KUPITIRIZA
MSOLO 7
Kupirira
Mpfundo: ‘Adapitiriza mwakhama kupfunzisa na kulengeza ntontholo wabwino.’—Mac. 5:42.
Vomwe Paulo adachita
1. Nyang’anirani VIDIYO, panango werengani Machitidwe 19:8-10. Patsogolo pake ganizirani mibvunzo aya:
M’malo mogonja pomwe wanthu anango ambamutsutsa, ko Paulo adawonesa tani kupirira pa kuthandiza wanthu womwe ambawonesa chidwi?
Ko ni maulendo yangasi yomwe Paulo adayenda kukapfunzisa wanthu womwe ambawonesa chidwi, ndipo iye adachita vimwevi kwa nthawe itali tani?
Ko tinkupfunzira chani kwa Paulo?
2. Pachadekana nthawe na khama kuti tikwanise kuchita maulendo yobwereza kwa wanthu wachidwi na kuchitisa mapfunziro ya Baibolo.
Tewedzerani Paulo
3. Bvumani kuchinja ndandanda yanu kuti ibverane na wanthu. Dzibvunzeni kuti: ‘Ko ni nthawe yanyi yomwe ningawagumane? Ko ni nthawe na malo yaponi yomwe angakhale womasuka kucheza nane?’ Mbakhalani wokonzeka kucheza na wanthu olo pa nthawe yomwe ni yabwinolini kwa imwepo.
4. Panganani nthawe. Mukandomaliza kuchezerana naye munthu, mbatsimikiziranani naye va nthawe chaiyo yomwe mungadzachezerane naye pomwe. Patsogolo pake mumbayesese kukwanirisa vamwapangana.
5. Ayi kumbataya chidikhiro. Lekani kumbakulumiza kukumbuka kuti munthu yemwe agumanikalini kawirikawiri pamuyi panango yemwe kazinjikazinji akhala wotangwanika alibe chidwi. (1 Akor. 13:4, 7) M’malo mwake, mbayesesani kugawa bwino nthawe yanu, muchimbanyang’ana tumipata tomwe mungagumanirane naye pomwe.—1 Akor. 9:26.