na viminyala Paulo ndipo adamusiya pakuganiza kuti wafa. (Mac. 14:19) Olo venze teno, Baranaba na Paulo adapitiriza kulalikira ku madera yanango. Ko phindu yake yenze iponi? Iwo adagumana ‘namba ikulu ya opfunzira.’ Kuingizira pamwapo, mawu yawo na chitsanzo chawo chidalimbikisa abale wa mu nthawe mweire. (Mac. 14:21, 22) Paulo na Baranaba alibe kusiya kulalikira podiya kuti ambadzudziwa ndipo ndawa ya vimwevo azinji adaphindula. Tikaleka kusiya basa yomwe Yahova watipasa kuti tichite, nivosakaikisa kuti tidzadalisiwe. w23.04 tsa. 16-17 ndi. 13-14

Mpfumu Davide ambagumana na azondi wogopsa pa moyo wake wose. Ndipo nthawe zizinji ambakumbira Yahova kuti amuthandize Wamasalimo Davide wenze na chitsimikizo chose chakuti Yahova ambabvesera mapemphero yake. Olo imwembo mungakhalembo na chitsimikizo chimwechi. Baibolo itsimikizira kuti Yahova angatipase nzeru, mphanvu na chikhulupiriro kuti tikwanise kupirira mabvuto. Iye angaphatisire basa abale wathu komasoti wanthu omwe amutumikiralini kuti atithandize mu njira zinango. Ni shuwadi kuti ni nthawelini zose pomwe Yahova angadawire mapemphero yathu mu njira yomwe timbaganizira. Koma chomwe tinkudziwa nchakuti iye achadawira mapemphero yathu. Iye adzatipase vomwe tichadekana komasoti pa nthawe yoyenera. Ndipomwapa, pitirizani kupemphera mwa chikhulupiriro na kukhala otsimikiza kuti Yahova adzakusamalireni manjeuno na mu dziko inyowani momwe Yahova ‘adzakwanirise vofuna va chamoyo chilichose.’—Sal. 145:16. w23.05 tsa. 8 ndi. 4; tsa. 13 ndi. 17-18

Vikhala bwino kuganizira madaliso yomwe titambira tikambakwanirisa cholinga. Ko mudaganizako kale maphindu yomwe mungagumane ndawa yokwanirisa volinga vanu? Mwakulinganiza, peno cholinga chanu ni kuwerenga Baibolo na pemphero ganizirani momwe vimwevi vingalimbisire ushamwali wanu na Yahova. (Sal. 145:18, 19) Peno cholinga chanu nkufuna kukulisa khalidwe ya Chikhrisitu ganizirani momwe ushamwali wanu na anzanu ungakhalire. (Akol. 3:14) Ko tani kuchita ndandanda wa vinthu vose vabwino vomwe vingachitike ndawa yokwanirisa cholinga chanu? Nthawe na nthawe mbanyang’anani kawirikawiri pa ndandanda mweyo. Komasoti mbakhalani na nthawe yocheza na wanthu womwe angambakulimbikiseni. (Miy. 13:20) Kunena shuwa, tose ntsiku zinango tikhala tilibe shungu yokwanirisa volinga. Ko vimwevi vingatikangise kukwanirisa volinga vathu? Neye. Ninge momwe viliri kuti mwadiya ungafike komwe unkuyenda osandothemba mphanvu yamadzi yokha, isembo tingakwanirise volinga vathu podiya kuti tilibe chifuno. Nishuwadi kuti mwevi ni voshupa, koma nivothandiza. w23.05 tsa. 27-28 ndi. 5-8

Koma kudziwa kuti tichadekana kubvuma mabvuto yomwe yabwera ndawa ya vomwe tasalula, vingatithandize kuulula vomwe taphonyesa na kuchita vinthu vomwe vingatithandize kuti tileke kubwerezera pomwe. Kuchita vimwevi kudzatithandize kuti tipitirize kuthamanga pa mpikisano wokatambira moyo. Peno imwepo mwasalula vinthu koma mukudandaula na vomwe mwasalula, ko muchadekana kuchita chani? Lekani kutaya mphanvu zanu na nzeru kumbandoviganizira. Ndipo ayi kumbandoganizira vinthu vomwe vidachitika kale kumbuyo. Panango kumbaimba mulandu wanthu anango M’malo mochita vimwevi, bvumani vomwe mudaphonyesa ndipo yesani kuchita vinthu kuti vikhale bwino na momwe viliri pa moyo wanu manjeuno. Peno imwepo munkudziimba mulandu pa vinthu vomwe mudaphonyesa, khalani odzichepesa pempherani kwa Yahova, muuzeni vomwe mwaphonyesa ndipo mukumbireni kuti akukhululukireni. (Sal. 25:11; 51:3, 4) Peno ni vokwanisika kumbirani thandizo kwa akulu. (Yak. 5:14, 15) Pfunzirani pa vomwe mwaphonyesa ndipo chitani vose vomwe mungakwanise kuti muleke kuphonyesa pomwe. Mukachita vose vimwevi imwepo mudzatsimikize kuti Yahova adzakuoneseni chifundo ndipo adzakupaseni thandizo yomwe munkudekana.—Sal. 103:8-13. w23.08 tsa. 28-29 ndi. 8-9

Mpfumu Yehoasi idaphindula maninge na makhalidwe yabwino ya Yehoyada. Ndipo ndawa yavimwevi mpfumu yachilumbwana mweyi imbafuna kukondweresa Yahova. Koma pomwe Yehoyada adafa iye adayamba kutetekera alangizi wampatuko. (2 Mbiri 24:4, 17, 18) Yahova vidamuwawa maninge, ndipomwapa ‘ambatumiza aneneri kuti akawatsuule . . . , koma iwo adalamba kubvera.’ Iwo alibe kumubvera Zakariya, mwana wa Yehoyada yemwe sikuti chabe wenze mneneri na wantsembe wa Yahova koma wenze m’bale wake chaiye. Mpfumu Yehoasi idafika pakupha Zakariya. (2 Mbiri 22:11; 24:19-22) Yehoasi alibe kupitiriza kugopa Yahova. Yahova wenze adanena kale kuti: ‘Womwe aninyoza adzanyozewembo.’ (1 Sam. 2:30) Patsogolo pake gulu ing’ono yankhondo ya Asiriya, idagonjesa ‘gulu ikulu’ maninge ya Yehoasi ndipo iye adapwetekeka. (2 Mbiri 24:24, 25) Yehoasi adaphewa na mtumiki wake chaiye ndawa yakuti wenze adapha Zakariya. w23.06 tsa. 18-19 ndi. 16-17

Mtumi Paulo wenze adakhala nthawe ikulu na abale wa ku Efeso, kulalikira na kupfunzisa ntontholo wabwino. (Mac. 19:1, 8-10; 20:20, 21) Iye ambawakonda maninge azibale wake mwawa ndipo ambafuna kuwathandiza kuti apitirize kukhala okhulupirika kwa Yahova. Wanthu wa ku Efeso enze na vikhulupiriro vophonyeka va vipembedzo vabodza ndipo ambakhulupirira pomwe matsenga. Wanthu azinji wa ku Efeso enze na makhalidwe yoipa ndipo ambachitalini manyazi na kuchita vimwevi. Kuyankhula nkhani zoipa chenze chikhalidwe chawo, ambayankhula pomwe pa masenzeka, pa masewero komasoti m’matchetchi. (Aef. 5:3) Akhrisitu azinji wa ku Efeso chikumbuntima chawo chenze chidaleka kuphata basa. Mawu mwaya yangatanthauze ‘kusiya kudzibvera ntsisi.’ (Aef. 4:17-19) Akalibe adziwa Yahova na kupfunzira kusiyanisa pakati pa chabwino na choipa, chikumbuntima chawo chimbawashupalini akakhala kuti iwo achita vinthu voipa. Ndawa ya vimwevi Paulo adafotokoza kuti iwo enze ‘mu m’dima komasoti enze kutali na Mulungu.” Anango ku Efeso adachoka mu m’dima. w24.03 tsa. 20 ndi. 2, 4; tsa. 21 ndi. 5-6’

Basa ya Gidiyoni ninge woweruza imbafunika khama ikulu. Pomwe Amidiyani angathawa nkhondo usiku, Gidiyoni adawatewera kuchokera ku chigwa cha Zerera mpaka ku kamadzi ka Yorodano. (Ower. 7:22) Ko Gidiyoni adaimira ku Yorodano? Neye! Podiya kuti wenze woneta iye na masocha yake 300 adapitiriza kuwatewera. Pakumalizira adawagumana Amidiyani ndipo adawagonjesa. (Ower. 8:4-12) Gidiyoni ambathemba kuti Yahova adzamupase mphanvu ndipo vimwevi vidachitikadi. (Ower. 6:14, 34) Ntsiku inango, Gidiyoni na masocha yake ambatewera mafumu yawiri ya Amidiyani na minyendo, koma panango mafumu mwaya yambafamba na ngamila. (Ower. 8:12, 21) Podiya kuti venze teno, Aizirayeli olimba mwawa adapitiriza kuyenda patsogolo. Akulu nawombo angathembe Yahova yemwe ‘anetalini panango kufoka.’ Iye adzawapase mphanvu pomwe ankuzifuna. —Yes 40:28-29. w23.06 tsa. 6 ndi. 14, 16

Tingakwanise kukhala wolimba vilibe basa kuti ni mabvuto yaponi yomwe tingagumane nayo. Ndipo mwapa mbathembani Yahova. Wonani momwe Baraki adaphindulira na kuthemba malangizo ya Yahova. Pa nthawe mwaire Aizirayeli enze wosakonzeka kuti angamenye nkhondo, iwo enze alibe vitsulo vomenyera nkhondo koma Yahova adawuza Baraki kuti ayende akamenyane na nkulu wa masocha ya Akanani. Sisera wenze na vitsulo vizinji vomenyera nkhondo. (Ower. 5:8) Mneneri wachikazi Debora adawuza Baraki kuti ayende kumalo komwe kwenze kulibe mapiri kuti akagumane na Sisera yemwe wenze na ngolo zokwana 900 za nkhondo. Venze vabwino maninge kwa Akanani kuti amenye nkhondo ku malo komwe kwenze kulibe mapiri ndawa yakuti enze na ngolo. Koma olo kuti venze teno Baraki adabvera Mulungu. Pomwe Baraki angabuluka mu phiri ya Tabori Yahova adagwesa chimvula champhanvu ndipo pamwapo ngolo za nkhondo za Sisera zidayamba kumira m’matope, Yahova adapulumusa Baraki. (Ower. 4:1-7, 10, 13-16) Nchibodzibodzimbo, Yahova adzatipulumuse peno tingamuthembe na kubvera malamulo yomwe angatipase m’gulu yake. w23.07 tsa. 19 ndi. 17-18

Tichadekana kukhala odekha peno tinkufuna kukhala na moyo mpaka kalekale. Ninge atumiki wa Yahova okhulupirika wakumbuyo, tichadekana kukhala odekha podikhira Yahova kuti akwanirise mapolomisi yake yose. (Aheb. 6:11, 12) Baibolo ilinganiza nkhani mweyi na mulimi. (Yak. 5:7, 8) Mulimi aphata basa mwakhama kuti abzale na kuthiriza mbewu zake. Koma iye adziwalini nthawe chaiyo yomwe mbewu mweizo zidzakule. Ndipomwapa mulimi achadekana kudikhira modekha na kudikhira kuti adzakolole vomwe wabzala. Nchibodzibodzimbo, tichadekana kukhala opanikizika na vinthu vauzimu ‘podiya kuti tikudziwalini ntsiku yomwe Yahova adzabwere.’ (Mat. 24:42) Isepano tidikhira modekha na kukhala na chidikhiro chakuti Yahova adzakwanirise mapolomisi yake yose pa nthawe yake. Koma tikaleka kukhala odekha, tidzanete kudikhira nkuyamba kufutuka pang’onopang’ono kwa Yahova. Nakuyamba kukhala otangwanika maninge na vinthu vomwe tingaone ninge kuti vingatikhalise okondwa manjeuno. Koma tikakhala odekha tidzakwanise kupirira mpaka mapeto ndipo tidzapulumuke.—Mika 7:7. w23.08 tsa. 22 ndi. 7

Tikambalinganiza maulosi mwaya ya pa Danieli 2:41-43 bukhu ya Chivumbulutso vititsimikizira kuti minyendo mwaya yankuimira boma ya Estados Unidos na Grã-Bretanha. Maboma mwaya yankuphata basa mbali zose ndipo vachitisa kuti yakhale maboma ya mphanvu maninge padziko yose yapasi. Pakulewa va ulamuliro wamphanvu wa padziko yose, Danieli adalewa kuti udzakhale ‘wolimba mbali zinango na wofoka mbali zinango.’ Koma ndawa chani Danieli adalewa kuti udzakhale wofoka mbali zinango? Ndawa yakuti wanthu wolamuliriwa na ufumu moyu ali ninge dongo yotota, iwo achitisa ufumu moyu kukhala ulibe mphanvu ninge chitsulo cholimba. Isepano tingapfunzire vinthu vodekana maninge na chifano chomwe Danieli adachitanthauzira. Chakuyamba, tapfunzira kuti Boma ya mphanvu ya América yaonesa mphanvu zake mu njira zizinji maninge. Mwakulinganiza, Estados Unido na Grã-Bretanha ni maidziko yomwe yadawina pa Nkhondo yoyamba na Nkhondo yachiwiri ya padziko yose. Koma Ulamuliro wamphanvu moyu nthawe zose unkukhala wofoka ndipo vinthu vipitirize teneuyu ndawa yakuti wanthu ni ogawanika ndipo ankukondwalini na utongi moyu. Chinthu chinango chodekana maninge chomwe tapfunzira ni chakuti ulamuliro wamphanvu moyu ndiwo womwe ukhale womaliza kutonga pomwe ufumu wa Yahova ukanati kudzonga maboma yose ya wanthu. w23.08 tsa. 10-11 ndi. 12-13

Nthawe zinango Davide ambakhala wokhumudwa ndawa ya mabvuto yomwe ambalimbana nayo. (Sal. 18:4,5) Olo viri teno chikondi na chisamaliro cha Yahova ndivo vomwe vimbamulimbikisa. Venze ninge Yahova ankutenga Davide kuyenda naye ku ‘nsipu wobiriwira’ na ku ‘malo yopumulira komwe kunamadzi yabwino.’ Mwanjira mweyi Davide ambabwezeresa mphanvu zake na kupitiriza kutumikira Yahova mokondwa. (Sal. 18:28-32; 23:2) Isembo ntsiku zino tikwanisa kulimbana na mabvuto ndawa ya chikondi cha Yahova, ninge momwe Baibolo ichanenera kuti: ‘Ndawa ya chikondi chokhulupirika cha Yahova tilibe kudzongewa.’ (Maliro 3:22; Akol. 1:11) Azondi wa Davide enze wamphanvu maninge ndipo maulendo yazinji moyo wake wenze pa ngozi. Olo nteno iye ambadzibva wotetezeka ndawa ya chikondi cha Yahova. Iye ambadzibva kuti Yahova wenze naye nthawe zose ndipo ni vimweviletu vomwe vimbamulimbikisa. Ndipomwapa iye adayimba kuti: ‘[Yahova] mwanipulumusa ku mabvuto yangu yose.’ (Sal. 34:4) Nthawe zinango Davide ambakhala na mantha, koma iye ambakwanisa kupirira ndawa wenze na chitsimikizo chakuti Yahova ambamukonda. w24.01 tsa. 30 ndi. 15-17

Vamungapfunzire pa vosalula voipa va Yehoasi. Pambuyo pakuti nkulu wantsembe Yehoyada wamwalira, Yehoasi adayamba kukhala na azishamwali oipa. (2 Mbiri 24:17, 18) Iye adasalula kubvera malangizo ya alangizi Wachiyuda womwe ambakondalini Yahova. Panango imwepo mungatsimikizirembo kuti Yehoasi ambadekana kukhala kutali na azishamwali wa khaindi mweyi. M’malo mwakuti achite vimwevi iye adakhala chitsiru ndipo adabvesera malangizo yawo yoipa. Ndipo kuti viipiretu, Zakariya m’bale wake chaiye padayesesa kumutsumula iye adalamula kuti aphewe. (2 Mbiri 24:20, 21; Mat. 23:35) Chenze chinthu choipa maninge. Yehoasi wenze adayamba bwino koma chobvesa ntsisi ni chakuti iye adakhala wampatuko komasoti wakupha ndipo pakumalizira iye adaphewa na azinyabasa wake chaiwo. (2 Mbiri 24:22-25) Vinthu vidakakhala bwino maninge sembe iye adapitiriza kubvera Yahova na wanthu omwe amukonda! w23. 09 tsa. 9 ndi. 6

Yesu ambadziwa kuti mtumi Petulo adakapitiriza kukhala wokhulupirika, mokoma moyo Yesu adauza Petulo kuti ‘aleke kuchita mantha.’ Mawu mwaya yambaonesa kuti Yesu ambamuthemba Petulo ndipo vimwevi vidachinja moyo wake. Petulo na m’bale wake Andireya adadzasiya patsogolo pake bizi yawo ya ntsomba ndipo adayamba kufamba na Yesu pa utumiki wake, ndawa ya vimwevi iwo adatambira madaliso yazinji ya Yahova. (Maliko 1:16-18) Ninge wopfunzira wa Yesu, Petulo adakhala na moyo wokomedza maninge. Iye adawona Yesu ankupolesa wodwala, kuthamangisa viwanda, mpakana kumukisa wakufa. (Mat. 8:14-17; Maliko 5:37, 41, 42) Petulo adawona pomwe masomphenya ya Yesu ninge Mpfumu ya Ufumu wa Mulungu, ndipo vimwevi vidakhudza maninge moyo wake. (Maliko 9:1-8; 2 Pet. 1:16-18) Petulo adawona vinthu vizinji mwakuti sembe wenzelini wopfunzira wa Yesu. adakavionalini. Mosakayika iye ambakhala wokondwa ndawa yakuti adamalisa maganizo yophonyeka na kukhala na mwayi wotambira madaliso yazinji teneuyu! w23.09 tsa. 21 ndi. 4-5

Mukalata yake yoyamba, mtumi Petulo adaphatisa basa mawu yakuti ‘chikondi chaicho.’ Chikondi cha khaindi mweyi chitithandiza kukhululuka osati machimo yang’onong’ono yokha, koma na ‘machimo yakuluyakulu pomwe.’ (1 Pet. 4:8) Panango Petulo wenze adaganizira vomwe adapfunzira kwa Yesu magole yazinji kumbuyo pa nkhani ya kukhululuka. Panthawe mweire Petulo ambaganizira kuti ankuonesa kukoma ntima maninge pa mawu yakuti munthu achadekana kukhululuka ‘mauleno 7.’ koma Yesu adapfunzisa Petulo na ise tose kuti tichadeka kukhululuka ‘maulendo yoposha 77’ panango kuti nthawe zose pomwe tichadena kukhululuka. (Mat. 18:21) Peno imwepo munkuona kuti ni voshupa kuphatisa basa malangizo mwaya ayi kukwinyirira. Tose isepano tinabvuto yakukhululuka nthawe zinango koma tichadena kuchita vomwe vingatithandize kuti timukhululukire m’bale wathu na kuyesesa kuti tiyambepomwe kubverana. w23.09 tsa. 29 ndi. 12

Yona wenze alibe kubvera Yahova, koma iye wenze na chitsimikizo chakuti Yahova abvesere pemphero yake yakudzichepesa na kulapa, ndipo vimwevi vidamutsimikizira kuti Yahova amuthandize. Yahova adapulumusa Yona ndipo patsogolo pake iye wenze wokonzeka kukwanirisa utumiki womwe Yahova wenze adamupasa. (Yona 2:10–3:4) Ko mudagumanako kale na mabvuto yoshupa maninge mpakana kukangira kumufotokozera Yahova momwe munkubvera? Ko mudakhalako kale woneta mpakana kukangira kuchita pfunziro ya pamwekha? Kumbukirani kuti Yahova ankudziwa bwino vomwe munkugumananavo podiya muchichita pemphero yachigwato. Imwepo mudzakhale na chitsimikizo chakuti Yahova adzakupaseni vomwe munkudekana. (Aef. 3:20) Peno vowawa va nthupi panago va m’maganizo vinkukuchitisani kuti imwepo mukangire kuwerenga Baibolo, yesesani kubvesera Baibolo yotepa na nkhani zinango zofotokozera Baibolo. Ndipo vingakhalesoti vothandiza kubvesera nyimbo zathu na kunyang’anira mavidiyo pa saiti ya jw.org. Mukambapemphera kwa Yahova na kufagafaga midawiro m’Baibolo na mu vofalisa vathu mudzakhale ninge munkumuchemera Yahova kuti akulimbikiseni ndipo iye adzakulimbikisenidi. w23.10 tsa. 13 ndi. 6; tsa. 14 ndi. 9

Chihema na makachisi yomwe yenze yadamangiwa ku Yerusalemu yenze yolingana ndipo nkati mwake mwenze vipinda viwiri. ‘Malo yochena’ na ‘yochena maninge’ yomwe yenze yadagawiwa na ntsalu. (Aheb. 9:2-5; Eks. 26:31-33) M’malo yochena mwenze choyikhapo lambi cha ouro na guwa yoperekera ntsembe, meza na mikate yavionesero. ‘Antsembe odzodzewa’ okha ndiwo ambabvumiziwa kungena pa malo yochena mwaya kuti aphate basa zochena. (Num. 3:3, 7, 10) Malo yochena maninge mwenze likasa yokonzewa na ouro yokhayokha yomwe imbatanthauza kukhalapo kwa Yahova. (Eks. 25:21, 22) Nkulu wantsembe ndiye yekha yemwe ambabvumiziwa kungena pa malo yochena maninge mwaya, kabodzi pa gole pa ntsiku yomasula wanthu ku ukapolo. (Lev. 16:2, 17) Iye ambangena na magazi ya nyama kuti abvingiridzire machimo yake na machimo ya wanthu. Pakumalizira, Yahova adawonesa bwino tanthauzo ya malo yawiri yochena mwaya ya chihema.—Aheb. 9:6-7. w23.10 tsa. 27 ndi. 12

Kazinjikazinji m’Mawu ya Mulungu, tigumana lamulo yakuti ‘timbakonde anzathu.’ (Yoh. 15:12, ; Aro. 13:8; 1 Ates. 4:9; 1 Pet. 1:22; 1 Yoh. 4:11) Chikondi ni khalidwe ya muntima mwathu, khalidwe yomwe tinayo nkati mwantima wathu. Ndipo palibe aliyese yemwe angakwanise kuona va muntima mwathu. Manje ko anango angadziwe tani kuti tichawakonda? Pa voyankhula vathu na vomwe tichachita. Pananjira zizinji zomwe tingawonesere kuti tichakonda abale na alongo wathu. Onani vitsanzo vinango: ‘Mumbanene chaivo kwa anzanu.’ (Zek. 8:16) ‘Khalani mwantendere na anzanu.’ (Maliko 9:50) Mumbayambe ndimwe ‘kulemekeza anango.’ (Aro. 12:10) ‘Mumbatambire anango.’ (Aro. 15:7) ‘Pitirizani . . . Kukhululukira anango.’ (Akol. 3:13) ‘Pitirizani kunyamula vofoka va anango.’ (Agal. 6:2) ‘Mbalimbikisani anango.’ (1 Ates. 4:18) ‘Pitirizani . . . Kunyamalisa anango.’ (1 Ates. 5:11) ‘Mbapemphererani anango.’—Yak. 5:16. w23.11 tsa. 9 ndi. 7-8

Ntsiku zose tichadekana kusalula vochita vikuluvikulu panango ving’onoving’ono. Chinthu chomwe chingatithandize kusalula bwino vochita, ni kukhala na chikhulupiriro cholimba. Mwakulinganiza, ntsiku zose tichadekana kusalula bwino vochita pa nkhani ya azishamwali, vokondweresa, mapfunziro, ukwati, wana na basa. Vingakhale bwino kudzibvunza kuti: ‘Ko vosalula vangu vionesa kuti nitsimikiza kuti dziko yoipa iyi ni yakanthawe kang’onong’ono ndipo dziko inyowani ifike manjemanje?’ (Mat. 6:19, 20; Luka 12:16-21) Tikambalimbisa chikhulupiriro chathu chakuti dziko inyowani iripafupi maninge, tidzakwanise kusalula bwino vochita. Isepano tichadekana pomwe kukhala na chikhulupiriro cholimba kuti tikwanise kulimbana na mabvuto. Nthawe zinango tingagumane na mabvuto ninge kudzudziwa, matenda yokhalisa na mabvuto yanango yomwe yangatifokese. Pakuyamba tingaganize kuti tikwanise kulimbana nayo. Koma mabvuto mwaya yakatenga nthawe, tingafunike chikhulupiriro cholimba kuti tikwanise kupirira na kupitiriza kutumikira Yahova mokondwa.—1 Pet. 1:6, 7. w23.04 tsa. 27 ndi. 4-5

Yahova achadikhira kuti timbachite vinthu mobverana na mapemphero yathu. Mwakulinganiza, m’bale angakumbire Yahova kuti amuthandize kukumbira feriya kwa bwana wake kuti akagumanike pa nsonkhano wachigawo. Ko Yahova angadawire tani pemphero mweyi? Iye angathandize m’bale moyu kuti akhale wolimba ntima nkuyenda kukayankhula na bwana wake. Koma m’bale muyo achadekana kuchita mbali yake yomwe ni kuyenda kwa bwana wake kuti akakumbire. Panango iye angadekane kuchita vimwevi kwa maulendo yazinji ndipo panango angadekane kukumbira munzake kuti asinthane nthawe yongenera mu basa nakubvuma kuti bwana wake adzamugwate kobiri pa feriya yomwe iye wachosa. Yahova achadikhira kuti timbapempherere vomwe ni vodekana kwa isepano. Yesu adabvekesa mpfundo yakuti mapemphero yathu yanango yangadawiriwelini mwakankulumize. (Luka 11:9) Ndipomwapa ayi kufoka kupemphera! Mbachitani vimwevi na ntima wose komasoti mobwerezabwereza (Luka 18:1-7) Isepano timuwonesa Yahova kuti chinthu chomwe tinkumukumbira ni chodekana maninge kwa isepano, osati chinthu chomwe tindochifuna chomwe chingadizelini kumala. Kuyingizira mwapa tichaonesa kuti tinachikhulupiriro kuti iye angatithandize. w23.11 tsa. 22 ndi. 10-11

Yahova adapolomisa shamwali wake Abulahamu kuti adzakhale na mwana nakuti makhaindi yazinji padziko yapasi yadzadalisiwe ndawa ya iye. (Gen. 15:5; 22:18) Abulahamu wenze na chikhulupiriro cholimba kwa Mulungu. Iye wenze na chikhulupiriro cholimba chakuti Mulungu adzakwanirise polomisi yake. Koma Abulahamu wenze na magole 100 ndipo Sara wenze na magole 90. Olo venze teno, iye wenze alibe mwana. (Gen. 21:1-7) Olo nteno, Baibolo inena kuti: ‘[Abulahamu] wenze na chidikhiro chakuti adzakhale baba wa makhaindi yazinji ‘ninge momwe vidanenerewa.’ (Aro. 4:18) Ndipo imwepo munkudziwa kuti vomwe Abulahamu ambadikhira vidachitikadi. Iye adakhala baba wa mwana yemwe ambamudikhira yemwe ni Isaki. Koma ndawa chani Abulahamu ambadekana kumukhulupirira tene Yahova? Abulahamu ambamudziwa bwino Yahova. Ndipomwapa iye ‘wenze na chitsimikizo chakuti vomwe [Mulungu] adamupolomisa’ vidzakwanirisike. (Aro. 4:21) Yahova ambamukonda Abulahamu ndipo adamuona kuti ni wolungama ndawa ya chikhulupiriro chake.—Yak. 2:23. w23.12 tsa. 8 ndi. 1-2

Mulumbwana yemwe ni wothembeka achasamalira bwino maudindo yake yose. Ganizirani chitsanzo chaungwiro cha Yesu. Iye alibe kukangira kukwanirisa maudindo yake, koma iye adakwanirisa mautumiki yose yomwe Yahova adamupasa podiya kuti pa nthawe zinango venze voshupa kuchita vimwevi. Iye ambakonda wanthu makamaka ateweri wake. Ndipo wenze wokonzeka kupereka moyo wake ndawa ya iwo. (Yoh. 13:1) Imwepo mungatewedzerembo Yesu mwakuphata basa mwakhama kuti mukwanirise utumiki uliose womwe mungatambire. Peno imwepo munkudziwalini bwinobwino vakuti muchite, khalani odzichepesa ndipo kumbirani thandizo kwa abale odziwa vizinji. Ayi kukhala okondwa ndawa yochita vinthu vomwe muchakwanisa basi. (Aro. 12:11) M’malomwake kwanirisani utumiki wanu ndipo chitirani vimwevi ‘Yahova osati wanthu.’ (Akol. 3:23) Ni shuwadi kuti imwepo ndimwelini waungwiro, ndipomwapa khalani odzichepesa ndipo bvumani chilichose chomwe imwepo mwaphonyesa.—Miy. 11:2. w23.12 tsa. 26 ndi. 8

Ni chinthu chokomedza maninge kubatizika na kuchita mbali ya banja ya Yahova, ndipo wale omwe adachita vimwevi ali pa ushamwali wolimba na Yahova ndipo abverana na wamasalimo Davide yemwe adati: ‘Okondwa ni wale omwe imwepo mwawasalula kuti abwere pafupi na imwepo kuti akhale mu nyumba yanu.’ (Sal. 65:4) Yahova asalula mosamala maninge wanthu omwe iye ankufuna kuti akhale m’banja yake. Iye achasalula wanthu omwe achafunisisa kukhala pa ushamwali wolimba na iye. (Yak. 4:8) Imwepo mukadzipereka kwa Yahova na kubatizika, mungatsimikizire kuti patsogolo pakuti mwabatizika, Yahova ‘adzakukhuthulireni madaliso yazinji maninge ndipo mudzasowelini chilichose.’ (Mal. 3:10; Yer. 17:8) Ubatizo ni chiyambi chabe. Imwepo mudzafunisise kuchita vomwe mungakwanise kuti mupitirize kukhala okhulupirika kwa Yahova podiya pa nthawe yomwe munkugumana na mabvuto panango viyeso. (Mla 5:4, 5) Ninge mteweri wa Yesu imwepo mudzachite vizinji kuti mutewedze chitsanzo chake na vose vomwe iye adapfunzisa.—Mat. 28:19, 20; 1 Pet. 2:21 w24.03 tsa. 8 ndi. 1-3

Manje ko tani peno mukondalini kugumana nthawe yokhala pabodzi? Manje ko mungachite tani? sikuti moto undokhala wogaka nthawe zose koma ungafunike kuikha nkhuni nthawe zose. Molingana na chitsanzo mwechi, tani imwepo kuyamba kupatula ka nthawe kang’onong’ono kakuti mumbakhalire pabodzi nthawe zose? Yesesani kuchita vinthu vomwe mose muchavikonda. (Yak. 3:18) Mukambayesesa kuchita vimwevi mudzasonkhezera chikondi chanu. Ulemu ni wodekana manige m’banja, ndipo ulemu tingaulinganize na mphepo. Palibe mphepo moto udzimwa mwakankulumize. Molingana na vimwevi, pakakhala palibe ulemu chikondi chomwe chilipo pa banja chingazizire mwakankulumize. Pambali inango mwamuna na nkazi olowolana akambachita khama yowonesana ulemu iwo apitiriza kuchitisa chikondi chawo kukhala champhanvu. Panango imwepo mungaganize kuti munkuonesa ulemu. Koma ko mwamuna wanu panango nkazi wanu adzibva kuti mumulemekeza? w23.05 tsa. 22 ndi. 9; tsa. 24 ndi. 14-15

Baibolo ifotokoza va atumiki okhulupirika wa Yahova omwe ambakhala okhumudwa maninge ndipo ambachita mantha ndawa ya azondi wawo komasoti na mabvuto yanango. (Sal. 18:4; 55:1, 5) Mwanjira ibodzibodzi, vingachitike kuti tingambatsutsiwe kubasa, kushikola komasoti na boma. Panango tingakhale na mantha yakuti timwalire ndawa ya bvuto yomwe tinayo ya thanzi. Pa nthawe ninge mweyi tidzibva kuti ndiselini otetezeka ninge kamwana. Manje ko Yahova atithandiza tani ku mabvuto ninge mwaya? Iye atinyamalisa na kutikhazika moyo pasi. Ayi kusiya kulimbisa ushamwali wanu na Yahova ndipo nthawe zose mbachezani naye na kuwerenga mawu yake. (Sal. 77:1, 12-14) Mukakhala na chizolowezi chochita vimwevi nthawe zose pomwe munkugumana na mabvuto, mudzawonese kuti munkufaga thandizo kwa Yahova. Muuzeni Yahova mantha yanu na nkhawa zanu zose. Patsogolo pake bveserani vomwe Yahova ankufuna kukuuzani pa kuwerenga Baibolo. Mwanjira mweyi imwepo mudzakwanise kuona thandizo yake.—Sal. 119:28. w24.01 tsa. 24-25 ndi. 14-16

Kuti tikwanise volinga vathu vauzimu tichadekana kukhala na maganizo yabwino. Maganizo yoyenera nichifuno champhanvu choyesayesa kukwanirisa volinga vathu. Nchibodzibodzimbo, tikakhala na maganizo yoyenera tingakwanise kukwanirisa volinga vanthu. Ko mungachite tani kuti mumbakhale na maganizo yoyenera? Pempherani kuti mumbakhale na maganizo yoyenera. Yahova aphatisa basa mzimu uchena kuti akulimbikiseni kukwanisa volinga vanu. Nthawe zinango tingakhale na cholinga ndawa yakuti tinkudziwa kuti ndivo tichadekana kuchita, palibe vophonyeka na vimwevi. Koma vingachitike kuti mulibe chifuno chokwanirisa cholinga chimwechi. Ganizirani vomwe Yahova adakuchitirani kale. (Sal. 143:5) Mtumi Paulo ambaganizira kukoma ntima kosapera komwe Yahova adamuwonesa, vimwevi vimbamuchitisa kuti ambaphate basa mwakhama pakutumikira Yahova. (1 Akor. 15:9, 10; 1 Tim. 1:12-14) Nchibodzibodzimbo, imwepo mukambaganizira vomwe Yahova wakuchitirani kale mudzakhale wofunisisa kukwanirisa cholinga chanu.—Sal. 116:12. w23.05 tsa. 27 ndi. 3-5

Ababa wathu wakudzulu akhala wokondwa maninge tikambalemekeza dzina yake. (Sal. 119:108) Wanthu anango ni osowa ndipo adzibva kuti ni osatetezeka. Ndipo afuna kuti wanthu anango ambawatembeje. Ko Mulungu ali tene uyu? Neye. Tikambalemekeza Yahova isepano tithandizambo kuonesa kuti Satana adanama. Ko ndawa chani? Ndawa yakuti iye adanena kuti palibe munthu aliyese yemwe angakwanise kukhala wokhulupirika kwa Yahova na kuteteza dzina yake. Satana adanena pomwe kuti palibe munthu yemwe angayesewe koma nkupitiriza kukhala wokhulupirika kwa Yahova. Iye adatsimikizira pomwe kuti tose isepano tingaleke kutumikira Yahova munthu akatipasa chinthu chabwino maninge. (Yobu 1:9-11; 2:4) Koma munthu wokhulupirika Yobu adawonesa kuti Satana ambanama. Manje ntsiku zino munthu aliyese anamwayi wothandizira basa yochenesa dzina ya Yahova na kumutumikira. (Miy. 27:11) Umoyu ni mwayi ukulu maninge. w24.02 tsa. 8-9 ndi. 3-5

Patsogolo pa masiku ya Mose na Yoswa, Yahova adasalula pomwe oweruza kuti atsogolere wanthu wake. Ndipo pa nthawe ya mafumu Yahova adasalula pomwe aneneri kuti atsogolere wanthu wake. Mafumu yomwe yenze yokhulupirika kwa Yahova yambathemba malangizo ya aneneri mwawa. Mwakulinganiza, Mpfumu Davide adabvuma modzichepesa malangizo yochokera kwa m’neneri Natani. (2 Sam. 12:7, 13; 1 Mbiri 17:3, 4) Mpfumu Yehosafati, adatewedza malangizo ya mneneri Yehazieli pakufuna kudziwa vomwe angachite na wanthu wa Mulungu komasoti na kufuna kuwalimbikisa kuti ‘ambathembe aneneri wa [Mulungu].’ (2 Mbiri 20:14, 15) Ndipo Mpfumu Hezekiya idafaga thandizo kwa mneneri Yesaya pa nthawe yomwe wenze pa mabvuto. (Yes. 37:1-6) Nthawe zose pomwe mafumu yambatewedza malangizo ya Yahova, iwo ambadalisiwa ndipo wanthu ambakhala mwa ntendere. (2 Mbiri 20:29, 30; 32:22) Venze vowonekeratu kuti Yahova ankuphatisa basa aneneri kuti atsogolere wanthu wake. w24.02 tsa. 21 ndi. 8

Satana ankufuna kuti isepano tikhale na azishamwali omwe atilimbikisalini kuchita chifuniro cha Yahova. Ntsiku zino isepano tichadekana kukhala osamala maninge kuposha abale wa ku Efeso, ndawa yakuti ntsiku zathu zino ni vosashupa kumala nthawe ikulu tinkucheza na wanthu, osati pamaso na pamaso pokha komasoti pa intaneti. Ayi kuti tibvume maganizo ya m’dziko iyi yakuti makhalidwe yoipa ni vinthulini voipa. Isepano tinkudziwa kuti vimwevi ni bodza. (Aef. 4:19, 20) Ndipomwapa, tingachite bwino kudzibvunza kuti: ‘Ko inepano nikhala osamala kuti nileke kubverana na anzangu wa ku shikola, wa ku basa panango wanthu anango omwe alemekezalini mpfundo za Yahova? Ko inepano ndine wolimba ntima kuikhira kumbuyo mpfundo za Yahova podiya kuti wanthu anango abverana navolini ndipo viribe basa podiya achinena kuti ndine munthu wosalekerera vinthu voipa? Ninge momwe lemba ya 2 Timoteyo 2:20-22, inkuonesera, isepano tichadekana kukhala osamala pomwe tinkusalula shamwali mumpingu. Tichadekana kukumbukira kuti anango mumpingu angatithandizelini kupitiriza kukhala okhulupirika kwa Yahova. w24.03 tsa. 22-23 ndi. 11-12

Ko mudaganizirako kale momwe Yahova aliri? Ni shuwadi kuti isepano tingamuwonelini Yahova, koma Baibolo imufotokoza mu njira zizinji. Iye achemerewa kuti ‘ni Dzuwa na Chotitetezera’ ndipo nthawe zinango anenewa kuti ‘ni moto wodzonga.’ (Sal. 84:11; Aheb. 12:29) Mu masomphenya yanango, m’neneri Ezekieli adanena va Yahova kuti ali ninge mwala wa safiro, chitsulo chonyezimira na chitawaleza. (Ezek. 1:26-28) Pakuti timuwonalini Yahova vingakhale voshupa kwa isepano kutsimikizira kuti atikonda. Anango adabonera maninge pa moyo ndipo aganiza kuti Yahova awakondalini. Yahova achabvesa momwe tibvera ndipo ankudziwa kuti ndawa chani vingakhale voshupa kwa isepano kuti timufenderere. Pa kufuna kutithandiza, iye adatiwonesa m’Baibolo kuti iye ni Mulungu wachikondi. Mawu yabwino yomwe yamudziwikisa Yahova ni chikondi. (1 Yoh. 4:8) Baibolo ichati Mulungu ni chikondi. Ndipo ni chikondi chomwe chimupasa mphanvu kuchita vose vomwe iye achachita. Chikondi cha Mulungu ni chikulu ni champhanvu mpakana chiphindulisa pomwe wale omwe amukondalini.—Mat. 5:44, 45. w24.01 tsa. 26 ndi. 1-3

Yahova adasalula Mose kuti atsogolere Aizirayeli kubula mu Iguputo. Yahova adapasa umboni wowoneka Aizirayeli kuti iye wenze adasalula Mose kuti awatsogolere. Iye ambaphatisa basa ntambo masikati ndipo usiku ambaphatisa basa ntambo wogaka moto. (Eks. 13:21) Mose ambalondola ntambo moyu ndipo iye adatsogolera Aizirayeli mpakana ku nyanja ifuwira. Wanthu adachita mantha ndawa yowona kuti apanikiziwa na nyanja komasoti na gulu yankhondo ya Aiguputo. Koma Mose wenze alibe kuphonyesa chinthu chilichose. Ni Yahova yemwe adafuna kutsogolera wanthu wake mpaka kunkule, koma iye adandophatisa basa Mose kuti achite vimwevi. (Eks. 14:2) Vimwevi vidapasa mpata Yahova kuti awonese mphanvu zake modabwisa maninge. (Eks. 14:26-28) Kwa magole 40, Mose adapitiriza kuthemba malangizo ya Yahova kuti akwanise kutsogolera wanthu wa Yahova nchipululu. (Eks. 33:7, 9, 10) Yahova ambayankhula na Mose kuchokera mu ntambo moyu ndipo Mose ambapereka malangizo yose kwa Aizirayeli. Aizirayeli ambakwanisa kuwona kuti Yahova ankuphatisira basa Mose kuti awatsogolere. w24.02 tsa. 21 ndi. 4-5