Julho

Vose vomwe Yesu adalewa, kuchita kuphatanidzapo vodabwisa, ambatewedzera mokhulupirika Ababa wake. (Yoh. 14:9) Ko isepano tingapfunzire chani pa vodabwisa va Yesu? Yesu na Yahova atikonda maninge. Pomwe Yesu wenze padziko yapasi, adaonesa kuti akonda wanthu pakuwamasula kumabvuto yawo. Nthawe inango amuna awiri osaona adakuwa kuchemera Yesu kuti awathandize. (Mat. 20:30-34) Yesu ‘adabva ntsisi’ na amuna mwawa ndipo adawachirisa. Mavesi mwaya, pagumanika mawu ya Chigiriki yotsumbudzuliliwa kuti ‘adabva ntsisi’ kunkuonesa kubva ntsisi maninge kuchokera mu ntima. Nimaganizo mwaya yachifundo yomwe yaonesa chikondi chomwe chidachitisa Yesu kudyesa wanjala na kupolesa wakhate. (Mat. 15:32; Maliko 1:41) Ndise otsimikiza kuti Yahova Mulungu ‘yemwe ni wachifundo’ chikulu na mwana wake Yesu atikonda maninge ndipo viwawawa akambaona tinkubonera. (Luka 1:78; 1 Pet. 5:7) Tikayikiralini kuti Yahova na Yesu afuna maninge kumalisa mabvuto yose yomwe yankuboneresa wanthu! w23.04 tsa. 3 ndi. 4-5

Tichadekana kuchita vose vomwe tingakwanise kuti tipewe kukhala na maganizo yoipa mu dziko ya Satana iyi. Tikambawerenga na kupfunzira Baibolo, tidzadza m’maganizo mwathu na vinthu vabwino. Kuyenda ku misonkhano na kuphata basa yolalikira, kudzatithandize pomwe kuteteza maganizo yathu. Pamwapo, Yahova adzakwanirise polomisi yake yakuti adzatisiyelini kuti tiyesewe kufika mpaka pomwe tingakwaniselini kupirira. (1 Akor. 10:12, 13) Tose tichadekana kupemphera kuti tipitirize kukhala okhulupirika kwa Yahova ntsiku zomalizira zino zomwe nizoshupa. Yahova akufuna kuti timbapemphere kwa iye na ntima wathu wose. (Sal. 62:8) Mbatembejani na kutamanda Yahova pa vose vomwe wakuchitirani. Kumbirani thandizo kuti mukhale wolimba ntima pakulalikira. Nthawe zose mbapempherani kukumbira thandizo kuti mukwanise kulimbana na mabvuto nakuti mupirire mayesero yaliyose yomwe yangabwere. Ayi kubvuma kuti aliyese akukangiseni kupemphera kwa Yahova nthawe zose. w23.05 tsa. 7 ndi. 17-18

Ndawa chani tigumanika pa misonkhano? Cholinga chathu ni kulemekeza Yahova. (Sal. 26:12; 111:1) Cholinga chinango ni chakuti timbalimbikisane makamaka ntsiku zoshupa zomwe tinkukhala zino. (1 Ates. 5:11) Tikandoimisa djanja kupereka ndemanga tikhala kuti tinkuonesa vinthu viwiri vimwevi. Koma kuti tiyankhe panango tingagumane na mabvuto. Panango tingakhale na nkhawa pakuyankha panango tingafune kuti timbalatiwe kawirikawiri koma tinkulatiwalini ninge momwe tinkufunira. Ko tingalimbane tani na bvuto mweyi? Ntumi Paulo adati ambafunika ‘kuganizirana kuti alimbikisane.’ Manje tikabvesa kuti m’bale munango angalimbikisiwe pa ndemanga yochepa yomwe isepano tingapereke, tidzibva omasuka kuti tiperekere ndemanga. Olo kuti alibe kutilata ninge momwe isepano timbafunira tikhala okondwa ndawa abale anango agumanambo mpata wopereka ndemanga.—1 Pet. 3:8. w23.04 tsa. 20 ndi. 1-3

Mpfumu idalengeza kuti Ayuda omwe enze ku ukapolo kwa magole 70 abwerere ku dziko yawo ku Izirayeli. (Ezara 1:2-4) Ni vowonekeratu kuti Yahova ndiye adawathandiza ndawa yakuti Ababulo ambamasulalini akapolo wawo. (Yes. 14:4, 17) Koma mpfumu yawo inyowani idabvumiza kuti Ayuda achoke. Ndipomwapa, mu Yuda aliyese makamaka misolo ya banja yambafunika kuchita vosalula. Kuchoka ku Babulo panango kupitiriza kukhala. Kuti akwanise kusalula yenzelini nkhani ya masenzeka. Ndawa yakuti Ayuda azinji enze wokalamba, ndipo mwapa vidakakhala voshupa maninge kwa iwo kuti achite ulendo moyu. Ayuda azinji enze obadwira ku Babulo ndipo kwenze kumoku kokha komwe iwo angadziwa. Kwaiwo Izirayeli yenze chabe dziko ya ababa wawo na azimbuya wawo. Ayuda anango wenze adakhala olemera ku Babulo, ndipomwapa, vidakakhala voshupa maninge kusiya nyumba zawo na bizi yawo kuti akayambe pomwe moyo unyowani. w23.05 tsa. 14 ndi. 1-2

Mawu ya Mulungu yatilimbikisa kuti tipitirize kukhala wopirira, wachifundo na wachikondi. Lemba ya Luka 21:19 ilewa kuti: ‘Peno imwepo mudzapirire mudzagumane moyo.’ Lemba ya Akolose 3:12 ilewa kuti: ‘Valani chifundo.’ Ndipo Lemba ya 1 Atesalonika 4:9, 10 ilewa kuti: ‘Mulungu adakupfunzisani kuti mumbakondane. . . . Koma isepano tinkukudandaulirani abale kuti, mupitirize kuchita vimwevi kawirikawiri.’ Mawu mwaya yadanemberewa Akhrisitu womwe ambawonesa kale kupirira, chifundo komasoti chikondi. Podiya kuti venze teno iwo ambafunika kupitiriza kuwonesa makhalidwe mwaya ndipo isepanombo tichadekana kuchita vibodzibodzi. Kuti mudziwe momwe mungachitire vimwevi wonani momwe Akhrisitu woyambirira adawonesera makhalidwe mwaya. Muwone pomwe momwe mungawatewedzerere Akhrisitu mwawa kuti mukhale wokonzekeradi chisautso chikulu. Ndipo chisauso chikulu chikadzati chayamba, mudzakhale kuti mwapfunzira kale momwe mungapiririre ndipo mudzakhale wotsimikiza kupirira. w23.07 tsa. 3 ndi. 4, 8

Viribe basa peno ndise odzozewa panango wa ‘nkhosa zinango,’ tose tichadekana kupitiriza kufamba ‘mu Nsewu Wochena.’ Vimwevi vidzatithandize kupitiriza kutumikira Yahova manjeuno komasoti kutsogolo tikadzatambira madaliso yomwe Ufumu wa Mulungu udzabwerese.(Yoh. 10:16) Kundoyambira mu 1919 wanthu azinji amuna, akazi na wana akhala ankubula mu Babulo Nkulu panango kuti chipembedzo chonama na kuyamba kufamba mu nsewu wophiphirisa. Yahova adatsimikizira kuti chopunthwisa chirichose chomwe chidakakangisa Ayuda kuchoka ku Babulo chidakachosewa. (Yes. 57:14) Ko ntsiku zathu zino kunkuchitikambo vinthu volingana na ‘Nsewu Wochena?’ Inde. Kwamagole yazinji ikanati kufika gole ya 1919, Yahova adaphatisa basa amuna okhulupirika kuthandiza anango kuti achoke mu Babulo Nkulu. (Onani pomwe Yesaya 40:3.) Amuna mwawa adakonza njira kuti wanthu wabwino ntima akwanise kuchoka mu chipembedzo chonama nakuti atumikire Yahova pabodzi na wanthu wake. w23.05 tsa. 15-16 ndi. 8-9

Yahova afunalini kuti munthu ambachite vinthu mokakamiziwa, koma mokodwa. (2 Akor. 9:7) Manje tani peno imwepo mulibe chifuno chokwanirisa cholinga, ko muchadekana kuchita khama kuti muchikwanirise? Onani chitsanzo cha mtumi Paulo, iye adati: ‘Nikupumphuntha thupi yangu na kuitsogolera ninge kapolo.’ (1 Akor. 9:25-27) Paulo abadzikakamiza kuchita vinthu vabwino olo kuti alibe chifuno chochita vinthu vimwevi. Ko Yahova ambawona chani pa vomwe Paulo ambachita? Iye ambakondwa na utumiki wake ndipo Yahova adadalisa khama yake. (2 Tim. 4:7, 8) Chibodzibodzimbo, Yahova akhala wokodwa akambaona khama yathu yokwanirisa volinga vathu, podiya kuti tilibe chifuno chochitira vimwevi. Iye akhala wokodwa kuwona khama yomwe tinkuchita osati ndawa yokonda vomwe tinkuchita koma ndawa yomukonda iye. Ninge momwe Yahova adadalisira Paulo, iye adzadalisembo khama yanu. (Sal. 126:5) Tikambaona kuti Yahova ankutidalisa tilimbikisiwa. w23.05 tsa. 29 ndi. 9-10

Mtumi Paulo adalinganiza wale omwe adzapulumukelini pa ntsiku ya Yahova ninge wanthu omwe ankugona. Iwo azindikiralini vomwe vinkuchitika na nthawe yomwe tinkukhala. Ndipo mwapa iwo akukwanisalini kuzindikira vinthu vofunika vomwe vinkuchinja ndipo ankuchitapolini kanthu. Wanthu azinji ntsiku zino ankugona mwauzimu. (Aro. 11:8) Iwo alibenavo basa vakuti tinkukhala mu ‘ntsiku zomalizira’ nakuti manjamanje chisautso chikulu chifike. (2 Pet. 3:3, 4) Olo nteno tizindikira kuti malangizo youziriwa yolewa vantsiku yachiweruzo yapitiriza kukhala yofunika ntsiku na ntsiku. (1 Ates. 5:6) ndipomwapa tifunika kukhala odekha na olimba. Ndawa chani? Kuti tileke kusokonezewa na vinthu mudziko iyi. Kuyesewa kuti tikhale kusaidi yadziko kupitirize makamaka pomwe ntsiku ya Yahova ili pafupi. Tichadekanalini kukhala nankhawa koma kukonzekera momwe tingapilirire. Mzimu wa Mulungu ungatithandize kuti tikhale osagunduzika, ochena mumaganizo komasoti kuti timbasalule vinthu mwanzeru.—Luka 12:11, 12. w23.06 tsa. 10 ndi. 6-7

Ko nchani chichabwera m’maganizo mwanu mukabva dzina yakuti Samisoni? Mosakayika imwepo mungaganizire kuti iye wenze mwamuna wamphanvu. Vimwevi nichaivo. Koma chinthu chinango nchakuti iye adasalula vinthu mophonyeka ndipo adagumana na mabvuto yakulu maninge ndawa ya vimwevi. Podiya venze teno, Yahova adaganizira vinthu vose vabwino vomwe Samisoni adachita, ndipo adabvuma kuti chitsanzo cha Samisoni chinembewe m’Baibolo kuti chitiphindulise. Yahova adaphatisa basa Samisoni kuti achite vinthu vodabwisa na kuthandiza Aizirayeli. Payadapita magole yazinji maninge Samisoni wamwalira kale, Yahova adauzira mtumi Paulo kuti amuyikhe mu ndandanda ya wanthu omwe adawonesa chikhulupiriro. (Aheb. 11:32-34) Chitsanzo cha Samisoni chingatilimbikise maninge. Iye adathemba Yahova podiya kuti adagumana na mabvuto yazinji maninge. chitsanzo cha Samisoni chingatilimbikise na kutipfunzisa vinthu vomwe vingatithandize. w23.09 tsa. 2 ndi. 1-2

Kuti timbakwanise kupirira tifunika kupemphera kwa Yahova na kumuuza vose vomwe vinkutishupa. (1 Ates. 5:17) Koma panango imwepo manjeuno munkugumanalini na bvuto ikulu. Koma ko imwepo mupemphera kwa Yahova na kukumbira kuti akuthandizeni pa nthawe iliyose yomwe ndimwe wokwinyirira, wopanikizika panango kusowa chochita? Peno imwepo mu na chizolowezi chopemphera kwa Yahova kuti akuthandizeni pa mabvuto ya ntsiku na ntsiku, ndiye kuti mudzachite pomwe vibodzibodzi kutsogolo. Mukachita teno mudzakhale wotsimikiza kuti Yahova ankudziwa nthawe chaiyo yomwe angakuthandizeni na momwe angachitire vimwevi. (Sal. 27:1, 3) Tikambayesesa kupirira mabvuto manjeuno, vidzakhale vosashupa kupirira pa chisautso chikulu. (Aro. 5:3) Ko tinkudziwa tani vimwevi? Abale na alongo azinji nthawe iliyose yomwe akuyesesa kupirira mabvuto yoyesa chikhulupiriro chawo akhala na mphanvu kuti adzakwanise kupirira mabvuto yakutsogolo. Akagumana na bvuto koma nkukwanisa kupirira akhala wotsimikiza maninge kuti Yahova nthawe zose ni wokonzeka kuwathandiza. Kukhulupirira vimwevi kuwathandiza kuti adzapirire mabvuto yali kutsogolo.—Yak. 1:2-4. w23.07 tsa. 3 ndi. 7-8

Kukhala wodzichepesa na wachifundo kuchitisa kuti Yahova akhale wololera. Mwakulinganiza, kudzichepesa kwa Yahova kudaonekera bwinobwino pomwe iye ambafuna kudzonga wanthu oipa mu Sodomu. Pakuphatisa basa angelo Yahova adauza Loti munthu wokhulupirika kuti achoke nkuyenda kudera ya kumaphiri. Koma iye wenze na mantha ndipo ambafunalini kuyenda ku dera mweyi. Pamwapo Loti adakumbira kuti iye na banja yake athawire ku Zowari, thaundi ing’ono yomwe Yahova ambafunakale kuidzonga. Pamwapa Yahova adakandomuuza Loti kuti aphatisire basa malangizo yomwe Iye wenze adamupasa. Koma m’malo mwakuti amuuze teno Yahova adabvuma pomwe Loti adakumbira ndipo adachinja maganizo yake yakuti adzonge thaundi mweyire. (Gen. 19:18-22) Magole patsogolo pake, Yahova adawonesa pomwe chifundo kwa wanthu omwe ambakhala ku Nineve. Iye adatumiza mneneri wake Yona kuti akapereke chenjezo yakuti wanthu na nthaundi mweyire anzongewe. Koma pomwe wanthu wa ku Nineve adalapa Yahova adawabvera ntsisi ndipo alibe kudzonga nthaundi mweire.—Yona 3:1, 10; 4:10,11. w23.07 tsa. 21 ndi. 5

Ko tinkupfunzira chiyani pachitsanzo cha Yehoasi? Iye wenze ninge muti womwe ulidjikiliriwe na munzake yemwe wenze Yehoyada, pomwe muti wodjikilira udagwa yemwe ni Yehoyada mphepo idabwera womwe ni wanthu wampatuko muti wodjikiriwa udagwa yemwe ni Yehoasi. Chitsanzo chimwechi chinkuwoneseratu kuti kugopa kwathu Yahova osati kumbathembe Akhrisitu anzathu olo wanthu wa m’banja mwathu. Kuti tipitirize kukhala wolimba mwauzimu, tichadekana kupitiriza kuyesesa kudzipereka kwa Mulungu nakumugopa. Tingachite vimwevi pakupfunzira ntsiku iliyose, kusinkhasinkha na kupemphera. (Yer. 17:7, 8; Akol. 2:6, 7) Yahova atikumbiralini vinthu vomwe isepano tingakwaniselini kuvichita. Vomwe iye ankufuna vifotokozewa mwachigwato pa Mlaliki 12:13, yomwe ichati: ‘Gopa Mulungu nakusunga malamulo yake, ndawa vimwevi ndivo vomwe munthu afunika kuchita.’ Tikambagopa Mulungu, tidzakwanise kupirira viyeso nakukhala wolimba. Palibe chirichose chomwe chidzasokoneze ushamwali wathu na Yahova. w23.06 tsa. 19 ndi. 17-19

Kumayambiriro kwa vesi 5 inena kuti: ‘Yemwe alikhale pa mpando wachifumu adanena kuti.’ (Chiv. 21:5a) Mawu mwaya ni yodekana maninge ndawa ni ubodzi mwa maulendo yatatu pomwe Yahova adayankhula mu bukhu ya Chivumbulutso. Ni mngelo lini panango Yesu yemwe adatsimikizira vimwevi, koma ni Yahova chaiye. Vimwevi vinkutitsimikizira kuti tingamuthembe na ntima wose Yahova pa vomwe iye adanena kumapeto kwa vesi 5. Ndawa chani? Ndawa yakuti Yahova ‘anganamelini.’ (Tito 1:2) Ndipomwapa tingakhulupirire pomwe mawu ya pa Chivumbulutso 21:5, 6. Mawu yanango yomwe Yahova adanena ni yakuti: ‘Onani!’ Mawu yachigiriki yotsumbudzuliriwa kuti ‘onani!’ Yaphatisiriwa basa maninge mu bukhu ya Chivumbulutso. Bukhu inango ya marefarensiya ifotokoza kuti “mawu mwaya yaphatisiwa basa pakufuna kuthandiza owerenga kuti akhale tcheru na vomwe ankufuna kuwerenga.” Manje ko Yahova adanena chani patsogolo pake? Iye adanena kuti: ‘Ninkukonza vinthu vose kukhala vinyowani.’ Yahova adzachite vimwevi kutsogolo. Iye ankutsimikizira kuti adzakwanirise vomwe adapolomisa ndipo iye ankuyankhula ninge kuti vimwevi vachitika kale.—Yes. 46:10. w23.11 tsa. 3-4 ndi. 7-8

Mtumi Petulo ambalimbana na vofoka vake. Onani vitsanzo vinango. Pomwe Yesu adati ankufunika kuti abonere na kufa kuti akwanirise maulosi ya m’Baibolo, Petulo adauza Yesu kuti vimwevi vichitikelini. (Maliko 8:31-33) Maulendo yazinji Petulo na atumi anango adagegedzana pakufuna kudziwa kuti nkulu wenze mbani pakati pawo. (Maliko 9:33, 34) Usiku Yesu akanati wafa, Petulo adaganiza mophonyeka ndipo adagwata dzitu ya munthu. (Yoh. 18:10) Usiku ubodzibodzi moule, mosaganiza bwino adalamba maulendo yatatu kuti wenzelini wopfunzira wa Yesu. (Maliko 14:66-72) Vimwevi vidachitisa kuti Petulo alire maninge. Koma Yesu alibe kumusiya ndipo pomwe iye adamukisiwa adapasa Petulo mwayi woonesa chikondi chake kwa iye. Yesu adamupasa utumiki unango unyowani Petulo wakubusa na kusamalira nkhosa zake. (Yoh. 21:15-17) Petulo adachita ndendende momwe Yesu adamukumbirira. Petulo wenze ku Yerusalemu pa ntsiku ya Pentekosite ndipo wenze m’bodzi mwa woyamba omwe adadzodzewa na mzimu uchena. w23.09 tsa. 22 ndi. 6-7

“Petulo adauza akulu kuti: ‘Busani gulu ya nkhosa za Mulungu.’ (1 Pet. 5:1-4) Peno imwepo ndimwe nkulu isepano tinkudziwa kuti muwakonda maninge abale ndipo munkufunisisa kuwasamalira bwino. Koma nthawe zinango imwepo mungakhale wotangwanika panango kudzibva woneta ndipo munkukwanilisalini udindo wanu. Vikakhala teno ko imwepo mungachite tani? Mufotokozereni Yahova momwe munkubvera. Petulo adanemba kuti: ‘Peno munango ankutumikira atumikire mothemba mphanvu zomwe Mulungu achapereka.’ (1 Pet. 4:11) Panango munkugumana na mabvuto yoshupa munthawe ya mapeto ya dongosolo yoshupa ino. Koma kumbukirani kuti ‘M’busa nkulu’ Yesu Khrisitu angakuthandizeni imwepo. Iye angachite vimwevi manjeuno komasoti mu dziko inyowani. Chomwe Yahova ankufuna kwa akulu ni kuwakonda, kuwatsogolera bwino komasoti kukhala ‘chitsanzo chabwino’ kwa abale na alongo. w23.09 tsa. 29-30 ndi. 13-14.

Tifunika kupewa kutewedzera kaganizidwe ka wanthu womwe alemekezalini malamulo ya Yahova. Tikambaganiza ninge wanthu womwe achalemekezalini malamulo ya Yahova, isepanombo tingatengere vochita vawo. (1 Akor. 3:19) ‘Nzeru za dziko iyi’ kawirikawiri zichitisa kuti wanthu aleke kubvera malamulo ya Mulungu. Akhrisitu woyambirira wa mu mpingu wa Pegamo na Tiyatira wenze adatengerambo makhalidwe ya wanthu womwe enze nawo pafupi womwe ambachita chigololo na kutumikira mafano. Yesu adapereka malangizo yamphanvu ku mipingu mwaya ndawa yakuti ambalekerera khalidwe yachigololo. (Chiv. 2:14, 20) Ntsiku zino wanthu azinji atikakamiza kuti timbawone vinthu ninge momwe dziko ichawonera. Wanthu wa m’banja mwathu panango anzathu angayambe kumbalewa kuti tinkupherewa ufulu ndawa yotewedza malamulo ya Yahova. Ndipo viribe basa olo tichileka kutewedza ibodzi ya malamulo ya Yahova. Iwo angayambe pomwe kumbatiwuza kuti viribe basa olo tichikulisa chikhumbo chathu nkumbawona kuti malamulo ya Yahova ni yakalekale. Nthawe zinango tingambawone kuti malangizo yomwe Yahova ankutipasa niyosabveseseka panango tingambayesewe kuti tichite vinthu ‘vopitirira vomwe viri m’malemba.’—1 Akor. 4:6. w23.07 tsa. 16 ndi. 10-11

Mariya mayi wa Yesu angadekana mphanvu kuti akwanise kuchita vomwe Yahova ambafuna. Iye wenze wosalowolewa, koma mngelo adamuuza kuti adzakhale na mimba. Mariya ambadziwalini momwe angasamalilire mwana koma ambafunika kulera mwana yemwe ambadzakhala Mesiya. Pakuti iye wenze akanati wagonana na mwamuna aliyese, ko adakamuuza tani Yosefe mwamuna yemwe ambafuna kulowolana naye? (Luka 1:26-33) Ko Mariya adakwanisa tani kukhala na mphanvu? Iye adakumbira thandizo ya anango. Mwakulinganiza, iye adakumbira mngelo Gabirieli kuti amufotokozere vizinji va udindo moyu. (Luka 1:34) Patsogolo pake iye adachita ulendo woyenda ‘ku dera ya maphiri’ ku Yuda kuti akagumane na m’bale wake Elizabeti. Elizabeti adamutembeja Mariya ndipo adauziriwa na Yahova kuti afotokoze va ulosi wa Mesiya. (Luka 1:39-45) Mariya adafotokoza kuti Yahova wenze adachita vinthu ‘mwamphanvu na djanja yake.’ (Luka 1:46-51) Yahova adaphatisa basa mngelo Gabirieli na Elizabeti kuti alimbikise Mariya. w23.10 tsa. 14-15 ndi. 10-12

Namba yochepa ya Akhrisitu ankudzodzewa na mzimu uchena. Ndawa ya vimwevi iwo ali pa ushamwali wapadzulu maninge na Yahova. Odzodzewa mwawa okwana 144,000 akatumikire ninge antsembe kudzulu pabodzi na Yesu. (Chiv. 14:1) Malo yochena ya chihema yambatanthauza kubadwa kwawo kwauzimu ninge wana wa Mulungu alipano pa dziko yapasi. (Aro. 8:15-17) Malo yochena maninge ya chihema yatanthauza kudzulu komwe Yahova achakhala. ‘Ntsalu’ yomwe imbagawa malo yochena na malo yochena maninge ichatanthauza thupi ya Yesu. Alipano pa dziko yapasi anathupi ya umunthu iye adakakwanisalini kuyenda kudzulu nkukakhala nkulu wantsembe wa kachisi wauzimu wa Yahova. Pa kupereka moyo wake ninge dipo kwa wanthu wose Yesu adafungula njira ya moyo wakudzulu kwa Akhrisitu ose odzodzewa. Ninge Yesu Akhrisitu odzodzewa achadekana kuvula mathupi yawo ya umunthu kuti akatambire mphaso yawo ya moyo wosapera kudzulu.—Aheb. 10:19, 20; 1 Akor. 15:50. w23.10 tsa. 28 ndi. 13

Gidiyoni pakuti ambadziwa kuti ni wochimwa, iye adachita vinthu mofatsa pomwe Aefulaimu adamunenera vinthu voipa. (Ower. 8:1-3) Iye alibe kudawira mwaukali. Iye adaonesa kudzichepesa pa kuwatetekera vomwe anganena ndipo adachitisa kuti ukali wawo uchepe. Akulu wanzeru atewedzera Gidiyoni pakutetekera bwinobwino na kuchita vinthu mwachikatikati akambanenerewa vinthu voipa. (Yak 3:13) Vimwevi vichitisa kuti mu mpingu mukhale ntendere. Pomwe Gidiyoni adatembejewa ndawa yakuwina Amidiyani, iye adachitisa kuti ulemelero wose uyende kwa Yahova. (Ower. 8:22, 23) Ko abale wamaudindo angatewedzere tani Gidiyoni? Iwo angambapereke ulemelero kwa Yahova pa vomwe wachita. (1 Akor. 4:6, 7) Mwakulinganiza, nkulu akatembejewa ndawa yakuti anabuya yopfunzisa iye angachitise otembeja kuti ambaganizire pomwe komwe kuchachoka malangizo, Mawu ya Mulungu na chipfunziso chomwe tichatambira mu gulu ya Yahova. Akulu angafunike kuganizira peno wanthu akundoganiziralini va iwo okha basi. w23.06 tsa. 4 ndi. 7-8

Peno chinthu chomwe takumbira kwa Yahova chilibe kuchitika, tingadzibvunze kuti: ‘Ko inepano ninkukumbiradi chinthu chabwino?’ Nthawe zizinji tiganiza kuti tinkudziwa vinthu vabwino, koma nthawe zinango vinthu vomwe tingawone kuti ni vabwino kwa isepano, nkuyenda kwa nthawe vingakhale vosafunika. Peno tinkupemphera kuti timalise bvuto inango panango pangakhale njira yabwino maninge yomalisira bvuto mweyo. Ndipo vinthu vinango vomwe tingakumbire kwa Yahova panango vingakhale vosabverana na chifuniro chake. (1 Yoh. 5:14) Mwakulinganiza, ganizirani va azibereki womwe ankukumbira Yahova kuti mwana wawo apitirize kukonda Yahova. Vinkuoneka kuti kukumbira vimwevi ni kosaphonyeka koma Yahova akakamizalini munthu kumutumikira. Iye ankufuna kuti tose isepano kuphatanidzapo wana wathu asalule kumutumikira. (Deut. 10:12, 13; 30:19, 20) Manje m’malo mwakuti akumbire Yahova kuti mwana wawo apitirize kutumikira Yahova, azibereki angakumbire kuti ambawafike pa moyo wana wawo na kuwalimbikisa kuti ambakonde Yahova na kukhala pa ushamwali na iye.—Miy. 22:6; Aef. 6:4. w23.11 tsa. 21 ndi. 5; tsa. 23 ndi. 12

‘Nthawe zose mumbanyamalisane.’ Koma ndawa chani ni vodekana kunyamalisa abale na alongo wathu? Bukhu inango yofotokozera marefarensiya ya m’Baibolo idanena kuti mawu yomwe Paulo adaphatisa basa yakuti ‘kunyamalisa’ yatanthauza “kukhala pafupi na munthu yemwe ankugumana na mabvuto yoshupa kuti umulimbikise.” Manje isepano tikambalimbikisa abale, tiwathandiza kuti apitirize kufamba mu nsewu wokatambira moyo. Nthawe zose tikambalira pabodzi na abale wathu, tiwawonesa kuti tichawakonda maninge. (2 Akor. 7:6, 7, 13) Pomwe munthu ankubva chifundo na munthu yemwe ankubonera, achafunisisa kumunyamalisa na kumuthandiza. Ndipomwapa chakuyamba tichabva chifundo pambuyo pake nkumulimbikisa. Naboni tiwone momwe Paulo adalinganizira chifundo cha Yahova na chilimbikiso chomwe iye achatipasa. Paulo adafotokoza kuti Yahova ‘ni Baba wa chifundo chosapera na Mulungu wachilimbikiso chose.’—2 Akor. 1:3. w23.11 tsa. 9-10 ndi. 8-10

Aliyese angadikhire kugumana na mabvuto. Ganizirani chitsanzo cha mtumi Paulo. Iye adauza Akhrisitu wa ku Atesalonika kuti: ‘Pomwe tenze na imwepo tidakuuzirantuni kuti tidzagumane na chidzudzo. Ni vimwevi vomwe vinkuchitika.’ (1 Ates. 3:4) Kwa Akorinto, Paulo adanemba kuti: ‘Tinkufunalini kuti imwepo abale musadziwe va chidzudzo chomwe tidagumananacho . . . Ndipo timbakayikira kuti tikhalepomwe na moyo.’ (2 Akor. 1:8; 11:23-27) Manjeuno tose isepano tingadikhire kugumanambo na chidzudzo. (2 Tim. 3:12) Pomwe munkukhulupirira Yesu, panango azishamwali na wanthu wa m’banja mwanu angambakunyozeni. Vingachitike kuti angakuchitireni vinthu voipa. Ko munkugumanapomwe na bvuto inango ku basa ndawa ya kukhala woona ntima? (Aheb. 13:18) Ko imwepo mudadzudziwakokale na boma ndawa ya basa yolalikira? Viribe basa khaindi ya chidzudzo chomwe tinkugumana nacho. Paulo adanena kuti isepano tingakwanise kukhala okondwa. w23.12 tsa. 10-11 ndi. 9-10

Yakobo adalimbana pomwe na mabvuto yazinji. Wana wake awiri Simiyoni na Levi, adapsipiza dzina Yahova komasoti ya banja yawo. Kuthimizira pamwapo, nkazi wake wa Yakobo Rakele yemwe ambamukonda maninge adamwalira pangabereka mwana wawo wachiwiri. Ndipo ndawa ya njala ikulu yomwe idachitika mu dziko yomwe Yakobo angakhala, iye podiya kuti wenze wokalamba adakakamizika kufuluka kukakhala mu dziko ya Iguputo. (Gen. 35:16-19; 37:28; 45:9-11, 28) Podiya kuti venze teno, Yakobo alibe kuluza chikhulupiriro chake kwa Yahova na mapolomisi yake. Yahova adamuwoneseratu Yakobo kuti ambakondwa naye. Mwakulinganiza, Yahova nthawe zose ambamudalisa na vinthu vakuthupi. Yakobo adatembeja maninge Yahova pomwe adagumanapomwe na mwana wake Yosefe yemwe ambaganizira kuti wenze adamwalira kwa magole yazinji m’mbuyo! Chikondi champhanvu chomwe Yakobo wenze nacho kwa Yahova ndicho chidamuthandiza kuti alimbane na mabvuto yose mwaya. (Gen. 30:43; 32:9, 10; 46:28-30) Tikapitiriza kukhala pa ushamwali wolimba na Yahova, isepanombo tidzakwanise kulimbana na mabvuto yosadikhirika. w23.04 tsa. 15 ndi. 6-7

Pa Salimo 23 Davide adawonesa chikhulupiriro chake kuti Yahova ambamukonda na kumusamalira. Iye adanena momwe ushamwali wake na Yahova wenzere ndipo adanena kuti Yahova ni Nyakabusa wake. Davide ambadzibva wotetezeka pa kubvuma kuti Yahova ambamutsogolere ndipo ambamuthemba maninge. Davide ambadziwa kuti Yahova awonesa chikondi chake kwa iye nthawe zose. Ndawa chani Davide wenze na chitsimikizo mwechi? Davide nthawe zose ambawona momwe Yahova amusamalilira ndipo nthawe zose wenze na vinthu vodekana pa moyo wake. Kuyingiziramwapa Davide ambadziwa kuti Yahova wenze shamwali wake ndipo ambamukonda. Ndipomwapa Davide ambadziwa kuti viribe basa vinthu vomwe vichitike kutsogolo, Yahova nthawe zose adzamusamalire. Chikhulupiriro chomwe Davide wenze nacho pa chikondi cha Yahova chenze champhanvu kuposha chinthu chilichose. Ni vimweviletu vomwe vimbachitisa Davide kukhala wokondwa.—Sal. 16:11. w24.01 tsa. 29 ndi. 12-13

Nkati mwa nkhondo ya chiwiri ya padziko yose, atumiki wa Yahova adakwanisa kuphata basa yolalikira mwa ufulu ndipo basa yolalikira padziko yose idayingizirika Ntsiku zino abale wa M’bungwe Yotonga, ankupitiriza kutewedza malangizo ya Yesu. Iwo ankuchita vimwevi pakuwonesesa kuti vomwe ankusalula vinkubverana na vomwe Yesu ankufuna. Kuyingizira mwapa, onyang’anira madera na akulu aphatisiriwa basa kuti apereke malangizo mwaya ku mipingu. Akulu omwe ni odzodzewa ali ku ‘djanja ya makulu’ ya Yesu. (Chiv. 2:1) Ni vobveka kuti akulu ose alibe ungwiro ndipo nthawe zinango aphonyesa vinthu. Mose na Yoswa ambaphonyesambo olo atumi nthawe zinango ambaphonyesambo. (Num. 20:12; Yos. 9:14, 15; Aro. 3:23) Podiya viri tene, isepano tingakwanise kuwona kuti Yesu ankupitiriza kutsogolera kapolo wokhulupirika na wanzeru komasoti akulu. Manje isepano tinavifukwa vobveka votichitisa kukhulupirira malangizo yomwe Yesu ankupereka pakuphatisa basa amuna okhulupirika mwawa. w24.02 tsa. 23-24 ndi. 13-14

Ntsiku zino isembo tingamulemekeze Yahova tikambalewa va iye mwaulemu na mwachikondi. Tikakhala mu umboni, tichadekana kukumbukira kuti cholinga chathu chikulu ni kuthandiza wanthu kumufenderera Yahova na kuwathandiza kuti ambamuwone ninge Baba wachikondi. (Yak. 4:8) Kwa isepano ni mwayi ukulu maninge kuwonesa wanthu kuti Yahova ni Mulungu wachikondi, wachilungamo, wanzeru, wamphanvu komasoti nakuti iye anamakhalidwe yanango yabwino maninge. Njira inango yomwe tingamulemekezere Yahova ni kuchita vose vomwe tingakwanise kuti timbamutewedzere. Tikambachita mwevi, wanthu anango adzawone kuti ndise osiyana maninge na wanthu azinji wa m’dziko iyi. (Mat. 5:14-16) Pomwe tinkukhala nawo ntsiku na ntsiku, tikhala na mwayi wakuwafotokozera kuti ndawa chani ndise osiyana na wanthu anango, ndipo mwanjira mweyi isepano tingalemekeze dzina ya Yahova. Phindu yake ni yakuti wanthu azinji omwe anantima wabwino, angachite chidwi na kufuna kuyamba kupfunzira vizinji va Yahova Mulungu wathu. Tikambalemekeza Yahova mwanjira mweyi iye akhala wokondwa maninge.—1 Tim. 2:3, 4. w24.02 tsa. 10 ndi. 7

Kuti mukhale Mkhrisitu wokhuma mwauzimu, imwepo muchadekana kupfunzira maluso yanango yodekana. Maluso mwaya yadzakuthandizeni kukwanirisa udindo wanu mumpingu, kugumana basa ndipo yadzakuthandizenipomwe kugumana vofunika va banja yanu. Kuyingiziramwapa yadzakuthandizeni kuti mukhale obverana na wanthu anango. Mwakulinganiza pfunzirani kuwerenga na kunemba bwinobwino. Baibolo inena kuti kuwerenga Mawu ya Mulungu ntsiku iliyose na kuyaganizira, kuthandiza munthu kukhala wokondwa ndipo vimufambira bwino pa vose vomwe achachita. (Sal. 1:1-3) Kuwerenga Baibolo ntsiku iliyose kudzakuthandizeni kudziwa momwe Yahova achawonera vinthu ndipo kudzakuthandizenipomwe kuganizira bwinobwino vomwe mwawerenga na kuphatisa basa mpfundo za m’Baibolo. (Miy. 1:3, 4) Mumpingu muchadekana abale omwe achadziwa kupfunzisa, kuti apfunzise na kupereka malangizo ya m’Baibolo. Imwepo mukakwanisa kuwerenga na kunemba bwinobwino, mudzakwanise kukonzekera nkhani na ndemanga zomwe zingalimbikise abale na alongo. Mpfundo zimwezi zidzakuthandizeni imwepo kulimbisa chikhulupiriro chanu na kulimbikisa wanthu anango. w23.12 tsa. 26-27 ndi. 9-11

Imwepo mukakhala na mantha ganizirani vomwe Yahova adzachite kutsogolo, na pomwe Satana na wanthu oipa adzachosewe. Chitsanzo chinango cha pansonkhano wa chigawo wa 2014, chidawonesa momwe banja inango yomwe imbaganizira momwe moyo udzakhalire mu paradaiso. Iwo ambaganizira va lemba ya 2 Timoteyo 3:1-5 momwe angayifotokozere pakulinganiza momwe moyo udzakhalire mu dziko inyowani. Pakunena vimwevi iwo adafotokoza kuti: “Mu dziko inyowani idzakhale nthawe yabwino maninge kuposha yomwe tinayo manjeuno. Wanthu adzakhale okondana, adzakhale okonda mpfundo za m’Baibolo, odzichepesa, ofatsa, otumikira Mulungu, obvera azibereki, otembeja, okhulupirika, okonda maninge mabanja yawo, okonzeka kubvera, oyankhula vinthu vabwino kwa anzawo, odziletsa, wa chikondi chochokera pasi pa ntima, othembeka, wabwino, wamaganizo yodzichepesa, okonda Yahova m’malo mokonda vokondweresa, odzipereka na ntima wose kwa Mulungu. Wanthu mwawa mumbawakonde.” Ko imwepo mukonda kucheza na banja yanu panango na abale va moyo omwe tidzakhale nawo mu dziko inyowani? w24.01 tsa. 6 ndi. 13-14

Ni volimbikisa maninge kudziwa vomwe viri pa lemba ya Salimo 149:4. Pa lemba mweyi Baibolo inena kuti: ‘Yahova akondwa na wanthu wake.’ Koma nthawe zinango anango akhala okwinyirira akambaganiza kuti: ‘Ko inepano panekha ndine wodekana kwa Yahova?’ Koma olo atumiki azinji okhulupirika wa Yahova podiya wa nthawe yakumbuyo, ambalimbanambo na maganizo yoipa mwaya. (1 Sam. 1:6-10; Yobu 29:2, 4; Sal. 51:11) Baibolo ifotokoza mobveka bwino kuti wanthu alibe ungwiro angakwanise kukondweresa Yahova na kukhala obvumizika kwa iye. Mwanjira yanyi? Tichadekana kuwonesa kuti tikhulupirira Yesu Khrisitu na kubatizika. (Yoh. 3:16) Mwanjira mweyi tiwonesa pagulu kuti talapa machimo yathu na kuti tamupolomisa Yahova kuti timbachite chifuniro chake. (Mac. 2:38; 3:19) Yahova akhala wokondwa maninge tikambachita vimwevi kuti timufenderere. Pomwe tinkuyesesa kuchita vomwe tingakwanise kuti tikwanirise lumbiro yomwe tidachita tidzakhale obvumizika kwa Yahova ndipo adzatione ninge azishamwali wake chaiwo.—Sal. 25:14. w24.03 tsa. 26 ndi. 1-2

Peno akuluakulu wa boma watilambiza kulalikira, isepano tingatewedzere chitsanzo cha atumi. Isepano tingakhale na chitsimikizo chakuti Yahova adzatithandize pa basa yake. Tingakumbire nzeru na kulimba moyo. Kumbirani thandizo ya Yahova kuti mukwanise kulimbana na mabvuto. Azinji tinkulimbana na mabvuto yakuthupi na ya m’maganizo. Mwakulinganiza, anango aluza munthu yemwe amukonda, anango akulimbana na mabvuto ya m’banja, pomwe anango akudzudziwa na mabvuto yanango. Kuingizira pamwapa, vinthu ninge miliri na nkhondo vachitisa kuti vinthu viipe maninge. Ndipomwapa, mbapempherani kwa Yahova ndipo muuzeni vose vomwe munkugumana navo ninge kuti mukucheza na shamwali wanu. Tsimikizani kuti Yahova ‘adzachitepo kanthu.’ (Sal. 37:3, 5) Chomwe chingatithandize ‘kupirira mabvuto’ ni kupitiriza kupemphera. (Aro. 12:12) Yahova ankudziwa vomwe atumiki wake ankugumana navo ndipo ‘iye akubva kukuwa kwawo kokumbira thandizo.’—Sal. 145:18, 19. w23.05 tsa. 5-6 ndi. 12-15

Tikafuna kusankhula vinthu vomwe ni vodekana maninge, tichadekana kubvesa chomwe ni ‘chifuniro cha Yahova’ ndipo patsogolo pake tichadekana kuchita mobverana na chifuniro chake. (Aef. 5:17) Tikagumana mpfundo za m’Baibolo zomwe zinkubverana na vomwe tinkugumana navo pa moyo wathu, vingakhale ninge kuti tagumana vinthu vomwe Yahova ankuganiza pa vinthu vomwe tinkugumana navo. Patsogolo pake tikaphatisira basa mpfundo za Yahova tidzakwanise kuchita chosalula chabwino. ‘Woipa’ panango kuti mzondi wathu Satana, ankufuna kuti tikhale opanikizika na vinthu vakudziko uku na kuti tileke kugumana nthawe yotumikira Yahova. (1 Yoh. 5:19) Mosazindikira, Mkhrisitu angayambe kuikhira nzeru maninge kobiri, mapfunziro na basa m’malo mogumana mpata wochita vizinji pakutumikira Yahova. Vimwevi vikachitika vikhala ninge chitsimikizo chakuti wayamba kukhala na maganizo ninge ya kudziko. Ni shuwadi kuti kobiri, mapfunziro na vinthu vaku thupi nivosaphonyeka. Koma vimwevi vichadekanalini kukhala pa malo yoyamba pa moyo wathu. w24.03 tsa. 24 ndi. 16-17