“Khalani wolimba na wosagunduzika”

1-2. Ndawa chani Mkhrisitu angalinganiziwe ninge nyumba ya prédio itali? (1 Akorinto 15:58)

NYUMBA ya andale 60 idayamba kumangiwa mu gole ya 1970 mu thaundi ya Tokyo ku Japan. Wanthu womwe ambanyang’anisisa nyumba mweyi inkumangiwa ambakayikira kuti peno nyumba mweyi ingakhale yolimba na matsoka yachilengedwe yomwe yambachitika mu thandi mweyi. Ko vimwevi vidakwanisika tani? Mayenjinyero yadakonza nyumba mweyi kuti ikhale yolimba nakuti imbakwanise kupirira kukachitika chimphepo. Akhrisitu alimbo ninge nyumba itali mweyi. Mu njira iponi?

² Mkhrisitu achadekana kulinganiza pakati pakukhala wolimba na wololera. Iye adekana kukhala wolimba na wosagunduzika pa kubvera, kuteteza malamulo na mpfundo za Yahova. (Lewengani 1 Akorinto 15:58.) Iye achadekana ‘kukhala wobvera’ nakusabvuma kuti chilichose chisinthe maganizo yake. Mwanjira inango, iye achadekana kukhala ‘wololera’ pa nthawe iliyose yomwe pankudekana kuchita vimwevo. (Yak. 3:17) Mkhrisitu yemwe apfunzira kuchita vimwevi akhala wachikatikati. Mu pfunziro ino tiwone momwe tingakhalire olimba na osagunduzika, tiwone pomwe njira 5 zomwe Satana achaphatisa basa pakufuna kutifokesa kuti tileke kukhala osagunduzika na momwe tingapilirire pa viyeso vimwevi.

KO TINGAKHALE TANI OLIMBA?

3. Ko ni malamulo yaponi yomwe Yahova adatipasa pa Machitidwe 15:28, 29?

³ Yahova ndiye yekha yemwe angadekane kupereka malamulo kwa wanthu wake ndipo malamulo yake ni yodziwika bwino. (Yes. 33:22) Mwakulinganiza, Bungwe Yotonga ya mu nthawe ya Akhrisitu adafotokoza vinthu vitatu vomwe iwo angachite kuti apitirize kukhala olimba: (1) kuleka kutumikira mafano koma Yahova yekha, (2) kulamba kuyikhiwa magazi ndipo (3) kubvera malamulo ya m’Baibolo yakuti ayi kuchita chigololo. (Lewengani Machitidwe 15:28, 29.) Ko Akhrisitu angabvere tani Yahova pa Vinthu vitatu vofunika mwevi?

4. Ko tingawonese tani kuti titumikira Yahova yekha? (Chivumbulutso 4:11)

⁴ Isepano tigwadiralini mafano koma titumikira Yahova yekha. Iye adalamula Aizirayeli kuti ambatumikire iye yekha basi. (Deut. 5:6-10) Pomwe angayesewa na Satana, Yesu adalewa mobveka bwino kuti isepano tichadekana kutumikira Yahova yekha. (Mat. 4:8-10) Ndawa ya vimwevi isepano titumikiralini mafano, kuyingizira mwapa isepano titumikiralini wanthu womwe ni wapadzulu m’dziko ninge akuakulu wavipembedzo, akuluakulu waboma, panango wanthu wodziwika maninge. Koma titumikira Yahova yekha yemwe ‘adalenga vinthu vose.’—Lewengani Chivumbulutso 4:11.

5. Ndawa chani tichadekana kubvera lamulo ya Yahova pa nkhani ya kulemekeza moyo pa kupewa magazi?

⁵ Isepano tibvera malamulo ya Yahova pa nkhani ya kulemekeza moyo pa kupewa magazi. Ndawa chani? Ndawa yakuti Yahova adalewa kuti magazi ndiye moyo. Ni mphaso ikulu maninge ya Yahova kwa isepano. (Lev. 17:14) Pomwe Yahova adalamula wanthu kuti ambadye nyama adawauza pomwe kuti ayi kuti ambadye magazi. (Gen. 9:4) Iye adabwerezera pomwe lamulo mweyi pomwe adapereka chilamulo cha Mose kwa Aizirayeli. (Lev. 17:10) Yahova adalamula pomwe Bungwe Yotonga ya mu nthawe ya atumwi kuti auze Akhrisitu kuti: ‘Achadekana kupewa . . . magazi.’ (Mac. 15:28, 29) Isepanombo tibvera lamulo mweyi molimba ntima pomwe tinkusalula thandizo yamangwala yomwe tichadekana kutambira.b

6. Ni khama iponi yomwe tichadekana kuchita kuti tikwanise kubvera malamulo yabwino ya Yahova?

⁶ Tibvera malamulo yapadzulu yomwe iye achapereka. (Aheb. 13:4) Mtumi Paulo adatipasa malangizo kuti tichitise viwalo va thupi yathu kukhala ‘vakufa.’ Vomwe vitanthauza kuleka kuchita chilichose chomwe chingatichitise kukhala na maganizo yoipa. Isepano tichitalini chilichose chomwe chingatichitise kuti tichite chigololo olo kunyang’ana vinthu ninge vimwevi. (Akol. 3:5; Yobu 31:1) Tikambayesewa kuti tichite vinthu voipa, isepano tichosa chilichose chomwe chingatichitise kuti tichite voipa mwevi panango vomwe vingadzonge ushamwali wathu na Yahova.

7. Ko tichadekana kukhala wotsimikiza kuchita chani ndipo ndawa chani?

⁷ Yahova afuna kuti ‘timbamubvere na ntima wose.’ (Aro. 6:17) Vomwe iye alewa nthawe zose ni vabwino kwa isepano ndipo tingafunikirelini kuchinja malamulo yake. (Yes. 48:17, 18; 1 Akor. 6:9, 10) Isepano tichita khama kuti tikondwerese Yahova pakukhala na maganizo yomwe wamasalimo wenze nayo yemwe adati: ‘Natsimikiza ntima kutewedza malangizo yanu mpaka kalekale shuwadi mpaka moyo wangu wose.’ (Sal. 119:112) Koma Satana ayesesa kufokesa maganizo yathu. Ko iye aphatisa basa njira ziponi?

NJIRA ZOMWE SATANA AZIPHATISA BASA KUTI ATIFOKESE

8. Ko Satana aphatisa tani basa chidzudzo pakutifokesa kuti tileke kuchita vomwe tasalula?

⁸ Kudzudziwa. Satana aphatisa basa vinthu vachiwawa na kukakamiza maganizo yathu kuti tifoke nkuleka kuchita vinthu vomwe tasalula, cholinga chake nchakuti ‘atimeze’ panango nkudzonga ushamwali wathu na Yahova. (1 Pet. 5:8) Akhrisitu woyambirira adagopsewa, kumenyewa mpakana kuphewa ndawa ya chosalula chawo chakuti apitirize kukhala wolimba. (Mac. 5:27, 28, 40; 7:54-60) Ntsiku zino Satana ankupitiriza kudzudza wanthu. Isepano tinkuwona vinthu voipa vimwevi momwe boma ya Russia na maboma yanango yankudzudzira abale na alongo wathu komasoti na momwe wanthu otsutsa ankutidzudzira.

9. Ko ni chochitika chiponi chomwe chinkuwonesa kuti tichadekana kukhala wosamala pa viyeso vosawoneka?

⁹ Viyeso vosawoneka. Kuyingira pa kuphatisa basa chidzudzo, Satana aphatisa pomwe basa ‘chinyengo’ kuti atifokese. (Aef. 6:11) Wonani chitsanzo cha m’bale Bob yemwe wenze adaikhiwa mu shipitali kuti achitiwe operasawu. Iye adawuza mafulumero kuti abvumelini kuyikhiwa magazi mu njira iliyose. Mafulumero yadabvuma kumuchita operasawu osamuyikha magazi koma usiku moule akanati kumuchita operasawu mafulumero yadacheza na Bob patsogolo pakuti azibale wake ayenda kumuyi. Mfulumero munango adamuuza kuti manfulumero yamuyikhelini magazi koma peno ankufuna magazi yalipo. Panango iwo ambaganiza kuti Bob achinje maganizo ndawa yakuti azibale wake alirini pafupi. Koma Bob adapitiriza kukhala wolimba ndipo adanena kuti abvumelini kuyikhiwa magazi mu njira iliyose.

10. Ndawa chani kutewedza maganizo ya dziko ni ngozi ikulu? (1 Akorinto 3:19, 20)

¹⁰ Kaganizidwe ka wanthu womwe alemekezalini malamulo ya Yahova. Tikambaganiza ninge wanthu womwe achalemekezalini malamulo ya Yahova, isepanombo tingatengere vochita vawo. (Lewengani 1 Akorinto 3:19, 20.) ‘Nzeru za dziko iyi’ kawirikawiri zichitisa kuti wanthu aleke kubvera malamulo ya Mulungu. Akhrisitu woyambirira wa mu mpingu wa Pegamo na Tiyatira wenze adatengerambo makhalidwe ya wanthu womwe enze nawo pafupi womwe ambachita chigololo na kutumikira mafano. Yesu adapereka malangizo yamphanvu ku mipingu mwaya ndawa yakuti ambalekerera khalidwe yachigololo. (Chiv. 2:14, 20) Ntsiku zino wanthu azinji atikakamiza kuti timbawone vinthu ninge momwe dziko ichawonera. Wanthu wa m’banja mwathu panango anzathu angayambe kumbalewa kuti tinkupherewa ufulu ndawa yotewedza malamulo ya Yahova. Ndipo viribe basa olo tichileka kutewedza ibodzi ya malamulo ya Yahova. Iwo angayambe pomwe kumbatiwuza kuti viribe basa olo tichikulisa chikhumbo chathu nkumbawona kuti malamulo ya Yahova ni yakalekale.

11. Ko ni chani chomwe isepano tichadekanalini kuchita?

¹¹ Nthawe zinango tingambawone kuti malangizo yomwe Yahova ankutipasa niyosabveseseka panango tingambayesewe kuti tichite vinthu ‘vopitirira vomwe viri m’malemba.’ (1 Akor. 4:6) Akuluakulu wa vipembedzo mu nthawe ya Yesu ambachitambo vimwevi, iwo ambayingizirambo malamulo yawo pa malamulo ya Mose. Ndipo venze voshupa kuti wanthu ambayatewedze. (Mat. 23:4) Yahova atipasa malangizo yobveka bwino kuchokera m’mawu yake komasoti gulu yake. Palibe chifukwa choingizilira malamulo mwaya. (Miy. 3:5-7) Ndawa ya vimwevi tichitalini vinthu vopitirira kuposha vomwe viri m’Baibolo ne titsutsalini okhulupirira anzathu pa vomwe angasalule.

12. Ko ni njira ziponi zomwe Satana aphatisa basa pa kufalisa ‘nkhani zabodza’?

¹² Nkhani zabodza. Satana aphatisa basa ‘chinyengo’ na ‘vinthu va kalekale’ kuti asokerese wanthu komasoti kuwapatusa. (Akol. 2:8) Mu nthawe ya atumi vimwevi vimbaphatanidzapo nzeru za wanthu, nzeru za Ayuda zosachokera m’malemba na vipfunziso vakuti Akhrisitu angadekana kutewedza chilamulo cha Mose. Maganizo mwaya yambasokoneza wanthu ndawa yakuti yambawapatusa pa phata chaiyo yanzeru yemwe ni Yahova. Ntsiku zino Satana aphatisa basa ma radio, internet kuti afalise nkhani za bodza zokonzewa na akuluakulu wandale, vimwevi vidachitika maninge pa nthawe ya Koronaviru.c Wa Mboni za Yahova womwe angatewedza malangizo yomwe iye angapereka kuchokera mu gulu yake, ambachitalini mantha na nkhawa zomwe wanthu enze nazo omwe ambabvesera nkhani zabodza mwezi.—Mat. 24:45.

13. Ndawa chani tichadekana kukhala wosamala na vinthu vosokoneza?

¹³ Vosokoneza. Tichadekalini kuleka kuwona ‘vinthu vodekana maninge.’ (Afil. 1:9, 10) Tikakhala kuti tasokonezeka tingaluze nthawe na mphanvu zomwe isepano tidakaphatisira basa pa kuganizira vinthu vakudikana maninge, vinthu va ntsiku na ntsiku ninge kudya, kumwa, vosangalasa na basa. Vingatisokoneze tikabvuma kuti vimwevi vikhale vinthu vofunika maninge pa moyo wathu. (Luka 21:34, 35) Kuyingizira mwapa, ntsiku zose timbabva nkhani za viwonesero na nkhani zandale. Tichadekana kukhala wosamala kuti tileke kusokonezewa na nkhani ninge mwezi. Tikaleka kusamala maganizo yathu na vochita vathu tingayambe kuwonesa kuti tinkulimbikira ku chipani chinango. Satana achaphatisa basa njira zose mwezi na chakulinga chakuti atikangise kuchita vinthu vomwe ni vabwino. Naboni tiwone momwe tingalambire vochita vake vimwevi na kupitiriza kukhala wolimba.

KO TINGAPITIRIZE TANI KUKHALA WOLIMBA?

14. Nchani chomwe chingatithandize kuti tipitirize kukhala wolimba ku saidi ya Yahova?

¹⁴ Ganizirani chomwe chidakuchitisani imwepo kudzipereka mpakana kubatiziwa. Imwepo mudachita vimwevi ndawa mumbafuna kukhala ku saidi ya Yahova. Ganizirani chomwe chidakutsimikizirani imwepo kuti mwagumanadi chonadi, imwepo mudadziwa kuti Yahova ni mbani ndipo mudayamba kumukonda na kumulemekeza ninge Ababa wanu wakudzulu. Mudakulisa chikhulupiriro chanu ndipo chidakuthandizani kuti muchinje. Chikondi chanu kwa Yahova chidakuthandizani kuti musiye vinthu voipa na kuti muyambe kuchita vinthu vokondweresa Mulungu. Imwepo mudabva bwino maninge pamudadziwa kuti Yahova wakukhululukirani. (Sal. 32:1, 2) Mudayamba kugumanika pa misonkhano ndipo mudayamba kuuzambo anango vinthu vabwino vomwe mungapfunzira. Ninge Nkhrisitu wodzipereka na wobatizika, imwepo munkufamba mu njira ya ku moyo ndipo ndimwe wotsimikiza kuchita chilichose chamungakwanise kuti mupitirize kufamba mu njira mweyi.—Mat. 7:13, 14.

15. Ndawa chani ni vodekana maninge kupfunzira na kuganizira mawu ya Mulungu?

¹⁵ Mbapfunzirani mawu ya Mulungu na kuyaganizira. Mizu ya muti yakakhala yozika maninge muti ukhala wolimba. Molingana na vimwevi tikambapfunzira mawu ya Mulungu chikhulupiriro chathu chikhala cholimba ndipo tingapitirize kukhala wolimba tikambapfunzira na kuganizira mawu ya Mulungu. Tikhala wotsimikiza kuti vomwe Mulungu ankukumbira kwa isepano ni vabwino. (Akol. 2:6, 7) Ganizirani momwe malangizo na malamulo ya Yahova momwe yadatetezera na kuthandiza atumiki wake m’mbuyo. Mwakulinganiza, m’masomphenya yake Ezekiyeli adachita chidwi maninge padawona m’ngelo wa Mulungu ankupima kachisi. Masomphenya mwaya yadamulimbikisa maninge Ezekiyeli ndipo yankutipasa pfunziro ya momwe isepano tingatetezerere na kubvera Mulungu pa kutumikira chaiko.d (Ezek. 40:1-4; 43:10-12) Isepanombo tiphindula tikambalewenga na kuganizira mpfundo iliyose yozama ya m’Baibolo.

16. Ko kulimba ntima kudathandiza tani Bob? (Salimo 112:7)

¹⁶ Pitirizani kulimbisa ntima wanu. Mpfumu  Davide adalewa kuti nidzasiyelini kukonda Yahova iye adayimba kuti ‘ntima wangu wakhala wolimba kwa imwepo Mulungu.’ (Sal. 57:7) Isepanombo tingakhale wolimba ntima tikapitiriza kuthemba Yahova. (Lewengani Salimo 112:7.) Wonani chitsanzo cha Bob yemwe tamutomola kale. Pomwe mafulumero yadalewa kuti anayo magazi yomwe angafunikire kuti amuchite operasawu, iye mosaganiza kawiri adalewa kuti peno penze chithandizo cha mankhwala chomwe ambafuna kunipasa chophatisira basa magazi, inepano nidakachoka kushipitali mwakankulumize pa nthawe mwaire. Patsogolo pake Bob adalewa kuti inepano nimbakayikiralini kuti venze vinvireletu vomwe inepano nidakachita ndipo “nenze nilibe mantha na vomwe vidakachitika.”

17. Ko tapfunzira chani pa vomwe vidachitikira Bob? (Onani pomwe foto.)

¹⁷ Bob adakwanisa kukhala wolimba ntima ndawa wenze adatsimikizira kale kuchita vimwevi akanati kuyenda kushipitali. Chakuyamba iye ambafuna kuti vadakasalula vikondwerese Yahova. Chachiwiri adapfunzira mosamala maninge vomwe Baibolo ichalewa na m’mabukhu yathu pa nkhani yolemekeza moyo na kupewa magazi. Chachitatu iye wenze wotsimikiza kuti kutewedza malangizo ya Yahova ni chinthu chabwino maninge kwa iye. Isepanombo tingatsimikize kukhala wolimba ntima viribe basa mabvuto yomwe tingagumane nayo.

18. Ko chitsanzo cha Baraki chinkutipfunzisa chiyani pa nkhani ya kuthemba Yahova? (Onani foto ya pa khava.)

¹⁸ Pitirizani kuthemba Yahova. Wonani momwe Baraki adaphindulira na kuthemba malangizo ya Yahova. Pa nthawe mwaire Aizirayeli enze wosakonzeka kuti angamenye nkhondo, iwo enze alibe vitsulo vomenyera nkhondo koma Yahova adawuza Baraki kuti ayende akamenyane na nkulu wa masocha ya Akanani. Sisera wenze na vitsulo vizinji vomenyera nkhondo. (Ower. 5:8) N’neneri wachikazi Debora adawuza Baraki kuti ayende kumalo komwe kwenze kulibe mapiri kuti akagumane na Sisera yemwe wenze na ngolo zokwana 900 za nkhondo. Venze vabwino maninge kwa Akanani kuti amenye nkhondo ku malo komwe kwenze kulibe mapiri ndawa yakuti enze na ngolo. Koma olo kuti venze teno Baraki adabvera Mulungu. Pomwe Baraki angabuluka mu phiri ya Tabori Yahova adagwesa chimvula champhanvu ndipo pamwapo ngolo za nkhondo za Sisera zidayamba kumira m’matope, Yahova adapulumusa Baraki. (Ower. 4:1-7, 10, 13-16) Nchibodzibodzimbo, Yahova adzatipulumuse peno tingamuthembe na kubvera malamulo yomwe angatipase m’gulu yake.—Deut. 31:6.

KO NDIMWE WOTSIMIKIZA KUKHALA OLIMBA NTIMA NA WOSAGUNDUZIKA?

19. Ndawa chani imwepo munkufuna kupitiriza kukhala wosagunduzika?

¹⁹ Nkhondo yathu yakuti tipitirize kukhala olimba kwa Yahova, ipitirize pomwe tinkukhala mu nthawe zoshupa zino. (1 Tim. 6:11, 12; 2 Pet. 3:17) Naboni tipitirize kutsimikiza kukhala wosagunduzika ndawa ya kudzudziwa ku viyeso vosawoneka, kaganizidwe ka wanthu womwe abveralini malamulo ya Yahova, nkhani zabodza na vinthu vosokoneza. (Aef. 4:14) Ndipomwapa naboni tipitirize kukhala wolimba, wosagunduzika pakupitiriza kukonda Yahova na kubvera malamulo yake. Mwanjira inango tichadekana kukhala wachikatikati. Mu nkhani yomwe inkubwera tidzawone momwe Yahova na Yesu aliri vitsanzo vabwino pa nkhani yokhala ololera.