Agosto

Onani kuti lemba mweyi ya Salimo ilewa mpfundo ziwiri zodekana maninge izi: (1) Olungama agumana na mabvuto na (2) Yahova atipulumusa kumabvuto yathu. Koma ko Yahova achita tani vimwevi? Njira ibodzi niyakuti atithandiza kuona vinthu moyenera mudziko yoipa ino. Yahova atipolomisa kuti tidzakhale okondwa tikambamutumikira. Olo viri teno, iye atiuzalini kuti moyo wathu udzakhale ulibe mabvuto. (Yes. 66:14) Yahova atilimbikisa kuti timbaganizire maninge vakutsogolo pomwe tidzakhale na moyo womwe iye ambafuna kuti tikhale nawo womwe ni moyo wokondwa na wosapera. (2 Akor. 4:16-18) Yahova atithandize kupitiriza kumutumikira, vilibe basa na mabvuto yomwe tinkugumana nayo ntsiku zino. (Maliro 3:22-24) Ko tingatewedzere tani vitsanzo va atumiki wa Yahova wokhulupirika wakale na wa ntsiku zino? Tingambagumane na mabvuto yosadikhirika, Koma tikambathemba Yahova, iye adzalekelini kutisamalira.—Sal. 55:22. w23.04 tsa. 14-15 ndi. 3-4

Tingapfunzire vizinji pa chitsanzo cha Yosefe na Mariya, omwe enze okonzeka kubvera akulu-akulu waboma olo kuti venze voshupa kwa iwo. (Luka 2:1-6) Onani chiyeso chomwe iwo adagumananacho pomwe Mariya wenze na mimba. Mpfumu ya ku Roma Augusito idapereka lamulo yakuti aliyese abwerere kuthaundi yake yobadwira kuti akanembese. Yosefe na Mariya ambadekana kuyenda ku Betelehemu yemwe wenze nsenga wa makilometro 150, yomwe yenze njira ya makata na matero. Ulendo moule wenze woshupa makamaka kwa Mariya yemwe wenze na mimba ya minyezi 9. Ko chidakachitika nchani nthawe yobereka idakamukwanira? Iwo enze na nkhawa na thanzi ya Mariya na mwana yemwe ambadzakhala Mesiya. Iwo adakafuna, chimwechi chidakakhala chifukwa cholambira kubvera boma. Yosefe na Mariya alibe kubvuma kuti nkhawa ziwasokoneze. Iwo adabvera akulu-akulu wa boma ndipo Yahova adawadalisa ndawa ya kubvera kwawo. Mariya adafika ku Betelehemu ali wotetezeka, adabereka mwana wathanzi ndipo adathandiza kukwanirisa maulosi ya m’Baibolo!—Mika 5:2. w23.10 tsa. 8 ndi. 9; tsa. 9 ndi. 11-12

Ko mungachite tani kuti muleke kukhala okhumudwa mukambapereka ndemanga nkumbakwanisa kulimbikisa anango? Imwepo mumbakonzekere bwino. (Miy. 21:5) Mukakhala kuti mwavidziwa vati mukapfunzire ku misonkhano vingakhale vosashupa kuyankha. Chinthu chinango ni kupereka mdawiro wachigwato. (Miy. 15:23; 17:27) Imwepo mudzakhalelini okhumudwa mukambapereka ndemanga zachigwato. Kupereka ndemanga zachigwato mu mawu yanuyanu vionesa kuti ndimwe okonzekera ndipo mwaibvesa bwino nkhani mweyo. Manje tani peno mudayesera kale njira zimwezi koma mukhala okhumudwa mukambapereka ndemanga? Imwepo mungakhale otsimikiza kuti Yahova achakhala otembeja pa khama yanu yomwe imwepo muonesa. (Luka 21:1-4) Kuchita vinthu vomwe mungakwanise vitanthauzalini kuchita vinthu vire vomwe mungavikwaniselini. (Afil. 4:5) Ndipomwapa, khalani na cholinga chomwe imwepo mungachikwanirise ndipo mukumbireni Yahova kuti ambakuchitiseni kukhala odekha, chinango chomwe mungachite mumbapereke midawiro yachigwato. w23.04 tsa. 21 ndi. 6-8

Mtumi Paulo ankutilinganiza namasocha yomwe yalikonzekere kuti yamenye nkhondo. Koma nthawe zose nsocha angafunike kukhala aliwokonzeka kuti palipose angamenye nkhondo. Tingakonzekere ntsiku ya Yahova tikakhala kuti tavala chodzitetezera pachifuwa chachikhulupiriro nachikondi. Chotetezera pachifuwa chimbatetezera ntima wa nsocha. Chikhulupiriro na chikondi chiteteza ntima wathu wophiphirisa. Ivo vidzatithandize kupitiriza kutumikira Mulungu nakutewedzera Yesu. Chikhulupiriro chititsimikizira kuti Yahova adzatidalise tikapitiriza kumufagafaga na ntima wose. (Aheb. 11:6) Vimwevi vitilimbikisa kuti tipitirize kukhala okhulupirika kwa ntsogoleri wanthu Yesu olo kuti tinkulimbana na mabvuto. Tingalimbise chikhulupiriro chathu kuti tilimbane na mabvuto yapamoyo tikambaganizira vitsanzo va abale na alongo ntsiku zino, omwe ankupitiriza kukhala okhulupirika podiya kuti ankugumana namabvuto yakuluyakulu. Tingapewe nsampha wofuna chuma tikatewedzera wale omwe akhala moyo wosafuna vizinji pakufuna kuikha Ufumu wa Mulungu pamalo yoyamba. w23.06 tsa. 10 ndi. 8-9

Kudziletsa, ni buya yokwanisa kutsogolera bwino maganizo yathu na vochita vathu. Koma nthawe zinango tingafunike kudzilesa kuti tikwanise kuchita vinthu vabwino, makamaka vomwe ni voshupa ndipo tilibe chifuno chovikwanirisa. Kumbukirani kuti kudzilesa ni khalidwe ibodzi ya mzimu uchena ndipo kumbirani thandizo kwa Yahova kuti mukwanise kuwonesa khalidwe yapadera mweyi. (Luka 11:13; Agal. 5:22, 23) Ayi kumbandodikhira kuti vose vimbafambe bwino. Mudziko yomwe tinkukhala ino tingadikhirelini kuti vose vimbafambe bwino. Tikambandodikhira kuti vose vimbafambe bwino, chipo tidzakwaniriselini volinga vathu. Vingachitike kuti imwepo mulibe chifuno ndawa yakuti cholinga chanu ni choshupa kuchikwanirisa. Ko munkuwona tani kukwanirisa cholinga chimwechi pang’onopang’ono? Peno munkufuna kukhala na khalidwe yabwino, mukuwona tani kumbayiwonesa pang’onopang’ono pa vochitika vanu va ntsiku na ntsiku? Panango cholinga chanu nikulewenga Baibolo yantero, tani kuyamba na kulewenga tumaminutu tochepa ntsiku iliyose? w23.05 tsa. 29 ndi. 11-13

Ndawa ya thandizo ya Yahova na gulu yake chakudya chauzimu chinkushotalini ntsiku zomalizira zino. Chakudya chauzimu chimwechi chakhala chinkuthandiza tose isepano kupitiriza kufamba ‘mu Nsewu Wochena.’ (Yes. 35:8; 48:17; 60:17) Tingalewe kuti nthawe zose pomwe munthu wabvuma kupfunzira Baibolo iye anamwayi wofamba ‘mu Nsewu Wochena.’ Anango achita vimwevi pakufamba kanthawe kang’onong’ono basi nkusiya kufamba mu nsewu moyu. Anango atsimikiza kupitiriza kufamba mu nsewu moyu mpaka komwe ukamalire. Koma ko nsewu moyu ukamalire kuponi? Kwa wale omwe anachidikhiro chakudzulu komwe ukamalire ‘Nsewu Wochena’ moyu ni ‘paradaiso wa Mulungu’ kudzulu. (Chiv. 2:7) Koma kwa wale omwe anachidikhiro chodzakhala na moyo padziko yapasi, komwe ukamalire ni kumapeto kwa magole 1000 ya Khrisitu pomwe tose tidzakhale wangwiro. Peno imwepo munkufamba mu nsewu wochena moyu manjeuno, ayi kunyang’ana m’mambuyo ndipo ayi kusiya kufamba mu nsewu moyu mpaka mukafike komwe ukumalira mudziko inyowani! w23.05 tsa. 17 ndi. 15; tsa. 19 ndi. 16-18

Mukambaganizira vose vomwe Yahova wakuchitirani, imwepo mumutembeja ndipo vikuchitisani kuti mudzipereke kuti mumutumikire. (Sal. 116:12-14) Baibolo inena kuti Yahova ni yemwe atipasa ‘mphaso iliyose yabwino komasoti yaungwiro.’ (Yak. 1:17) Mphaso ikulu maninge kuposha zose, ni dipo ya mwana wake Yesu Khrisitu. Ganizirani ivi! Dipo idakuchitisani kuti imwepo mukhale paushamwali wolimba maninge na Yahova. Iye wakupasani mwayi wodzakhala na moyo mpaka kalekale. (1 Yoh. 4:9, 10) Kudzipereka kwa Yahova ni njira ibodzi yowonesa kuti imwepo munkutembeja osati ndawa ya dipo yokha koma ndawa yamadaliso yose yomwe iye wakupasani.—Deut. 16:17; 2 Akor. 5:15. w24.03 tsa. 5 ndi. 8

Polewa va makhalidwe yoipa yomwe dziko iyi ilimbikisa, tidzibva ninge munthu wokhulupirika Loti. Iye ‘vimbamuwawa maninge pakuona khalidwe yoipa mweyi,’ ndawa ambadziwa kuti Ababa wake wakudzulu azondana navo. (2 Pet. 2:7, 8) Kugopa Mulungu na chikondi chomwe Loti wenze nacho, vidamuthandiza kuti aleke kutengera makhalidwe yoipa yomwe wanthu wa mu nthawe yake enze nayo. Isembo tilizunguliriwe na wanthu omwe alemekezalini mpfundo zabwino za Yahova. Olo viri teno isepano tingaonese kuti ndise ochena mwakupitiriza kuonesa chikondi chathu kwa Mulungu na kumugopa. Kuti vimwevi vikwanisike Yahova atipasa malangizo yachikondi komasoti yolimbikisa yomwe yagumanika mu bukhu ya Miyambo. Akhrisitu tose amuna, akazi, wachikulire na wachilumbwana, tingaphindule maninge na malangizo ya nzeru yogumanika mu bukhu mweyi. Tikambagopa Yahova, tikhala osamala kuti osati timbadziyikhile kumbuyo tikakhala na khalidwe inango yoipa. w23.06 tsa. 20 ndi. 1-2; tsa. 21 ndi. 5

Vingachitike kuti mudadzudziwako na munthu wa m’banja yanu panango kusiya vinthu vakuthupi ndawa yofuna kuikha Ufumu pa malo yoyamba. (Mat. 6:33) Ndawa ya vimwevi ndimwe wotsimikizira kuti Yahova adziwa vose vomwe mwamuchitira. (Aheb. 6:10) Mosakaika imwepo munkubvesesa kuti mawu yomwe Yesu adalewa ni chaiyo yakuti: “Palibe yemwe wasiya nyumba, azibale, azilongosi, amayi, ababa, wana panango minda ndawa ya ine komasoti ndawa ya ntontholo wabwino yemwe manjeuno adzagumanelini vinthu vizinji kuyingira maulendo 100 mu nthawe ino. Iye adzagumane pomwe nyumba, azibale, azilongosi, amayi, wana na minda komasoti adzadzudziwe ndipo nthawe yomwe inkubwera iyo adzagumane moyo wosapera.” (Maliko 10:29, 30) Mosakayika madaliso yomwe imwepo mwatambira ni yakulu maninge kuposha khama iliyose yomwe imwepo mungachite.—Sal. 37:4. w24.03 tsa. 9 ndi. 5

Pomwe abale wa ku Yudeya angabonera na njala. Mpingu wa ku Antiokeya ‘Iwo adatsonkha vinthu mobverana na momwe aliyese adakwanisira nkuvitumiza ku Yudeya.’ (Mac. 11:27-30) Podiya kuti abale na alongo omwe enze panjala ambakhala kutali maninge, Akhrisitu wa ku Antiokeya enze wofunisisa kuwathandiza. (1 Yoh. 3:17, 18) Isepano tingawonesembo chifundo ntsiku zino, tikandodziwa kuti abale wathu ali pabvuto. Timbawathandize mwakankulumize, tingayankhule na akulu na kudzipereka kuti tithandize pa basa iliyose. Tingachite pomwe vopereka vothandiza pa basa ya padziko yose panango kupempherera womwe ankugumana na matsoka yachilengedwe mwaya. Abale na alongo wathu angafunike chithandizo chathu olo pa vinthu vomwe tingavione kuti ni ving’onoving’ono. Ndise otsimikiza kuti Yesu Khrisitu akadzabwera kudzaweruza wanthu, adzatione tinkuonesa chifundo ndipo ‘tidzakwanise kungena mu Ufumu.’—Mat. 25:34-40. w23.07 tsa. 4 ndi. 9-10; tsa. 6 ndi. 12

Yesu adatewenzera chitsanzo cha Ababa wake ndipo iyembo wenze wololera. Iye adatumiziwa padziko yapasi kuti akalalikire ‘kwa Nkhosa zotayika za nyumba ya Aizirayeli.’ Koma iye wenze wololera ndipo adalalikirapomwe kwa wanthu anango. Nthawe inango nkazi munango yemwe wenzelini mu Izirayeli adakumbira Yesu kuti amuchirisire mwana wake nkazi yemwe wenze na ‘mzimu wakuti ukamuphata umbamudzudza mwa nkhanza.’ Koma ndawa yachifundo Yesu adachita vomwe nkazi moule adamukumbira ndipo adamuchirisira mwana wake. (Mat. 15:21-28) Onani pomwe chitsanzo chinango. Kumayambiriro kwa utumiki wake, Yesu adalewa kuti: ‘Yemwe anilambe . . . , Inepano nidzamulambembo.’ (Mat. 10:33) Koma Yesu alibe kumulamba Petulo, podiya kuti iye wenze adamulamba Yesu maulendo yatatu. Iye ambadziwa kuti Petulo walapa ndipo ni mwamuna wokhulupirika. Pambuyo pakuti Yesu wamukisiwa adaonekera kwa Petulo ndipo mosakaika adamutsimikizira kuti amukonda ndipo wamukhululukira. (Luka 24:33, 34) Pakufika pano taona kuti Yahova na Yesu nthawe zose awonesa khalidwe imweyi ya kulolera. Manje tani isepano? Yahova adikhira kuti tichitembo chibodzibodzi. w23.07 tsa. 21 ndi. 6-7

Ko manje tinganene chani kwa wale omwe akayikira kuti dziko yapasi idzakhale paradaiso? Chakuyamba, Yahova chaiye ndiye adachita polomisi mweyi. Bukhu ya Chivumbulutso inena kuti: ‘Iye wokhala pa mpando wachifumu adanena kuti: ‘Onani! Ninkukonza vinthu vose kukhala vinyowani.’’ Yahova ananzeru, mphanvu na chifuno kuti akwanirise vomwe iye adapolomisa. Chachiwiri, momwe Yahova achawonera, vikhala ninge kuti vinthu vomwe adapolomisa vachitika kale. Ndipomwapa iye adati: ‘Mawu mwaya ni yokhulupirika ndipo ni chaiyo. . . . Iyo yadzakwanirisike!’ Chachitatu, palibe chomwe chingakangise Yahova kumalizisa chinthu chomwe adayamba. Ndipomwapa iye adanena kuti: ‘Ine ndine Alefa na Omega.’ (Chiv. 21:6) Pakumalizira vidzawoneke kuti Satana na Yahova nimbani wabodza komasoti wokangira. Ndipo pomwe munthu munango ankunena kuti, “vimwevi ni vabwino koma vingachitikelini,” Mungamuwerengere vomwe viri m’mavesi ya Chivumbulutso 21:5,6 na kumufotokozera kuti viri ninge Yahova wasaina chikalata chotsimikizira kuti iye adzakwanirise vose vomwe adapolomisa.—Yes. 65:16. w23.11 tsa. 7 ndi. 18-19

Pomwe Abulahamu wenze na magole 75 akalibe mwana, Yahova adamupolomisa. Ko Abulahamu adaona mapolomisi mwaya yankukwanirisika? Mbali inango inde. Padayambuka kamadzi ka Firate nkudikhira kwa magole 25, Abulahamu adaona kubadwa kwa mwana wake Isaki. Vimwevi venze vodabwisa maninge. Ndipo payadapita magole 60, iye adawona kubadwa kwa azidzukulu wake omwe ni Esau na Yakobo. (Aheb. 6:15) Koma Abulahamu alibe kuona wana wake ankukhala ntundu ukulu komasoti ankungena mudziko yomwe Yahova adamupolomisa. Olo venze teno mwamuna wokhulupirika moyu ambakhala pa ushamwali wolimba maninge na Mulengi wake. (Yak. 2:23) Abulahamu akadzamukisiwa iye adzakhale wokondwa ndawa yodziwa kuti kukhulupirika kwake na kudekha kwake, wanthu wose padziko yapasi adadalisiwa! (Gen. 22:18) Ko tinkupfuzira chani? Panango tingaonelini mapolomisi yose ya Yahova yankukwanirisiwa koma tikakhala wodekha ninge Abulahamu tidzatsimikize kuti Yahova adzatidalise manjeuno komasoti mu dziko inyowani.—Maliko 10:29,30. w23.08 tsa. 24 ndi. 14

Pomwe Mpfumu Uziya wenze mulumbwana, iye wenze wodzichepesa. Iye adapfunzira ‘kugopa Mulungu chaiye’. Uziya adamwalira anamagole 68 ndipo mbali ikulu ya moyo wake Yahova adamudalisa. (2 Mbiri 26:1-4) Uziya adagonjesa makhaindi yazinji ya azondi wake ndipo adachitisa kuti Yerusalemu akhale wotetezeka. (2 Mbiri 26:6-15) Shuwadi, Uziya adakhala wokondwa maninge ndawa ya vomwe adakwanisa kuchita na thandizo ya Yahova. (Mla. 3:12, 13) Mpfumu Uziya wenze adazolowera kuuza wanthu vomwe achadekana kuchita. Ko vimwevi vidamuchitisa kuti ambaganize kuti angachite chilichose chomwe ankufuna? Ntsiku inango Uziya adangena mu kachisi wa Yahova ndipo adalimba ntima kufukiza ntsembe chinthu chomwe mafumu enze adalambiziwa kuchita. (2 Mbiri 26:16-18) Nkulu wantsembe Azariya adamutsumula koma Uziya adakalipa maninge. Vobvesa ntsisi ni vakuti Uziya alibe kupitiriza kukhala wokhulupirika kwa Yahova ndipo adamulanga pakumuchitisa khate. (2 Mbiri 26:19-21) Vose vidakapitiriza kufamba bwino sembe iye adapitiriza kukhala wodzichepesa! w23.09 tsa. 10 ndi. 9-10

Olo pa nthawe yomwe iye wenze wodzodzewa, mtumi Petulo ambadekana kulimbana na vofoka vake. Mu gole ya 36 Yesu wayendakale kudzulu, Mulungu adatumiza Petulo kwa Koneliyo yemwe wenzelini Muyuda, kumoko Mulungu adadzodza Koneliyo. Kuchokera mwapo Koneliyo adadzodzewa na mzimu uchena ndipo vidaonekeratu kuti ‘Mulungu alibe tsankho,’ vomwe vinkuoneseratu kuti wale omwe enzelini Ayuda angakhalembo mu mpingu Wachikhrisitu. (Mac. 10:34, 44, 45) Pambuyo pa vimwevi Petulo adayamba kudya pabodzi na wanthu wamakhaindi yanango, chinthu chomwe wenze akalibe wachitako pa moyo wake. Koma Akhrisitu anango wachiyuda enze na maganizo yakuti Ayuda na wanthu wamakhaindi yanango achadekalini kudyera pabodzi. Akhrisitu anango omwe ambakumbuka tene pomwe adayenda ku Antiyokeya adaleka kudya na wanthu wamakhaindi yanango ndawa yakuti ambagopa kukhumudwisa Ayuda anzawo. Mtumi Paulo adaona kuti mtumi Petulo wayamba kukhala na tsankho ndipo adamutsumuliratu pa gulu ya wanthu. (Agal. 2:13, 14) Podiya kuti ambaphonyesa, Petulo alibe kufoka adapitiriza kuyesesa kuchinja. w23.09 tsa. 22 ndi. 8

Panango mwazindikira kuti munkufunikira kuchinja mbali zinango, ayi kubvuma kuti vimwevi vikuchitiseni kukhala okwinyirira. ‘Ambuya ni okoma ntima’ ndipo adzakuthandizeni imwepo kuchinja mbali zomwe muchadekana kuchinja. (1 Pet. 2:3) Mtumi Petulo adatitsimikizira kuti: ‘Mulungu . . . adzamalizise kukupfunzisani, adzakulimbiseni na kukupasani mphanvu.’ Pakuyamba Petulo ambadzibva kuti ni wosadekana kuti akhale pabodzi na Yesu. (Luka 5:8) Koma na thandizo ya Yahova na Yesu, Petulo adapirira ndipo adapitiriza kukhala nteweri wa Yesu. Koma phindu ni yakuti Yahova adabvuma kuti Petulo ‘angene mu Ufumu wosapera wa Ambuya wathu na mpulumusi wathu Yesu Khrisitu.’ (2 Pet. 1:11) Imweyi yenze daliso yabwino maninge kwa Petulo. Ninge momwe vidakhalira na Petulo, imwepo mukapirira na kubvuma kupfunzisiwa na Yahova, mudzatambirembo madaliso ya moyo wosapera. Mwanjira mweyi ‘mudzakwanirise cholinga cha chikhulupiriro chanu chomwe ni kupulumusiwa.’—1 Pet. 1:9. w23.09 tsa. 31 ndi. 16-17

Chihema cha kalekale chenze na malo yabodzi yopempherera yakulu maninge komwe wantsembe ambaphatirako basa. Malo mwaya ndiko kwenze guwa ya ntsembe ya nkuwa komwe ambaperekerako ntsembe pabodzi na basiya ya nkuwa yodzadza madzi yomwe wantsembe ambadzichenesera akanati kuyamba kuphata basa zawo za untsembe. (Eks. 30:17-20; 40:6-8) Ntsiku zino Akhrisitu odzodzewa ankutumikira mokhulupirika pano padziko yapasi panango kuti mbali ya nkati ya kachisi wauzimu. Basiya ya madzi yomwe ili pa malo mwaya, ni chikumbuso chikulu maninge kwa Akhrisitu odzodzewa pabodzi na Akhrisitu ose kuti achadekana kukhala ochena mwakuthupi na m’maganizo. Manje nkuponi komwe wanthu wa‘gulu ikulu’ ankutumikirira Yahova? Mtumi Yohane adaona wanthu azinji ‘aliyimirire patsogolo pa mpando wa Chifumu’ mukachisi wophiphirisa yemwe achatanthauza malo yakunja. Momwe ‘iwo achachitira utumiki wopatulika wa Mulungu usiku na masikati mukachisi wake.’ (Chiv. 7:9, 13-15) Isepano titembeja maninge mwayi womwe Yahova adatipasa wakumutumikira munjira yochena mu kachisi wake nkulu wauzimu! w23.10 tsa. 28 ndi. 15-16

Njira inango yomwe Yahova atithandizira ni kuphatisa basa akulu. (Yes. 32:1, 2) Manje peno imwepo munankhawa, fotokozerani akulu va bvuto yanu. Ayi kunyalanyaza thandizo yomwe akulu angakupaseni. Pa kuphatisa basa akulu, Yahova angakulimbikiseni imwepo. Chidikhiro chathu cha m’Baibolo cha moyo wosapera ni chokomedza maninge viribe basa peno tidzakhale mparadaiso pano pa dziko yapasi panango kukatonga na Yesu kudzulu. (Aro. 4:3, 18, 19) Chidikhiro chathu chitithandiza kupirira mabvuto, kulalikira ntontholo wabwino na kukwanirisa udindo wathu womwe tingakhale nawo mu mpingu. (1 Ates. 1:3) Ni chidikhiro chimwechi chomwe chidalimbikisa mtumi Paulo. Iye ‘ambapanikizika,’ ‘kumaliriwa nzeru,’ ‘kudzudziwa,’ ‘ambadzibva ninge wagonjesewa’ mpakana nthawe zizinji ambakhala pang’ono kufa. (2 Akor. 4:8-10) Paulo wenze na mphanvu zizinji zokwanisira kupirira mabvuto mwaya, ndawa ambaganizira va chidikhiro chake cha kutsogolo. (2 Akor. 4:16-18) Paulo ambaganizira va tsogolo yake. Chidikhiro chake chakudzulu cha moyo wosapera chenze ‘chidikhiro chikulu maninge na chodabwisa,’ ndawa ya vimwevi venze vobveka kuti iye agumane na mabvuto na chidzudzo. Paulo ambaganizira va chidikhiro chimwechi, ndawa ya vimwevi iye ‘ambakhala wamphanvu pa mabvuto ya ntsiku na ntsiku.’ w23.10 tsa. 15-16 ndi. 14-17

Mukambapemphera mungachite bwino kuganizira peno ni nthawe yabwino yakuti Yahova akupaseni chinthu chomwe munkukumbira icho. Panango mungaganize kuti ninkufunika m’dawiro mwakankulumize pa vomwe ninkukumbira. Koma chaivo ni vakuti Yahova achadziwa nthawe chaiyo yomwe angatithandize. (Aheb. 4:16) Pomwe mapemphero yathu yankudawiriwalini tingayambe kuganiza kuti, m’dawiro wa Yahova ni wakuti ‘neye.’ Koma vingachitikedi kuti m’dawiro wake ni wakuti ‘osati manjemanje.’ Mwakulinganiza m’bale munango wachilumbwana ambapemphera kuti apole matenda yake, koma alibe kupola. Peno Yahova adakachita chodabwisa nkumupolesa matenda yake, Satana adakaganiza kuti iye ankutumikira Yahova ndawa yakuti wapolesewa. (Yobu 1:9-11; 2:4) Kuyingizira pamwapa, Yahova atitsimikizira kuti wanthu ose adzapolesewe matenda yawo. (Yes. 33:24; Chiv. 21:3, 4) Pomwe tinkudikhira nthawe mweyi, tichadekanalini kupolesewa modabwisa. Ndipomwapa m’bale moyu ambandofunika kukumbira Yahova kuti amupase mphanvu na ntendere wa muntima kuti akwanise kupirira mabvuto yake na kupitiriza kutumikira Yahova mokhulupirika. w23.11 tsa. 24 ndi. 13

Samisoni wenze adaphonyesa maninge, koma iye alibe kusiya kupitiriza kutumikira Yahova. Iye adanyang’anapomwe njira inango yakuti achitire vinthu vomwe Mulungu ambafuna pomenyana na Afilisiti. (Ower. 16:28-30) Samisoni adapemphera kwa Yahova kuti: ‘Nisiyeni kuti niwabwezere Afilisiti.’ Yahova adamudawira Samisoni pa kumupasa mphanvu zizinji maninge modabwisa. Na mphanvu zimwezi Samisoni adakwanisa kupha Afilisiti azinji kuposha omwe iye wenze adapha kwa moyo wake wose. Ni shuwadi kuti Samisoni ambafunika kugumana na mabvuto ndawa ya vomwe adasalula. Koma iye alibe kusiya kuchita chifuniro cha Yahova. Isepanombo vingatichitikire, tikaphonyesa chinthu chomwe tinkudekana kutambira malangizo panango kuluza mautumiki yathu tichadekanalini kusiya kutumikira Yahova. Kumbukirani kuti Yahova adzatisiyelini. (Sal. 103:8) Podiya kuti tiphonyesa vinthu, tingapitirize kukhala odekana kwa Yahova ninge momwe venzere na Samisoni. w23.09 tsa. 6 ndi. 15-16

Chikhulupiriro chathu chitithandiza kukhala ‘obvumizika kwa Yahova.’ Vomwe vinkutanthauza kuti mukambapirira mukhala obvumizika kwa Yahova. Koma vinkutanthauzalini kuti imwepo mukambatsutsiwa panango kudzudziwa Yahova akhala wokondwa, neye. Koma Yahova akhala wokondwa na imwepo na kupirira kwanu komwe kuchachitisa kuti imwepo mukhale obvumizika. Imweyi ni daliso yodabwisa maninge! (Sal. 5:12) Kumbukirani kuti Abulahamu adakhala wopirira podiya kuti adagumana na mabvuto yazinji. Yahova adakhala wokondwa. Ndawa ya vimwevi Yahova adamuona kukhala shamwali wake ndipo ambamuwonapomwe kuti ni munthu wokhulupirika. (Gen. 15:6; Aro. 4:13, 22) Ni vibodzibodzimbo na vomwe vinchitikira isepano. Kubvumiziwa kwathu kwa Yahova kuchathembalini basa zomwe takhala tinkuchita panango maudindo yathu. Yahova atibvuma ndawa ya kupirira mwa chikhulupiriro. Ndipo viribe basa nsinkhu, momwe vinthu viriri pa moyo wathu panango luso yathu, tose isepano tingakwanise kupirira. Ko imwepo munkupirira bvuto inango manjeuno? Peno nteno, dziwani kuti munkuchitisa Yahova kukhala wokondwa. Tikazindikira kuti ndise obvumizika kwa Yahova, chidikhiro chomwe tinacho chakuti iye adzakwanirise vose vomwe adapolomisa chikhala cholimba maninge. w23.12 tsa. 11 ndi. 13-14

Mkhrisitu achadekana kupfunzira kucheza bwino na anzake. Mwamuna yemwe achadziwa kucheza bwino na anango abvesera mwatcheru pomwe anango ankuyankhula, akwanisa kubvesa momwe iwo ankukumbukira na momwe ankubvera. (Miy. 20:5) Iye achakwanisapomwe kubvesa mawu ya wanthu, momwe ankuwonekera pa nkhope na momwe ankuyankhulira. Imwepo mungakwaniselini kupfunzira vose vimwevi peno mulibe nthawe yocheza na wanthu. Peno imwepo mukonda kucheza na wanthu pa foni, kutumiza mensaje na maimelo vimwevi vidzachepese luso yanu ya momwe mungachezere na wanthu maso na maso. Ndipomwapa gumanani nthawe yakuti mumbakhale na anzanu nkumbacheza nawo. (2 Yoh. 12) Mkhrisitu wokhuma mwauzimu achadekana pomwe kudziwa kudzisamalira yekha na kusamalira banja yake. (1 Tim. 5:8) Ni vabwino kupfunzira vinthu vomwe vidzakuthandizeni kugumana basa. (Mac. 18:2, 3; 20:34; Aef. 4:28) Yesesani kumbadziwika ninge munthu wophata basa mwakhama yemwe amalizisa chomwe wachiyamba. Imwepo mukachita vimwevi vidzakhale vosashupa kuti mugumane basa. w23.12 tsa. 27 ndi. 12-13

Baibolo ikambanena va ‘ntsiku ya Yahova,’ itanthauza nthawe yomwe Yahova adzadzonge azondi wake nakupulumusa wanthu wake. Nthawe zinango kalekale Yahova ambapereka viweruzo. (Yes. 13:1, 6; Ezek. 13:5; Zef. 1:8) Ntsiku zathu zino ‘ntsiku ya Yahova’ inkuyamba na kudzongewa kwa Babulo Nkulu mpaka pa ntsiku ya Arumagedo. Kuti tidzapulumuke pa ‘ntsiku’ mweyo, tichadekana kuyamba kukonzeka manjeuno. Yesu atipfunzisa kuti ayi kuti tindokonzekera ‘chisautso chikulu’ koma ‘tipitirize kukonzekera. (Mat. 24:21; Luka 12:40) Mukalata yake yoyamba youziriwa kwa Atesalonika, Paulo adaphatisa basa vitsanzo vizinji kuti athandize Akhrisitu kukonzekera ntsiku ikulu ya chiweruzo cha Yahova. Paulo ambadziwa kuti ntsiku ya Yahova ifikelini mu nthawe mweyo. (2 Ates. 2:1-3) Olo venze teno iye adachenjeza abale kuti akonzekere ntsiku mweyo ninge kuti yafika kale. Isembo tingaphatise basa malangizo mwaya. w23.06 tsa. 8 ndi. 1-2

Nyumba ya andale 60 idayamba kumangiwa mu gole ya 1970 mu thaundi ya Tokyo ku Japan. Wanthu womwe ambanyang’anisisa nyumba mweyi inkumangiwa ambakayikira kuti peno nyumba mweyi ingakhale yolimba na matsoka yachilengedwe yomwe yambachitika mu thandi mweyi. Ko vimwevi vidakwanisika tani? Mayenjinyero yadakonza nyumba mweyi kuti ikhale yolimba nakuti imbakwanise kupirira kukachitika chimphepo. Akhrisitu alimbo ninge nyumba itali mweyi. Mu njira iponi? Mkhrisitu achadekana kulinganiza pakati pakukhala wolimba na wololera. Iye adekana kukhala wolimba na wosagunduzika pa kubvera, kuteteza malamulo na mpfundo za Yahova. Iye achadekana ‘kukhala wobvera’ nakusabvuma kuti chilichose chisinthe maganizo yake. Mwanjira inango, iye achadekana kukhala ‘wololera’ pa nthawe iliyose yomwe pankudekana kuchita vimwevo. (Yak. 3:17) Mkhrisitu yemwe apfunzira kuchita vimwevi akhala wachikatikati. w23.07 tsa. 14 ndi. 1-2

Pomwe adakula Yesu ambadekana kulamba viyeso va Satana yemwe ambafuna kuti aleke kukhala wokhulupirika kwa Yahova. (Mat. 4:1-11) Satana wenze wofunisisa kuchimwisa Yesu kuti akangire kulipira moyo wake ninge dipo. Nkati mwa utumiki wake pano pa dziko yapasi, iye adagumana na mabvuto yanango. Azondi wake ambamudzudza ndipo ambayesesa kuti amuphe. (Luka 4:28, 29; 13:31) Kuingiziramwapa iye ambadekana kulimbana na vophonya va ateweri wake. (Maliko 9:33, 34) Pomwe iye adaweruziwa kuti aphewe, Yesu adamanikiwa ndipo adanyozewa na kuchitisiwa manyazi. Pakumalizira iye adafa modzudzika na mowawa maninge. (Aheb. 12:1-3) Ndipo iye ambadekana kupirira mayesero yomaliza yekha mosatetezewa na Yahova. (Mat. 27:46) Shuwadi, Yesu adadzudzika maninge kuti apereke moyo wake kwa isepano. Tikambaganizira vose vomwe Yesu adatichitira, isepano tichamukonda. w24.01 tsa. 10-11 ndi. 7-9

Kudekha kuchatithandiza kuti tikhale paushamwali wabwino na anzathu. Ndipo kuchatithandizapomwe kuti timbabvesere mwa tcheru munzathu akambayankhula. (Yak. 1:19) Kuingizira pamwapa kudekha kuchatithandiza kuti tikhale pantendere na anzathu. Tikakhala odekha podiya kuti tapanikizika, tidzachitelini vinthu mwagugu na kuyankhula vinthu vomwe vingakalipise anzathu. Ndipo tidzachitelini vinthu mwaukali anzathu akatikalipisa. M’malo mwakuti tibwezere, tidzayesese ‘kupitiriza kulolerana na kukhululukirana na ntima wose. (Akol. 3:12, 13) Kudekha kungatithandize pomwe peno tinkufuna kusalula vochita, m’malo mwakuti tifulumize kuchita vinthu mwagugu tichadekana kuganizira volinga vomwe tinavo, ndipo tidzakwanise kusalula bwino vochita. Mwakulinganiza, peno tinkunyang’ana basa tingandobvuma basa iliyose yomwe yandogumanika. Koma tikakhala odekha tidzayambe taganizira momwe vingakhudzire banja yathu na ushamwali wathu na Yahova. Tikakhala odekha tidzakwanise kusalula bwino vochita. w23.08 tsa. 22 ndi. 8-9

Nthawe zinango mukambakhumudwa maninge na vophonya vanu, mbakumbukirani polomisi yomwe mudamuuza Yahova mpemphero pakudzipereka kwa iye ndipo kuchita vimwevi kudzakupaseni mphanvu kuti mukwanise kulimbana na chiyeso chilichose. Mwa njira yanyi? Imwepo mukadzipereka kwa Yahova, mudzilamba mwekha. Vimwevi vinkutanthauza kuti mudzalambe chilichose chomwe chingakhumudwise Yahova. (Mat. 16:24) Ndipomwapa mukambalimbana na chiyeso mudzatengelini nthawe ikulu kuganiza kuti ko pamwapa nichite chani ndawa mudzakhale munkudziwa kale vodekana kuchita pa vinthu viwiri mwevi. Ndipo mudzapitirize kukhala wokhulupirika kwa Yahova. Mudzapitirize kukhala wotsimikiza kukondweresa Yahova, ndipo ndawa ya vimwevi mudzakhale ninge Yobu. Olo pa nthawe yomwe adagumana na vinthu voshupa maninge, iye adanena kuti: ‘Nidzalekelini kukhala na ntima wosagawanika!’—Yobu 27:5. w24.03 tsa. 9 ndi. 6-7

Yahova ‘Mulungu wachikondi’ alinase! (2 Akor. 13:11) Iye aganizira aliyese payekha. Isepano tingakhale na chitsimikiziro chakuti ndise ozunguliriwa ‘na chikondi chake chokhulupirika.’ (Sal. 32:10) Tikambaganizira momwe Yahova waonesera chikondi chake kwa isepano, tidzadzibve kuti tilinaye pafupi ndipo iye adzakhale chaiye kwa isepano. Isepano tingapemphere kwa Yahova nthawe iliyose na kumuuza momwe tinkufunira chikondi chake. Ndipo tingamuuze pomwe vomwe vinkutichitisa nkhawa na kukhala nachitsimikizo chakuti iye adzatidawire ndipo ankufunisisa kutithandiza. (Sal. 145:19) Ninge momwe tichafenderera kumoto nthawe ya mphepo, isepano tinkufuna kufenderera chikondi cha Yahova. Olo kuti chikondi cha Yahova nichamphanvu maninge, icho chitilimbikisa. Ndipomwapa fungulani ntima wanu kuti muwone chikondi cha Yahova pa moyo wanu. Ndipo pakuona chikondi mwechi tose isepano tidzanene kuti: ‘Inepano nikonda Yahova.’—Sal. 116:1. w24.01 tsa. 31 ndi. 19-20

Yesu adachita vinthu vizinji maninge osati kundouza wanthu kuti dzina ya Mulungu ni Yahova. Ayuda omwe ambayankhula na Yesu, ambayidziwa kale dzina ya Mulungu. Koma Yesu . . . ‘adayidziwikisa.’ (Yoh. 1:17, 18) Mwakulinganiza, Baibolo ya Chiheberi inena kuti Yahova ni wachifundo na wokoma ntima. (Eks. 34:5-7) Yesu adafotokoza bwinobwino vimwevi pa fanizo ya mwana wolowerera. Isepano tikambawerenga pomwe baba adaona mwana wake ‘na patali,’ nkuthamanga kukamukumbatira na kumukhululukira na ntima wose, tikwanisa kubvesa bwinobwino va chikondi na chifundo cha Yahova. (Luka 15:11-32) Yesu adatiwonesa momwe Ababa wake aliri. w24.02 tsa. 10 ndi. 8-9

Yahova achatilimbikisa na kutipasa mphanvu pomwe tinkugumana na mabvuto. Manje tingamutewedzere tani Yahova pakuchitira chifundo anango na kuwalimbikisa? Njira ibodzi yomwe tingachitire vimwevi ni kukulisa makhalidwe yabwino muntima mwathu yomwe yangatithandize kuti timbalimbikise anango. Ko yanango mwa makhalidwe mwaya ni yaponi? Ko ni chani chomwe chingatithandize kuti ‘timbapitirize kulimbikisa anangoʼ ntsiku iliyose? (1 Ates. 4:18) Tichadekana kuwonesa makhalidwe yanango ninge chifundo, chikondi chapadziko yose na kukoma ntima. (Akol. 3:12; 1 Pet. 3:8) Ko makhalidwe mwaya yadzatithandize tani? Tikambakhala na chifundo kwa abale wathu na kuwaganizira, tidzakhale na chifuno chofuna kuwathandiza pomwe iwo ankugumana na mabvuto ninge momwe Yesu adanenera kuti: ‘Pakamwa payankhula vomwe viridzale muntima. Munthu wabwino ayankhula vinthu vabwino ndawa yakuti muntima mwake mulidzale na vinthu vabwino.’ (Mat. 12:34, 35) Tikambalimbikisa abale na alongo wathu omwe ankugumana na mabvuto, mosakayika ni njira ibodzi yomwe tingawonesere chikondi chathu kwa iwo. w23.11 tsa. 10 ndi. 10-11

Peno tinkufuna kubvesesa maulosi ya m’Baibolo, Tichadekana thandizo ya anango. Ganizirani chitsazo ichi, linganizani kuti imwepo mwayenda kukazungira dera inango yomwe mukanati mwayendako ndipo munashamwali wanu yemwe aidziwa bwinobwino dera mweyi. Iye ankudziwa bwinobwino komwe imwepo muli ndipo ankudziwa komwe njira iliyose inkuyenda. Mosakaika kukhala na shamwali moyu kungatithandize maninge. N’chibodzibodzimbo Yahova ali ninge shamwali moyu, iye ankudziwa bwinobwino nthawe yomwe tiriyino na vomwe vidzachitike kutsogolo. Manje peno tinkufuna kubvesesa maulosi ya m’Baibolo tichadekana kukhala odzichepesa na kukumbira thandizo ya Yahova. (Dan. 2:28; 2 Pet. 1:19, 20) Ninge momwe baba aliri wabwino kwa mwana wake, Yahova afuna kuti wana wake akhale na tsogolo yabwino. (Yer. 29:11) Koma mosiyana na baba yemwe angadziwelini va kutsogolo, Yahova adziwa vomwe vidzachitike kutsogolo. Iye ankuvidziwa bwinobwino vimwevi, ndipomwapa adabvuma kuti maulosi yanembewe m’Baibolo. Tingadziwe manjeuno vinthu vomwe vidzachitike kutsogolo.—Yes. 46:10. w23.08 tsa. 8 ndi. 3-4