Waswe, Laef Kamap Moa Cheap?

“Hem wanfala world wea laef hem cheap. Man savve baem dae for tu-thri handred pound and planti willing for killim man dae.”—The Scotsman.

Long April 1999, long wanfala attak wea mekem full world seke fogud, tufala young boy tekova long Columbine High Skul, long Littleton, Colorado, U.S.A., and 15-fala nao dae. Olketa faendemaot hao wanfala wea attak hia hem garem wanfala page long Internet wea hem raet olsem: “PIPOL WEA DAE FINIS NO SAVVE ARGUE!” Tufala hia wea attak dae long datfala nogud samting.

MURDER hem kamap evriwea, and planti pipol dae long raf wei evriday. South Africa nao garem barava hae namba long world for murder, hem nao 75 dae bilong evri 100,000 pipol long 1995. Laef hem barava cheap long wanfala kantri long South America, wea olketa killim dae winim 6,000 pipol for saed bilong politik long 1997. Wei for mekem kontrak for killim man dae hem normal samting nomoa. Wanfala report long datfala kantri sei: “Samting wea nogud tumas hem hao wei for killim dae pikinini hem go ap tu: Long 1996, 4,322 pikinini nao dae, wea hem grow 40 percent insaed tufala year nomoa.” Nomata olsem, olketa pikinini tu killim pipol dae—olketa killim dae nara pikinini and dadi and mami bilong olketa seleva. Laef hem barava cheap.

Why Nao “Death Culture”?

Wanem nao olketa tru samting and namba hia showimaot? Wei for no respectim laef kamap moa big. Pipol wea lovem paoa and hangre for selen nating feel sorre taem olketa killim man dae. Olketa bigman for sellim drug givim order for killim dae samfala full famili. Olketa daonem wei for killkill taem olketa iusim word olsem “hitim,” “rabemaot,” “aotem,” or “finisim” pipol wea olketa bae killim wea olketa kolem diswan wanfala hit. Genocide and ethnic klining hem join witim diswan and mekem laef bilong man kamap cheap. From diswan, wei for killkill hem samting wea pipol lukim evriday long olketa TV station evriwea long world.

Sapos iumi joinim diswan witim evri raf fasin wea olketa mekhae long hem long television and movie, hem luk olsem community bilong iumi interest tumas long nogud wei, long dae. Encyclopædia Britannica sei olsem abaotem diswan: “Long lastfala part bilong mek-20 century, dae hem kamap wanfala subject wea planti interest tumas long hem. Bifor datfala taem, maet iumi sapraes, klosap evri scientist stap klia long disfala subject, and planti wea studyim tingting bilong man stap klia long hem tu.” Olsem Josep Fericgla, wanfala Catalonian professor bilong cultural anthropology hem talem, “dae hem kamap last samting wea pipol no laek tok abaotem, dastawe, distaem hem kamap wanfala main subject wea pipol laek kontrolem.”

Maet samting wea barava spesol long disfala “death culture” nao hem wei for biliv hao paoa, bignem, selen, and hapitaem olketa moa important winim laef bilong man and fasin.

Hao nao disfala “death culture” go kasem planti ples? Wanem nao parents savve duim for faet againstim disfala nogud feeling wea stap raonem and affectim pikinini bilong olketa? Olketa hia nao samfala kwestin wea bae kasem ansa insaed next article.

[Box/Piksa long page 4]

Haomas Nao Kost Bilong Wanfala Laef?

◼ “Olketa young wan insaed olketa gang [long Mumbai, India] from olketa needim tumas, olketa savve acceptim kontrak for killim dae samwan for samting olsem 5,000 rupee [US$115] nomoa.”—Far Eastern Economic Review.

◼ “Hem Killim Dae Man wea Wakabaot Go Pas wea No Laek Givim Hem Cigarette.”—Hedlaen bilong wanfala niuspepa La Tercera, Santiago, Chile.

◼ “Hem kostim samting olsem US$7,000 for arrangem kontrak for killim man dae long Russia [long 1995] . . . Wei for killkill followim kontrak hem grow taem economy bilong Russia hem kamap hae bihaen long communist rul.”—Reuters, from wanfala report insaed long Moscow News.

◼ “Olketa arrestim . . . wanfala man from Brooklyn for baem and sellim property, and chargem hem from hem peim part long US$1,500 long wanfala teenage boy for killim dae waef bilong man hia wea babule and mami bilong waef bilong hem.”—The New York Times.

◼ ‘Kost for killkill long England hem gogo daon. Kost for killim man dae hem go daon from 30,000 pound long faev year wea go pas for 5,000 go kasem 10,000 pound.’—The Guardian.

◼ ‘Olketa raf gang bilong Balkan mekem Mafia luk gud nomoa. Diswan hem niu kaen criminal, witim niu rul and niu weapon. Hem garem bomb and machine gun and no hol bak for iusim olketa samting hia.’—The Guardian Weekly.