NKHANI YOPFUNZIRA 17
NYIMBO NA. 99 Abale Ambirimbiri
Isepano tirilini tekha
‘Nidzakuthandize.’—YES. 41:10.
CHOLINGA
Kuona njira zinayi za momwe Yahova atithandizira.
1-2. (a) Ko ndawa chani tinganene kuti tikhalalini tekha tikakhala kuti tinkulimbana na mabvuto? (b) Ko tipfunzire chani mu nkhani mweino?
TIKAMBALIMBANA na mabvuto yakuluyakulu tingadzibve kuti tiri tekha, ndipo tingadzibve ninge tiri mu kamwadiya kang’ono pakati panyanja pomwe pankuchita chonzi. Koma chaivo ni vakuti tirilini tekha. Ababa wathu wachikondi Yahova awona mabvuto yathu. Sikuti iwo andowona mabvuto yathu koma atithandiza pomwe kulimbana nayo. Mwachikondi adatipolomisa kuti: ‘Nidzakuthandize.’—Yes. 41:10.
2 Mu nkhani mweino tione njira zinayi za momwe Yahova atisamalirira (1) iye atitsogolera, (2) atipasa vomwe tinkudekana, (3) atiteteza (4) atilimbikisa. Viribe basa mabvuto yomwe tingagumane nayo pa moyo wathu Yahova adapolomisa kuti adzatiyebwelini. Iye adzatisiyelini olo pang’ono ndipomwapa isepano tirilini tekha.
YAHOVA ATITSOGOLERA
3-4. Ko Yahova atitsogolera tani? (Salimo 48:14)
3 Werengani Salimo 48:14. Yahova ankudziwa kuti tingakwaniselini kudzitsogolera tekha ndipo tidekana malangizo yake. Ko iye atsogolera tani wanthu wake ntsiku zino? Njira ibodzi yomwe achitira vimwevi ni kuphatisa basa Baibolo. (Sal. 119:105) Iye aphatisa basa mawu yake kuti atipfunzise kusalula bwino vochita na kukulisa makhalidwe yomwe yangatithandize kukhala wokondwa manjeuno na kudzagumana moyo wosapera kutsogolo.a Mwakulinganiza, iye atipfunzisa kusasunga chakuntima, kukhala woona ntima na kukonda anango kuchokera pasi pa ntima. (Sal. 37:8; Aheb. 13:18; 1 Pet. 1:22) Tikachita vimwevi tidzakhale na banja yokondwa komasoti azishamwali wabwino.
4 Kuyingizira pamwapa, Yahova adabvuma kuti m’Baibolo munembewe nkhani za vochitika chaivo za wanthu womwe adagumanambo na mabvuto ninge isepano. (1 Akor. 10:13; Yak. 5:17) Kuwerenga nkhani mwezi na kuphatisa basa vomwe tawerenga ni vabwino kwa isepano pa vifukwa viwiri ivi: Chakuyamba, tidziwa kuti tirilini tekha, inde ndawa yakuti anangombo adagumana na mabvuto ninge yathu, koma adakwanisa kupirira na thandizo ya Yahova. (1 Pet. 5:9) Chachiwiri, tipfunzira kulimbana na mabvuto yathu.—Aro. 15:4.
5. Ko Yahova aphatisa basa mbani pa kutitsogolera?
5 Yahova aphatisa pomwe basa abale na alongo kuti atitsogolere.b Mwakulinganiza, onyang’anira madera nthawe zose azungira mipingo kuti atilimbikise. Nkhani zawo zilimbikisa chikhulupiriro chathu ndipo zitithandiza kupitiriza kukhala obvana. (Mac. 15:40–16:5) Akulu pomwe achita khama kuti alimbikise wofalisa aliyese kuti apitirize kukhala na chikhulupiriro cholimba. (1 Pet. 5:2, 3) Azibereki apfunzisa wana wawo kukonda Yahova, kuchita vosalula vabwino komasoti kukhala na vizolowezi vabwino. (Miy. 22:6) Alongo okhuma mwauzimu athandiza alongo wachitsikana pa kuwapasa chitsanzo chabwino, malangizo yabwino na kuwalimbikisa.—Tito 2:3-5.
6. Ko tingaonese tani kutembeja pa vose vomwe Yahova achita kuti atitsogolere?
6 Yahova achita mbali yake kuti atitsogolere. Ko tingaonese tani kuti titembeja vose vomwe iye achita kuti atitsogolere? Lemba ya Miyambo 3:5, 6 inena kuti: ‘Khulupirira Yahova na ntima wako wose, ndipo ayi kuthemba buya yako yodziwa vinthu.’ Tikachita vimwevi, ‘iye adzatsogolere njira zathu.’ Vimwevi vinkutanthauza kuti iye adzatithandize kupewa mabvuto yazinji na kukhala na moyo wokondwa. Ndise wokondwa maninge ndawa yakuti Yahova adziwa munthu aliyese payekha ndipo atipasa malangizo yachikondi.—Sal. 32:8.
YAHOVA ATIPASA VOMWE TINKUDEKANA
7. Ko Yahova atipasa tani vomwe tinkudekana? (Afilipi 4:19)
7 Werengani Afilipi 4:19. Kuingizira pa kutitsogolera, Yahova atipasa vomwe tinkudekana. Ko achita tani vimwevi? Iye adalisa khama yomwe tichita kuti tigumane chakudya, vovala komasoti pokhala. (Mat. 6:33; 2 Ates. 3:12) Ni vobveka kudera nkhawa vinthu vimwevi, koma Yahova atiuza kuti tidekanalini kuvidera nkhawa maninge. (Mat. 6:25) Iye adapolomisa kuti adzasiyelini atumiki wake wokhulupirika pomwe iwo ankufuna thandizo. (Mat. 6:8; Aheb. 13:5) Tingathembe na ntima wose polomisi ya Yahova yakuti adzasamalire vosowa vathu.
8. Ko Yahova adathandiza tani Davide?
8 Onani momwe Yahova adathandizira Davide. Davide adamala magole yazinji ankuthawa Mpfumu Sauli. Pa nthawe yoshupa mweyi Yahova adamupasa iye pabodzi na wanthu womwe enze naye vinthu vodekana kuti apitirize kukhala na moyo. Pakuganizira momwe Yahova adamusamalirira magole yose mwaya, Davide adanemba kuti: ‘Nenze mwana ndipo manje nakula, koma nikalibe kuwonako munthu aliyese wolugama wasiyiwa panango wana wake ankukumbira chakudya.’ (Sal. 37:25) Vingachitike kuti imwepo mudawona chikondi cha Yahova pomwe iye adakusamalirani imwepo panango abale anango pa nthawe yoshupa.
9. Pakachitika tsoka, ko Yahova atipasa tani vomwe tinkudekana? (Onani pomwe mafoto.)
9 Yahova atipasa pomwe vomwe tinkudekana pakachitika tsoka. Mwakulinganiza, pomwe ku Yerusalemu kudagwa njala ikulu maninge m’magole yoyambirira, Akhrisitu wa m’madera yazinji adatumizira Akhrisitu anzawo thandizo. (Mac. 11:27-30; Aro. 15:25, 26) Ntsiku zino wanthu wa Yahova awonesambo kupasa kumoku. Pakachitika tsoka Yahova aphatisa basa abale kuti apereke vinthu ninge madzi, vovala, chakudya, na mankhwala kwa wanthu omwe agwerewa na tsoka mweiyo. Abale wachimango athandiza kukonza pomwe nyumba za abale na nyumba za Ufumu zomwe zadzongeka. Kuingizira pamwapa, atumiki wa Yahova achebwalini kupereka thandizo yauzimu komasoti kulimbikisa wale womwe aluza wokondewa wawo.c
Ko Yahova atisamalira tani pakachitika tsoka? (Onani ndime 9)e
10-11. Ko mwapfunzira chani na vomwe vidachitikira Borys?
10 Yahova ni wopasa maninge mpakana asamalira vosowa va wale omwe amutumikiralini. Pakutewedzera chitsanzo chake, isepano tinyang’ana njira zomwe tingaonesere kukoma ntima kwa wale omwe ni abale wathulini. (Agal. 6:10) Vimwevi nthawe zizinji vipereka umboni wabwino pa dzina ya Yahova. Onani vomwe vidachitikira Borys, diretori wa shikola inango ku Ucrânia. Olo kuti wenzelini wa Mboni za Yahova, iye nthawe zose ambalemekeza aluno omwe enze wa Mboni za Yahova, ndipo ambalemekeza pomwe vomwe iwo achakhulupirira. Pomwe Borys adasalula kuthawa ku dera komwe kumbachitika nkhondo nkuyenda ku dera inango komwe kwenze kotetezeka, abale na alongo wathu adamuthandiza. Patsogolo pake iye adagumanika pa mwambo wokumbukira impfa ya Yesu. Pakukumbukira vose vomwe abale na alongo adamuchitira, Borys adanena kuti: “Wa Mboni za Yahova adakhala tcheru maninge ndipo adanisamalira. Inepano ninkudekana kuwatembeja iwo.”
11 Isepano tingatewedzere kukoma ntima kwa Yahova tikambaonesa chikondi kwa wanthu ose, kuphatanidzapo wale omwe atumikiralini Yahova. (Luka 6:31, 36) Tinkufuna maninge kuti khalidwe yathu ya chikondi ithandize wanthu kufenderera Yahova. (1 Pet. 2:12) Olo kuti vimwevi vileke kuchitika, isepano tidzakhale okondwa kuthandiza anango ndawa yakuti kupasa kutichitisa kukhala okondwa maninge.—Mac. 20:35.
YAHOVA ATITETEZA
12. Ko ni thandizo iponi yomwe Yahova apolomisa kupasa wanthu wake ninge gulu? (Salimo 91:1, 2, 14)
12 Werengani Salimo 91:1, 2, 14. Ntsiku zino Yahova apolomisa kuteteza wanthu wake mwauzimu panango kuti iye awathandiza kuti apitirize kukhala pa ushamwali wolimba maninge na iye. Yahova adzabvumelini kuti Satana amalise kupemphera chaiko. (Yoh. 17:15) Tingatsimikize pomwe na ntima wose kuti pa nthawe ya “chisautso chikulu”, Yahova adzakwanirise polomisi yake yoteteza wanthu wake osati mwauzimu basi komasoti mwakuthupi.—Chiv. 7:9, 14.
13. Ko Yahova ateteza tani ntumiki wake aliyese payekha?
13 Ko Yahova ateteza tani ntumiki wake aliyese payekha? Pakuphatisa basa Baibolo, Yahova atithandiza kubvesa kusiyanisa pakati pa chabwino na choipa. (Aheb. 5:14) Tikambaphatisa basa mpfundo za m’Baibolo tikhala wotetezeka mwauzimu komasoti mwakuthupi. (Sal. 91:4) Yahova atiteteza pomwe pophatisa basa mpingo. (Yes. 32:1, 2) Abale wathu akonda Yahova ndipo achita vinthu mobverana na mpfundo zake. Tikakhala kuti tili nawo pabodzi atilimbikisa ndipo atipasa mphanvu zomwe tinkudekana kuti tikwanise kulimbana na vizolowezi voipa.—Miy. 13:20.
14. (a) Ko ndawa chani Yahova abvuma kuti atumiki wake abonere? (b) Ko lemba ya Salimo 9:10 itipasa chitsimikizo chiponi? (Onani pomwe mawu ya m’nyantsi.)
14 Ni shuwadi kuti nthawe ya kumbuyo Yahova adateteza atumiki wake anango mwakuthupi. Koma azinji adabonera, kufa ndawa ya vochitika vosiyanasiyana. Ntsiku zinombo aliyese wa isepano angabonere na ‘vinthu vosadikhirika.’ (Mla. 9:11) Kuingizira pamwapa, atumiki anango wa Yahova wakalekale adalimbana na chidzudzo mpakana kuphewa. Vimwevi vingatichitikerembo isepano. Ntsiku zino Yahova abvuma kuti vimwevi vichitike kuti aonese kuti Satana ni wabodza. (Yobu 2:4-6; Mat. 23:34) Panango Yahova angatitetezelini ku mabvuto yathu yose koma Baibolo ititsimikizira kuti iye adzasiyelini wale omwe amukonda.d—Sal. 9:10.
YAHOVA ATILIMBIKISA
15. Ko Yahova, atilimbikisa tani pakuphatisa basa pemphero, Mawu yake komasoti misonkhano? (2 Akorinto 1:3, 4)
15 Werengani 2 Akorinto 1:3, 4. Nthawe zinango tingakhale okhumudwa ndawa yoluza munthu yemwe timukonda. Vingachitike kuti manjeuno imwepo munkulimbana na bvuto yomwe ikuchitisani kudzibva kuti muli mwekha. Ko pana munthu yemwe angabvese momwe imwepo munkubvera? Yahova abvesa. Iye sikuti andodziwa chabe va mabvuto yathu, koma “atinyamalisa pabvuto iriyose.” Ko iye achita tani vimwevi? Tikambapemphera kwa Yahova na kugwigwirira kuti atithandize, iye atipasa “ntendere wa Mulungu womwe wanthu angakwaniselini kuubvesa.” (Afil. 4:6, 7) Ndipo tilimbikisiwa pomwe tikambawerenga vomwe iye ankutiuza m’Baibolo. Baibolo iwonesa momwe Yahova atikondera, itipfunzisa kuona momwe tingakhalire wa nzeru ndipo itipasa chidikhiro chotsimikizirika. Komasoti misonkhano itilimbikisa pomwe ndawa yakuti tingabve chikondi cha abale na alongo na kulimbikisiwa na vomwe tapfunzira m’Baibolo.
16. Ko chitsanzo cha Nathan na Priscilla chinkutipfunzisa chani?
16 Onani vomwe vidachitikira Nathan na Priscilla, omwe akhala ku Estados Unidos. Chitsanzo chawo ni chitsimikizo chakuti Yahova atilimbikisa pakuphatisa basa Baibolo. Magole yanganani kumbuyo uku, iwo adasalula kuti ayende ku dera inango komwe kumbafunika ofalisa azinji. Nathan adanena kuti: “Isepano tenze otsimikiza kuti Yahova adalise khama yathu.” Koma kanthawe pang’ono pomwe iwo adandofika ku utumiki wawo unyowani, adayamba kugumana na bvuto ya thanzi na yosowa kobiri. Kuyenda kwa nthawe iwo adabwerera kumuyi. Koma podiya kuti adabwerera, bvuto yosowa kobiri idapitiriza. Pa kukumbukira vomwe vidachitika Nathan adanena kuti: “Yahova alibe kutidalisa munjira yomwe timbadikhira. Nimbadzibvunza kuti ko ndawa chani? Ko nachita vinthu vophonyeka?” Koma kuyenda kwa nthawe iwo adazindikira kuti Yahova wenze alibe kuwasiya pomwe iwo ambadekana thandizo. Iwo adanena kuti: “Pa nthawe yoshupa mweire Baibolo yenze ninge shamwali wabwino, yemwe ambatipasa malangizo ya nzeru komasoti kutilimbikisa. M’malo mwakuti timbandokumbukira mabvuto yomwe timbagumana nayo, tidayamba kumbaganizira momwe Yahova ambatithandizira. Vimwevi vidatithandiza kutsimikiza kuti Yahova adzapitirize kutithandiza ku mabvuto yomwe tingadzagumane nayo kutsogolo.”
17. Ko Yahova adalimbikisa tani Helga? (Onani pomwe foto.)
17 Yahova aphatisa pomwe basa abale na alongo kuti atilimbikise. Onani chitsanzo cha Helga, yemwe akhala ku Hungria. Kwa magole yazinji, iye adalimbana na bvuto yomwe imbamudesa nkhawa, ndipo ambadzibva kuti ni wosafunika. Koma akambaganizira va kumbuyo, iye akwanisa kuona momwe Yahova adamuthandizira pakuphatisa basa abale na alongo. Iye adanena kuti: “Nimbadekana kuphata basa, kusamalira mwana wangu yemwe ambadwala na kulimbana na mabvuto yanango yazinji. Nikakhala kuti niriberetu mphanvu, nthawe zose Yahova ambanithandiza. Pa magole 30 yapita aya palibe ne ntsiku ibodzi pomwe Yahova alibe kukwanirisa polomisi yake yakuti adzanilimbikise. Nthawe zizinji, iye achita vimwevi pakuphatisa basa mawu yachikondi na yolimbikisa yochokera kwa abale na alongo. Pa nthawe yomwe nimbafunika maninge thandizo, nthawe zose nimbatambira mesaje, kalata panango chilimbikiso.”
Ko Yahova angakuphatiseni tani basa kuti mulimbikise anango? (Onani ndime 17)
18. Ko tingalimbikise tani anango?
18 Kulimbikisa anango, ni njira ibodzi yomwe tingatewedzerere Mulungu. Ndipo kuchita vimwevi ni mwayi ukulu maninge kwa isepano. Manje ko tingavichite tani vimwevi? Pa kuwabvesera modekha, kuyankhula molimbikisa na kupereka thandizo yomwe ankudekana. (Miy. 3:27) Isepano, tichita khama kuti tilimbikise wale omwe ankubonera kuphatanidzapo wale omwe akalibe kuyamba kutumikira Mulungu. Wanthu omwe tikhala nawo pafupi akaferewa, kudwala panango kukwinyirira, isepano tiyenda kukawaona, nkuwabvesera mwatcheru na kuwauza malemba ya m’Baibolo yomwe ni yolimbikisa. Tikambatewedzera Yahova ‘Mulungu yemwe atilimbikisa,’ tigumana maphindu yabwino maninge. Tingathandize abale wathu kupirira, komasoti kufewesa ntima wa wanthu omwe atumikiralini Yahova, vomwe vingachitise kuti akhale na chidwi chofuna kupfunzira chonadi.—Mat. 5:16.
YAHOVA NTHAWE ZOSE AKHALA KU MBALI YATHU
19. Ko Yahova atisamalira tani ndipo tingamutewedzere tani?
19 Yahova adera nkhawa maninge wanthu ose omwe amukonda. Iye atisiyalini tikakhala kuti tinkulimbana na mabvuto. Yahova atisamalira ninge momwe baba wachikondi angasamalirire mwana wake. Iye atitsogolera, atipasa vomwe tinkudekana, atiteteza komasoti kutilimbikisa. Tingatewedzere Ababa wathu wachikondi, pa kuthandiza na kulimbikisa wale omwe ankugumana na mabvuto. Ni shuwadi kuti ntsiku zomalizira zino tigumana na mabvuto, koma tingatsimikize kuti Yahova ali kumbali yathu. Inde ndawa adapolomisa kuti: ‘Ayi kuchita mantha ndawa nilinawe.’ (Yes. 41:10) Ndipomwapa, tinkutsimikiza na ntima wose kuti isepano tirilini tekha.
NYIMB NA. 100 Alandireni Bwino
a Onani nkhani yakuti “Zosankha Zanu Zizilemekeza Mulungu” mu Nsanja ya Olonda ya 15 Abril, 2011.
b Onani ndime 11-14 mu nkhani yakuti “Timbabvere Yahova pabodzi na gulu yake” mu Ntsanja ya olonda ya Fevereiro 2024.
c Mungakwanise kuona vitsanzo va manjemanjepa, pa kunemba mawu yakuti ‘ngozi zadzidzidzi’ pa malo yofufudzira pa saiti ya jw.org.
d Onani nkhani yakuti “Mafunso Ochokera kwa Owerenga” mu Nsanja ya Olonda ya Fevereiro 2017.
e MAWU YOFOTOKOZERA FOTO: Abale ku Malawi, ankutambira thandizo yakuthupi, yauzimu na vinthu vinango vodekana patsogolo pakuti pachitika tsoka ya nchilengedwe.