NKHANI YOPFUNZIRA 19
NYIMBO NA. 22 Ufumu Umene Ukulamulira Kumwamba Ubwere
Ko nchani chomwe tinkudziwa pa chiweruzo chomwe Yahova adzapereke kutsogolo?
‘Yahova . . . ankufunalini kuti munthu aliyese adzadzongewe.’—2 PET. 3:9.
CHOLINGA
Kulimbisa chikhulupiriro chathu chakuti Yahova akambadzaweruza wanthu kutsogolo, iye adzachite vinthu vabwino komasoti vachilungamo.
1. Ndawa chani tingalewe kuti tinkukhala mu nthawe yapadera?
ISEPANO tinkukhala mu nthawe yapadera maninge, maulosi ya m’Baibolo yankukwanirisiwa tinkuona ntsiku iliyose. Mwakulinganiza, isepano tinkuona ‘mpfumu ya ku norte’ na ‘mpfumu ya ku sul’ ankumenyana na cholinga chakuti atonge dziko. (Dan. 11:40, mawu ya m’nyantsi.) Komasoti tinkuona ntontholo wabwino wa Ufumu wa Mulungu unkulalikiriwa munjira yopasa chidwi maninge. Kuposha kale wanthu mamidyau yazinji ankusalula kutumikira Yahova. (Yes. 60:22; Mat. 24:14) Kuingizira pamwapa, tinkutambira pomwe chakudya chizinji chauzimu “pa nthawe yoyenera.”—Mat. 24:45-47.
2. Ko tichadekana kutsimikizira va chani, ndipo tichadekana kudziwa chani?
2 Yahova ankutithandiza kubvesa vinthu vodekana maninge vomwe vichitike manjemanje. (Miy. 4:18; Dan. 2:28) Tingakhale otsimikiza kuti pomwe chisautso chikulu chidzayambe, tidzakhale tinkudziwa vodekana kuchita kuti tipitirize kukhala okhulupirika kwa Yahova na obvana. Koma ni vodekana kudziwa kuti panavinthu vinango vakutsogolo vomwe isepano tikanati tavidziwa. Mu nkhani mweyi, ndawa ya kubvesesa vinthu vinango tione vinthu vomwe vachinja ndipo patsogolo pake tikambirane vinthu vomwe tichadziwa polewa va kutsogolo na momwe Ababa wathu wakudzulu adzachitire vinthu.
VOMWE ISEPANO TINKUDZIWALINI
3. Ko m’buyo umu timbalewa kuti ni nthawe iponi pomwe Yahova adzachose mwayi wakuti wanthu amutumikire, ndipo timbanena tene ndawa chani?
3 M’buyo umu timbalewa kuti chisautso chikulu chikadzayamba palibe pomwe mwayi wakuti munthu adzasalule kutumikira Yahova na kupulumuka pa Arumagedo. Tidafika pakulewa tene ndawa timbaganiza kuti vomwe vidachitika pachigumula, vimbayimira vomwe vidzachitike kutsogolo. Mwakulinganiza, timbakhulupirira kuti ninge momwe vidakhalira kuti palibe yemwe adakwanisa kungena muchingalawa pomwe Yahova ‘adafunga nsuwo,’ palibembo yemwe adzakwanise kutumikira Yahova na kupulumuka patsogolo pakuti chisautso chikulu chayamba.—Mat. 24:37-39.
4. Ndawa chani tinkulewalini pomwe kuti vomwe vidachitika mu nthawe ya Nowa vidzakwanirisike mbali yake ikulu kutsogolo? Fotokozani.
4 Ko vingakhale chaivo kulewa kuti vomwe vidachitika pa chigumula vinkuyimira vomwe vidzachitike kutsogolo? M’dawiro ni wakuti neye. Ndawa chani? Ndawa yakuti Baibolo ifotokozalini vimwevi.a Ni shuwadi kuti Yesu adalinganiza ‘nthawe ya Nowa’ na nthawe yakukhalapo kwake. Koma iye alibe kufotokoza kuti ninge momwe vidakhalira mu nthawe ya Nowa mwakulinganiza kufungiwa kwa nsuwo wachingalawa kudzakwanirisiwe pomwe mbali yake ikulu kutsogolo. Ndipo tingapfunzire vizinji maninge pa nkhani ya Nowa na vomwe vidachitika pa nthawe ya chigumula.
5. (a) Ko Nowa adaonesa tani chikhulupiriro? (Aheberi 11:7; 1 Petulo 3:20) (b) Ko basa yolalikira yomwe tinkuchita ntsiku zino, inkuling’ana tani na basa yolalikira yomwe Nowa adachita?
5 Pomwe Nowa adabva machenjezo ya Yahova, iye adaonesa kuti wenze na chikhulupiriro ndipo adayamba kumanga chingalawa. (Werengani Aheberi 11:7; 1 Petulo 3:20.) Mwanjira ibodzibodzi, wanthu akambabvesera ntontholo wabwino wa Ufumu, iwo achadekana kuphatisa basa vomwe achapfunzira. (Mac. 3:17-20) Petulo adanena kuti Nowa ‘ni mlaliki wachilungamo.’ (2 Pet. 2:5) Koma momwe tidaonera mu pfunziro yapita, isepano tinkudziwalini kuti Nowa adakwanisa kulalikira wanthu ose omwe enzeko nthawe mweire. Ntsiku zino tichayesesa kulalikira kwa wanthu azinji padziko yose ndipo tichachita vimwevi mwakhama. Koma olo tiyesese tani, tidzakwaniselini kulalikira kwa wanthu ose mapeto yakanati kufika. Ko ndawa chani tingakwaniselini?
6-7. Ndawa chani tingalewe kuti tingakwaniselini kulalikira kwa munthu aliyese mapeto yakanati kufika.
6 Ganizirani vomwe Yesu adalewa pa nkhani ya basa yolalikira. Iye adalewa kuti ntontholo wabwino udzalalikiriwe “padziko yose yapasi kuti ukhale umboni kwa wanthu wa makhaindi yose.” (Mat. 24:14) Ntsiku zino kuposha kale ulosi moyu unkukwanirisika. Ntontholo wa Ufumu unkugumanika muviyankhulo voposha 1000, ndipo pakuphatisa basa saiti ya jw.org, wanthu azinji padziko yapasi angakwanise kupfunzira va Ufumu wa Mulungu.
7 Koma Yesu adauza opfunzira wake kuti mudzakwaniselini ‘kuzungulira mathaundi yose’ panango kuti iwo adzakwaniselini kulalikira munthu aliyese chiweruzo chomalizira chikanati kufika. (Mat. 10:23; 25:31-33) Mawu ya Yesu mwaya yakuphata pomwe basa ntsiku zathu zino. Wanthu mamidyau yazinji ankukhala mu malo yomwe isepano tingakwaniselini kulalikira mwaufulu. Kuingizira mwapa, wana azinji achabadwa pa minutu iliyose. Isepano tichachita vomwe tingakwanise kuti tikwanise kugumana wanthu ‘wamakhaindi yose, dzinza iliyose, chiyankhulo chilichose’ kuti tiwalalikire va ntontholo wabwino. (Chiv. 14:6) Koma chaivo ni vakuti tidzakwaniselini kulalikira kwa munthu aliyese padziko yapasi mapeto yakanati kufika.
8. Ko tingakhale na mbvunzo uponi pa momwe Yahova adzaweruzire wanthu kutsogolo? (Onani pomwe foto.)
8 Koma panambvunzo munango: Manje ko tani va wanthu omwe adzakhale alibe mwayi wakubva ntontholo wabwino chisautso chikulu chikanati chayamba? Ko Yahova na mwana wake Yesu yemwe wapasiwa udindo woweruza adzawachitire chani? (Yoh. 5:19, 22, 27; Mac. 17:31) Lemba yomwe pachokera msolo wa nkhani mweyi, pankulewa kuti Yahova ‘ankufunalini kuti munthu aliyese adzadzongewe.’ Kusiyana na vimwevi iye ankufuna kuti ‘wanthu ose alape.’ (2 Pet. 3:9; 1 Tim. 2:4) Ni vodekana kudziwa kuti Yahova akanati watiuza momwe iye adzaweruzire wanthu omwe akanati akhala na mwayi wobvako ntontholo wabwino ndipo ni vobveka kuti Yahova achichimiziwalini kuti atiuze vomwe iye wachita na vomwe adzachite kutsogolo.
Ko Yahova adzachite chani na wanthu omwe alibe kukhala na mwayi wakubva ntontholo wabwino chisautso chikulu chikanati chayamba? (Onani ndime 8)c
9. Ko Yahova adzachite chani kutsogolo?
9 Pakuphatisa basa Baibolo, Yahova atiuza vinthu vinango vomwe iye adzachite. Mwakulinganiza, tiwerenga kuti Yahova adzamukise wanthu ‘osalungama,’ panango kuti wanthu omwe alibe kukhala na mwayi wakubva ntontholo wabwino na kuchinja moyo wawo. (Mac. 24:15; Luka 23:42, 43) Ndipo vimwevi vinkuchitisa kuti pakhale pomwe mbvunzo munango wodekana maninge.
10. Ko pangakhale mibvunzo yanango yaponi?
10 Ko wanthu ose omwe adzafe pa nthawe ya chisautso chikulu, adzadzongewe mwakuti adzakhale pomwelini na mwayi wakudzamukisiwa? Baibolo ichafotokoza bwinobwino kuti wanthu omwe ni azondi wa Yahova adzadzongewe pa Arumagedo ndipo adzakhalelini na mwayi wakudzamukisiwa. (2 Ates. 1:6-10) Koma wanthu anango pa nthawe ya chisautso chikulu, panango adzafe ndawa ya vifukwa vinango. Mwakulinganiza, ndawa ya matenda, kukalamba, ngozi panango kuphewa na wanthu. Ndawa ya vochitika vimwevi, ko nchani chomwe chidzawachitikire? (Mla. 9:11; Zek. 14:13) Ko wanthu mwawa adzakhale mu gulu ya wanthu ‘osalungama’ omwe adzamukisiwe mu dziko inyowani? Isepano tinkudziwalini m’dawiro wake.
VOMWE ISEPANO TINKUDZIWA
11. Ko wanthu adzaweruziwe pa Arumagedo mobverana na chani?
11 Isepano tinkudziwa vinthu vinango vomwe vidzachitike kutsogolo. Mwakulinganiza, tinkudziwa kuti pa Arumagedo wanthu adzaweruziwe mobverana na momwe angachitira vinthu na abale wa Khrisitu. (Mat. 25:40) Wale omwe athandiza odzodzewa adzaweruziwe ninge nkhosa. Tinkudziwa kuti odzodzewa anango adzakhale adakali pano padziko yapasi chisautso chikulu chikadzayamba ndipo adzatengewe nkuyenda kudzulu pakadzakhala kanthawe kang’onong’ono kuti Arumagedo iyambe. Ndawa yakuti odzodzewa anango adzakhale adakali pano pa dziko yapasi, ni vokwanisika kuti wanthu omwe ana ntima wabwino adzakhale na mwayi wowathandiza pa basa yomwe iwo ankuchita. (Mat. 25:31, 32; Chiv. 12:17) Ndawa chani vinthu vimwevi ni vodekana maninge?
12-13. Ko wanthu anango adzachite chani akadzaona kudzongewa kwa ‘Babulo Nkulu’? (Onani pomwe foto.)
12 Chisautso chikulu chikadzayamba, vingachitike kuti wanthu omwe adzaone kudzongewa kwa ‘Babulo Nkulu’ adzakumbukire kuti wa Mboni za Yahova akhala ankulewa kwa magole yazinji kuti vimwevi vidzachitike. Ko anango mwa wanthu mwawa angadzayambe kukhulupirira Yahova?—Chiv. 17:5; Ezek. 33:33.
13 Vimwevi vikadzachitika, vidzatikumbuse vomwe vidachitika ku Iguputo munthawe ya Mose. Kumbukirani kuti ‘gulu ikulu ya wanthu’ idatewera Aizirayeli pomwe iwo ambachoka ku Iguputo. Anango mwa wanthu mwawa panango adayamba kukhulupirira Yahova pomwe adaona kukwanirisiwa kwa miliri 10 yomwe Mose adalewa. (Eks. 12:38) Vinthu voligana na vimwevi vikadzachitika patsogolo pakuti Babulo Nkulu wadzongewa, ko tidzakhumudwe nkuona kuti nchilungamolini kuti wanthu anango abverane nase mapeto yakanati kufika? Neye. Isepano tichadekana kukhala ninge Ababa wathu wakudzulu yemwe ni ‘wachifundo, wokoma ntima, wodekha na wodzadza na chikondi chokhulupirika na chonadi.’b—Eks. 34:6.
Anango omwe adzaone kudzongewa kwa ‘Babulo Nkulu’ adzakumbukire kuti wa Mboni za Yahova akhala ankuyankhula va nkhani mweyi kwa magole yazinji (Onani ndime 12-13)d
14-15. Ko tsogolo ya munthu ithemba nthawe yomwe iye wafa panango komwe achakhala? (Salimo 33:4, 5)
14 Nthawe zinango tichabva abale anango ankulewa va m’bale wawo kuti: “Vidakakhala bwino iye adakafa chisautso chikulu chikanati chayamba, ndawa yakuti adzakhale na mwayi wakumukisiwa.” Nthawe zose munthu achayankhula vinthu vimwevi na cholinga chabwino, koma tsogolo yosapera ya munthu ichathembalini nthawe yomwe munthu angafe. Yahova ni Woweruza waungwiro, vosalula vake nthawe zose ni vabwino komasoti vachilungamo. (Werengani Salimo 33:4, 5.) Ndipomwapa, tingakhale otsimikiza kuti ‘Woweruza wadziko yose’ adzachite vinthu vabwino.—Gen. 18:25.
15 Tinganene pomwe kuti tsogolo ya munthu ithembalini komwe iye achakhala. Yahova angaweruzelini wanthu mamidyau yazinji nkuwaona kuti ni “mbuzi” ndawa yakuti ambakhala m’madera yomwe ntontholo wabwino ulibe kulalikiriwa. (Mat. 25:46) Peno tiwadera nkhawa wanthu mwawa, ndoganizani Woweruza wachilungamo wadziko yose yapasi. Isepano tinkudziwalini vomwe Yahova adzachite pa nkhani mweyi pa nthawe ya chisautso chikulu. Panango anango mwa wanthu mwawa akadzaona vomwe vidzachitike pa nthawe ya chisautso chikulu angadzayambe kukhulupirira Yahova na kusalula kukhala kumbali yake pomwe iye adzakhale ankuchenesa dzina yake padziko yose yapasi.—Ezek. 38:16.
Patsogolo pakuti chisautso chikulu chayamba, . . . ko wanthu anango adzachinje makhalidwe?
16. Ko isepano tinkudziwa chani polewa va Yahova? (Onani pomwe foto.)
16 Ndawa ya kupfunzira Baibolo, tadziwa kuti munthu aliyese ni wodekana kwa Yahova. Iye adapereka mwana wake kuti tose isepano tikhale na mwayi wodzakhala na moyo mpaka kalekale. (Yoh. 3:16) Tose tichaona chikondi chomwe Yahova achationesa. (Yes. 49:15) Iye adziwa dzina ya munthu aliyese, atidziwa bwinobwino, olo tichifa angatimukise ninge momwe tenzere pakuyamba na mbali iliyose mpakana kubwezeresa pomwe maganizo yathu (Mat. 10:29-31) Tichadekanalini kukayikira ne pang’ono kuti Ababa wathu wakudzulu adzaweruze munthu aliyese mwachilungamo, mwanzeru komasoti mwachifundo.—Yak. 2:13.
Isepano tingakhale otsimikiza kuti Yahova adzaweruze munthu aliyese mwachilungamo, mwanzeru komasoti mwachifundo (Onani ndime 16)
17. Ko mu pfunziro inkubwera tidzaone chani?
17 Manje pomwe tabvesa kuchinja moku pa vomwe timbakhulupirira, taona kuti basa yathu yolalikira ni yodekana maninge kuposha kale. Ndawa chani tinganene tene? Ndipo ni chani chomwe chichatilimbikisa kuti tipitirize kulalikira ntontholo wabwino mwakhama? Tidzaone midawiro ya mibvunzo mwaya mu nkhani yomwe inkubwera.
NYIMBO NA. 76 Kodi Mumamva Bwanji?
a Kuti mudziwe ndawa chani takhala na kuchinja moku, onani nkhani yakuti “Munavomereza Kuti Zimenezi Zichitike” mu Nsanja ya Olonda ya 15 Março 2015, tsa. 7-11.
b Patsogolo pakuti Babulo Nkulu wadzongewa, atumiki ose wa Yahova adzayesewe pa kudzudziwa na Gogi wa Kudziko ya Magogi. Ndipo wale omwe adzayambe kubverana na wanthu wa Mulungu patsogolo pakuti Babulo Nkulu wadzongewa iwombo adzayesewe.
c MAWU YOFOTOKOZERA FOTO : Vochitika vitatu vomwe vinkuonesa vifukwa vomwe vinkuchitisa wanthu anango kuti aleke kubva ntontholo wabwino: (1) Nkazi yemwe ankukhala mudziko yomwe abvumizalini kuchinja tchetchi, (2) banja yomwe inkukhala mu dziko yomwe basa yathu ni yolambiziwa ndipo ni ngozi kupfunzira chonadi, na (3) mwamuna yemwe ankukhala kudera komwe ni koshupa kufikako komasoti ni kutali maninge.
d MAWU YOFOTOKOZERA FOTO: Ntsikana munango yemwe wenze adasiya kutumikira Yahova ankukumbukira vomwe iye adapfunzira va kudzongewa kwa ‘Babulo Nkulu.’ Iye ankusalula kubwerera kwa Yahova ndipo ankunyang’ana thandizo ya azibereki. Vimwevi vikadzachitika tichadekana kukhala ninge Yahova Ababa wathu wachifundo na wachikondi ndipo tidzakondwe na wale omwe asalula kubwerera kwa Yahova.