Taem Maunten Trae for Joinim Sea
FROM MAN WEA RAET FOR WEKAP! LONG VENEZUELA
MIDOLWAN long kapitol taon bilong Venezuela, Caracas, and sea, wanfala maunten, El Ávila, hem stap wea hae bilong hem 2,000 meter. Long north saed hem wanfala thin pis land long saedsea wea staka pipol stap long hem. Main airport bilong Venezuela hem stap long there, and for go from airport go long Caracas, olketa tourist mas go thru long wanfala tunnel wea olketa katem thru long datfala maunten.
Bihaen olketa hevi rain long December 1999, maunten bilong El Ávila hem kamap barava tuwet nao. Olketa saed bilong hem olsem bosta taem planti thousand cubic meter bilong wata hem foldaon from datfala maunten. Wanfala man sei hem luk olsem maunten trae for joinim sea. Olketa haos—nogud wan and barava naes wan—olketa kava taem bigfala wata, mud, olketa ston, and olketa tree roll kamdaon. Wata hia swipim olketa bed, icebox, TV, and man tu. Wanfala olo man sei hem tingse datwan end bilong world nao.
Gogo, rain hem stop, and floodwata start for go daon. Wanfala report sei maet samting olsem 50,000 pipol nao dae, and 400,000 lusim haos bilong olketa. Dastawe olketa kolem diswan “barava worse natural disaster long history bilong Venezuela.”
Klosap Dae
Long December 15, Juan Carlos Lorenzo and dadi bilong hem trap midolwan long tufala river wea ran big. Tufala lusim trak bilong tufala and go stap witim 35 pipol insaed wanfala building. Bat, no longtaem bihaen, wata start for kam insaed and kamap hae. Evriwan go antap long ruf. Long semtaem, olketa big ston and tree hitim datfala building. Kwiktaem nomoa olketa wall long daon brek, gogo only olketa post and ruf nomoa stap. Full haos hem seksek taem wata and olketa nara samting go ahed for hitim.
Wanfala helicopter hem kam, bat hem no savve land bikos building hia no strong. Taem hem go bak, Juan Carlos and dadi bilong hem krae and sei gud-bae long each other, from tufala sure bae tufala dae nao. Then tufala helicopter arrive. Wan bae wan, olketa liftimap evriwan antap long ruf for go long sef ples. Taem olketa helicopter go bak, datfala building hem foldaon go insaed wata. Olketa ranawe long barava taem!
Olketa muvimaot planti thousand pipol—thru long olketa smol aeroplane, road, and ship bilong army wea savve land long sandbis. Longfala laen bilong pipol—samfala karem pikinini long shoulder—hol followim rope thru long sea for go long olketa boat. Samfala fit for tekem tu-thri samting bilong olketa bat planti garem nomoa kaleko wea olketa werem.
Relief Waka
Long Venezuela branch office bilong Olketa Jehovah’s Witness, relief waka start stretawe taem olketa herem nius abaotem datfala disaster. Bat, olketa road fulap witim rabis or wata aotem olketa nao. Bihaen tu-thri day, haf road hem open for emergency, and olketa letem olketa Witness trak wea karem olketa medical supply and olketa wakman for go thru. Wanfala bigman hem sei olsem bihaen: “Gavman hem luksavve Olketa Jehovah’s Witness nao samfala long olketa first wan for arrive witim help and for tekem pipol aot from datfala area.”
Olketa Witness organizem samfala for faendem olketa wea needim help. Olketa arrangem transport for tekem pipol go long Caracas, wea planti arrive long there witim no eniting. Olketa markem samfala kolekson ples long datfala taon mekem olketa savve givimaot kaikai, kaleko, and medicine long pipol wea needim. Bat planti long olketa needim moa samting winim kaikai and kaleko. Olketa barava needim wanfala ples for stap. Olketa Christian brata willing for olketa hia stap long haos bilong olketa.
Nomata longfala taem bihaen long disaster, olketa fren and relative bilong samfala still stap witim olketa. Joel and Elsa, tufala Witness long Puerto Cabello, stap insaed wanfala smol flat. Wanfala month bihaen long cyclone, 16-fala pipol still stap witim tufala. Planti no lusim haos bilong olketa nomoa bat waka bilong olketa tu. Ples wea olketa waka hem no stap nao.
Sorre samting, olketa resort and taon saed long sea barava distroe nao. Samfala trak smol haf nomoa showaot long mud, and olketa narawan pas long olketa wall, post, or long olketa door or window. Mud wea kamap hard—kasem 3 meter deep long samfala ples—mekem olketa road barava hae so man wea wakabaot, hem long sem levol witim ruf bilong olketa building!
Samfala long Venezuela sei datfala disaster teachim olketa wanfala gud leson—for no putim trust bilong olketa long material samting. (Luke 12:29-31) Planti start for tinghae long disfala kaonsel bilong Jesus Christ: “No go ahed for hipimap for iufala seleva olketa riches long earth, wea moth and rasta savve kaikaim, and wea olketa man for steal savve brekem and kam insaed and stealim. Bat, hipimap for iufala seleva olketa riches long heven, wea no eni moth or rasta savve kaikaim, and wea olketa man for steal no savve brekem and kam insaed and stealim. Bikos long ples wea olketa riches bilong iufala hem stap, long there nao heart bilong iufala bae stap tu.”—Matthew 6:19-21.
[Map/Piksa long page 22, 23]
(Lukim pablikeson for olketa nara information)
VENEZUELA
Caracas
Disaster area
COLOMBIA
[Piksa long page 23]
Rubén Serrano, witim samting wea stap yet long haos bilong hem
[Olketa piksa long page 24]
1. Olketa volunteer hipimap olketa relief supply long Caracas
2, 3. Maiquetía Kongregeson aotem mud wea hard wea winim tu meter deep from Kingdom Hall bilong olketa
4. Olketa Witness hia lusim haos bilong olketa and then volunteer for buildim olketa niu wan for olketa seleva and narawan
5. Wanfala haos wea klosap finis long San Sebastián de los Reyes