Kuganizira wanthu anango kuchabweresa madaliso yazinji maninge kwa moyo wose

Apayi wangu wenze m’busa wa tchetchi ya ku Canadá, sondo iliyose pa Sondo ababa wangu ambanitumiza pabodzi na mbale wangu kushikola ya wana yomwe imbachitika kutchetchi mweyi. M’ma 11:00 hora timbagumana pabodzi kuti tipemphere. Masikati timbayenda ku Nyumba ya Ufumu pabodzi na amayi, ndipo timbakwanisa kuona bwinobwino kusiyana kwa ma tchetchi yawiri mwaya.

Amayi adayamba kufotokoza vachikhulupiriro chawo kwa azishamwali wawo wakalekale omwe ni Bob na Marion Hutcheson, iwombo adabvuma kupfunzira chonadi. Mu 1958 banja mweyi idanitenga pabodzi na wana wawo kuti tikanyang’anire nsonkhano wa m’maiko wa ntsiku 8 ku thaundi ya Nova Iorque. Koma manje ninkubvesa kuti yenze basa ikulu maninge kuti anitenge kuyenda ku nsonkhano moule. Koma nsonkhano moule wenze chinthu chodekana manige pa moyo wangu.

ABALE ADANITHANDIZA KUTI NICHITE VIZINJI PAKUTUMIKIRA YAHOVA

Pomwe nenze na magole 10 nimbakhala kumalo yosungirako vinyama ndipo nimbakonda maninge kusamalira vinyama. Nidayamba kuganiza kudzakhala munthu wosamalira vinyama. Ndipo amayi wangu adafotokozera akulu vankhani mweyi. Ndipo mwachikondi akulu adanikumbusa kuti tinkukhala “mu ntsiku zomalizira” kuti niyende kukapfunzira ku shikola yapadzulu mweyi kungadzonge ushamwali wangu na Yahova. (2 Tim. 3:1) Ndawa ya vimwevi nidaganiza kuti nileke kuyenda kukapfunzira ku shikola mweyi.

Koma inepano nimbadzibvunza basi kuti ko nidzachite chiyani nikadzamaliza shikola. Podiya kuti nimbayenda mu umboni sondo iliyose inepano nimbakondalini kulalikira. Ndipo nimbadzionalini ninge mpainiya. Panthawe mweyi ababa wangu na amalume wangu omwe wenzelini wa Mboni za Yahova adaniuza kuti niyende kukaphata basa pakampani ikulu maninge ku Toronto. Amalume wangu wenze na udindo ukulu maninge pa kampani mweyi ndipo inepano nidabvuma basa mweyi.

Ku Toronto, inepano nimbaphata basa nthawe zizinji nimbakhalapomwe na wanthu womwe wenzelini wa Mboni za Yahova. Vimwevi vidanichitisa kuti nileke kumbagumanika kawiri-kawiri pa misonkhano na mu umboni. Pakuyamba nimbakhala na ambuya wangu womwe wenzelini wa Mboni za Yahova, koma pomwe adamwalira nidayamba kunyang’ana mbuto inango yokhala.

Banja ya Hutchesons, yomwe idanitenga kuti niyende nawo ku nsonkhano mu 1958 adakhala ninge azibereki wangu. Iwo adaniuza kuti niyende nimbakakhale nawo ndipo adanithandiza kukhala na volinga va uzimu. Mu 1960, inepano nidabatizika pabodzi na mwana wawo John. John ambatumikira ninge mpainiya, vimwevi vidanikomedza ndipo nidayamba kukonda maninge kulalikira. Abale adaona va khama yangu ndipo kupita kwa nthawe adaniyikha kuti nimbanyang’anire Shikola ya Utumiki.a

NIDAGUMANA MWANZANGU NDIPO NIDAYAMBA KUTUMIKIRA NINGE MPAINIYA

Mu 1966, nidalowolana na Randi Berge, yemwe wenze mpainiya wakhama ndipo wenze wokonzeka kulalikira kudera iliyose yosowa. Wonyang’anira dera wathu adatilimbikisa, ndipo adatiuza kuti tiyende kukathandiza mu mpingu unango ku Orillia, Ontário. Mwapo tidalongedza katundu wathu ndipo tidayenda.

Pomwe tidandofika ku Orillia, inepano nidayamba kutumikira ninge mpainiya pabodzi na Randi. Khama yake idanilimbikisa maninge. Pomwe nidadzipereka na ntima wose kuti nikhale mpainiya wakhama, nidayamba kukhala wokondwa kuphatisa basa Baibolo kuthandiza anango kuti adziwembo chonadi. Mwayi ukulu maninge womwe tenze nawo ni kuthandiza banja inango kuti ichite vosalula vabwino maninge pamoyo wawo mpakana kudzipereka kukhala wa Mboni za Yahova.

KUPFUNZIRA CHIYANKHULO CHINYOWANI NA KAGANIZIDWE KANYOWANI

Paulendo unango ku Toronto, tidadziwana na m’bale Arnold MacNamara, yemwe wenze m’bale wamaudindo ku Beteli. Iye adatibvunza kuti peno tingakonde kutumikira ninge apainiya wapadera. Nthawe imweyo inepano nidamudawira kuti: “Kulikose tingatumikire kupatulapo ku Quebec!” Tenze tidatengerambo tsankho yomwe wanthu wa ku Canadá womwe ambayankhula Chingelezi wenze nalo kwa wanthu wa ku Quebec omwe ambayankhula chi Francês. Panthawe mweire penze wandale omwe ambafuna kuti thaundi ya Quebec idziyimire.

M’bale Arnold adanidawira kuti ona “kubodzi komwe Beteli inkutumiza apainiya wapadera ni ku Quebec.” Pamwapo inepano nidabvuma ndipo nimbadziwa kuti Randi ankufuna kukatumikira kumoku. Kuyenda kwa nthawe tidazindikira kuti chosalula chimwechi chomwe tidachita chenze chinthu chodekana maninge pa moyo wathu!

Pomwe tidandopfunzirako chi Francês kwa ma sondo 5, Randi nainepano pabodzi na banja inango tidayenda ku Rimouski, yemwe wenze nsenga wa makilometro 540 chakumachubese kwa Montreal. Pamwapa isepano timbandoyakhulako pang’ono chi Francês. Vimwevi vidaonekera bwino-bwino pa nsonkhano unango pomwe nimbawerenga virengezo. Pomwe nimbalengeza va nsonkhano unkubwera inepano nidasokoneza mawu. M’malo mwakuti nilewe kuti tidzatambire “alendo wa ku Áustria” nidalewa kuti tidzatambire “alendo wa nthiwatiwa.”

Ku Rimouski, isepano tidatambira thandizo ya alongo anayi wa khama, komasoti na banja ya Huberdeaus na wana wawo awiri wachikazi. M’bale Huberdeaus adalugali nyumba ikulu yomwe apainiya wose ambakhala moumo. Ndipo apainiya ambawathandiza kupagali nyumba mweyi. Timbachemera nyumba mweyi kuti nyumba ichena ndawa ya kuti yose yenze indapentewa na penti ichena. Kazinjikazinji timbakhala wanthu 12 panango 14 mu nyumba mweyi. Ninge apainiya wapadera, inepano na Randi timbalalikira kuchoka machibese mpakana maulo. Ndawa ya vinwevi vimbakhala vokomedza maninge kukhala na anzako woyenda nawo mu umboni olo usiku kunkuzizira.

Isepano tidakhalapomwe paushamwali na apainiya mwawa womwe wenze ninge azibale wathu. Nthawe zinango timbaotha moto pabodzi pomwe nthawe zinango timbaphikira pabodzi ninge banja. M’bale munango ambadziwa kuyimba ndipo maulo yaliyose pa Satade timbayenda kukaimba na kuvina.

Wanthu wa mu dera ya Rimouski ambachita chidwi na Baibolo! Payadapita magole 5, tidakhala okondwa kuona mapfunziro yathu ya Baibolo yankupita patsogolo mwauzimu nkufika pakubatiziwa. Ndipo mpingu udakula mpakana udakhala na ofalisa 35.

Ku Quebec, tidatambira mapfunziro yabwino maninge yamomwe tingaphatire basa yolalikira. Isepano tidaona Yahova ankutithandiza mu umboni na kutithandizapomwe pa vinthu vakuthupi. Kuingizira pamwapa tidayamba kukonda wanthu wa mu dera mweyire chikhalidwe chawo na chiyankhulo cha chi Francês. Vimwevi vidatichitsa kuti timbakondepomwe wanthu wa khaindi inango.—2 Akor. 6:13.

Pomwe timbandikhiralini, Beteli idatikumbira kuti tiyende kukatumikira ku thaundi ya Tracadie, yomwe ikhala ku machibese kwa Nova Brunswick. Kuchita vimwevi kwenze koshupa maninge ndawa yakuti tenze tidalogali nyumba ndipo inepano nimbaphata basa ninge ticha kwa maola yang’onongo’no pa sondo. Kuingizira pamwapa, mapfunziro yathu yanango yenze yadakhala ofalisa osabatiziwa komasoti ni pa nthawe yomwe timbamanga Nyumba ya Ufumu yathu.

Tidayipempherera kwa sondo yose nkhani mweyi, ndipo tidayenda kukazungira thaundi ya Tracadie tidaona kuti yenze yosiyana maninge na Rimouski. Isepano tidaganiza kuti peno Yahova ankufuna kuti tiyende ku moku, isepano tinkufunika kuyenda. Tidathemba Yahova ndipo tidaona kuti iye adachosa vinthu vose vomwe vidakatisokoneza. (Mla. 3:10) Ndawa yakuti nthawe zose Randi ambakonda Yahova ndipo ambafuna kumutumikira mwachikondi vidakhala vosashupa kuti tichinje.

Nkulu wa mu mpingu wathu unyowani dzina yake wenze Robert Ross. Iye wenze adatumikira kumoku pabodzi na nkazi wake Linda, iwo adaganiza vokhala kumoku pomwe mwana wawo woyamba adabadwa. Podiya kuti ambasamalira mwana, iwo adapitiriza kukhala wakhama mu umboni komasoti kutambira alendo. Vimwevi ndivo vidatilimbikisa maninge.

MAPHINDU YOMWE TIDAGUMANA KU GAWO YOSOWA

Pambuyo pakuti tatumikira ninge apainiya ku Tracadie kwa magole yawiri. Tidatambira mwayi wosadikhirika womwe wenze kutumikira ninge wonyang’anira dera. Pomwe tidatumikira kwa magole 7 ku madera yomwe ambayankhula Chingelezi, tidatumiziwa kuti tikatumikire ku dera inango yomwe ambayankhula chi Francês ku Quebec. Wonyang’anira dera wathu wa ku Quebec dzina yake Léonce Crépeault, ambakonda kutembeja nkhani zomwe nimbakamba. Nthawe zinango iye adanibvunza kuti: “Ko unkuganiza kuti ungachite tani kuti nkhani zako zimbakhale zophindulisa maninge?”b Navomwe m’bale moyu adalewa, vidanithandiza maninge kuti nimbaganizire vomwe ningachite kuti nkhani zangu zimbakhale zobveka komasoti zosashupa kubva.

Ubodzi mwa utumiki wangu womwe niyebwalini ni womwe nenze nawo pa nsonkhano wa m’mayiko womwe wenze na nsolo wakuti “Chikhulupiriro chopambana” mu 1978 ku Montreal. Nimbaphata basa mu dipatimenti ya vakudya. Timbadikhira wanthu pafupifupi 80 000 ndipo tidatambira malangizo yamomwe tingaphatire basa mweyi. Vose venze vinyowani, vophatisira basa na momwe tingaphikire chakudya. Tenze na makojeradori yakuluyakulu 20 yomwe yambaphatalini bwinobwino basa. Ndawa ya vomwe vimbachitika mu estádio mweyi, usiku wakuti mwagwana yake kuli nsonkhano isepano tidakwanisa kungenamo mu estádio mweyi. Kuti tikwanise kutenthesa madzi yakuti tikonzere thiyi wamachibese. Tenze oneta koma tidapfunzira vizinji kwa abale womwe ambaphata basa modzipereka. Na wachikulire womwe ambachita nthabwala zosekesa. Ushamwali womwe tidachita pa nsonkhano moule ukalipo mpakana manje. Kwaisepano venze vokomedza maninge kukhala pa nsonkhano moule ku Quebec, kudera komwe m’magole ya ma 1940 na 1950 basa yathu yenze yolambiziwa!

Inepano nidapfunzira vizinji na abale omwe ambasamalira madipatimenti yawo pa nsonkhano ukulu moule ku Montreal. M’bale munango dzina yake David Splane, yemwe manje uno ankutumikira mu Bungwe Yotonga wenze wonyang’anira nsonkhano moule. Koma pa nsonkhano unango pomwe inepano nidasaluliwambo kuti nikhale wonyang’anira nsonkhano. M’bale David adanionesa chikondi na ntima wose.

Mu 2011, isepano pomwe tidakwanisa magole 36 tinkutumikira ninge onyang’anira dera nidasaluliwa kuti nikakhale ninge mpfunzisi wa Shikola ya akulu mu mpingu. Pa magole yawiri ya utumiki moyu Rand na ine tenze tidagonera makama yokwana 75. Koma chokomedza maninge ni utumiki womwe tenze nawo. Kumapeto kwa sondo iliyose akulu ambakhala okondwa ndawa yowona kuti Bungwe Yotonga iwaganizira pa chakudya cha uzimu chimwechi.

Patsogolo pake adaniyikha kuti nikhale mpfunzisi mu Shikola ya Akhrisitu Olalikira za Ufumu. Koma aluno ambakhala oneta ndawa ya momwe ndandanda yenzere, iwo ambakhala oneta ndawa ya kuti ambakhala mu shikola kwa maola 7. Ambaphata basa za pamuyi kwa maola yatatu komasoti usiku wose ambakonzekera misolo 4 panango 5 yakuti apfunzire pa sondo iliyose. Inepano na maticha yanango tidawauza aluno kuti angakwanise kuchita vimwevi na thandizo ya Yahova basi. Inepano ninkukumbukira kuti aluno mwawale adakhala odabwa kuona kuti ndawa yothemba Yahova adakwanisa kuchita vinthu vizinji vomwe iwo ambavidikhiralini kuti angavichite.

KUGANIZIRA ANANGO NTHAWE ZOSE KUBWERESA MADALISO

Ndawa yakuti amayi wangu ambaganizira anango, vidathandiza kuti mapfunziro yawo ya Baibolo yapite patsogolo mwauzimu. Komasoti vidathandiza apayi wangu kuti akhale munthu wosashupa nkuyamba kumbabvesera mawu ya Mulungu. Iwo adanidabwisa maninge ndawa pomwe padandopita ntsiku zitatu amayi wangu wamwalira kale, iwo adayenda ku Nyumba ya Ufumu ndipo adabvesera nkhani ya wose, adapitiriza kusonkhana kwa magole yanango 26. Podiya kuti ababa wangu alimbe kubatiziwa, akulu adaniuza kuti nthawe zose ambakhala woyamba kufika pa misonkhano sondo iliyose.

Amayi wangu adasiya chitsanzo cha bwino maninge kwa inepano na azilongosi wangu atatu. Azilongosi wangu atatu mwawa pabodzi na azimuna wawo ankutumikira Yahova mokhulupirika. Awiri mwa iwo ankutumikira ku beteli, mbodzi ankutumira ku beteli ya ku Portugal pomwe munango ankutumikira ku Haiti.

Manje ine na Randi tinkutumikira ninge apainiya wapadera ku Hamilton, Ontário. Pomwe timbatumikira ninge onyang’anira dera, timbakonda maninge kuyenda na abale na alongo ku mapfunziro yawo komasoti kumaulendo yobwereza. Koma manje isepano ndise okondwa maninge kuona kuti tinayombo mapfunziro ya Baibolo yomwe yankupita patsogolo mwauzimu. Mu mpingu wathu unyowani isepano tikondwa maninge na abale na alongo ndipo tilimbikisiwa maninge kuona momwe Yahova ankuwathandizira pa nthawe yoshupa na nthawe ya bwino.

Tikaganizira kumbuyo isepano tikhala okondwa kuchokera pasi pa ntima kuona momwe wanthu ambaonesera chikondi kwa isepano. Ndawa ya vimwevi isepano tiyesesambo kuchita vose “vomwe tingakwanise,” kuti tithandize abale na alongo kuchita vose vomwe angakwanise pa basa ya Yahova. (2 Akor. 7:6, 7) Mwakulinganiza, pa banja inango amayi na wana wawo awiri ankuchita utumiki wa nthawe zose. Inepano nidabvunza amuna wawo kuti peno adaganizako kale kuchita upainiya. Koma iwo adanidawira kuti ninkuthandiza kale apainiya atatu pa muyi pano. Manje inepano ni dawabvunzapomwe kuti: “Ko thandizo yomwe munkuwapasa inkuposha yomwe Yahova ankuwapasa?” Nidawalimbikisa kuti iwo angakhale okondwa ninge momwe akazi na wana wawo ankukondwera na utumiki moyu. Ndipo padandopita minyezi 6 iwo adayamba kutumikira ninge mpainiya.

Randi na ine tipirize kuyankhula va ubwino wa Yahova “kwa wanthu azinji” na kudikhira kuti iwo adzakhale okondwa ninge momwe isepano “takhalira okondwa” pakutumikira Yahova.—Sal. 71:17, 18.