‘Salulani yemwe munkufuna kumutumikira’

1. Kuti tikhale okondwa chaivo, ko tichadekana kuchita chani ndipo ndawa chani? (Yesaya 48:17, 18)

ABABA wathu wakudzulu Yahova atikonda maninge. Iye ankufuna kuti tikhale na moyo wabwino manjeuno komasoti ntsogolo. (Mla. 3:12, 13) Yahova adatilenga na maluso yodabwisa maninge. Koma alibe kutipasa luso yakuti timbadzitonge tekha panango yosalula tekha chinthu chabwino panango choipa. (Mla. 8:9; Yer. 10:23) Iye adziwa kuti, kuti tikhale okondwa chaivo, tichadekana kumutumikira na kutewedza vomwe iye anena.—Werengani Yesaya 48:17, 18.

2. Ko Satana ankufuna kuti isepano tikhulupirire chani, ndipo ko Yahova ankuchita chani kuti vimwevi visakwanisike?

² Satana, ankufuna kuti isepano timbakhulupirire kuti tingakhale okondwa tiribe Yahova komasoti kuti wanthu angambadzitonge okha bwinobwino. (Gen. 3:4, 5) Pakufuna kuonesa kuti Satana ni wabodza, Yahova ankubvuma kuti wanthu adzitonge okha kwa kanthawe pang’ono. Tikambaona vinthu voipa vomwe vinkuchitika mu dziko iyi, vitichitisa kuti tikwanise kuona bwinobwino kuti tingakwaniselini kudzitonga tekha. Koma Baibolo inena va wanthu azinji maninge amuna komasoti akazi omwe adakhala okondwa maninge ndawa yosalula kutumikira Yahova. Chibodzi mwa chitsanzo chabwino maninge pa wanthu wose mwawa ni Yesu. Mu nkhani mweyino, tione kuti ndawa chani Yesu adasalula kutumikira Yahova? Komasoti tione kuti ko ndawa chani Yahova ni woyenerera kutumikiriwa? Pakumalizira pake, tikumbukire vifukwa vomwe vidatichitisa kusalula kutumikira Yahova.

KO NDAWA CHANI YESU ADASALULA KUTUMIKIRA YAHOVA?

3. Ko Satana adapasa chani Yesu, ndipo Yesu adasalula kuchita chani?

³ Pomwe Yesu wenze pano padziko yapasi, iye ambadekana kusalula yemwe angamutumikire. Kanthawe pang’ono Yesu wandobatiziwa, Satana adamuonesa maufumu yose ya padziko yapasi. Nkumuuza kuti: Angamupase maufumu yose akandomugwadirako kabodzi basi. Koma Yesu adamudawira kuti: “Choka Satana! Ndawa Malemba yanena kuti: ‘Yahova Mulungu wako ndiye yemwe ufunika kumupempherera ndipo ufunika kutumikira iye yekha.’” (Mat. 4:8-10) Ko ndawa chani Yesu adasalula kuchita vimwevi? Naboni tione vifukwa vinango.

4-5. Ko ni vifukwa vinango viponi vomwe vidachitisa Yesu kusalula kutumikira Yahova?

⁴ Chifukwa chikulu chomwe chidachitisa Yesu kusalula kutumikira Yahova, ni chikondi. Chikondi chikulu komasoti chochokera pasi pa ntima chomwe anacho na Ababa wake. (Yoh. 14:31) Kuyingizira mwapa, Yesu atumikira Yahova ndawa yakuti ni chinthu chodekana maninge kuchichita. (Yoh. 8:28, 29; Chiv. 4:11) Iye adziwa kuti Yahova ni phata ya moyo. Ni wothembeka komasoti ni wopasa. (Sal. 33:4; 36:9; Yak. 1:17) Nthawe zose Yahova ambamuuza chonadi Yesu, komasoti vose vomwe Yesu wenze navo vimbachokera kwa Yahova. (Yoh. 1:14) Pomwe Satana, ni wosiyana maninge na Yahova. Ndiye yemwe adayambisa uchimo na impfa. Iye ni wabodza. Ndipo vose vomwe achita avichita ndawa yadyera nakudzikonda. (Yoh. 8:44) Yesu, ambawadziwa wose awiri mwawa, Satana komasoti Yahova. Ndipomwapa, Yesu alibe kuganizako vokhala ninge Satana nkupandukira Yahova.—Afil. 2:5-8.

⁵ Chinthu chinango chomwe chidachitisa Yesu kutumikira Yahova, ni chakuti iye ambadziwa kuti kukhulupirika kwake kudzabwerese maphindu yazinji maninge. (Aheb. 12:2) Ambadziwa pomwe kuti akapitiriza kukhala wokhulupirika, adzachenese dzina ya Ababa wake, nakuti vikhale vokwanisika kuti mabvuto yose yomwe yadayambisiwa na Satana yamale.

KO NDAWA CHANI YAHOVA NI WOYENERERA KUTUMIKIRIWA?

6-7. Ko ndawa chani wanthu azinji manjeuno atumikiralini Yahova, ndipo ndawa chani Yahova ni wodekana kutumikiriwa?

⁶ Wanthu azinji atumikiralini Yahova ndawa yakuti adziwalini makhalidwe yabwino yomwe iye anayo ndipo azindikiralini vinthu vose vabwino vomwe Yahova awachitira. Wanthu mwawa, ni olingana na omwe Paulo adawalalikira ku Atene, omwe ambadziwambolini Mulungu.—Mac. 17:19, 20, 30, 34.

⁷ Paulo adapfunzisa wanthu wa ku Atene kuti Mulungu chaiye “ndiye yemwe adapasa wanthu wose moyo, mphuwe, na vinthu vose.” Adanena pomwe kuti: “Ndawa ya iye tinamoyo, tifamba ndipo tilipo.” Mulungu ni Mulengi yemwe “kuchokera kwa munthu m’bodzi adakonza makhaindi yose ya wanthu.” Ndipomwapa, iye ni woyenerera kuti timbamutumikire.—Mac. 17:25, 26, 28.

8. Ko nchani chomwe Yahova adzachitelini, ndipo aonesa tani kuti atikonda maninge?

⁸ Ndawa yakuti Yahova ni Mulengi komasoti Ntongi wa chilengedwe chose, iye adakambachichimiza wanthu kuti ambamutumikire. Koma iye achitalini vimwevi. M’malo mwa vimwevi, Yahova atitsimikizira kuti iye aliko, nakuti akonda maninge aliyese wa isepano. Iye ankufuna maninge kuti wanthu ose akhale azishamwali wake mpakana kalekale. (1 Tim. 2:3, 4) Ndipomwapa, Yahova atitherena kuti timbapfunzise anango va cholinga chake, na vinthu vabwino vomwe adzachitire wanthu. (Mat. 10:11-13; 28:19, 20) Iye, wakhazikisa pomwe mipingo komwe tingakwanise kumutumikira na kutambira thandizo kuchokera kwa akulu omwe atikonda maninge.—Mac. 20:28.

9. Ko Yahova aonesa tani chikondi chake kwa wanthu ose?

⁹ Tingakwanise kuona chikondi chikulu cha Yahova pakuona momwe iye asamalirira wanthu omwe ayikhiralini nzeru kuti iye aliko. Mwakulinganiza, kwa magole mamidyau yazinji, wanthu azinji asalula kukhala moyo wobverana na vomwe iwo aona kuti ni vabwino panango voipa, m’malo mwakubvera Yahova. Olo nteno, Yahova ni wokoma ntima ndipo awapasa vinthu vose kuti apitirize kukhala na moyo, komasoti kuti moyo muyo ukhale wowakondweresa. (Mat. 5:44, 45; Mac. 14:16, 17) Wanthu mwawa, angakhale pomwe na azibale na azishamwali omwe awakonda, wana komasoti kugumana maphindu na basa zomwe aphata. (Sal. 127:3; Mla. 2:24) Vinkuchita kuonekeratu kuti Ababa wathu wakudzulu, akonda wanthu wose. (Eks. 34:6) Manje naboni tikumbukire vifukwa vinango vomwe vitichitisa kusalula kutumikira Yahova, nakuona momwe iye atidalisira tikachita vimwevi.

KO NDAWA CHANI TIDASALULA KUTUMIKIRA YAHOVA?

10. (a) Ko chifukwa chikulu chomwe chitichitisa kutumikira Yahova ni chiponi? (Mateyu 22:37) (b) Ko mubva tani ndawa yodziwa kuti Yahova ni wodekha komasoti wachifundo? (Salimo 103:13, 14)

¹⁰ Ninge Yesu, chinthu chikulu chomwe chitichitisa kutumikira Yahova ni ndawa yakuti timukonda. (Werengani Mateyu 22:37.) Pomwe tinkupfunzira makhalidwe ya Yahova ndipo pomwe tinkufunisisa kukhala azishamwali wake. Mwakulinganiza, ganizirani va kudekha na chifundo cha Yahova. Pomwe Aizirayeli adamupandukira, Yahova adawagwigwirira kuti: ‘Pulizi, bwererani na kusiya njira zanu zoipa.’ (Yer. 18:11) Vimwevi vinkuchita kuoneseratu kuti Yahova akumbukira kuti ndise ochimwa komasoti ndise pfumbi. (Werengani Salimo 103:13, 14.) Mukambaganizira va kudekha na chifundo komasoti makhalidwe yanango ya Yahova, ko vikuchitisanilini kukhala na chifuno chofuna kumutumikira mpakana kalekale?

11. Ko ni vifukwa vinango viponi vomwe vitichitisa kutumikira Yahova?

¹¹ Chinthu chinango chomwe chitichitisa kumbatumikira Yahova, ni ndawa yakuti kuchita vimwevi ndiko kodekana. (Mat. 4:10) Komasoti tinkudziwa kuti kukhulupirika kwathu kwa Yahova, kudzabwerese maphindu yazinji maninge. Tidzathandize kuchenesa dzina ya Yahova, kuonesa kuti Satana ni wabodza na kukondweresa ntima wa Ababa wathu. Tikasalula kutumikira Yahova manjeuno, tidzakhale na mwayi wakuti tidzamutumikire mpakana kalekale.—Yoh. 17:3.

12-13. Ko tapfunzira chani na vomwe vidachitikira Jane na Pam?

¹² Olo mwana panango mulumbwana aliyese, angakwanise kukulisa chikondi chake kwa Yahova. Chikondi chomwe chingapitirize kukula kuyenda kwa nthawe. Onani vomwe vidachitikira Jane na Pama pomwe adayamba kupfunzira Baibolo, Jane wenze na magole 11 ndipo Pam wenze na magole 10. Azibereki wawo ambapfunziralini Baibolo. Koma adawasiya wana wawo kuti ambapfunzire peno angambakwanise kuyenda kutchetchi kwawo pabodzi na banja yawo kumapeto kwa sondo iriyose. Jene adanena kuti: “Vomwe nidapfunzira m’Baibolo na wa Mboni za Yahova, vidanithandiza kuti nileke kumbachita vomwe anzangu ambachita, ninge kuphatisira basa mankhwala yosokoneza msolo na vinthu vachigololo.”

¹³ Magole yanganani patsogolo pake, pomwe wose awiri adakula iwo adakhala wa Mboni za Yahova. Ndipo patsogolo pake adayamba upainiya. Nthawe ibodzibodzi mweyo ambasamalira pomwe azibereki wawo okalamba. Pakuganizira vose vomwe Yahova wenze adawachitira Jene adanena kuti: “Nidaona na maso yangu momwe Yahova asamalilira azishamwali wake nakuti Yahova adziwa wanthu wake. Ninge momwe inenera lemba ya 2 Timoteyo 2:19, nikaikiralini kuti nthawe zose ‘Yahova adziwa wanthu wake.’” Asamalira wale omwe asalula kumukonda komasoti kumutumikira.

14. Ko titeteza tani dzina ya Yahova? (Onani pomwe mafoto.)

¹⁴ Isepano tinkufuna kuchenesa dzina ya Yahova nakutsutsa mabodza yose yomwe wanthu amunenera. Linganizani kuti muna shamwali wanu yemwe mumukonda. Iye ni wachifundo, wopasa komasoti wokhululuka. Koma ntsiku inango munkubva munthu ankunena kuti shamwali wanu muyo ni munthu woipa ndipo achita vinthu vomwe viribe chilungamo. Ko mungachite tani? Mosakaika, mungatsutsiretu vimwevi. Molingana na vimwevi, Satana na wanthu wake, anena mabodza na cholinga chakuti aipise dzina ya Yahova. Koma ise tichita vose vomwe tingakwanise kuti titeteze dzina ya Yahova na kunena vinthu vabwino vomwe iye achita. (Sal. 34:1; Isa. 43:10) Vochita vathu na voyankhula vathu vioneseratu kuti tinkufuna kutumikira Yahova na moyo wathu wose.

15. Ko ndawa chani Paulo adachita bwino kuchinja? (Afilipi 3:7, 8)

¹⁵ Kuingizira pamwapa, tikhala okondwa kuchinja vinthu vinango pa moyo wathu kuti tikondwerese Yahova. Nthawe zinango mpakana kuchita vizinji pakumutumikira. Mwakulinganiza, ntumi Paulo wenze na udindo ukulu maninge mu ulamuliro wa Ayuda. Koma iye adasiya vose kuti akhale wopfunzira wa Yesu Khrisitu na kutumikira Yahova. (Agal. 1:14) Ndawa ya vimwevi, iye adakhala na moyo wokondwa pakutumikira Yahova, ndipo adatambira mwayi wokatonga na Yesu kudzulu. Paulo, alibe kudziringa ndawa yosalula kutumikira Yahova. Isembo tidzadziringelini.—Werengani Afilipi 3:7, 8.

16. Ko tinkupfunzira chani na chitsanzo cha Julia? (Onani pomwe mafoto.)

¹⁶ Tikaikha kutumikira Yahova pa malo yakuyamba pa moyo wathu, iye adzatidalise manjeuno komasoti kutsogolo. Onani chitsanzo cha mulongo munango dzina yake Julia. Kundochokera ali mwana, iye ambaimba mu gulu yoyimba ya ku tchetchi kwawo. Wanthu adaona luso yake, ndipo Julia adayamba kutherenewa kuti akhale katswiri woimba. Iye adakhala wodziwika maninge ndawa yoimba bwino olo kuti wenze mwana. Ndipo adakaonekera kumalo yoimba yazinji maninge yobvekera. Pomwe iye ambapfunzira pa shikola yobvekera maninge ya voimbaimba, munzake yemwe ambapfunza naye adayamba kucheza naye ndipo adamuuza kuti Mulungu ana dzina ndipo dzina yake ni Yahova. Nthawe pang’ono patsogolo pake, Julia adayamba kupfunzira Baibolo kawiri pa sondo. Patsogolo pake Julia adasalula kuti ambaphatisire basa nthawe yake komasoti mphanvu pakutumikira Yahova, m’malo mwakuti akhale katswiri wobvekera maninge. Chosalula chimwechi chenze choshupa maninge. Ndipo Julia adanena kuti: “Wanthu azinji adayamba kumbaniuza kuti ninkusenzekesa luso yangu. Koma inepano nimbafuna kuphatisa basa moyo wangu wose pakutumikira Yahova.” Ko Julia adzibva tani manjeuno patsogolo pakuti papita magole 30 kuchokera pomwe adachita chosalula mwechire? Iye adanena kuti: “Ndine wokondwa maninge komasoti nina ntendere ndawa yosalula kutumikira Yahova. Nikutsimikiza kuti kutsogolo Yahova adzanipase vose vomwe ntima wangu unkufuna.”—Sal. 145:16.

PITIRIZANI KUTUMIKIRA YAHOVA

17. Ko ndawa chani ni vodekana kudziwa nthawe yomwe tinkukhala?

¹⁷ Isepano tiri kumapeto chaiko kwa dziko yoipa iyi. Ntumi Paulo adanemba kuti: “Kwasala kanthawe kang’onong’ono” ndipo “yemwe ankubwera afikedi, achebwelini.” (Aheb. 10:37) Ko vimwevi vinkutanthauza chani? Vinkutanthauza kuti kwasala kanthawe pang’ono kuti wanthu asalule peno ankufuna kutumikira Yahova panango neye. Iwo ankudekana kuchita chosalula chimwechi mwakankulumize maninge. (1 Akor. 7:29) Koma peno tidasalula kale kutumikira Yahova, tingatsimikizire kuti mabvuto yomwe tinkugumana nayo ni ‘yakanthawe kang’onong’ono.’

18. Ko Yahova na Yesu, atilimbikisa kuchita chani?

¹⁸ Yesu adalimbikisa opfunzira wake kuti ayambe kumutewera nakuti apitirize kumutewera. (Mat. 16:24) Peno munkutumikira kale Yahova kwa magole yazinji, pitirizani kukhala na chitsimikizo chakuti mudzasiyelini kuchita vimwevi. Tose tichadekana kuchita khama kuti tipitirize kulimbisa chosalula chathu chakuti titumikire Yahova. Nthawe zinango vimwevi vingakhale voshupa. Koma kuchita vimwevi kubweresa chimwemwe komasoti madaliso yazinji maninge kundoyambira manjeuno!—Sal. 35:27.

19. Ko mwapfunzira chani na vomwe vidachitikira Gene?

¹⁹ Anango aganiza kuti akayamba kutumikira Yahova, angakhalelini na moyo wokondwa. Peno ndimwe mulumbwana, ko munkuganiza kuti kuyamba kutumikira Yahova kungachitise kuti mukhale na moyo wosakondwa? Mulumbwana munango dzina yake Gene, adanena kuti: “Inepano nimbaganiza kuti ninkukondwalini ndawa yakuti ndine wa Mboni za Yahova. Vimbaoneka ninge kuti azinzangu azinji ambachita vinthu vokomedza. Kuyenda kumafesta, kukhala na vibwenzi komasoti kumbajogali magemu yomenyana. Koma inepano ndimbandoyenda kumisonkhano na mu umboni basi.” Ko maganizo mwaya yadamukhudza tani Gene? Iye adanena kuti: “Nidayamba kuchita vinthu vinango voipa mobisa. Ndipo kuyenda kwa nthawe nidayamba kuona kuti kuchita vimwevi kulibe bvuto. Koma viribe kutenga nthawe ndawa yakuti nenzelini wokondwa maninge. Nidayamba kuganizira va mpfundo zinango za m’Baibolo zomwe nenze nidasalula kusiya kuzitewedza. Ndipomwapa, nidasalula kuyamba pomwe kutumikira Yahova na ntima wose. Kuchoka pamwapo kuyenda kutsogolo nidayamba kuona momwe Yahova ambadawirira mapemphero yangu.”

20. Ko tinkudekana kukhala na chitsimikizo chochita chani?

²⁰ Wamasalimo munango adauza Yahova kuti: ‘Wokondwa ni munthu yemwe mumubweresa pafupi na imwepo kuti akhale mu m’mbuto yanu.’ (Sal. 65:4) Tinkudekana kupitiriza kukhala na chitsimikizo ninge chomwe chenze na Yoswa pomwe adanena kuti: ‘Koma ine na wa m’banja yangu, titumikire Yahova.’—Yos. 24:15.