DEAL WITIM WEI WEA PRICE BLO EVRITING GO AP
Kaen lo Narawan
If iu stragol witim wei wea price blo evriting hem go ap, maet iu feel dat hem no isi for kaen lo narawan. Nomata olsem, wei for kaen lo narawan savve helpem iu for deal witim olketa economic problem. Iu savve sevem selen and lo semtaem kaen lo narawan.
WHY DATWAN IMPORTANT
Wei for kaen, nomata for givim smol samting savve mekem iumi hapi and feel gud abaotem iumiseleva. Hem tru, samfala research storyim dat wei for give savve helpem physical and mentol health blo iumi. For example, hem savve reducim stress, blood pressure, and pain. And tu, hem savve impruvim sleep.
Taem iumi give lo olketa narawan, maet saed lo selen or eni nara samting, datwan savve mekem hem isi for iumi acceptim help from olketa narawan taem iumi needim. Howard, wea stap lo England, sei: “Taem mitufala waef blo mi lukaotem chance for kaen and helpem olketa narawan, mitufala no feel shame taem hem turn blo mitufala for kasem help.” Hem tru, pipol wea barava kaen no expectim for kasem bak samting. Bat gud samting wea olketa savve kasem hem for garem olketa tru fren wea willing for helpem olketa lo taem wea olketa needim.
WAT IU SAVVE DUIM
Sharem wat iu garem. If iu no garem staka samting, iu still savve give lo narawan, nomata lelebet kaikai. Duncan and famili blo hem wea stap lo Uganda, olketa poor, bat still olketa garem wei for kaen lo narawan. Duncan sei: “Lo olketa Sunday, mitufala waef blo mi savve kukim lelebet kaikai and invaetem samwan for kam lo haos. Mifala enjoyim wei for spendem taem tugeta witim olketa narawan.”
Hem tru, nomata iu give lo olketa narawan, iu mas reasonable tu. Iu no laek for give gogo iu and famili no garem samting nao.—Job 17:5.
Traem diswan: Givim lelebet kaikai or maet wata for samwan. If iu garem olketa samting wea iu no iusim nao, hem gud for iu givim for frens or neiba blo iu wea maet needim and bae tinghae lo datwan.
Give lo olketa nara wei. Samfala lo olketa best present wea iu savve givim hem no kostim eni selen. For example, iumi savve givim taem and duim olketa gud samting for helpem olketa narawan. Kaenfala toktok tu hem wanfala present! So talem olketa narawan dat iu barava tinghae and lovem olketa.
Traem diswan: Helpem olketa narawan for duim samfala waka, repairim haos, or duim shopping for olketa. Raetem wanfala card or sendem text message lo wanfala fren, even for just talem dat iu tingim hem.
Taem iu lukaotem chance for kaen lo narawan, iu openem door for kasem staka reward.