NKHANI YOPFUNZIRA 4
NYIMBO NA. 18 Tikuthokoza Chifukwa cha Dipo
Ko dipo itipfunzisa chani?
“Vomwe Mulungu adachita pakutiwonesa chikondi chake.” —1 YOH. 4:9.
CHOLINGA
Kuona vomwe dipo itipfunzisa vokhudza makhalidwe yabwino yomwe Yahova na Yesu ayaonesa.
1. Ko ndawa chani ni vodekana kwa isepano kugumanika pa chakudya cha maulo cha Ambuya gole iriyose?
MOSAKAIKA imwepo mutsimikizira kuti dipo ni mphaso ya padzulu maninge! (2 Akor. 9:15) Ndawa ya ntsembe yomwe Yesu adapereka, isepano tingakhale pa ushamwali wolimba na Yahova. Kuingizira pamwapa, dipo idafungula msuwo wakuti tikhale na mwayi wa moyo wosapera. Tina vifukwa vizinji vowonesera kutembeja ndawa ya chikondi chomwe Yahova adationesa pa kupereka mwana wake wokondewa! (Aro. 5:8) Pakufuna kutithandiza kuti tipitirize kukhala otembeja komasoti kuti tisayebwe va dipo, Yesu adakumbira kuti gole iriyose timbakumbukire va ntsembe yomwe iye adapereka.—Luka 22:19, 20.
2. Ko tikambirane chani mu nkhani mweyino?
2 Gole ino, Chikumbuso chidzachitike pa Satade 12 Abril 2025. Mosakaika tose tinkukonzekera kuti tidzagumanike. Tingadzaphindule maninge pa nthawe mweyi pakuganiziraa vomwe Yahova na Mwana wake adatichitira. Mu nkhani mweino, tipfunzire vomwe ntsembe itipfunzisa pa nkhani ya Yahova na mwana wake. Mu nkhani inkubwera, tidzabvese kuti ndawa chani dipo ni yodekana kwa isepano ndipo tingaonese tani kuti tinkutembeja.
KO DIPO ITIPFUNZISA CHANI VA YAHOVA?
3. Ko vingakwanisike tani kuti ntsembe ya munthu m’bodzi ipulumuse wanthu mamidyau yazinji? (Onani pomwe foto.)
3 Dipo, itipfunzisa vizinji va chilungamo cha Yahova. (Deut. 32:4) Ndawa chani? Ganizirani ivi: Ndawa yosabvera kwa Adamu, tidatengera uchimo womwe uchitisa kuti timbafe. (Aro. 5:12) Kuti atimasule ku vimwevi, Yahova adapereka mwana wake kuti adzatifere. Manje vingakwanisike tani kuti ntsembe ya munthu m’bodzi waungwiro ipulumuse mamidyau yazinji ya wanthu? Ntumi Paulo, adafotokoza kuti: “Pakuti kuleka kubvera kwa munthu m’bodzi muyo [Adamu] kudachitisa kuti azinji akhale wochimwa, kubvera kwa munthu m’bodzi moyu [Yesu] kudzachitise pomwe kuti wanthu azinji akhale wolungama.” (Aro. 5:19; 1 Tim. 2:6) Mwa mawu yanango, ndawa yosabvera kwa munthu m’bodzi isepano tidakhala akapolo wauchimo na impfa. Nichibodzibodzi, ndawa yobvera kwa munthu m’bodzi isepano tingapulumusiwe.
Ndawa ya munthu m’bodzi Adamu tose tidatengera uchimo ndipo tichafa. Mwanjira ibodzibodzi mweyo ndawa ya munthu m’bodzi Yesu tose tingamasuliwe ku uchimo na impfa (Onani ndime 3)
4. Ko ndawa chani Yahova alibe kundosiya kuti wana obvera wa Adamu akhale na moyo mpakana kalekale?
4 Ko Yesu ambadekanadi kufa kuti atipulumuse? Ko ndawa chani Yahova alibe kundosiya kuti wana obvera wa Adamu andokhale na moyo mpakana kalekale? Panango tingaganize kuti imweyi yenze njira yabwino yomalisira bvuto mweyi. Koma vimwevi vidakaonesalini chilungamo chaungwiro wake. Yahova ni wachilungamo, iye adakandosiyalini kuti chimo ya Adamu ikhale tene.
5. Ko ndawa chani nthawe zose tingatsimikizire kuti Yahova adzachite chilungamo?
5 Ko chidakachitika ni chani sembe Yahova alibe kukonza vakuti paperekewe dipo? Ko tani sembe iye alibe kuphatisira basa chilungamo nkundosiya kuti wana wa Adamu akhale na moyo mpakana kalekale? Sembe adachita vimwevi kuyenda kwa nthawe wanthu adakayamba kukaikira va chilungamo cha Yahova pa vinthu vinango. Mwakulinganiza, anango panango adakayamba kukumbuka kuti ko Yahova adzakwanirisedi mapolomisi yake yose? Koma chokomedza ni chakuti isepano tideralini nkhawa vimwevi. Ndawa yakuti Yahova adaonesa chilungamo na kupereka mwana wake kuti adzatifere, umoyu ni umboni wakuti nthawe zose adzachite vabwino.
6. Ko dipo iwonesa tani kuti Yahova atikonda? (1 Yohani 4:9, 10)
6 Dipo itithandiza kubvesa kuti Yahova ni wachilungamo ndipo itithandiza pomwe kubvesa kuti iye atikonda maninge. (Yoh. 3:16; werengani 1 Yohani 4:9, 10.) Dipo, itipfunzisa kuti Yahova ankufuna kuti tikhale na moyo mpakana kalekale. Kuposha vose, tichita mbali ya banja yake. Ganizirani ivi: Pomwe Adamu adachimwa, iye adakachitalini pomwe mbali ya banja ya Yahova. Ndipomwapa, tose tikandobadwa tichitalini mbali ya banja ya Yahova. Koma ndawa ya dipo, wanthu ose omwe ana chikhulupiriro ndipo ni obvera, ntsiku inango angadzachite mbali ya banja ya Yahova. Olo manjeuno, Yahova angatikhululukire machimo yathu. Ndipo tingakwanise kukhala naye pa ushamwali wolimba komasoti kukhala pa ushamwali na abale na alongo. Tichadekanalini kukaikira kuti Yahova atikonda maninge.—Aro. 5:10, 11.
7. Ko ndawa chani kubonera kwa Yesu kutithandiza kubvesa kuti Yahova atikonda?
7 Tingabvese momwe Yahova atikondera tikambaganizira momwe iye adabonerera kuti apereke dipo. Satana, adanena kuti palibe ntumiki wa Yahova yemwe adzapitirize kukhala wokhulupirika, peno iye ankugumana na vinthu voshupa. Kuti aonese kuti imweyi ni bodza, Yahova adabvuma kuti Mwana wake afe komasoti kuti ayambe wabonera akalibe kupereka moyo wake. (Yobu 2:1-5; 1 Pet. 2:21) Yahova adaona wanthu ankunyoza Mwana wake komasoti ankumumenya. Iye adaona pomwe Yesu adakhomererewa pa muti ndipo ambaona kubonera kwa Yesu mpakana impfa yake. (Mat. 27:28-31, 39) Yahova wenze na mphanvu zakuti adakamalisa vimwevi mwakankulumize. Mwakulinganiza, pomwe wanthu adanena kuti: “Peno Mulungu uyo ankumufunadi amupulumuse,” Yahova adakachitiratu chinthu pampaleretu. (Mat. 27:42, 43) Koma sembe kuti Yahova adachita vimwevi, dipo idakaperekewalini. Ndipo isepano tidakapitiriza kukhala tiribe chidikhiro. Ndipomwapa, Yahova adabvuma kuti Mwana wake abonere mpakana kufa.
8. Ko tinkudziwa tani kuti venze voshupa kwa Yahova kuona mwana wake ankubonera? (Onani pomwe fofo.)
8 Tichadekanalini kuganiza kuti Yahova alibe ntsisi ndawa yakuti ni wamphanvu yose. Iye adatilenga munjira yakuti timbakhudziwe na vinthu. Ndipo ndawa yakuti Baibolo inena kuti tidalengewa muchifaniziro chake, vinkuonesa kuti iyembo akhudziwa. Baibolo ifotokoza momwe Yahova akhalira ‘wokhumudwa’ na kubva ‘ntsisi.’ (Sal. 78:40, 41) Ganizirani pomwe chochitika cha Abulahamu na Isaki. Yahova adakumbira kuti Abulahamu apereke mwana wake m’bodzi yekha ninge ntsembe. (Gen. 22:9-12; Aheb. 11:17-19) Ganizirani momwe Abulahamu angabvera pomwe ambakonzekera kupha mwana wake. Panango iye adakachita vimwevi mwakankulumize kuti mwana wake aleke kubva kuwawa. Yahova adawawiwa maninge pomwe angaona Mwana wake ankudzudziwa mwakhanza, ankubonera mpakana kufa pang’onopang’ono. Onani vidiyo yakuti: Tewedzerani chikhulupiriro chawo—Abulahamu, Mbali 2 pa saiti ya jw.org.
Venze voshupa maninge kwa Yahova kuona mwana wake ankubonera (Onani ndime 8)
9. Ko tapfunzira chani pa Aroma 8:32, 38, 39 va chikondi cha Yahova?
9 Dipo, itipfunzisa kuti palibe yemwe atikonda maninge kuposha Yahova. Olo wanthu wa m’banja mwathu panango azishamwali wathu omwe tiwakonda maninge. (Werengani Aroma 8:32, 38, 39.) Tina chitsimikizo chakuti chikondi chomwe Yahova anacho kwa isepano nichikulu maninge kuposha momwe tidzikondera tekha. Ko imwepo munkufuna kukhala na moyo mpakana kalekale? Yahova ndiye yemwe ankufuna maninge kuti vimwevi vichitike. Ko munkufuna kuti machimo yanu yakhululukiriwe? Yahova ndiye ankufuna maninge kuti vimwevi vichitike. Koma chinthu chibodzi chomwe iye akumbira ni chakuti tionese kutembeja dipo, kukhala na chikhulupiriro komasoti kukhala obvera. Dipo, nimphaso yapadera maninge yomwe ionesa kuti Yahova atikonda maninge. Mu dziko inyowani, tidzapfunzire maninge va chikondi cha Yahova kwa isepano.—Mla. 3:11.
VOMWE DIPO ITIPFUNZISA VOKHUDZA YESU
10. (a) Ko chidamudesa nkhawa maninge Yesu pa impfa yake ni chani? (b) Ko Yesu adaonesa tani kuti Satana ni wabodza? (Onani pomwe bokosi yakuti: “Kukhulupirika kwa Yesu, kudaonesa kuti Satana ni wabodza.”)
10 Yesu adera nkhawa maninge momwe wanthu aganizira va Ababa wake. (Yoh. 14:31) Wakhala pang’ono kufa, Yesu adaimbiwa mulandu wakuti wanyoza Mulungu komasoti ni munthu woipa. Iye adakwinyirira maninge pakuganiza kuti vochitika vimwevi vingachitise kuti wanthu ambaganizire vinthu voipa Ababa wake. Ndipomwapa, iye adapemphera kuti: “Ababa wangu, peno ni vokwanisika bvumani kuti khapu mweyi inipitirire.” (Mat. 26:39) Yesu, adapitiriza kukhala wokhulupirika mpakana kufa kwake. Ndawa ya vimwevi iye adakwanisa kuwonesa kuti Satana ni wabodza.
11. Ko Yesu adaonesa tani chikondi chomwe wenze nacho kwa wanthu? (Yoh. 13:1)
11 Dipo, itipfunzisa pomwe kuti Yesu adera nkhawa maninge wanthu makamaka opfunzira wake. (Miy. 8:31; werengani Yohani 13:1.) Mwakulinganiza, Yesu ambadziwa kuti adzagumane na vinthu vizinji voshupa pano padziko yapasi kuphatanidzapo impfa yowawa. Koma iye ambaonalini kuti vomwe ambadekana kuchita pano padziko yapasi ninge ndandanda ya basa yomwe Yahova wenze adamupasa. Mosiyana na vimwevi iye adadzipereka na ntima wose kuti alalikire wanthu, awapfunzise na kuwathandiza. Mpakana pa ntsiku ya impfa yake iye adapatula nthawe yosambisa mapazi ya atumi wake, kuwapasa malangizo na chilimbikiso chomwe iwo ambadekana. (Yoh. 13:12-15) Olo pomwe wenze pa muti wodzudzikirapo iye alibe kunyalanyaza chigananga chomwe chenze pa mbali pake komasoti na kukumbira Yohani kuti asamalire amayi wake. (Luka 23:42, 43; Yoh. 19:26, 27) Vinkuchita kuonekeratu kuti Yesu adaonesa chikondi chake chochokera pasi pa ntima osati ndawa yondopereka moyo wake koma pa chirichose chomwe iye adachita ali pano padziko yapasi.
12. Ko Yesu ankupitiriza tani kutiperekera ntsembe?
12 Ni shuwadi kuti Yesu “adafa kuti achose uchimo kabodzi kokha.” Koma iye ankupitiriza kutiperekera ntsembe. (Aro. 6:10) Mwanjira yanyi? Iye ankupitiriza kuphata basa kuti atipase vinthu vose vabwino vomwe manjeuno ni vokwanisika ndawa ya dipo. Iye ni wopanikizika kuphata basa ninge Mpfumu yathu, Nkulu wa ntsembe komasoti nsolo wampingo. (1 Akor. 15:25; Aef. 5:23; Aheb. 2:17) Iye ana udindo wounganidza odzodzewa na wankhosa zinango. Imweyi ni basa yomwe idzamale chisautso chikulu chikanati chamala.b (Mat. 25:32; Maliko 13:27) Iye ankupitiriza kuphatisa basa kapolo wokhulupirika na wanzeru kuti atipase chakudya chodekana kuti tipitirize kukhala okhulupirika kwa Yahova ntsiku zomalizira zino. (Mat. 24:45) Akadzatitonga kwa magole 1000 adzapitirize kukhala ku mbali yathu ndawa yakuti Yahova adapereka mwana wake kwa isepano.
PITIRIZANI KUPFUNZIRA VINTHU VINYOWANI
13. Ko nchani chomwe chingakuthandizeni kupitiriza kupfunzira va chikondi cha Yahova na Yesu?
13 Ni vokwanisika kupfunzira va chikondi chomwe Yahova na Yesu anacho kwa isepno, tikambaganizira vose vomwe iwo achita mpakana manjeuno. Gole ino pa sondo zoyambirira tikanati kuchita chikumbuso, imwepo mungawerenge mwatcheru ibodzi panango yazinji mwa mabukhu ya ntontholo wabwino. Koma ayi kuti mumbawerenge misolo yazinji pa nthawe ibodzi. Ndipo ayi kuthamanga, yesesani kuti muone vifukwa vinyowani vomwe vingakuchitiseni kuti mukonde maninge Yahova na Yesu. Ayi kuyebwa kuuza anango vomwe mwavigumana.
14. Mobverana na Salimo 119:97 na mawu ya m’nyantsi, ko kufufudza kungatithandize tani kupitiriza kupfunzira va dipo na vinthu vinango? (Onani pomwe fofo.)
14 Peno mudabatizika kalekale, panango mungaganize kuti pana vinthu vizinji vomwe mungadekane kupfunzira vokhudza chilungamo cha Yahova, chikondi chake komasoti dipo. Koma chaivo nivakuti nthawe zose tina vinthu vinyowani vomwe tichadekana kupfunzira pa nkhani mweyi. Manje ko muchadekana kuchita chani? Phatisirani basa mokwana vofalisa vathu. Peno mwawerenga chinthu chinango m’Baibolo chomwe mulibe kuchibvesa, fufudzani. Ndipo ntsiku yose ganizirani vomwe mwapfunzira va Yahova, Mwana wake komasoti chikondi chake kwa imwepo.—Werengani Salimo 119:97 mawu ya m’nyantsi.
Olo kuti tiri nchonadi kwa magole yazinji, tingapitirize kuyingizira kutembeja kwathu ndawa ya dipo (Onani ndime 14)
15. Ndawa chani ni vodekana kupitiriza kupfunzira vinthu vinyowani va m’Baibolo?
15 Ayi kukhumudwa peno mulibe kugumana vinthu vinyowani panango vokomedza pomwe mungawerenga Baibolo panango pomwe mungafufudza. Mwanjira inango imwepo mungalingane na munthu yemwe ankufaga ouro. Nthawe zizinji munthu yemwe ankufaga ouro adekana kumala nthawe zizinji panango ntsiku kuti agumane kapitsi kang’onong’ono ka ouro. Olo viri teno iye afokalini. Ndawa kwa iye ka ouro kang’onong’ono ni kodekana maninge. Kumbali yathu chonandi chomwe tichigumana m’Baibolo ni chodekana maninge kuposha ouro. (Sal. 119:127; Miy. 8:10) Khalani odekha, ayi kufoka pomwe munkunyang’ana vinthu vinyowani m’Baibolo.—Sal. 1:2.
16. Ko tingatewedzere tani Yahova na Yesu?
16 Pomwe munkupfunzira, ganizirani momwe mungaphatisire basa pa moyo wanu vomwe mwapfunzira. Mwakulinganiza, tewedzerani chilungamo cha Yahova pa kuleka kuchitira munthu aliyese tsankho. Mungatewedzere pomwe chikondi cha Yesu kwa Ababa wake na wanthu anango. Njira ibodzi yochitira vimwevi ni kuchita vomwe Yahova afuna, na kuthandiza anango olo kuti nthawe zinango vimwevi vingachitise kuti moyo wanu ukhale woshupa. Njira inango ni kulalikira wanthu anango kuti iwombo akhale na mwayi wobvuma mphaso yapadera mweyi yochokera kwa Yahova.
17. Ko tidzaone chani mu nkhani inkubwera?
17 Pomwe tinkupfunzira vinthu vizinji vokhudza dipo, na kuona kuti ni yodekana maninge, chikondi chathu kwa Yahova na Yesu Khrisitu chidzayingizirike maninge. Ndipo vomwe vidzachitike ni vakuti Yahova na Yesu adzatikonde maninge. (Yoh. 14:21; Yak. 4:8) Ndipomwapa, tinkufuna kuphatisa basa bwino makonzedwe ya Yahova na kupitiriza kupfunzira va dipo. Mu nkhani inkubwera tidzaone madaliso yanango yomwe tidzatambire ndawa ya dipo na momwe tingaonesere kutembeja kwathu ndawa ya chikondi cha Yahova.
NYIMBO NA. 107 Tizitsanzira Chikondi cha Mulungu
a DZIWANI VIZINJI: “Kuganizira,” kutanthauza kuikha maganizo yanu pa chinthu na kupfunzira vinthu vizinji kuti muchibvese bwino.
b Pa Aefeso 1:10, Paulo adafotokoza va ‘kuunganidza vinthu kudzulu.’ Pa Mateyu 24:31 na Maliko 13:27 Yesu adafotokoza va kuunganidza “wosaluliwa.” Paulo na Yesu, ambanena vinthu vosiyana. Paulo ambafotokoza va pomwe Yahova asalula wale omwe akalamulire na Yesu nkuwadzodza na mzimu uchena. Koma Yesu ambafotokoza va nthawe yomwe odzodzewa omwe adakali pano padziko yapasi adzaunganidziwe kudzulu pa nthawe ya chisautso chikulu.