NKHANI YOPFUNZIRA 39
NYIMBO NA. 125 “Odala Ndi Anthu Achifundo”
Nkhalani okondwa ndawa yokhala munthu wopasa
“Kupasa kutichitisa kukhala okondwa maninge kuposha kutambira.”—MAC. 20:35.
CHOLINGA
Kuona njira zosiyanasiyana zomwe tingaonesere kuti ndise opasa na kuona momwe vimwevi vitichitisira kukhala okondwa.
1-2. Ko ndawa chani Yahova adatilenga munjira yakuti timbakhale okondwa tikathandiza anango?
POMWE Yahova adatilenga, iye adatilenga mu njira yakuti timbakhale okondwa maninge tikambachitira wanthu anango vinthu vabwino kuposha kutambira. (Mac. 20:35) Ko vimwevi vinkutanthauza kuti tikhalalini okondwa munthu akatipasa chinthu? Neye. Tose tikhala okondwa maninge tikatambira mphaso. Koma tikapasa munthu chinthu, ndipo pomwe tikhala okondwa maninge. Nivabwino maninge kuti Yahova adatilenga mu njira mweyi. Ko ndawa chani?
2 Ndawa yakuti Yahova ambadziwa kuti njira mweyi ndiyo yomwe ingatithandize kuti tipitirize kukhala okondwa. Isepano tingakhale okondwa maninge tikaganizira njira zinango zomwe tingathandizire anango. Ndipo nivabwino maninge kuti Yahova adatilenga mwa njira mweyi. Ntenolini?—Sal. 139:14.
3. Ndawa chani Yahova anenewa kuti “Mulungu wachimwemwe”?
3 Baibolo inena kuti kuchitira vinthu vabwino anango, kutichitisa kukhala okondwa maninge. Ndipomwapa, ni vosadabwisa kuti Yahova afotokozewa kuti: “Mulungu wachimwemwe.” (1 Tim. 1:11) Iye wenze woyamba kuchitira vinthu vabwino anango ndipo palibe munthu wopasa kuposha Yahova. Ndawa ya iye “tinamoyo, tifamba ndipo tilipo” ninge momwe ntumi Paulo adanenera pa Machitidwe 17:28. Nishuwadi, ‘mphaso iriyose yabwino na mphaso iriyose yaungwiro,’ ichokera kwa Yahova.—Yak. 1:17.
4. Ko nchani chomwe chingatithandize kuti timbakhale okondwa maninge?
4 Nishuwadi tose tifuna kukhala okondwa tikachitira wanthu anango vinthu vabwino. Ndipo tingakwanise kuchita vimwevi tikatewedzera Yahova pa nkhani yopasa. (Aef. 5:1) Tikambapfunzira chitsanzo cha Yahova, tione vomwe tingachite peno anango alibe kutembeja pa vomwe tawachitira. Vimwevi vidzatithandize kupitiriza kuchitira vinthu vabwino anango na kutichitisa kuti tipitirize kukhala okondwa.
TEWEDZERANI YAHOVA PA NKHANI YOPASA
5. Ko ni vinthu vinango viponi vomwe Yahova atipasa?
5 Ko Yahova aonesa tani kuti ni wopasa? Onani vitsanzo vinango. Yahova atipasa vofuna vathu va kuthupi. Panango Yahova angatipaselini vose vomwe tinkufuna. Koma chaivo ni vakuti Yahova adzatipase vose vomwe tinkufunikira. Mwakulinganiza, Yahova atipasa vakudya, vovala na malo yokhala. (Sal. 4:8; Mat. 6:31-33; 1 Tim. 6:6-8) Ko Yahova achita vimwevi ndawa yokakamiziwa? Neye. Manje ndawa chani Yahova atichitira vimwevi?
6. Ko tinkupfunzira chani pa lemba ya Mateyu 6:25, 26?
6 Yahova atipasa vomwe tinkudekana ndawa yakuti atikonda maninge. Onani vomwe Yesu adanena pa Mateyu 6:25, 26. (Werengani.) Pamwapa iye adaphatisa basa chitsanzo cha vinthu va mchilengedwe. Pakunena va mbalani Yesu adanena kuti: “Zibzalalini mbewu, panango kukolola panango kusunga chakudya munkhokwe.” Koma onani vomwe iye adanena patsogolo pake: “Koma Ababa wanu wakudzulu azidyesa.” Pamwapo Yesu andawabvunza kuti: “Ko imwepo ndimwelini wofunika maninge kuposha mbalani?” Ko tinkupfunzira chani? Pa maso pa Yahova wanthu omwe amutumikira, ni ofunika maninge kuposha vinyama. Peno Yahova asamalira vinyama, tingakhale otsimikiza kuti iye nthawe zose adzatisamalire. Ninge baba yemwe asamalira vofuna va banja yake, Yahova atikonda maninge ndipo nthawe zose adzatisamalire.—Sal. 145:16; Mat. 6:32.
7. Ko tingatewedzere tani Yahova pa nkhani yopasa? (Onani pomwe foto.)
7 Ninge Yahova, mwachikondi isembo tingathandizembo wanthu anango pa vosowa vawo va kuthupi. Mwakulinganiza, ko munkudziwa m’bale munango yemwe ankufunikira chakudya panango vovala? Yahova angaphatise basa imwepo pakuthandiza m’bale moyu. Wanthu wa Yahova adziwika pomwe kuti ni opasa maninge, pakachitika matsoka ya mchilengedwe. Pa nthawe ya Koronaviru, abale na alongo adapereka vakudya, vovala na vinthu vinango vomwe abale wawo ambadekana. Ndipo azinji adachita vopereka na ntima wose pa kuthandizira basa ya padziko yose. Vimwevi vidathandiza maninge kuti tipitirize kuthandiza abale na alongo padziko yose omwe adagumana na matsoka. Abale mwawa opasa, adaphatisa basa mpfundo yomwe igumanika pa lemba ya Aheberi 13:16 pomwe panena kuti: ‘Ayi kuyebwa kuchita vabwino na kupasa anango vomwe imwepo munavo ndawa yakuti Yahova akondwa na mphaso zimwezi.’
Tose tingamutewedzere Yahova pa nkhani yopasa (Onani ndime 7)
8. Ko Yahova atithandiza pomwe mwanjira iponi? (Afilipi 2:13)
8 Yahova atipasa mphanvu. Yahova akhala wokondwa maninge pakupasa atumiki wake okhulupirika mphanvu zomwe iwo achadekana. (Werengani Afilipi 2:13.) Ko imwepo mudapempherako kale kukumbira mphanvu kuti mulimbane na chiyeso panango kuti mupirire bvuto inango? Panango mudandokumbira mphanvu zakuti mukwanise kupirira kwa ntsiku ibodzi. Koma pomwe pemphero yanu idadawiriwa, ni vosakayikisa kuti imwepo mudakumbukira mawu ya Paulo ndipo mudabverananavo vomwe iye adanena pomwe adati: “Pa vinthu vose, nigumana mphanvu kuchokera kwa Mulungu yemwe anipasa mphanvu zofunika.”—Afil. 4:13.
9. Ko tingatewedzere tani Yahova pa kuphatisa basa mphanvu zanthu na nthawe pa kuthandiza anango? (Onani pomwe foto.)
9 Podiya kuti ndise ochimwa, isepano tingaphatise basa chitsanzo cha Yahova momwe iye aphatisira basa mphanvu zake. Ni shuwadi kuti tingakwaniselini kugawana mphanvu zanthu na anango, olo nteno tingaphatise basa mphanvu zomwe tinazo, pakuthandiza anango. Mwakulinganiza, tingamugulire vinthu panango kumuthandiza basa za pamuyi Mkhrisitu yemwe ni wachikulire panango yemwe ankudwala. Peno vinthu viribwino pa moyo wathu, tingathandize pa basa zakuchenesa panango kukonza pomwe Nyumba za Ufumu. Kuphatisa basa mphanvu zathu mwanjira mweyi, kudzathandize wale omwe atumikira Yahova.
Isepano tingaphatise basa mphanvu zathu pa kuthandiza anango (Onani ndime 9)
10. Ko tingalimbikise tani anango na vomwe tingayankhule?
10 Ayi kuyebwa pomwe kuti mawu ya na mphanvu. Ko munkuganizira va munthu munango yemwe angakhale wokondwa achitembejewa? Ko munkudziwa munthu munango yemwe ankudekana kulimbikisiwa? Peno nteno, ko tani kuyamba imwepo kumuuza munthu muyo kuti mukondwa naye maninge? Imwepo mungayankhule naye maso na maso, kumufonera, kumunembera kalata panango mensaje. Muchadekanalini kuchita mantha na vomwe mungayankhule. Mawu yang’onong’ono yochokera pasi pa ntima, yangakhale yomwe iye ankudekana kuti apitirize kukhala wokhulupirika na kukhala pomwe na chidikhiro.—Miy. 12:25; Aef. 4:29.
11. Ko Yahova angatipase tani nzeru?
11 Yahova atipasa nzeru. Ntumi Yakobo adanemba kuti: ‘Peno munango wa imwepo ankusowa nzeru, akumbire Mulungu. Ndawa yakuti iye apasa ose mosaumira komasoti mosatonza.’ (Yak. 1:5; mawu ya m’nyantsi.) Mawu mwaya yankuonesa kuti Yahova atimanalini nzeru. Mosaumira iye apereka nzeru zomwe anazo kwa anango. Dziwani pomwe kuti Yahova akapereka nzeru, iye achita vimwevi ‘mosatonza’ panango ‘kukugumanirani vifukwa.’ Yahova afunalini kuti timbadziyimbe mulandu ndawa yokumbira malangizo yake. Chaivo nivakuti iye afuna kuti timbamukumbire nzeru.—Miy. 2:1-6.
12. Ko ni njira ziponi zomwe tingaziphatise basa kuti tigawane na anango vomwe tichadziwa?
12 Manje ko tani isepano? Ko tingatewedzere Yahova pa kugawana na anango vomwe tichadziwa? (Sal. 32:8) Wanthu wa Yahova ananjira zizinji zogawanirana na anango vomwe iwo achadziwa. Mwakulinganiza, isepano tipfunzisa ofalisa anyowani kuti ayambembo kulalikira. Akulu, modekha athandiza atumiki othandiza komasoti abale obatiziwa kuti apfunzire kusamalira maudindo yawo mumpingo. Ndipo wale omwe adziwa vomangamanga, athandiza kutherena omwe ana luso yochepa kuti athandize pa vomangamanga vomwe vithandiza pa basa ya Yahova.
13. Ko tingatewedzere tani Yahova pomwe tinkutherena anango?
13 Yesesani kutewedzera Yahova mukambatherena anango. Kumbukirani kuti Yahova ni wopasa pa kugawana na anango vomwe achadziwa. Mwanjira ibodzibodzi, isepano tichadekana kuuza anango vomwe tichadziwa. Tilekalini kuuza anango vomwe tichadziwa pakuganiza kuti munthu muyo angadzatenge udindo wathu. Ndipo tichadekanalini kuganiza pomwe kuti ‘palibe yemwe adanitherenako, aliyese apfunzire yekha.’ Palibe ntumiki wa Yahova yemwe achadekana kuganiza teneuyu. M’malo mwa vimwevi, tikhala okondwa osati ndawa yakuti tikundogawana na anzathu vomwe tichadziwa “koma ndawa yakuti tinkuchitira vose vomwe tingakwanise” wale omwe tinkuwatherena. (1 Ates. 2:8) Chidikhiro chathu ni chakuti “iwo apfunzire mpakana kufika pa kuyenerera kupfunzisambo anango.” (2 Tim. 2:1, 2) Tose tikakhala osaumira kupfunzisa anango vomwe tidziwa, tidzakhale kuti tinkukulisa khalidwe yopasa yomwe idzathandize kuti tose tikhale okondwa.
MUNTHU AKALEKA KUTEMBEJA VOMWE TACHITA
14. Ko wanthu azinji achita tani tikawachitira vinthu vabwino?
14 Tikakhala opasa makamaka kwa abale wathu, iwo kazinjikazinji adzatitembeje. Panango iwo angatitumizire kalata pakufuna kutitembeja panango angachite vimwevi mwanjira inango. (Akol. 3:15) Vimwevi vikachitika, tikhala okondwa maninge ndawa yakuti tidawachitira vinthu.
15. Ko tichadekana kukumbukira chani munthu munango akaleka kutembeja vomwe tamuchitira?
15 Koma tifunika kudziwa pomwe kuti ni nthawelini zose pomwe wanthu atembeja vomwe tachita. Nthawe zinango tingaone kuti munthu alibe kutembeja nthawe, mphanvu na vinthu vomwe tamupasa. Vimwevi vikachitika, ko tingachite tani kuti tipitirize kukhala okondwa? Kumbukirani mawu ya mulemba ya Machitidwe 20:35 pomwe pachokera msolo wankhani ino. Kukondwa kwathu kuthembalini kuti wanthu atitembeje pa vomwe tachita. Koma tingapitirize kuthandiza anango olo kuti iwo atembejalini pa vomwe tachita. Ko tingachite tani vimwevi? Onani njira zinango.
16. Ko tichadekana kutewedzera mbani pa nkhani yopasa?
16 Ikhani maganizo yanu pa kutewedzera Yahova. Yahova apereka vinthu vabwino kwa wanthu olo kuti iwo nthawe zinango atembejalini vimwevi. (Mat. 5:43-48) Yahova, adanena kuti: Tikachitira wanthu anango vinthu vabwino, “osadikhira kutambira kalikose,” mphoto yathu “idzakhale ikulu.” (Luka 6:35) Ndipomwapa, ayi kukhumudwa peno nthawe zinango wanthu atembejalini pa vomwe mwawachitira. Kumbukirani kuti Yahova adzakudaliseni na vinthu vabwino ndawa yothandiza anango komasoti ndawa yokhala munthu ‘wopereka mokondwa.’—Miy. 19:17; 2 Akor. 9:7.
17. Ko chifukwa chikulu chomwe chitichitisa kuthandiza anango ni chiponi? (Luka 14:12-14)
17 Chinthu chinango chomwe tingachite kuti titewedzere Yahova ni kukumbukira vomwe Yesu adanena pa lemba ya Luka 14:12-14. (Werengani.) Nkuphonyalini kuchemera wanthu anango kuti adzadye kumuyi kwanu, panango kuwonesa kukoma ntima kwa wanthu omwe tinkudziwa kuti iwo angachitembo vimwevi kwa isepano. Manje tani peno mwazindikira kuti munkuchita vimwevi kwa anango na chidikhiro chakuti iwo akuchitirenimbo? Peno viri teno, tingachite vomwe Yesu adanena. Isepano tingakhale opasa kwa munthu yemwe alibe chirichose chakuti angatichitirembo. Mwanjira mweyi tingakhale okondwa maninge ndawa yakuti tinkutewedzera Yahova. Kuona vinthu mwa njira mweyi kudzatithandize kukhala okondwa, tikachitira vithu wanthu anango koma ne kutitembeja.
18. Ko nchani chomwe chidzatithandize kuti tileke kumbaganizira vinthu voipa anango?
18 Ayi kumbaganizira voipa wanthu anango. (1 Akor. 13:7) Peno munthu alibe kutembeja pa vomwe mwachita, dzibvunzeni kuti: ‘Ko munthu moyu atembejalini panango wandoyebwa kunena kuti mwaphata basa?’ Vingachitike kuti pa na chifukwa chomwe chamuchitisa kuti iye achite vinthu vomwe isepano timbavidikhiralini. Wanthu anango atembeja maninge koma ashupika kufotokoza momwe ankubvera. Iwo angakhale na manyazi yotambira thandizo makamaka peno ntsiku za kumbuyo iwo ndiwo omwe ambathandiza anango. Ni vodekana kukumbukira kuti tikambaonesa kuti tiwakonda abale, tidzawaganizirelini vinthu voipa ndipo tidzapitirize kuthandiza anango mokondwa.—Aef. 4:2.
19-20. Ndawa chani tichadekana kukhala odekha tikachitira anango vinthu vabwino? (Onani pomwe foto.)
19 Khalani odekha. Pakunena va kukhala opasa, Mpfumu Solomo idanena kuti: ‘Thusa nkate wako pa madzi ndawa yakuti pakapita ntsiku zizinji udzaugumane pomwe.’ (Mla. 11:1) Mobverana na mawu mwaya, wanthu anango pakuyamba angaoneselini kutembeja koma angadzatembeje “pakapita nthawe.” Onani chitsanzo chinango chomwe chinkuonesa kuti ni vimweviretu vomwe vidachitikira mulongo munango.
20 Magole yazinji m’buyo umu, nkazi wa wonyang’anira dera munango adanembera kalata yolimbikisa mulongo munango yemwe wenze adandobatizika chamanjemanje, pa kumuuza kufunika kwa kupitiriza kukhala wokhulupirika kwa Yahova. Koma pomwe payadapita magole 8 iye adadawira pakumunemberambo kalata nkumuuza kuti: “Nafuna kukunemberani kalata ino pakufuna kukuuzani momwe mawu ya [mukalata yanu] yadanithandizira pa magole yose mwaya. Ne mungabveselini momwe kalata yanu idanithandizira. Makamaka lemba yomwe mudanemba ire idanifika pa ntima. Ndipo niyiyebwalini.”a Pomwe adafotokoza va mabvuto yomwe adagumana nayo, mulongo moyu adanena kuti: “Nthawe zinango nimbandofuna kusiya chonadi, maudindo . . . kundosiyiratu vose. Koma lemba yomwe mudanemba ire idasungika muntima mwangu ndipo idanithandiza kuti nileke kufoka. Kwa magole yose mwaya kalata mweire ndiyo yomwe yanithandiza kupirira.” Ganizirani momwe nkazi wa wonyang’anira dera moyu adakhalira wokondwa pomwe adatambira kalata mweyi patsogolo pakuti papita magole yazinji maninge. Mwanjira ibodzibodzi mweyi isepano tingatembejewe na munthu patsogolo pakuti papita nthawe ikulu maninge.
Panango munthu yemwe tamuthandiza angadzatitembeje pakapita nthawe ikulu maninge (Onani ndime 20)b
21. Ndawa chani tichadekana kupitiriza kutewedzera Yahova pa nkhani yopasa?
21 Ninge momwe taonera, Yahova adatilenga mu njira yapadera maninge. Iye adatilenga munjira yakuti timbakhale okondwa tikapasa anango vinthu kuposha pomwe tinkutambira. Ndipo tichabva bwino tikakwanisa kuthandiza abale wathu. Ndipo vikhala vabwino maninge iwo akatembeja pa vomwe tachita. Olo munthu akaleka kutembeja pa thandizo yomwe tamupasa, tidzapitirize kukhala okondwa ndawa yodziwa kuti tachita vinthu vodekana. ‘Yahova angakupaseni vinthu vizinji maninge kuposha vomwe imwepo mungapase anango.’ (2 Mbiri 25:9) Pa nkhani yopasa wanthu anango vinthu vabwino, palibe aposha Yahova. Palibe kukondwa komwe tingakulinganize na kukondwa komwe tingapasiwe na Yahova. Ndipomwapa, tichadekana kukhala otsimikiza nthawe zose kutewedzera Ababa wathu wa kudzulu Yahova.
NYMBO NA. 17 “Ndikufuna”
a Lemba yomwe mulongo adanemba pa kalata, yenze lemba ya 2 Yohani 8, yomwe inena kuti: ‘Khalani osamala kuti muleke kutaya vinthu vomwe tidakuthandizani kuti muvigumane na cholinga chakuti mudzatambire madaliso yose yomwe Mulungu wakukonzerani.’
b MAWU YOFOTOKOZERA MAFOTO: Pa mafoto mwaya, nkazi wa wonyang’anira dera ankulimbikisa mulongo munango pa kuphatisa basa kalata. Magole yazinji patsogolo pake iye ankutambira kalata yomutembeja.