NKHANI YOPFUNZIRA 3
NYIMBO NA. 124 Tizikhulupirika Nthawe Zose
Yahova adzakuthandizeni pomwe munkugumana na mabvuto
‘[Yahova] adzakulimbiseni pa nthawe yake.’—YES. 33:6.
CHOLINGA
Kudziwa vomwe tichadekana kuchita kuti titambire thandizo ya Yahova pomwe tinkugumana na mabvuto.
1-2. Ko ni mabvuto yaponi yomwe atumiki okhulupirika wa Yahova angagumane nayo?
CHINTHU chinango chikachitika, moyo wathu ungachinje mwadzidzidzi. Mwakulinganiza, m’bale munango dzina yake Luisa adagumanika kuti anamatenda yakhansa yomwe yagumanikalini kawirikawiri. Mfulumero adamuuza kuti akhale na moyo kwa minyezi yochepa. Monika na mwamuna wake ambachita khama pa basa zauzimu. Koma ntsiku inango, Monika adazindikira kuti mwamuna wake yemwe wenze nkulu ambakhala moyo wachinyengo kwa magole yazinji. Olivia, yemwe ni mulongo wosalowodwa, adachichimizika kuti achoke m’nyumba mwake ndawa ya chimphepo chikulu maninge chomwe chenze chidakhala panango kuchitika. Pomwe iye adabwerera adagumana kuti nyumba yake yadzongekeratu. Mwadzidzidzi moyo wa wanthu mwawa udachinja maninge. Ko imwepo mudagumanakokale na vinthu ninge mwevi? Ko mudagumanakokale na mabvuto mwakuti mwadzidzidzi moyo wanu udachinja maninge?
2 Podiya kuti ndise atumiki wa Yahova okhulupirika, isepano tigumana na mabvuto yathanzi ninge wanthu ose. Kuingizira pamwapa, vingachitikepomwe kuti tinkulimbana na kutsutsiwa panango kudzudziwa na wanthu omwe achazonda atumiki wa Yahova. Nthawe zinango Yahova atitetezalini pa mabvuto yose mwaya. Koma iye adapolomisa kuti nthawe zose adzatithandize. (Yes. 41:10) Na thandizo yake isepano tingakwanise kukhala na moyo wokondwa kuti tikwanise kuchita vosalula vabwino na kupitiriza kukhala okhulupirika kwa iye podiya kuti tinkugumana na mabvuto yoshupa. Mu nkhani mweyi tikambirane njira zinayi za momwe Yahova achatithandizira tikambagumana na mabvuto pa moyo wathu ndipo tiwonepomwe vomwe tichadekana kuchita kuti titambire thandizo yake.
YAHOVA ADZAKUTETEZENI IMWEPO
3. Ko nchani chomwe chikhala choshupa kuchita pa nthawe yomwe tinkugumana na mabvuto?
3 Pamabvuto. Tikakhala kuti tinkugumana na mabvuto yakulu vikhala voshupa kuganiza bwinobwino na kusalula vochita. Ndawa chani? Ndawa yakuti ntima wathu ungambatiwawe ndawa ya mabvuto yomwe tinkugumana nayo panango tingapanikizike maninge ndawa ya nkhawa. Nthawe zinango mungambadzibve ninge kuti mukundofambafamba pakati pa pfulere osadziwa komwe munkuyenda. Onani momwe adabvera alongo awiri omwe tawatomola pakuyamba wale pa nthawe yomwe angagumana na mabvuto. Olivia adanena kuti: “Pomwe chimphepo chankuntho chidadzonga nyumba yangu, inepano nidadzibva kuti nili nekhanekha komasoti nilibe koyenda.” Pakunena va kusakhulupirika kwa mwamuna wake, Monika adanena kuti: “Inepano nidakhumudwa maninge ndipo nidabva kuwawiwa maninge komwe kumbaniwawa muntima ndipo venze vonishupa kuti nimbachite basa za ntsiku na ntsiku. Chinthu chomwe chimbaoneka kuti chingachitikelini chidachitika kwa inepano.” Ko Yahova adatipolomisa kuti adzatiteteze tani pomwe tinkudzibva kuti tili tekhatekha?
4. Mobverana na Afilipi 4:6, 7, ko Yahova wapolomisa kuchita chani kwa isepano?
4 Vomwe Yahova achachita. Iye adapolomisa kutipasa vomwe Baibolo ichanena kuti ‘ntendere wa Mulungu.’ (Werengani Afilipi 4:6, 7.) Ntendere moyu ni ntendere wa muntima womwe wanthu omwe achatumikira Yahova okha ndiwo angawugumane. Ntendere moyu ‘uchaposha kuganiza kulikose kozama’ ndipo ntendere moyu ni wamphanvu maninge kuposha momwe tinkuganizira. Ko imwepo mudakhalakokale na ntendere moyu pambuyo pakuti mwapemphera kuchokera pasi pa ntima kwa Yahova? Peno nteno imwepo mudabva ‘ntendere wa Mulungu.’
5. Ko ntendere wa Mulungu uteteza tani ntima wathu na maganizo yathu
5 Palemba ya Afilipi mweyi, tiwerengapomwe kuti ntendere wa Mulungu moyu ‘udzatete mitima yanu na maganizo yanu.’ Mawu yachigiriki yotsumbudzuliliwa kuti ‘kuteteza,’ yambaphatisiwa basa pakunena va masocha yomwe yambateteza thaundi kuti azondi aleke kudzonga.’ Munthu yemwe ambakhala mu thaundi mweyi ambakwanisa kugona mwantendere ndawa yakuti ambadziwa kuti masocha yankuteteza thaundi mweyo. Molingana na vimwevi, ntendere wa Yahova ukambateteza maganizo na mitima yathu, isepano tikhala odekha pakudziwa kuti ndise otetezeka. (Sal. 4:8) Ninge momwe vidachitikira na Hana mabvuto yake yalibe kumaliratu mwakankulumize isepanombo tingakhale na ntendere wa muntima. (1 Sam. 1:16-18) Tikakhala odekha vikhala vosashupa kuti tikwanise kuganiza bwinobwino na kusalula vochita mwanzeru.
Pempherani mpakana kubva ‘ntendere wa Mulungu’ unkuteteza ntima wanu (Onani ndime 4-6)
6. Ko tingachite chani kuti tibve ntendere wa Mulungu? (Onani pomwe foto.)
6 Vomwe tichadekana kuchita. Peno imwepo munkugumana na bvuto ikulu maninge chemerani nsocha. Ko mungamuchemere tani? Pempherani kwa Yahova mpakana kubva ntendere wa wake. (Luka 11:9; 1 Ates. 5:17) Luis, yemwe tamutomola pokuyamba ankunena vomwe iye pabodzi na nkazi wake Ana, adachita pomwe adadziwa kuti Luis akhale na moyo minyezi yang’onong’ono. Iye adanena kuti: “Panthawe ninge mweyi nivoshupa maninge kusalula vinthu ninge pa nkhani ya thanzi na nkhani zinango. Kupemphera ndiko kudatithandiza kuti tikwanise kupirira nthawe yoshupa mweyi.” Luis adanena kuti iye na nkazi wake ambapemphera kuchokera pasi pa ntima kukumbira kuti Yahova awapase nzeru na kuti akwanise kusalula bwino vochita. Ndipo nteneletu momwe iwo adabvera. Manje peno imwepo munkugumana na bvuto ikulu, pitirizani kupemphera ndipo mudzabve ntendere wa Mulungu womwe udzateteze ntima wanu na maganizo yanu.—Aro. 12:12.
YAHOVA ADZAKUTHANDIZENI KUKHALA ODEKHA
7. Ko ni maganizo yaponi yomwe tingakhale nayo pomwe tinkugumana na mabvuto yoshupa?
7 Mabvuto. Tikayamba kulimbana na mabvuto, isepano tingayambe kuganiza na kuchita vinthu mosiyana na momwe timbachitira kale. Ninge barko pakati pa madzi yomwe inkugwinyiwagwinyiwa na mphepo, isepano tingabve kuti tinkugumana na mabvuto yosanzikidzanasanzikidzana. Ana, yemwe tamutomola pakuyamba ule ankunena kuti pambuyo pakuti mwamuna wake wamwalira, ntsiku iliyose ambakhala na maganizo yosiyanasiyana. Iye adati: “Nthawe zinango inepano nimbakhala wokhumudwa maninge nimbaganiza kuti nimbadekanalini kugumana na mabvuto mwayale. Nthawe zinango nimbakhala wokalipa maninge ndawa yakuti iye adamwalira.” Ana ambadzibvapomwe kuti ali yekhayekha wokhumudwa ndawa yosakwanisa kuchita vinthu vinango vomwe ambachita mwamuna wake akali moyo. Nthawe zinango iye ambadzibva ninge kuti ali pakati pa nyanja ndipo ankugwinyiwagwinyiwa na mphepo. Ko Yahova angatithandize tani pomwe tinkulimbana na maganizo mwaya?
8. Mobverana na lemba ya Yesaya 33:6, ko Yahova watipolomisa chani?
8 Vomwe Yahova achachita. Iye ankutitsimikizira kuti adzatiteteze m’maganizo komasoti mwauzimu. (Werengani Yesaya 33:6.) Mwakulinganiza, panyanja pakakhala kuti pankuchitika chimphepo, kawirikawiri barko ichagwinyiwagwinyiwa maninge. Kuti ikwanise kulimbana na bvuto ikulu mweyi barko ikhala na vinthu vomwe vitchingiriza mphepo mbali zose vomwe vikhala kuntsi kwa barko. Votetezera mwevi vithandiza kuti barko ileke kugwinyiwagwinyiwa na mphepo. Ndawa ya mwevi wanthu omwe akhala ali mu barko mweyi akhala otetezeka ndipo ulendo wawo ukhala wokomedza. Chochitisa chidwi ni chakuti votetezera mwevi viphata bwinobwino basa yake vikakhala kuti barko inkufamba. Mwanjira ibodzibodzimweyi Yahova adzatiteteze mwauzimu tikakhala kuti tinkumutumikira mokhulupirika pa nthawe yoshupa.
Phatisirani basa vinthu vofufudzira kuti mukhale otetezeka mwauzimu na m’maganizo (Onani ndime 8-9)
9. Ko vinthu vathu vofufudzira vingatithadize tani kukhala olimba? (Onani pomwe foto.)
9 Vomwe tichadekana kuchita. Pomwe munkudzibva kuti muli pa mabvuto yakulu, pitirizani kuchita vomwe mungakwanise kuti mupitirize kutumikira Yahova. Nishuwadi kuti nthawe zinango imwepo mudzakwaniselini kuchita vose vomwe mumbachita pakuyamba. Koma kumbukirani kuti Yahova adikhiralini kuti muchite vinthu vomwe imwepo mungakwaniselini. (Onanipomwe Luka 21:1-4.) Ayi kuyebwa kupatula nthawe ya pfunziro ya pamwekha na kuganizira vomwe mwapfunzira. Ndawa chani? Ndawa pakuphatisa basa gulu yake, Yahova watipasa nkhani na mavidiyo vomwe vitithandiza maninge kuteteza maganizo yathu panthawe yomwe tinkugumana na mabvuto. Kuti muone nkhani zomwe zingakuthandizeni, imwepo mungaphatise basa vinthu vofufudzira vomwe viripo mu chiyankhulo chanu. Ninge JW Library®, Índice das Publicações da Torre de Vigia na Buku la Mboni za Yehova Lofufuzira Nkhani. Monika, yemwe tamutomola pakuyamba ankunena kuti nthawe zose achaphatisa basa vinthu vofufudzira pomwe ankuona kuti maganizo yake yoipa yankuipiraipira. Mwakulinganiza, iye ambakonda kufufudza mawu yakuti “ukali” ndipo nthawe zinango ambafufudza mawu yakuti “kusakhulupirika” panango “kukhulupirika.” Iye ambawerenga mpakana kubva bwino mu ntima. Iye adanena kuti: “Inepano nidayamba kufufudza nkhani zose zobverana na mabvuto yangu. Ndipo nimbawerenga nkhani zomwe zagumanika. Nthawe pang’ono nidayamba kubva ninge kuti Yahova ankunikumbatira. Pomwe inepano nimbawerenga nidazindikira kuti Yahova ankubva momwe ninkubvera ndipo ankunithandiza.” Kuona thandizo ya Yahova mweyi ndiko kudzakuthandizeni kukhala olimba panthawe yomwe munkugumana na mabvuto.—Sal. 119:143, 144.
YAHOVA ADZAKUTHANDIZENI IMWEPO
10. Ko nthawe zinango tingambadzibve tani tikambagumana na mabvuto yoshupa maninge?
10 Mabvuto. Peno imwepo mudagumanakokale na mabvuto yakulu pa moyo wanu, vingachitike kuti nthawe zinango mungadzibve ofoka mwakuthupi komasoti m’maganizo. Vingachitikepomwe kuti mungadzibve ninge wothamanga yemwe ni wodziwa maninge koma wapwetekeka. Pakuyamba angathamange mwakankulumize koma manjeuno ankudekana kufamba pang’onopang’ono. Nthawe zinango vingakhale votishupa kuchita vinthu vomwe timbavichita bwinobwino. Panango tingambachite ulesi kuchita vinthu vomwe pakuyamba timbavikonda. Ndipo vingachitike kuti mungadzibve ninge Eliya kuti mungakwaniselini kuyimirira koma chinthu chomwe munkufuna ni kugona basi. (1 Maf. 19:5-7) Ko Yahova ankutipolomisa kuti adzatichitire chani tikambadzibva tene?
11. Ko ninjira inango iponi yomwe Yahova atithandizira? (Salimo 94:18)
11 Vomwe Yahova achachita. Iye ankupolomisa kuti adzakuthandizeni imwepo. (Werengani Salimo 94:18.) Ninge wothamanga yemwe wadzipweteka yemwe ankufunikira thandizo yamunzake kuti ayambepomwe kufamba, isepano tinkufunikambo thandizo kuti tipitirize kukhala olimba pa basa ya Yahova. Ni panthawe mweyi pomwe Yahova atitsimikizira kuti: ‘Inepano, Yahova Mulungu wako nidzakuphate djanja yako yamakulu, ndine ule yemwe ninena kuti ‘ayi kuchita mantha. Inepano nidzakuthandize.’’ (Yes. 41:13) Mfumu Davide adaona thandizo ya Yahova. Pakulimbana na mabvuto ya azondi wake, iye adauza Yahova kuti: ‘Djanja yanu ya mphanvu idanilimbisa.’ (Sal. 18:35) Manje ko Yahova achatithandiza tani?
Bvumani thandizo ya abale wanu, azishamwali wanu na akulu (Onani ndime 11-13)
12. Ko nimbani yemwe nthawe zinango Yahova angamuphatise basa kuti atithandize?
12 Kawirikawiri Yahova aphatisa basa wanthu anango kuti atipase thandizo yomwe tinkudekana. Mwakulinganiza, pa nthawe yomwe mpfumu Davide adadzibva kuti ni wofoka, ni shamwali wake Yonatani yemwe adabwera kudzamuzungira kuti amulimbikise. (1 Sam. 23:16, 17) Mwanjira ibodzibodzimbo Yahova adaphatisira basa Elisa kuti athandize Eliya. (1 Maf. 19:16, 21; 2 Maf. 2:2) Manjeuno Yahova angaphatise basa abale wathu, azishamwali panango akulu kuti atithandize. Tikakhala kuti tinkugumana na mabvuto yakulu maninge, m’maganizo mwathu tikonda kudzisalula ndipo tikonda kukhala pa zii kwatekhatekha. Vimwevi ni vobveka. Manje ko tingatambire tani thandizo ya Yahova peno tinkudzisalula?
13. Ko tichadekana kuchita chani kuti titambire thandizo ya Yahova? (Onani pomwe foto.)
13 Vomwe tichadekana kuchita. Malisani bvuto yofuna kukhala kwamwekha. Tikambadzisalula, m’maganizo yathu tikonda kuganizira va mabvuto yathu na vomwe tinkugumananavo. Kumbandoganizira mwevi vingachitise kuti tisalule vinthu voipa. (Miy. 18:1) Ni vobvekadi kuti tose isepano nthawe zinango tifuna kukhala patekha makamaka tikakhala kuti tinkugumana na bvuto ikulu. Koma tikambadzisalula kwa nthawe ikulu, tikhala kuti tinkusiyana na anzathu ndipo ni imweyiletu njira yomwe Yahova aphatisa basa kuti atithandize. Olo kuti pa nthawe zinango ni voshupa kuchita vimwevi, bvumani thandizo ya abale wanu, azishamwali na akulu. Yesesani kuona momwe iwo aliri, imweyi ni njira ibodzi yomwe Yahova achaperekera thandizo.—Miy. 17:17; Yes. 32:1, 2.
YAHOVA ADZAKULIMBISENI IMWEPO
14. Ko ni vochitika viponi vomwe vingatipase mantha?
14 Mabvuto. Nthawe zinango tingagumane na mabvuto yomwe yangatichitise mantha. Baibolo ifotokoza va atumiki okhulupirika wa Yahova omwe ambakhala okhumudwa maninge ndipo ambachita mantha ndawa ya azondi wawo komasoti na mabvuto yanango. (Sal. 18:4; 55:1, 5) Mwanjira ibodzibodzi, vingachitike kuti tingambatsutsiwe kubasa, kushikola komasoti na boma. Panango tingakhale na mantha yakuti timwalire ndawa ya bvuto yomwe tinayo ya thanzi. Pa nthawe ninge mweyi tidzibva kuti ndiselini otetezeka ninge kamwana. Manje ko Yahova atithandiza tani ku mabvuto ninge mwaya?
15. Ko ni chitsimikizo chiponi chomwe lemba ya Salimo 94:19 itipasa?
15 Vomwe Yahova achachita. Iye achatilimbikisa na kutinyamalisa. (Werengani Salimo 94:19.) Lemba mweyi panango ingakukumbuseni va mwana yemwe ankuchita mantha ndipo ankukwanisalini kugona ndawa ya mphezi. Tingakwanise kuona azibereki wa mwana moyu ankungena ku chipinda kwake ndipo ankumuphatirira mpakana iye kukwanisa kugona. Podiya kuti iye ankubva basi mphezimwezi, apayi wake ankumunyamalisa ndipo ankumuchitisa kubva kuti ni wotetezeka. Pomwe tinkulimbanambo na mabvuto yopasa mantha, tichadekanambo Ababa wanthu wakudzulu Yahova kuti atiphatirire mpakana maganizo yoipa kumala. Manje ko tingalimbikisiwe tani na Yahova?
Bvumani kuti ababa wanu wa kudzulu akuthandizeni pa kuphatisa basa Baibolo (Onani ndime 15-16)
16. Ko tingachite tani kuti titambire thandizo ya Yahova? (Onani pomwe foto.)
16 Vomwe tichadekana kuchita. Ayi kusiya kulimbisa ushamwali wanu na Yahova. Kucheza naye na kuwerenga mawu yake. (Sal. 77:1, 12-14) Mukakhala na chizolowezi chochita vimwevi nthawe zose pomwe munkugumana na mabvuto, chakuyamba mudzafage thandizo ya Yahova. Muuzeni Yahova mantha yanu na nkhawa zanu zose. Patsogolo pake bveserani vomwe Yahova ankufuna kukuuzani pa kuwerenga Baibolo. Mwanjira mweyi imwepo mudzakwanise kuona thandizo yake. (Sal. 119:28) Mukakhala na mantha mungalibikisiwe pakuwerenga mavesi ya m’Baibolo. Mwakulinganiza, bukhu ya Yobu, Masalimo, Miyambo, na mawu ya Yesu yogumanika pa lemba ya Mateyu msolo wa 6 yangakuthandizeni kukhala okondwa. Mukambapemphera kwa Yahova na kuwerenga Baibolo mudzatambire thandizo yochokera kwa Yahova.
17. Ko nichitsimikizo chiponi chomwe isepano tinacho?
17 Isepano tingakhale otsimikiza kuti Yahova nthawe zose adzakhale wokonzeka kutithandiza pa nthawe zoshupa pa moyu wathu. Isepano tidzakhelelini tekha. (Sal. 23:4; 94:14) Yahova ankutipolomisa kuti adzatiteteze, kutikhazika ntima pasi, kutithandiza na kutinyamalisa. Lemba ya Yesaya 26:3 ititsimikirapomwe chinthu chinango cholewa va Yahova. Iyo inena kuti: ‘Wanthu omwe anantima wosagunduzika mudzawateteze pakuwapasa ntendere wosapera, ndawa achakuthembani imwepo.’ Manje thembani Yahova ndipo phindulani na vose vomwe iye achachita kuti akuthandizeni. Mukachita vimwevi imwepo mudzapitirize kukhala olimba podiya pa nthawe zoshupa.
KO MUNGADAWIRE TANI?
Ni pa nthawe ziponi pomwe isepano tingadekane thandizo ya Yahova?
Ko ni njira zinayi ziponi zomwe Yahova achaphatisa basa kuti atithandize tikambagumana na mabvuto?
Ko tichadekana kuchita chani kuti titambire thandizo ya Yahova?
NYIMBO NA. 12 Yehova Ndi Mulungu Wankulu
a Madzina yanango yachinjiwa.