Pitirizani kuphindula ndawa yogopa Mulungu

1-2. Ninge Loti ko nibvuto iponi yomwe akhrisitu alimbana nayo ntsiku zino?

POLEWA va makhalidwe yoipa yomwe dziko iyi ilimbikisa, tidzibva ninge munthu wokhulupirika Loti. Iye ‘vimbamuwawa maninge pakuona khalidwe yoipa mweyi,’ ndawa ambadziwa kuti Ababa wake wakudzulu azondana navo. (2 Pet. 2:7, 8) Kugopa Mulungu na chikondi chomwe Loti wenze nacho, vidamuthandiza kuti aleke kutengera makhalidwe yoipa yomwe wanthu wa mu nthawe yake enze nayo. Isembo tilizunguliriwe na wanthu omwe alemekezalini mpfundo zabwino za Yahova. Olo vili teno isepano tingaonese kuti ndise ochena mwakupitiriza kuonesa chikondi chathu kwa Mulungu na kumugopa.—Miy. 14:2.

² Kuti vimwevi vikwanisike Yahova atipasa malangizo yachikondi komasoti yolimbikisa yomwe yagumanika mu bukhu ya Miyambo. Akhrisitu tose amuna, akazi, wachikulire na wachilubwana, tingaphindule maninge na malangizo ya nzeru yogumanika mu bukhu mweyi.

KUGOPA MULUNGU KUTITETEZA

3. Mobverana na Miyambo 17:3, ndawa chani tifunika kuteteza ntima wathu? (Onani pomwe foto.)

³ Chinthu chibodzi chotichitisa kuti titeteze mitima yathu yophiphirisa ni ndawa yakuti Yahova achadziwa va mu ntima mwathu. Vimwevi vitanthauza kuti iye aona va mu ntima mwathu kuposha momwe wanthu anango achationera. (Lewengani Miyambo 17:3.) Iye adzatikonde tikambaikha vinthu vabwino m’maganizo mwathu. (Yoh. 4:14) Tikachita teneuyu tidzachitise kuti tipewe misampha yose yomwe Satana angatiteyere mu dziko iyi. (1 Yoh. 5:18, 19) Pomwe tinkufendera kwa Yahova chikondi chathu na ulemu wathu kwa iye viingizirika. Pakuti tinkufunalini kukalipisa ababa wathu tidzazonde chilichose olo maganizo yochita chimo. Tikayesewa kuti tichite voipa vingakhale bwino kudzibvunza kuti, ‘ko vimwevi vikhudze tani Mulungu yemwe adanionesa chikondi?’—1 Yoh. 4:9, 10.

4. Ko kugopa Mulungu kudateteza tani mulongo kuleka kubvuma kuchita chinthu choipa?

⁴ Mulongo Marta waku Croatia, yemwe adayesewa kuti achite chigololo. Adanemba kuti: “Vidakhala vonishupa manige kuti nileke kulimbana na vilakolako vochita vinthu voipa, koma kugopa kwangu Yahova kudanithandiza.”b Ko kugopa Mulungu kudamuthandiza tani kuti aleke kuchita vinthu voipa? Marta adaganizira vomwe vidakachitika adakakhala kuti wachita vinthu voipa. Isepanombo tingachite chibodzibodzi, chomwe chichitika nchakuti tikalipisa Yahova ndipo tingakwaniselini kumutumikira mpakana kalekale.—Gen. 6:5, 6.

5. Ko munkupfunzira chani pa chitsanzo cha Leo?

⁵ Tikambagopa Yahova, tikhala osamala kuti osati timbadziyikhile kumbuyo tikakhala na khalidwe inango yoipa. Leo, yemwe akhala ku Congo adapfunzirapo kanthu pa vomwe iye adachita. Pomwe padapita magole 4 iye wabatizika kale adayamba kucheza na wanthu wa makhalidwe yoipa. Iye ambakumbuka kuti peno akuchitalini vinthu voipa ndiye kuti ankuchimwilalini Yahova. Koma ndawa ya anzake mwawa adamuchitisa kuti ambamwe mwa uchidakwa na kuchita chigololo. Pamwapo iye adayamba kuganizira vomwe azibereki wake omwe ni mboni adamupfunzisa komasoti na chimwemwe chomwe wenze adaluza ndawa yochita vinthu voipa. Nchani chidachitika? Iye adadzilinga maninge, na thandizo ya akulu iye adabwelera kwa Yahova. Manjeuno iye akukhala wokondwa ndipo akutumikira ninge nkulu komasoti mpainiya wapadera.

6. Ko ni akazi awiri aponi ophiphirisa omwe tikambirane?

⁶ Naboni tikambirane msolo  9 wa lemba ya Miyambo, pomwe tilewenga va nzelu komasoti kupusa vomwe vinkulinganiziwa na akazi awiri. (Onani Aroma 5:14; Agalatiya 4:24.) Pomwe tinkukambirana vimwevi khalani muchidziwa kuti dziko ya Satana iyi, ilidzale na nkhani za chigololo na volaula. (Aef. 4:19) Ndipo mwapa tifunika kupitiriza kugopa Mulungu na kuzonda vinthu voipa. (Miy. 16:6) Mosakaika tose amuna na akazi tingaphindule na vomwe vinkunenewa mu msolo moyu. Azikazi awiri ose mwawa ankufotokozewa kuti ankuchemera wanthu osadziwa vinthu panango kuti osazindikira. Pakulewa kuti ‘bwelani mudzadye chakudya kumuyi kwangu.’ (Miy. 9:1, 5, 6, 13, 16, 17) Koma vomwe vidachitika patsogolo pake nivosiyana maninge.

PEWANI KUPUSISIWA KUTI MUCHITE VINTHU VOIPA

7. Mobverana na Miyambo 9:13-18, ko kuchemerewa kubodzi kunkuyendesa kuponi? (Onani pomwe foto.)

⁷ Ganizirani kuchemera komwe ‘nkazi wopusa’ adakuchita. (Lewengani Miyambo 9:13-18.) Iye ankuchemera wanthu wosadziwa vinthu kuti ‘ngenani muno ndipo kondwani.’ Nchani chidachitika? Wanthu osazindikira wale adangenadi, panango imwepo munkukumbukira mawu yophiphirisa yomwe yadafotokozewa mu bukhu mweyi ya Miyambo. Tinkuchenjezewa va ‘nkazi wosabvera na makhalidwe yoipa.’ Lemba mweyi ilewa kuti: ‘Ndawa nyumba yake ichitisa wanthu kuyenda kumanda.’ (Miy. 2:11-19) Pa Miyambo 5:3-10 papereka chenjezo pa nkhani ya ‘nkazi moyu wosabvera,’ panena kuti ‘mapazi yake yatsogolera ku impfa.’

8. Ko nchani chomwe isepano tingasalule?

⁸ Wale omwe agumana na ‘nkazi wopusa moyu’ ankufunika kusalula kuyenda panango kulamba. Isepanombo tingagumane na vinthu vibodzibodzi. Tikagumana na vinthu voipa ninge vachigololo vinthu volaula pa TV panango pa internet. Ko mudzasalule chani?

9-10. Ko ni vifukwa vinango viponi voti timbapewere kuchita chigololo?

⁹ Pana vifukwa vobveka vomwe tichadekana kupewera makhalidwe yoipa komasoti chigololo. ‘Nkazi wopusa’ moyu afotokozewa pomwe kuti ‘madzi yakuba niyabwino.’ Ko ‘madzi yakuba’ ni chani? Baibolo ifotokoza kugonana komwe mwamuna na nkazi olowolana angakhale nako ninge madzi yokhazika moyo pasi. (Miy. 5:15-18) Mwamuna na nkazi angakondwe na kugonana koyenera m’banja yobvumizika. Koma ni vosiyana maninge na ‘madzi yakuba,’ mwevi vingatanthauze kuchita chigololo. Vimwevi vichitika mwachintsintsi ninge momwe mbava im’bera mwachintsintsi. ‘Madzi yakuba’ yangaoneke ninge yabwino akakhala kuti omwe ankuchita voipa akanati waphatiwa. Kumoku kundodzinamiza ndawa Yahova awona vose. Palibe chowawa maninge kuposha kuluza ushamwali wathu na Mulungu ndipo mwapa palibe ‘chabwino’ vimwevi vikachitika. (1 Akor. 6:9, 10) Koma pana vinango.

¹⁰ Kuchita chigololo kubweresa manyazi, kudziona kuti ndiwe wosafunika, kukhala na mimba pomwe ndiwe wosakonzeka komasoti kudzonga ma banja. Ndipomwapa nivabwino maninge kulamba kuyenda ‘kunyumba’ ya nkazi moyu wopusa komasoti chakudya chake. Kuingizira pa kufa mwa uzimu wanthu azinji atenga matenda yomwe yawachitisa kuti afe akali wachilumbwana. (Miy. 7:23, 26) Vesi 18 mu msolo 9 m’bukhu ya Miyambo imaliza kulewa kuti: ‘Omwe ankuchemerewa na nkazi moyu ankuyenda kumanda.’ Ndawa chani wanthu azinji abvuma akachemerewa podiya kuti vimwevi vibweresa mabvuto?—Miy. 9:13-18.

11. Ndawa chani kunyang’anira volaula ni ngozi ikulu?

¹¹ Nsampha womwe ni wodziwika maninge ni kunyang’anira volaula. Anango aganiza kuti kunyang’anira volaula ni bvutolini. Koma mosiyana na vimwevi volaula vidzonga ndipo vichitisa kuti munthu adjaire vinthu voipa. Vimwevi vikhala maninge m’maganizo mwathu ndipo vikhala voshupa kuviyebwa. Chinthu chinango chakuti m’malo mwakuti uleke kukhala na vilakolako, volaula viingizira chilakolako. (Akol. 3:5; Yak. 1:14, 15) Kunena shuwa azinji omwe anyang’anira volaula achita vinthu vomwe nivolambiziwa.

12. Ko tingawonese tani kuti tinkusamala na mafoto yaliyose yomwe yalimbikisa va chigololo?

¹² Ko nchani chomwe isepano tingachite ninge akhrisitu peno foto panango chilichose cholaula chabwera pa foni yathu? Tifunika kuchichoseratu mwakankulumize. Tingakwanise kuchita vimwevi tikaganizira kuti chinthu chomwe ni chodekana maninge kwa isepano ni ushamwali wathu na Yahova. Kunena shuwa mafoto yanango yangaoneke ninge niyosalaula koma yangakhale yodzonga. Ndawa chani tingadekane kuvipewa? Ndawa tifunalini kuchita chilichose chomwe chingatichitise kuti tichite chigololo mu ntima mwathu. (Mat. 5:28, 29) Nkulu munango wa ku Thailand dzina yake David adati: “Nthawe zinango nidzibvunza kuti: ‘Podiya kuti foto niyosalaula koma ko vimwevi vingakondwerese Yahova nikakhala kuti ninkupitiriza kuinyang’ana?’ Kukumbuka kwa khaindi mweyi ni kothandiza maninge vinithandiza kuti nimbachite vinthu mwanzeru.”

13. Nchani chingatithandize kuchita vinthu mwanzeru?

¹³ Tithandiziwa kuti timbachite vinthu mwanzeru na kuyesesa kugopa kukalipisa Yahova. Kugopa Mulungu ‘ndicho chiyambi’ cha ‘nzeru.’ (Miy. 9:10) Mwevi vinkuonesewa bwinobwino pa mbali yoyamba ya msolo  9 wa Miyambo, mwapa patikumbusa va nkazi munango wophiphirisa yemwe afotokozewa ninge ‘nzeru chaizo.’

BVUMANI KUCHEMEREWA KWA ‘NZERU CHAIZO’

14. Ko kuchemerewa kofotokozewa pa Miyambo 9:1-6 kunkusiyana tani na koyamba kule?

¹⁴ Lewengani Miyambo 9:1-6. Mwapa tiwerenga va munthu yemwe ankutichemera yemwe ni Mulengi wachilegedwe chose, komasoti wadzeru chaizo. (Miy. 2:6; Aro. 16:27) Mwapa pafotokozewa nyumba ikulu inamizati yokwana 7. Mwevi vinkuonesa kuti Yahova ni wopasa ndipo niwokonzeka kutambira aliyese yemwe akufuna kuphatisira basa nzeru zake.

15. Ko Mulungu ankutichemera kuti tichite chani?

¹⁵ Yahova ni Mulungu yemwe ni wopasa. Makhalidwe mwaya yaoneselatu va nzeru chaizo zomwe ‘ziimira nkazi’ yemwe atomolewa pa lemba ya Miyambo msolo 9. Nkhani mweyi ilewapomwe kuti nkazi wophiphirisa moyu, wakonzekera nyama, wasanganiza vinyo wake ndipo walongedza meza kumuyi kwake. (Miy. 9:2) Kuingizira pamwapa mobverana na vesi 4 na 5: ‘Nzeru yophiphirisa yofotokozewa ninge munthu wosowa nzeru ile ilewa kuti: ‘Bwera dyaya chakudya changu.’’ Ko nyumba ya nzeru chaiyo ingadye chakudya mwechi? Yahova afuna kuti wana wake ambakhale ozindikira komasoti otetezeka. Iye afunalini kuti timbapfunzire vinthu pa moyo wathu kuchokera pa vinthu vowawa vomwe taphonyesa. Ndawa yakuti iye ni ‘chuma chanzeru zophindulisa kwa wale omwe azifuna.’ (Miy. 2:7) Tikakhala kuti tinkugopa Yahova moyenera tifunisisa kumukondweresa. Tibvera malangizo yake mwanzeru ndipo tikhala okondwa kuyaphatisa basa.—Yak. 1:25.

16. Ko kugopa Mulungu kudathandiza tani Alain kusalula vinthu mwanzeru ndipo nchani chidachitika patsogolo pake?

¹⁶ Onani momwe kugopa Mulungu kudathandizira Alain kusalula vinthu mwanzeru. Nkulu moyu yemwe ni ticha adanena kuti: “Anzangu wakubasa ambaona kuti kunyang’anira volaula ni njira ibodzi yopfunzisira va kugonana.” Koma Alain alibe kunamiziwa, iye adati: “Ndawa ya kugopa kwangu Mulungu nidalamba kunyang’anira mavidiyo mwaya ndipo nidawafotokozera ndawa yake kwa azinzangu mwawa.” Iye ambaphatisira basa ‘nzeru chaiyo’ kuti ‘akwanise kufamba mu njira yodziwa vinthu.’ (Miy. 9:6) Ndawa ya kudabwa na vomwe Alain adachita maticha yanzake ya ku shikola ankupfunzira Baibolo ndipo ankugumanika pamisonkhano yachikhrisitu.

17-18. Ko ni madaliso yaponi kwa wanthu omwe ankubvuma kuchemerewa kwa ‘nzeru chaizo’ ankukondwa nayo komasoti yomwe ankudikhira? (Onani pomwe foto.)

¹⁷ Kuphatisa basa chitsanzo cha azikazi awiri ophimphirisa mwawa, Yahova adatiuza kuti tikasalula bwino vinthu tidzadalisiwe. Wale omwe ankubvuma kuchemerewa na ‘nkazi wopusa’ aganizira va kundokhutilisa vilakolako vawo voipa. Kunena shuwa iwo ankukomedzewa manjeuno koma vidzawawawe kutsogolo ndawa mapeto yawo ‘nikutsogolelewa kumanda.’—Miy. 9:13, 17, 18.

¹⁸ Koma nivosiyana manige na wale omwe abvuma kuchemerewa na ‘nzeru chaizo’! Wale omwe abvuma kuchemerewa kumoku, akhala okondwa maninge pakupasiwa chakudya chabwino chakudya chomwe ni cholimbisa mwauzimu. (Yes. 65:13) Pakuphatisira basa mneneri Yesaya Yahova adati: ‘Nitetekereni ndipo mudye vakudya vabwino, kuti moyo wanu ukondwe ndawa ya chakudya cha mafuta.’ (Yes. 55:1, 2) Tinkuyesesa kudziwa vomwe Yahova achakonda na vomwe iye achazonda. (Sal. 97:10) Tikhala okondwa maninge kuchemera anango kuti adzaphindulembo na ‘nzeru chaizo. Vikhala ninge kuti tili padzulu pa thaundi tinkunena kuti: ‘Bwerani kuno mose osadziwa vinthu.’’ Ndipo phindu yake kwa ise na kwa wale omwe atetekera idzakhalerini ya ntsinkuzino chabe. Madaliso mwaya yadzakhalepo mpaka kalekale yadzatichitise kuti tikhale na ‘moyo’ mpaka kalekale uku ‘tinkufamba mu njira yobvesa vinthu.’—Miy. 9:3, 4, 6.

19. Mobvera na Mlaliki 12:13, 14, ko tichadekana kukhala otsimikiza kuchita chani? (Onani pomwe bokosi yakuti “Kugopa Mulungu kutiphindulisa.”)

¹⁹ Lewengani Mlaliki 12:13, 14. Tikufuna kuti kugopa kwathu Yahova kupitirize kuteteza ntima wathu na kutithandiza kukhala ochena mwa uzimu mu nthawe zomwe nizoshupa zino. Mantha ya khaindi mweyi yadzatithandize kuti tipitirize kuchemera wanthu azinji kuti agumane ‘nzeru chaizo’ na kuphindula nazo.