NKHANI YOPFUNZIRA 28
NYIMBO NA. 123 Tizigonjera Mulungu Mokhulupirika
Ko imwepo mukwanisa kusiyanisa bodza na nkhani chaiyo?
“Manje khalani olimba . . . uku muli mange chonadi nchiuno mwanu ninge bande.”—AEF. 6:14.
CHOLINGA
Kupfunzira kusiyanisa chonadi chomwe tidachipfunzira kwa Yahova na nkhani zabodza zomwe Satana azifalisa pakuphatisa basa wanthu otsutsa.
1. Ko muchabva tani ndawa yopfunzira chonadi?
NINGE wanthu wa Yahova, isepano tikonda maninge chonadi chomwe chiri m’Baibolo. Ndipo tichakhulupirira maninge vimwevi. (Aro. 10:17) Isepano tinachitsimikizo chakuti Yahova adakhazikisa mpingo wachikhrisitu womwe “ulimbikisa na kuteteza chonadi.” (1 Tim. 3:15) Tikhala okondwa maninge kuthandiza omwe ‘anyang’anira m’gulu yathu.’ Inde, ndawa yakuti ni abale mwawa omwe atithandiza kubvesa bwinobwino mpfundo za m’Baibolo na kutithandiza kuchita chifuniro cha Mulungu.—Aheb. 13:17.
2. Mobverana na Yakobo 5:19, ko chingachitike ni chani patsogolo pakuti tapfunzira chonadi?
2 Koma patsogolo pakuti tapfunzira chonadi nakuti tabvuma kuti tichadekana kutewedzera malangizo ya gulu ya Yahova, tingakhale pomwe pangozi yosiya kutewedza vomwe tidapfunzira. (Werengani Yakobo 5:19.) Satana adzakhale wokondwa maninge kuona kuti tasiya kukhulupirira Baibolo na gulu ya Mulungu.—Aef. 4:14.
3. Ndawa chani tichadekana kupitiriza kukhala okhulupirika nchonadi? (Aefeso 6:13, 14)
3 Werengani Aefeso 6:13, 14. Manjemanjepa, Satana adzafalise mabodza nkuchitisa wanthu wa makhaindi kuzonda atumiki wa Yahova. (Chiv. 16:13, 14) Tinkudziwa pomwe kuti Satana adzayesese kuchita vose vomwe angakwanise kuti asokoneze wanthu wa Yahova. (Chiv. 12:9) Ndipomwapa, nivabwino maninge kudzikonzekeresa manjeuno kuti tidzakwanise kusiyanisa chonadi na bodza na kupitiriza kukhala ku saidi ya chonadi. (Aro. 6:17; 1 Pet. 1:22) Chipulumuso chathu pa nthawe ya chisautso chikulu chidzathembe vimwevi.
4. Ko tipfunzire chani mu nkhani mweyi?
4 Mupfunziro mweyi tione makhalidwe yawiri yomwe yangatithandize peno tinkufuna kudziwa chonadi cha m’Baibolo na kutambira malangizo ya gulu ya Mulungu. Patsogolo pake tikambirane vinthu vitatu peno tinkufuna kupitiriza kukhala olimba mu chonadi.
MAKHALIDWE YOMWE TICHADEKANA KUKHALA NAYO PENO TINKUFUNA KUDZIWA CHONADI
5. Ko kugopa Yahova kungatithandize tani kudziwa chonadi?
5 Kugopa Yahova. Kugopa Yahova, kutanthauza kuti isepano timukonda maninge nakuti tingafunelini kuchita chirichose chomwe chingamukhumudwise. Ndipomwapa tichadekana kudziwa bwinobwino kusiyanisa chabwino na choipa, chonadi na bodza kuti tikwanise kukhala obvumizika kwa Yahova. (Miy. 2:3-6; Aheb. 5:14) Ndawa yakuti vinthu vomwe vikondweresa wanthu kazinjikazinji vikhumudwisa Yahova, tichadekanalini kuti mantha yogopa wanthu yakhale yakulu maninge kuposha chikondi chathu kwa Yahova.
6. Ko mantha yogopa wanthu yadachitisa tani kuti Aizirayeli 10 anyalanyaze chonadi?
6 Peno tigopa wanthu maninge kuposha momwe tichagopera Yahova, tingasiye chonadi. Onani chitsanzo cha Aizirayeli 12 omwe enze adatumiwa kuti akaone dziko ya Kanani yomwe Yahova wenze adapolomisa kupasa wanthu wake. Amuna anango 10, adachitisa kuti Aizirayeli akhale na mantha maninge kuposha chikondi chomwe enze nacho kwa Yahova. Ndipo iwo adanena ivi kwa Aizirayeli ose: ‘Ayi kuti timenyane nawo wanthu mwawa ndawa yakuti niwamphanvu maninge kuposha isepano.’ (Num. 13:27-31) Nishuwadi kuti m’maganizo ya wanthu, Akanani enze wamphanvu maninge kuposha Aizirayeli. Koma mpakana kufika pakunena kuti Aizirayeli angakwaniselini kugonjesa azondi wawo, kwenze kukhumudwisa maninge Yahova. Amuna 10 mwawa ambadekana kuona vomwe Yahova ambafuna kuti Aizirayeli achite. Iwo ambadekana pomwe kukumbukira vomwe Yahova wenze adawachitira kale. Ndipo adakakwanisa kukumbukira kuti Akanani wenzelini chinthu kulinganiza na Yahova Mulungu Wamphanvuyose. Koma mosiyana na amuna mwawa, Yoswa na Kalebe, ambafuna kukhala obvumizika kwa Yahova. Iwo adauza gulu ire kuti: ‘Peno Yahova ankukondwa nase, iye achitise kuti isepano tingene mudziko mweyi ndipo atipase.’—Num. 14:6-9.
7. Ko tingalimbise tani kugopa kwathu Yahova? (Onani pomwe foto.)
7 Kuti timbamugope maninge Yahova, nthawe zose pomwe tinkufuna kusalula vochita tichadekana kuganizira vomwe vingamukondwerese. (Sal. 16:8) Mukambawerenga nkhani za m’Baibolo, dzibvunzeni kuti: ‘Sembe niripo pa nthawe mweyi ko nidakachita tani?’ Mwakulinganiza, pomwe Aizirayeli 10 wale adanena vinthu vosalimbikisa, ko imwepo mudakawabvera nkuyamba kugopa wanthu panango chikondi chanu kwa Yahova chidakakhala chikulu? Aizirayeli alibe kutsimikiza kuti Yoswa na Kalebe ambanena chaivo. Ndipomwapa iwo adaluza mwayi wongena Mudziko Yopolomisiwa.—Num. 14:10, 22, 23.
Ko imwepo mudakakhulupirira m’bani? (Onani ndime 7)
8. Ko tichadekana kukulisa makhalidwe yaponi, ndipo ndawa chani?
8 Kudzichepesa. Yahova aulula chonadi kwa wale omwe ni odzichepesa. (Mat. 11:25) Modzichepesa isepano tibvuma thandizo kuti tipfunzire chonadi. (Mac. 8:30, 31) Olo viri teno, tichadekana kukhala osamala kuti tileke kukhala odzikuza. Tikachita vimwevi, tingayambe kuganiza kuti maganizo yathu niyodekana maninge kuposha mpfundo za m’Baibolo panango malangizo ya gulu ya Yahova.
9. Ko tingakhale tani wanthu odzichepasa?
9 Peno tinkufuna kupitiriza kukhala odzichepesa, tichadekana kukumbukira kuti tikadzilinganiza na Yahova, ndiselini chinthu. (Sal. 8:3, 4) Tichadekana kupemphera kukumbira kuti Yahova atithandize kukhala odzichepesa na kubvuma kupfunzisiwa. Ndipo tibvume kuti Yahova atipfunzise malangizo yake pakuphatisa basa Baibolo na gulu yake. Iye adzatithandize kuti timbaone vimwevi kukhala vodekana maninge kuposha maganizo yanthu. Mukambawerenga Baibolo, ganizirani momwe Yahova akondera khalidwe yodzichepesa na momwe achazondera khalidwe yodzikuza. Ndipo yesesani kuchita khama kuti mupitirize kukhala odzichepesa peno mwatambira udindo ukulu maninge womwe uchitisa wanthu kumbakulemekezani.
VOMWE TINGACHITE KUTI TIKHALE OLIMBA MANINGE NCHONADI
10. Ko Yahova adaphatisa basa mbani kuti apereke malangizo kwa wanthu wake?
10 Thembani gulu ya Yahova. Kalekale Yahova adaphatisa basa Mose na Yoswa kuti ambapereke malangizo kwa ntundu wa Aizirayeli. (Yos. 1:16, 17) Aizirayeli enze odalisiwa ndawa yoona amuna mwawa ninge oyimira Yahova. Magole mamidyau yazinji patsogolo pomwe mpingo wachikhrisitu udakhazikisiwa, atumi ndiwo ambatsogolera gulu ya Mulungu. (Mac. 8:14, 15) Kuyenda kwa nthawe gulu mweyi idakula ndipo idaphatanidza pomwe akulu wa ku Yerusalemu. Kutewedza malangizo yomwe yambaperekewa na amuna okhulupirika mwawa, “mipingo yambalimbikisiwa nchikhulupiriro ndipo yambaingizirika ntsiku na ntsiku.” (Mac. 16:4, 5) Ntsiku zino tidalisiwambo tikambatewedza malangizo ya gulu ya Yahova. Manje ko munkuganiza kuti Yahova angabve tani peno isepano tinkubveralini wale omwe iye wawasalula kuti ambatitsogolere? Tigadawire mbvunzo moyu pakuona vomwe vidachitikira Aizirayeli pomwe ambayenda ku Dziko Yopolomisiwa.
11. Ko nchani chomwe chidachitikira wale omwe alibe kulemekeza Mulungu na Mose? (Onani pomwe foto.)
11 Nthawe zinango pomwe Aizirayeli ambayenda mu Dziko Yopolomisiwa, amuna obvekera adatsutsa Mose na utumiki womwe Yahova wenze adamupasa. Iwo adanena kuti: ‘[Osati Mose yekha] koma gulu yose mweyi ni yochena ndipo Yahova ali pakati pawo.’ (Num. 16:1-3) Podiya kuti venze chaivo kuti ‘ntundu wose wenze wochena’ kwa Yahova, koma iye wenze adasalula Mose kuti ambatsogolere. (Num. 16:28) Kukangana komwe iwo ambachita na Mose ambakangana pomwe na Yahova. Iwo ambaonalini vomwe Yahova ankufuna koma ambandoganizira vofuna vawo. Kukhala wa mphanvu komasoti obvekera. Yahova adawapha amuna mwawa komasoti wanthu mamidyau yazinji omwe adabverana nawo. (Num. 16:30-35, 41, 49) Nchibodzibodzimbo ntsiku zino tinkudziwa kuti Yahova abvumalini wanthu omwe alemekezalini malangizo ya gulu yake.
Ko mudakathandizira mbani? (Onani ndime 11)
12. Ndawa chani tichadekana kupitiriza kuthemba gulu ya Yahova?
12 Nthawe zose isepano tingambathembe gulu ya Yahova. Vikabveseseka kuti tichadekana kuchinja momwe tichabvera mpfundo zinango za m’Baibolo panango momwe tichatumikirira Yahova, wale omwe atinyang’anira achebwalini kuchita vimwevi. (Miy. 4:18) Iwo achita vimwevi, ndawa yakuti kuposha vose ankufuna kukondweresa Yahova. Ndipo ayesesa pomwe kuchita vomwe angakwanise kuti aphatise basa malangizo yose kuti asalule vinthu mobverana na mpfundo za Mawu ya Mulungu. Mwevi ndivo vomwe ntumiki aliyese wa Yahova achadekana kuchita.
13. Ko “chitsanzo cha mawu chaiyo” ni chani ndipo tichadekana kuchita nacho chani?
13 “Pitirizani kuphatisisa chitsanzo cha mawu chaiyo.” (2 Tim. 1:13) “Chitsanzo cha mawu chaiyo,” chinkutanthauza vipfunziso vachikhrisitu vomwe tichagumana m’Baibolo. (Yoh. 17:17) Ni m’Baibolo momwe tichagumana mpfundo zose zomwe tichakhulupirira. Gulu ya Yahova itipfunzisa kuphatisisa vipfunziso mwevi. Tikambachita vimwevi tidzadalisiwe.
14. Ko Akhrisitu anango wa ku mbuyo adasiya tani kuphatisa basa “chitsanzo cha mawu chaiyo”?
14 Ko nchani chomwe chingachitike peno tingasiye kukhulupirira “chitsanzo cha mawu chaiyo”? Onani chitsanzo ichi, m’magole yoyambirira Akhrisitu anango ambafalisa nkhani zabodza, nkumbanena kuti ntsiku ya Yahova yafika. Vingachitike kuti enze adatambira kalata inango yomwe imbaoneka ninge yanembewa na Paulo yomwe imbafotokoza vimwevi. Koma m’malo mwakuti afufudze nkhani yose, Akhrisitu anango wa ku Atesalonika adayamba kukhulupirira vimwevi ndipo adayamba kuuzambo anango. Koma sembe adakumbukira vomwe Paulo wenze adawauza adakapusisiwalini. (2 Ates. 2:1-5) Paulo wenze adawauza abale mwawa kuti aleke kukhulupirira virivose vomwe angabve. Ndipo pakuwathandiza pa vinthu vakutsogolo, Paulo adamaliza kalata yake yachiwiri kwa Atesalonika na mawu yakuti: “Tambirani moni wangu, womwe inepano Paulo nanemba na djanja yangu. Nthawe zose ninemba tene m’makalata yangu yose.”—2 Ates. 3:17.
15. Ko tingadziteteze tani kumabodza yomwe yaoneka ninge nichaivo? Perekani chitsanzo. (Onani pomwe mafoto.)
15 Ko tingapfunzire chani pa vomwe Paulo adauza mpingo wa Atesalonika? Tikabva vinthu vinango vomwe vinkubveranalini na mpfundo za m’Baibolo, panango tabva nkhani inango yachirendo, tichadekana kuifufudza bwinobwino. Nthawe inango boma ya União Soviética, azondi wathu adatumizira abale wathu kalata yomwe imbaoneka ninge yachokera ku Bungwe Yotonga. Kalata mweyi imbalimbikisa kuti abale anango akonze gulu yodziimira payokha. Ndipo kalata mweyi imbaoneka ninge inkulewa chaivo. Koma abale omwe enze okhulupirika alibe kupusisiwa. Iwo adazindikira kuti vomwe kalata mweyi imbanena vingabveranalini na mpfundo zomwe iwo enze adazipfunzira. Nichibodzibodzimbo ntsiku zino, wale omwe azonda chonadi, nthawe zinango aphatisa basa interneti na malo yochezera ya pa interneti kuti atigawanise. M’malo “mwakuti mwakankulumize tiluze chikhulupiriro chathu,” tichadekana kuona kuti peno vomwe tavibva panango kuviwerenga vinkubverana na chonadi chomwe tidachipfunzira.—2 Ates. 2:2; 1 Yoh. 4:1.
Ayi kunamiziwa na mabodza yomwe yaoneka ninge nichaivo (Onani ndime 15)a
16. Mobverana na lemba ya Aroma 16:17, 18, ko tichadekana kuchita chani peno munthu munango wasiya chonadi?
16 Pitirizani kukhala obverana na wale omwe ni okhulupirika kwa Yahova. Mulungu afuna kuti timbamutumikire mobverana na abale wathu. Tingakwanise kuchita vimwevi tikaphatisisa chonadi. Munthu yemwe afalisa nkhani zomwe zibveranalini na chonadi, achitisa kuti abale aleke kukhala obverana mumpingo. Ndipomwapa, Mulungu atichenjeza kuti timbakhale “kutali na wanthu mwawa.” Tikaleka kuchita vimwevi tidzayambe kukhulupirira vinthu vomwe vibveranalini na chonadi ndipo tidzakhale osakhulupirika kwa Yahova.—Werengani Aroma 16:17, 18.
17. Ko nimaphindu yaponi yomwe tinayo ndawa yopfunzira chonadi na kuchiphatisisa?
17 Tikachidziwa chonadi na kuchiphatisisa molimba, tidzakwanise kukhala paushamwali na Yahova na kulimbisa chikhulupiriro chathu. (Aef. 4:15, 16) Kuingizira pamwapa, tidzapusisiwelini na vipfunziso vabodza va Satana. Tidzakwanise kukhala olimba ndipo Yahova adzatithandize pa nthawe yachisautso chikulu. Ndipomwapa, chiphateni molimba chonadi. Mukachita vimwevi “Mulungu wa ntendere adzakhale namwe.”—Afil. 4:8, 9.
NYIMBO NA. 122 Khalani Olimba Komanso Osasunthika
a MAWU YOFOTOKOZERA FOTO: Mafoto ya abale, pa nthawe ya boma ya União Soviética pomwe adatambira kalata yomwe imbaoneka ninge yachokera ku Bungwe Yotonga pomwe yenze yochokera kwa azondi wathu. Ntsiku zino azondi wathu angaphatise basa Interneti kuti afalisire mabodza gulu ya Yahova.