Pitirizani kulimbisa ushamwali wanu na Yahova

Pakufika pano imwepo mwapfunzira vizinji va Yahova. Vinthu vomwe mwapfunzira vakuchitisani imwepo kumukonda maninge iye, ndipo mosakaikira mwafika pakupereka moyo wanu kwa iye na kubatizika. Peno neye, panango imwepo munkuganizira vodzachita vimwivi manjemajepa. Koma kuyenda kwanu patsogolo sikuti kwaimira paubatizo pokha neye. Imwepo mungapitirize basi kufenderera Yahova mpaka kalekale. Mungachite tani?

1. Ndawa chani muchadekana kupitiriza kulimbisa ushamwali wanu na Yahova?

Tichadekana kuchita khama kuti tipitirize kulimbisa ushamwali wathu na Yahova. Ndawa? ‘Kuti tileke kukhala kutali’ na iye. (Aheberi 2:1) Ko ni chani chomwe chingatithandize kutumikira Yahova mokhulupirika? Tingakwanise kukhala na vochita vizinji pa basa yakulalikira na kufagafaga njira zinango zomwe tingatumikirire Mulungu wathu mwakukwana. (Lewengani Afilipi 3:16.) Kutumikira Yahova ni njira yabwino maninge pamoyo!—Salimo 84:10.

2. Ni chinthu chinango chiponi chomwe imwepo mungapitirize kuchita?

Olo pfunziro ya Baibolo ino manje inkufika kumapeto, moyo wanu ninge Nkhrisitu udakapitiriza. Baibolo ichanena kuti tichadekana ‘kuvala umunthu unyowani.’ (Aefeso 4:23, 24) Imwepo mukapitiriza kupfunzira Mawu ya Mulungu na kugumanika pamisonkhano ya mpingu, mudzapfunzire vizinji va Yahova na makhalidwe yake. Faganifagani njira zomwe zingakuthandizeni kutewedzera makhalidwe yake pamoyo wanu. Pitirizani kuchita kuchinja kulikose komwe ni kodekana kuti mukondwerese Yahova.

3. Ko Yahova angakuthandizeni tani imwepo kuti mupite patsogolo?

Baibolo ichati: ‘Yahova adzamalizise thereni yanu. Iye adzakulimbiseni, adzakuchitiseni kukhala wamphanvu, adzakuphateni mwamphanvu.’ (1 Petulo 5:10) Aliyese wa ise achagumana na chiyeso. Koma Yahova achatipasa vomwe tichadekana kuti tipirire. (Salimo 139:23, 24) Iye ankupolomisa kukupasani vose viwiri shungu na mphanvu ya kumutumikira mokhulupirika.—Lewengani Afilipi 2:13.

PFUNZIRANI VIZINJI

4. Pitirizani kuyankhulana na Shamwali wanu wabwino

Pemphero na pfunziro ya Baibolo yakuthandizani imwepo kukhala paushamwali na Yahova. Ko vinthu vimwivi vingakuthandizeni tani imwepo kumufenderera iye?

Lewengani Salimo 62:8, ndipo patsogolo pake kambiranani mbvunzo uyu:

• Kuti mulimbise ushamwali wanu na Yahova, mungambachite tani kuti mapemphero yanu yambakhale yabwino?

Lewengani Salimo 1:2, ndipo patsogolo pake kambiranani mbvunzo uyu:

• Kuti mulimbise ushamwali wanu na Yahova, mungachite tani kuti kulewenga kwanu Baibolo kumbakhale kophata moyo?

Ko imwepo mungachite tani kuti pfunziro yanu ya Baibolo imbakhale yophindulisa? Kuti muone momwe mungachitire vimwevi, wonesani VIDIYO, ndipo patsogolo pake kambiranani mibvunzo aya.

VIDIYO: Chitisani pfunziro yanu kukhala yophata moyo (5:22)

• Ko ni njira ziponi zomwe imwepo mwaona mu vidiyo zomwe mungaziphatisire basa?

• Ni nkhani iponi yomwe imwepo mungakonde kuti muipfunzire?

5. Khalani na volinga vauzimu

Kukhala na volinga pakutumikira Yahova vidzakuthandizeni imwepo kuti mupitirize kupita patsogolo. Wonesani VIDIYO, ndipo patsogolo pake kambiranani mbvunzo uyu.

VIDIYO: Moyo wabwino maninge (3:31)

• Mu vidiyo, ko Cameron adaphindula tani ndawa yokhala na volinga vauzimu?

Sikuti aliyese angakwanise kuyenda kukalalikira kudziko inango. Koma olo kuti viritene, angakwanise kukhala na volinga vabwino. Lewengani Miyambo 21:5, ndipo patsogolo pake onani volinga vomwe imwepo mungafune kuvikwanirisa . . .

• mu mpingu.

• mu umboni.

Ko mpfundo ya mu vesi mweyi ingakuthandizeni tani kukwanirisa volinga vanu?

Volinga vomwe mungakhale navo

• Kumbachita mapemphero yatanthauzo.

• Kulewenga Baibolo yose.

• Kudziwana na aliyese mu mpingu.

• Kuyambisa pfunziro ya Baibolo.

• Kutumikira ninge mpainiya wothandiza panango wokhazikika.

• Peno imwepo ndimwe m’bale, khalani na cholinga chokhala mtumiki wothandiza.

CHIGWATO

Pitirizani kulimbisa ushamwali wanu na Yahova na kukhala na volinga vauzimu. Patsogolo pake Mungakondwe na moyo mpaka kalekale!

Kubwerezera

• Ko imwepo mungatsimikisire tani kuti Yahova adzakuthandizeni kuti mumutumikire mokhulupirika?

• Ko mungalimbise tani ushamwali wanu na Yahova?

• Kukhala na volinga vauzimu kungakuthandizeni tani imwepo kupita patsogolo?

KUTI MUDZIWE VIZINJI

Ko ni viponi vomwe ni vodekana maninge kwa Yahova, ni kumutumikira mwa mawu chabe panango nikumutumikira ntsiku na ntsiku?

Khalani wokhulupirika ninge Abulahamu (9:20)

Olo mtumiki wokhulupirika wa Yahova nthawe zinango angaluze chimwemwe. Onani momwe mungachibwezeresere.

Gumanani chimwemwe mwakupfunzira na kuganizira (5:25)

Ko imwepo mungakhale tani na volinga vauzimu na kuvikwanirisa?

‘Khalani na volinga vauzimu kuti mutamande navo Mlengi’ (Nsanja ya Olonda ya 15 Julho, 2004)

Ndawa chani kukhala wokhuma mwauzimu nikodekana ndipo imwepo mungachite chani kuti mufikepo?

‘Khalani wokhuma mwauzimu—‘Ntsiku ikulu ya Yahova ili pafupi’’ (Nsanja ya Olonda ya 15 Maio, 2009)